Read Roman Urdu Geo lūqā 1 Bible Online

lūqā 1 - Roman Urdu Geo bible

lūqā 1

¹muhtaram thiyufilus, bahut se log wuh sab kuchh likh chuke haiṅ jo hamāre darmiyān wāqe huā hai.

²un kī koshish yih thī ki wuhī kuchh bayān kiyā jāe jis kī gawāhī wuh dete haiṅ jo shurū hī se sāth the aur āj tak allāh kā kalām sunāne kī ḳhidmat saranjām de rahe haiṅ.

³maiṅ ne bhī har mumkin koshish kī hai ki sab kuchh shurū se aur ain haqīqat ke mutābiq mālūm karūṅ. ab maiṅ yih bāteṅ tartīb se āp ke lie likhnā chāhtā hūṅ.

⁴āp yih paṛh kar jān leṅge ki jo bāteṅ āp ko sikhāī gaī haiṅ wuh sach aur durust haiṅ.

⁵yahūdiyā ke bādshāh herodes ke zamāne meṅ ek imām thā jis kā nām zakariyāh thā. bait-ul-muqaddas meṅ imāmoṅ ke muḳhtalif guroh ḳhidmat saranjām dete the, aur zakariyāh kā tālluq abiyāh ke guroh se thā. us kī bīwī imām-e-āzam hārūn kī nasl se thī aur us kā nām ilīshibā thā.

⁶miyāṅ-bīwī allāh ke nazdīk rāstbāz the aur rab ke tamām ahkām aur hidāyāt ke mutābiq be'ilzām zindagī guzārte the.

⁷lekin wuh beaulād the. ilīshibā ke bachche paidā nahīṅ ho sakte the. ab wuh donoṅ būṛhe ho chuke the.

⁸ek din bait-ul-muqaddas maiṅ abiyāh ke guroh kī bārī thī aur zakariyāh allāh ke huzūr apnī ḳhidmat saranjām de rahā thā.

⁹dastūr ke mutābiq unhoṅ ne qur'ā ḍālā tāki mālūm kareṅ ki rab ke maqdis meṅ jā kar baḳhūr kī qurbānī kaun jalāe. zakariyāh ko chunā gayā.

¹⁰jab wuh muqarrarā waqt par baḳhūr jalāne ke lie bait-ul-muqaddas meṅ dāḳhil huā to jamā hone wāle tamām parastār sahan meṅ duā kar rahe the.

¹¹achānak rab kā ek farishtā zāhir huā jo baḳhūr jalāne kī qurbāngāh ke dahnī taraf khaṛā thā.

¹²use dekh kar zakariyāh ghabrāyā aur bahut ḍar gayā.

¹³lekin farishte ne us se kahā, “zakariyāh, mat ḍar! allāh ne terī duā sun lī hai. terī bīwī ilīshibā ke beṭā hogā. us kā nām yahyā rakhnā.

¹⁴wuh na sirf tere lie ḳhushī aur musarrat kā bāis hogā, balki bahut se log us kī paidāish par ḳhushī manāeṅge.

¹⁵kyūṅki wuh rab ke nazdīk azīm hogā. lāzim hai ki wuh mai aur sharāb se parhez kare. wuh paidā hone se pahle hī rūh-ul-quds se māmūr hogā

¹⁶aur isrāīlī qaum meṅ se bahutoṅ ko rab un ke ḳhudā ke pās wāpas lāegā.

¹⁷wuh ilyās kī rūh aur quwwat se ḳhudāwand ke āge āge chalegā. us kī ḳhidmat se wālidoṅ ke dil apne bachchoṅ kī taraf māil ho jāeṅge aur nāfarmān log rāstbāzoṅ kī dānāī kī taraf rujū kareṅge. yūṅ wuh is qaum ko rab ke lie tayyār karegā.”

¹⁸zakariyāh ne farishte se pūchhā, “maiṅ kis tarah jānūṅ ki yih bāt sach hai? maiṅ ḳhud būṛhā hūṅ aur merī bīwī bhī umrrasīdā hai.”

¹⁹farishte ne jawāb diyā, “maiṅ jibrāīl hūṅ jo allāh ke huzūr khaṛā rahtā hūṅ. mujhe isī maqsad ke lie bhejā gayā hai ki tujhe yih ḳhushḳhabrī sunāūṅ.

²⁰lekin chūṅki tū ne merī bāt kā yaqīn nahīṅ kiyā is lie tū ḳhāmosh rahegā aur us waqt tak bol nahīṅ sakegā jab tak tere beṭā paidā na ho. merī yih bāteṅ muqarrarā waqt par hī pūrī hoṅgī.”

²¹is daurān bāhar ke log zakariyāh ke intizār meṅ the. wuh hairān hote jā rahe the ki use wāpas āne meṅ kyūṅ itnī der ho rahī hai.

²²āḳhirkār wuh bāhar āyā, lekin wuh un se bāt na kar sakā. tab unhoṅ ne jān liyā ki us ne bait-ul-muqaddas meṅ royā dekhī hai. us ne hāthoṅ se ishāre to kie, lekin ḳhāmosh rahā.

²³zakariyāh muqarrarā waqt tak bait-ul-muqaddas meṅ apnī ḳhidmat anjām detā rahā, phir apne ghar wāpas chalā gayā.

²⁴thoṛe dinoṅ ke bād us kī bīwī ilīshibā hāmilā ho gaī aur wuh pāṅch māh tak ghar meṅ chhupī rahī.

²⁵us ne kahā, “ḳhudāwand ne mere lie kitnā baṛā kām kiyā hai, kyūṅki ab us ne merī fikr kī aur logoṅ ke sāmne se merī ruswāī dūr kar dī.”

²⁶ilīshibā chhih māh se ummīd se thī jab allāh ne jibrāīl farishte ko ek kuṅwārī ke pās bhejā jo nāsarat meṅ rahtī thī. nāsarat galīl kā ek shahr hai aur kuṅwārī kā nām mariyam thā. us kī mangnī ek mard ke sāth ho chukī thī jo dāūd bādshāh kī nasl se thā aur jis kā nām yūsuf thā.

²⁷

²⁸farishte ne us ke pās ā kar kahā, “ai ḳhātūn jis par rab kā ḳhās fazl huā hai, salām! rab tere sāth hai.”

²⁹mariyam yih sun kar ghabrā gaī aur sochā, “yih kis tarah kā salām hai?”

³⁰lekin farishte ne apnī bāt jārī rakhī aur kahā, “ai mariyam, mat ḍar, kyūṅki tujh par allāh kā fazl huā hai.

³¹tū ummīd se ho kar ek beṭe ko janm degī. tujhe us kā nām īsā (najāt dene wālā) rakhnā hai.

³²wuh azīm hogā aur allāh t'ālā kā farzand kahlāegā. rab hamārā ḳhudā use us ke bāp dāūd ke taḳht par biṭhāegā

³³aur wuh hameshā tak isrāīl par hukūmat karegā. us kī saltanat kabhī ḳhatm na hogī.”

³⁴mariyam ne farishte se kahā, “yih kyūṅkar ho saktā hai? abhī to maiṅ kuṅwārī hūṅ.”

³⁵farishte ne jawāb diyā, “rūh-ul-quds tujh par nāzil hogā, allāh t'ālā kī qudrat kā sāyā tujh par chhā jāegā. is lie yih bachchā quddūs hogā aur allāh kā farzand kahlāegā.

³⁶aur dekh, terī rishtedār ilīshibā ke bhī beṭā hogā hālāṅki wuh umrrasīdā hai. go use bāṅjh qarār diyā gayā thā, lekin wuh chhih māh se ummīd se hai.

³⁷kyūṅki allāh ke nazdīk koī kām nāmumkin nahīṅ hai.”

³⁸mariyam ne jawāb diyā, “maiṅ rab kī ḳhidmat ke lie hāzir hūṅ. mere sāth waisā hī ho jaisā āp ne kahā hai.” is par farishtā chalā gayā.

³⁹un dinoṅ meṅ mariyam yahūdiyā ke pahāṛī ilāqe ke ek shahr ke lie rawānā huī. us ne jaldī jaldī safar kiyā.

⁴⁰wahāṅ pahuṅch kar wuh zakariyāh ke ghar meṅ dāḳhil huī aur ilīshibā ko salām kiyā.

⁴¹mariyam kā yih salām sun kar ilīshibā kā bachchā us ke peṭ meṅ uchhal paṛā aur ilīshibā ḳhud rūh-ul-quds se bhar gaī.

⁴²us ne buland āwāz se kahā, “tū tamām auratoṅ meṅ mubārak hai aur mubārak hai terā bachchā!

⁴³maiṅ kaun hūṅ ki mere ḳhudāwand kī māṅ mere pās āī!

⁴⁴jūṅ hī maiṅ ne terā salām sunā bachchā mere peṭ meṅ ḳhushī se uchhal paṛā.

⁴⁵tū kitnī mubārak hai, kyūṅki tū īmān lāī ki jo kuchh rab ne farmāyā hai wuh takmīl tak pahuṅchegā.”

⁴⁶is par mariyam ne kahā, “merī jān rab kī tāzīm kartī hai

⁴⁷aur merī rūh apne najātdahindā allāh se nihāyat ḳhush hai.

⁴⁸kyūṅki us ne apnī ḳhādimā kī pastī par nazar kī hai. hāṅ, ab se tamām nasleṅ mujhe mubārak kaheṅgī,

⁴⁹kyūṅki qādir-e-mutlaq ne mere lie baṛe baṛe kām kie haiṅ. us kā nām quddūs hai.

⁵⁰jo us kā ḳhauf mānte haiṅ un par wuh pusht-dar-pusht apnī rahmat zāhir karegā.

⁵¹us kī qudrat ne azīm kām kar dikhāe haiṅ, aur dil se maġhrūr log titar-bitar ho gae haiṅ.

⁵²us ne hukmrānoṅ ko un ke taḳht se haṭā kar pasthāl logoṅ ko sarfarāz kar diyā hai.

⁵³bhūkoṅ ko us ne achchhī chīzoṅ se mālāmāl karke amīroṅ ko ḳhālī hāth lauṭā diyā hai.

⁵⁴wuh apne ḳhādim isrāīl kī madad ke lie ā gayā hai. hāṅ, us ne apnī rahmat ko yād kiyā hai,

⁵⁵yānī wuh dāimī wādā jo us ne hamāre buzurgoṅ ke sāth kiyā thā, ibrāhīm aur us kī aulād ke sāth.”

⁵⁶mariyam taqrīban tīn māh ilīshibā ke hāṅ ṭhahrī rahī, phir apne ghar lauṭ gaī.

⁵⁷phir ilīshibā kā bachche ko janm dene kā din ā pahuṅchā aur us ke beṭā huā.

⁵⁸jab us ke hamsāyoṅ aur rishtedāroṅ ko ittilā milī ki rab kī us par kitnī baṛī rahmat huī hai to unhoṅ ne us ke sāth ḳhushī manāī.

⁵⁹jab bachchā āṭh din kā thā to wuh us kā ḳhatnā karwāne kī rasm ke lie āe. wuh bachche kā nām us ke bāp ke nām par zakariyāh rakhnā chāhte the,

⁶⁰lekin us kī māṅ ne etirāz kiyā. us ne kahā, “nahīṅ, us kā nām yahyā ho.”

⁶¹unhoṅ ne kahā, “āp ke rishtedāroṅ meṅ to aisā nām kahīṅ bhī nahīṅ pāyā jātā.”

⁶²tab unhoṅ ne ishāroṅ se bachche ke bāp se pūchhā ki wuh kyā nām rakhnā chāhtā hai.

⁶³jawāb meṅ zakariyāh ne taḳhtī mangwā kar us par likhā, “is kā nām yahyā hai.” yih dekh kar sab hairān hue.

⁶⁴usī lamhe zakariyāh dubārā bolne ke qābil ho gayā, aur wuh allāh kī tamjīd karne lagā.

⁶⁵tamām hamsāyoṅ par ḳhauf chhā gayā aur is bāt kā charchā yahūdiyā ke pūre ilāqe meṅ phail gayā.

⁶⁶jis ne bhī sunā us ne sanjīdagī se is par ġhaur kiyā aur sochā, “is bachche kā kyā banegā?” kyūṅki rab kī qudrat us ke sāth thī.

⁶⁷us kā bāp zakariyāh rūh-ul-quds se māmūr ho gayā aur nabuwwat karke kahā,

⁶⁸“rab isrāīl ke allāh kī tamjīd ho! kyūṅki wuh apnī qaum kī madad ke lie āyā hai, us ne fidyā de kar use chhuṛāyā hai.

⁶⁹us ne apne ḳhādim dāūd ke gharāne meṅ hamāre lie ek azīm najātdahindā khaṛā kiyā hai.

⁷⁰aisā hī huā jis tarah us ne qadīm zamānoṅ meṅ apne muqaddas nabiyoṅ kī mārifat farmāyā thā,

⁷¹ki wuh hameṅ hamāre dushmanoṅ se najāt dilāegā, un sab ke hāth se jo ham se nafrat rakhte haiṅ.

⁷²kyūṅki us ne farmāyā thā ki wuh hamāre bāpdādā par rahm karegā

⁷³aur apne muqaddas ahd ko yād rakhegā, us wāde ko jo us ne qasam khā kar ibrāhīm ke sāth kiyā thā.

⁷⁴ab us kā yih wādā pūrā ho jāegā: ham apne dushmanoṅ se maḳhlasī pā kar ḳhauf ke baġhair allāh kī ḳhidmat kar sakeṅge,

⁷⁵jīte jī us ke huzūr muqaddas aur rāst zindagī guzār sakeṅge.

⁷⁶aur tū, mere bachche, allāh t'ālā kā nabī kahlāegā. kyūṅki tū ḳhudāwand ke āge āge us ke rāste tayyār karegā.

⁷⁷tū us kī qaum ko najāt kā rāstā dikhāegā, ki wuh kis tarah apne gunāhoṅ kī muāfī pāegī.

⁷⁸hamāre allāh kī baṛī rahmat kī wajah se ham par ilāhī nūr chamkegā.

⁷⁹us kī raushnī un par phail jāegī jo andhere aur maut ke sāy meṅ baiṭhe haiṅ, hāṅ wuh hamāre qadmoṅ ko salāmatī kī rāh par pahuṅchāegī.”

⁸⁰yahyā parwān chaṛhā aur us kī rūh ne taqwiyat pāī. us ne us waqt tak registān meṅ zindagī guzārī jab tak use isrāīl kī ḳhidmat karne ke lie bulāyā na gayā.