Read Roman Urdu Geo lūqā 10 Bible Online

lūqā 10 - Roman Urdu Geo bible

lūqā 10

¹is ke bād ḳhudāwand ne mazīd 72 shāgirdoṅ ko muqarrar kiyā aur unheṅ do do karke apne āge har us shahr aur jagah bhej diyā jahāṅ wuh abhī jāne ko thā.

²us ne un se kahā, “fasal bahut hai, lekin mazdūr thoṛe. is lie fasal ke mālik se darḳhwāst karo ki wuh fasal kāṭne ke lie mazīd mazdūr bhej de.

³ab rawānā ho jāo, lekin zahan meṅ yih bāt rakho ki tum bheṛ ke bachchoṅ kī mānind ho jinheṅ maiṅ bheṛiyoṅ ke darmiyān bhej rahā hūṅ.

⁴apne sāth na baṭwā le jānā, na sāmān ke lie baig, na jūte. aur rāste meṅ kisī ko bhī salām na karnā.

⁵jab bhī tum kisī ke ghar meṅ dāḳhil ho to pahle yih kahnā, ‘is ghar kī salāmatī ho.’

⁶agar us meṅ salāmatī kā koī bandā hogā to tumhārī barkat us par ṭhahregī, warnā wuh tum par lauṭ āegī.

⁷salāmatī ke aise ghar meṅ ṭhahro aur wuh kuchh khāo piyo jo tum ko diyā jāe, kyūṅki mazdūr apnī mazdūrī kā haqdār hai. muḳhtalif gharoṅ meṅ ghūmte na phiro balki ek hī ghar meṅ raho.

⁸jab bhī tum kisī shahr meṅ dāḳhil ho aur log tum ko qabūl kareṅ to jo kuchh wuh tum ko khāne ko deṅ use khāo.

⁹wahāṅ ke marīzoṅ ko shifā de kar batāo ki allāh kī bādshāhī qarīb ā gaī hai.

¹⁰lekin agar tum kisī shahr meṅ jāo aur log tum ko qabūl na kareṅ to phir shahr kī saṛakoṅ par khaṛe ho kar kaho,

¹¹‘ham apne jūtoṅ se tumhāre shahr kī gard bhī jhāṛ dete haiṅ. yūṅ ham tumhāre ḳhilāf gawāhī dete haiṅ. lekin yih jān lo ki allāh kī bādshāhī qarīb ā gaī hai.’

¹²maiṅ tum ko batātā hūṅ ki us din us shahr kī nisbat sadūm kā hāl zyādā qābil-e-bardāsht hogā.

¹³ai ḳhurāzīn, tujh par afsos! bait-saidā, tujh par afsos! agar sūr aur saidā meṅ wuh mojize kie gae hote jo tum meṅ hue to wahāṅ ke log kab ke ṭāṭ oṛh kar aur sar par rākh ḍāl kar taubā kar chuke hote.

¹⁴jī hāṅ, adālat ke din tumhārī nisbat sūr aur saidā kā hāl zyādā qābil-e-bardāsht hogā.

¹⁵aur tū ai kafarnahūm, kyā tujhe āsmān tak sarfarāz kiyā jāegā? hargiz nahīṅ, balki tū utartā utartā pātāl tak pahuṅchegā.

¹⁶jis ne tumhārī sunī us ne merī bhī sunī. aur jis ne tum ko radd kiyā us ne mujhe bhī radd kiyā. aur mujhe radd karne wāle ne use bhī radd kiyā jis ne mujhe bhejā hai.”

¹⁷72 shāgird lauṭ āe. wuh bahut ḳhush the aur kahne lage, “ḳhudāwand, jab ham āp kā nām lete haiṅ to badrūheṅ bhī hamāre tābe ho jātī haiṅ.”

¹⁸īsā ne jawāb diyā, “iblīs mujhe nazar āyā aur wuh bijlī kī tarah āsmān se gir rahā thā.

¹⁹dekho, maiṅ ne tum ko sāṅpoṅ aur bichchhū'oṅ par chalne kā iḳhtiyār diyā hai. tum ko dushman kī pūrī tāqat par iḳhtiyār hāsil hai. kuchh bhī tum ko nuqsān nahīṅ pahuṅchā sakegā.

²⁰lekin is wajah se ḳhushī na manāo ki badrūheṅ tumhāre tābe haiṅ, balki is wajah se ki tumhāre nām āsmān par darj kie gae haiṅ.”

²¹usī waqt īsā rūh-ul-quds meṅ ḳhushī manāne lagā. us ne kahā, “ai bāp, āsmān-o-zamīn ke mālik! maiṅ terī tamjīd kartā hūṅ ki tū ne yih bāt dānāoṅ aur aqalmandoṅ se chhupā kar chhoṭe bachchoṅ par zāhir kar dī hai. hāṅ mere bāp, kyūṅki yihī tujhe pasand āyā.

²²mere bāp ne sab kuchh mere sapurd kar diyā hai. koī nahīṅ jāntā ki farzand kaun hai siwāe bāp ke. aur koī nahīṅ jāntā ki bāp kaun hai siwāe farzand ke aur un logoṅ ke jin par farzand yih zāhir karnā chāhtā hai.”

²³phir īsā shāgirdoṅ kī taraf muṛā aur alāhidagī meṅ un se kahne lagā, “mubārak haiṅ wuh āṅkheṅ jo wuh kuchh deḳhtī haiṅ jo tum ne dekhā hai.

²⁴maiṅ tum ko batātā hūṅ ki bahut se nabī aur bādshāh yih deḳhnā chāhte the jo tum deḳhte ho, lekin unhoṅ ne na dekhā. aur wuh yih sunane ke ārzūmand the jo tum sunte ho, lekin unhoṅ ne na sunā.”

²⁵ek mauqe par sharīat kā ek ālim īsā ko phaṅsāne kī ḳhātir khaṛā huā. us ne pūchhā, “ustād, maiṅ kyā kyā karne se mīrās meṅ abadī zindagī pā saktā hūṅ?”

²⁶īsā ne us se kahā, “sharīat meṅ kyā likhā hai? tū us meṅ kyā paṛhtā hai?”

²⁷ādmī ne jawāb diyā, “‘rab apne ḳhudā se apne pūre dil, apnī pūrī jān, apnī pūrī tāqat aur apne pūre zahan se pyār karnā.’ aur ‘apne paṛosī se waisī muhabbat rakhnā jaisī tū apne āp se rakhtā hai’.”

²⁸īsā ne kahā, “tū ne ṭhīk jawāb diyā. aisā hī kar to zindā rahegā.”

²⁹lekin ālim ne apne āp ko durust sābit karne kī ġharz se pūchhā, “to merā paṛosī kaun hai?”

³⁰īsā ne jawāb meṅ kahā, “ek ādmī yarūshalam se yarīhū kī taraf jā rahā thā ki wuh ḍākuoṅ ke hāthoṅ meṅ paṛ gayā. unhoṅ ne us ke kapṛe utār kar use ḳhūb mārā aur adhmuā chhoṛ kar chale gae.

³¹ittifāq se ek imām bhī usī rāste par yarīhū kī taraf chal rahā thā. lekin jab us ne zaḳhmī ādmī ko dekhā to rāste kī parlī taraf ho kar āge nikal gayā.

³²lāwī qabīle kā ek ḳhādim bhī wahāṅ se guzarā. lekin wuh bhī rāste kī parlī taraf se āge nikal gayā.

³³phir sāmariyya kā ek musāfir wahāṅ se guzarā. jab us ne zaḳhmī ādmī ko dekhā to use us par tars āyā.

³⁴wuh us ke pās gayā aur us ke zaḳhmoṅ par tel aur mai lagā kar un par paṭṭiyāṅ bāndh dīṅ. phir us ko apne gadhe par biṭhā kar sarāy tak le gayā. wahāṅ us ne us kī mazīd dekh-bhāl kī.

³⁵agle din us ne chāṅdī ke do sikke nikāl kar sarāy ke mālik ko die aur kahā, ‘is kī dekh-bhāl karnā. agar ḳharchā is se baṛh kar huā to maiṅ wāpasī par adā kar dūṅgā’.”

³⁶phir īsā ne pūchhā, “ab terā kyā ḳhayāl hai, ḍākuoṅ kī zad meṅ āne wāle ādmī kā paṛosī kaun thā? imām, lāwī yā sāmarī?”

³⁷ālim ne jawāb diyā, “wuh jis ne us par rahm kiyā.” īsā ne kahā, “bilkul ṭhīk. ab tū bhī jā kar aisā hī kar.”

³⁸phir īsā shāgirdoṅ ke sāth āge niklā. chalte chalte wuh ek gāoṅ meṅ pahuṅchā. wahāṅ kī ek aurat banām marthā ne use apne ghar meṅ ḳhushāmdīd kahā.

³⁹marthā kī ek bahan thī jis kā nām mariyam thā. wuh ḳhudāwand ke pāoṅ meṅ baiṭh kar us kī bāteṅ sunane lagī

⁴⁰jabki marthā mehmānoṅ kī ḳhidmat karte karte thak gaī. āḳhirkār wuh īsā ke pās ā kar kahne lagī, “ḳhudāwand, kyā āp ko parwā nahīṅ ki merī bahan ne mehmānoṅ kī ḳhidmat kā pūrā intizām mujh par chhoṛ diyā hai? us se kaheṅ ki wuh merī madad kare.”

⁴¹lekin ḳhudāwand īsā ne jawāb meṅ kahā, “marthā, marthā, tū bahut sī fikroṅ aur pareshāniyoṅ meṅ paṛ gaī hai.

⁴²lekin ek bāt zarūrī hai. mariyam ne behtar hissā chun liyā hai aur yih us se chhīnā nahīṅ jāegā.”