Read Roman Urdu Geo marqus 7 Bible Online

marqus 7 - Roman Urdu Geo bible

marqus 7

¹ek din farīsī aur sharīat ke kuchh ālim yarūshalam se īsā se milne āe.

²jab wuh wahāṅ the to unhoṅ ne dekhā ki us ke kuchh shāgird apne hāth pāk-sāf kie baġhair yānī dhoe baġhair khānā khā rahe haiṅ.

³(kyūṅki yahūdī aur ḳhāskar farīsī firqe ke log is muāmale meṅ apne bāpdādā kī riwāyat ko mānte haiṅ. wuh apne hāth achchhī tarah dhoe baġhair khānā nahīṅ khāte.

⁴isī tarah jab wuh kabhī bāzār se āte haiṅ to wuh ġhusl karke hī khānā khāte haiṅ. wuh bahut sī aur riwāyatoṅ par bhī amal karte haiṅ, masalan kap, jag aur ketlī ko dho kar pāk-sāf karne kī rasm par.)

⁵chunāṅche farīsiyoṅ aur sharīat ke ālimoṅ ne īsā se pūchhā, “āp ke shāgird bāpdādā kī riwāyatoṅ ke mutābiq zindagī kyūṅ nahīṅ guzārte balki roṭī bhī hāth pāk-sāf kie baġhair khāte haiṅ?”

⁶īsā ne jawāb diyā, “yasāyāh nabī ne tum riyākāroṅ ke bāre meṅ ṭhīk kahā jab us ne yih nabuwwat kī, ‘yih qaum apne hoṅṭoṅ se to merā ehtirām kartī hai lekin us kā dil mujh se dūr hai.

⁷wuh merī parastish karte to haiṅ, lekin befāidā. kyūṅki wuh sirf insān hī ke ahkām sikhāte haiṅ.’

⁸tum allāh ke ahkām ko chhoṛ kar insānī riwāyāt kī pairawī karte ho.”

⁹īsā ne apnī bāt jārī rakhī, “tum kitne salīqe se allāh kā hukm mansūḳh karte ho tāki apnī riwāyāt ko qāim rakh sako.

¹⁰masalan mūsā ne farmāyā, ‘apne bāp aur apnī māṅ kī izzat karnā’ aur ‘jo apne bāp yā māṅ par lānat kare use sazā-e-maut dī jāe.’

¹¹lekin jab koī apne wālidain se kahe, ‘maiṅ āp kī madad nahīṅ kar saktā, kyūṅki maiṅ ne mannat mānī hai ki jo mujhe āp ko denā thā wuh allāh ke lie qurbānī hai’ to tum ise jāiz qarār dete ho.

¹²yūṅ tum use apne māṅ-bāp kī madad karne se rok lete ho.

¹³aur isī tarah tum allāh ke kalām ko apnī us riwāyat se mansūḳh kar lete ho jo tum ne nasl-dar-nasl muntaqil kī hai. tum is qism kī bahut sī harkateṅ karte ho.”

¹⁴phir īsā ne dubārā hujūm ko apne pās bulāyā aur kahā, “sab merī bāt suno aur ise samajhne kī koshish karo.

¹⁵koī aisī chīz hai nahīṅ jo insān meṅ dāḳhil ho kar use nāpāk kar sake, balki jo kuchh insān ke andar se nikaltā hai wuhī use nāpāk kar detā hai.”

¹⁶[agar koī sun saktā hai to wuh sun le.]

¹⁷phir wuh hujūm ko chhoṛ kar kisī ghar meṅ dāḳhil huā. wahāṅ us ke shāgirdoṅ ne pūchhā, “is tamsīl kā kyā matlab hai?”

¹⁸us ne kahā, “kyā tum bhī itne nāsamajh ho? kyā tum nahīṅ samajhte ki jo kuchh bāhar se insān meṅ dāḳhil hotā hai wuh use nāpāk nahīṅ kar saktā?

¹⁹wuh to us ke dil meṅ nahīṅ jātā balki us ke mede meṅ aur wahāṅ se nikal kar jā-e-zarūrat meṅ.” (yih kah kar īsā ne har qism kā khānā pāk-sāf qarār diyā.)

²⁰us ne yih bhī kahā, “jo kuchh insān ke andar se nikaltā hai wuhī use nāpāk kartā hai.

²¹kyūṅki logoṅ ke andar se, un ke diloṅ hī se bure ḳhayālāt, harāmkārī, chorī, qatl-o-ġhārat,

²²zinākārī, lālach, badkārī, dhokā, shahwatparastī, hasad, buhtān, ġhurūr aur hamāqat nikalte haiṅ.

²³yih tamām burāiyāṅ andar hī se nikal kar insān ko nāpāk kar detī haiṅ.”

²⁴phir īsā galīl se rawānā ho kar shimāl meṅ sūr ke ilāqe meṅ āyā. wahāṅ wuh kisī ghar meṅ dāḳhil huā. wuh nahīṅ chāhtā thā ki kisī ko patā chale, lekin wuh poshīdā na rah sakā.

²⁵fauran ek aurat us ke pās āī jis ne us ke bāre meṅ sun rakhā thā. wuh us ke pāoṅ meṅ gir gaī. us kī chhoṭī beṭī kisī nāpāk rūh ke qabze meṅ thī,

²⁶aur us ne īsā se guzārish kī, “badrūh ko merī beṭī meṅ se nikāl deṅ.” lekin wuh aurat yūnānī thī aur sūrufenīke ke ilāqe meṅ paidā huī thī,

²⁷is lie īsā ne use batāyā, “pahle bachchoṅ ko jī bhar kar khāne de, kyūṅki yih munāsib nahīṅ ki bachchoṅ se khānā le kar kuttoṅ ke sāmne phaiṅk diyā jāe.”

²⁸us ne jawāb diyā, “jī ḳhudāwand, lekin mez ke nīche ke kutte bhī bachchoṅ ke gire hue ṭukṛe khāte haiṅ.”

²⁹īsā ne kahā, “tū ne achchhā jawāb diyā, is lie jā, badrūh terī beṭī meṅ se nikal gaī hai.”

³⁰aurat apne ghar wāpas chalī gaī to dekhā ki laṛkī bistar par paṛī hai aur badrūh us meṅ se nikal chukī hai.

³¹jab īsā sūr se rawānā huā to wuh pahle shimāl meṅ wāqe shahr saidā ko chalā gayā. phir wahāṅ se bhī fāriġh ho kar wuh dubārā galīl kī jhīl ke kināre wāqe dikapulis ke ilāqe meṅ pahuṅch gayā.

³²wahāṅ us ke pās ek bahrā ādmī lāyā gayā jo mushkil hī se bol saktā thā. unhoṅ ne minnat kī ki wuh apnā hāth us par rakhe.

³³īsā use hujūm se dūr le gayā. us ne apnī ungliyāṅ us ke kānoṅ meṅ ḍālīṅ aur thūk kar ādmī kī zabān ko chhuā.

³⁴phir āsmān kī taraf nazar uṭhā kar us ne āh bharī aur us se kahā, “iffatah!” (is kā matlab hai “khul jā!”)

³⁵fauran ādmī ke kān khul gae. zabān kā bandhan ṭūṭ gayā aur wuh ṭhīk ṭhīk bolne lagā.

³⁶īsā ne hāzirīn ko hukm diyā ki wuh kisī ko yih bāt na batāeṅ. lekin jitnā wuh manā kartā thā utnā hī log is kī ḳhabar phailāte the.

³⁷wuh nihāyat hī hairān hue aur kahne lage, “is ne sab kuchh achchhā kiyā hai, yih bahroṅ ko sunane kī tāqat detā hai aur gūṅgoṅ ko bolne kī.”