Read Roman Urdu Geo lūqā 11 Bible Online

lūqā 11 - Roman Urdu Geo bible

lūqā 11

¹ek din īsā kahīṅ duā kar rahā thā. jab wuh fāriġh huā to us ke kisī shāgird ne kahā, “ḳhudāwand, hameṅ duā karnā sikhāeṅ, jis tarah yahyā ne bhī apne shāgirdoṅ ko duā karne kī tālīm dī.”

²īsā ne kahā, “duā karte waqt yūṅ kahnā, ai bāp, terā nām muqaddas mānā jāe. terī bādshāhī āe.

³har roz hameṅ hamārī roz kī roṭī de.

⁴hamāre gunāhoṅ ko muāf kar. kyūṅki ham bhī har ek ko muāf karte haiṅ jo hamārā gunāh kartā hai. [2] aur hameṅ āzmāish meṅ na paṛne de.”

⁵phir us ne un se kahā, “agar tum meṅ se koī ādhī rāt ke waqt apne dost ke ghar jā kar kahe, ‘bhāī, mujhe tīn roṭiyāṅ de, bād meṅ maiṅ yih wāpas kar dūṅgā.

⁶kyūṅki merā dost safar karke mere pās āyā hai aur maiṅ use khāne ke lie kuchh nahīṅ de saktā.’

⁷ab farz karo ki yih dost andar se jawāb de, ‘mehrbānī karke mujhe tang na kar. darwāze par tālā lagā hai aur mere bachche mere sāth bistar par haiṅ, is lie maiṅ tujhe dene ke lie uṭh nahīṅ saktā.’

⁸lekin maiṅ tum ko yih batātā hūṅ ki agar wuh dostī kī ḳhātir na bhī uṭhe, to bhī wuh apne dost ke bejā isrār kī wajah se us kī tamām zarūrat pūrī karegā.

⁹chunāṅche māṅgte raho to tum ko diyā jāegā, ḍhūṅḍte raho to tum ko mil jāegā. khaṭkhaṭāte raho to tumhāre lie darwāzā khol diyā jāegā.

¹⁰kyūṅki jo bhī māṅgtā hai wuh pātā hai, jo ḍhūṅḍtā hai use miltā hai aur jo khaṭkhaṭātā hai us ke lie darwāzā khol diyā jātā hai.

¹¹tum bāpoṅ meṅ se kaun apne beṭe ko sāṅp degā agar wuh machhlī māṅge?

¹²yā kaun use bichchhū degā agar wuh anḍā māṅge? koī nahīṅ!

¹³jab tum bure hone ke bāwujūd itne samajhdār ho ki apne bachchoṅ ko achchhī chīzeṅ de sakte ho to phir kitnī zyādā yaqīnī bāt hai ki āsmānī bāp apne māṅgne wāloṅ ko rūh-ul-quds degā.”

¹⁴ek din īsā ne ek aisī badrūh nikāl dī jo gūṅgī thī. jab wuh gūṅge ādmī meṅ se niklī to wuh bolne lagā. wahāṅ par jamā log hakkā-bakkā rah gae.

¹⁵lekin bāz ne kahā, “yih to badrūhoṅ ke sardār bāl-zabūl kī madad se badrūhoṅ ko nikāltā hai.”

¹⁶auroṅ ne use āzmāne ke lie kisī ilāhī nishān kā mutālabā kiyā.

¹⁷lekin īsā ne un ke ḳhayālāt jān kar kahā, “jis bādshāhī meṅ bhī phūṭ paṛ jāe wuh tabāh ho jāegī, aur jis gharāne kī aisī hālat ho wuh bhī ḳhāk meṅ mil jāegā.

¹⁸tum kahte ho ki maiṅ bāl-zabūl kī madad se badrūhoṅ ko nikāltā hūṅ. lekin agar iblīs meṅ phūṭ paṛ gaī hai to phir us kī bādshāhī kis tarah qāim rah saktī hai?

¹⁹dūsrā sawāl yih hai, agar maiṅ bāl-zabūl kī madad se badrūhoṅ ko nikāltā hūṅ to tumhāre beṭe unheṅ kis ke zarī'e nikālte haiṅ? chunāṅche wuhī is bāt meṅ tumhāre munsif hoṅge.

²⁰lekin agar maiṅ allāh kī qudrat se badrūhoṅ ko nikāltā hūṅ to phir allāh kī bādshāhī tumhāre pās pahuṅch chukī hai.

²¹jab tak koī zor-āwar ādmī hathiyāroṅ se les apne ḍere kī pahrādārī kare us waqt tak us kī milkiyat mahfūz rahtī hai.

²²lekin agar koī zyādā tāqatwar shaḳhs hamlā karke us par ġhālib āe to wuh us ke aslāh par qabzā karegā jis par us kā bharosā thā, aur lūṭā huā māl apne logoṅ meṅ taqsīm kar degā.

²³jo mere sāth nahīṅ wuh mere ḳhilāf hai aur jo mere sāth jamā nahīṅ kartā wuh bikhertā hai.

²⁴jab koī badrūh kisī shaḳhs meṅ se nikaltī hai to wuh wīrān ilāqoṅ meṅ se guzartī huī ārām kī jagah talāsh kartī hai. lekin jab use koī aisā maqām nahīṅ miltā to wuh kahtī hai, ‘maiṅ apne us ghar meṅ wāpas chalī jāūṅgī jis meṅ se niklī thī.’

²⁵wuh wāpas ā kar deḳhtī hai ki kisī ne jhāṛū de kar sab kuchh salīqe se rakh diyā hai.

²⁶phir wuh jā kar sāt aur badrūheṅ ḍhūnḍ lātī hai jo us se badtar hotī haiṅ, aur wuh sab us shaḳhs meṅ ghus kar rahne lagtī haiṅ. chunāṅche ab us ādmī kī hālat pahle kī nisbat zyādā burī ho jātī hai.”

²⁷īsā abhī yih bāt kar hī rahā thā ki ek aurat ne ūṅchī āwāz se kahā, “āp kī māṅ mubārak hai jis ne āp ko janm diyā aur āp ko dūdh pilāyā.”

²⁸lekin īsā ne jawāb diyā, “bāt yih nahīṅ hai. haqīqat meṅ wuh mubārak haiṅ jo allāh kā kalām sun kar us par amal karte haiṅ.”

²⁹sunane wāloṅ kī tādād bahut baṛh gaī to wuh kahne lagā, “yih nasl sharīr hai, kyūṅki yih mujh se ilāhī nishān kā taqāzā kartī hai. lekin ise koī bhī ilāhī nishān pesh nahīṅ kiyā jāegā siwāe yūnus ke nishān ke.

³⁰kyūṅki jis tarah yūnus nīnwā shahr ke bāshindoṅ ke lie nishān thā bilkul usī tarah ibn-e-ādam is nasl ke lie nishān hogā.

³¹qiyāmat ke din junūbī mulk sabā kī malikā is nasl ke logoṅ ke sāth khaṛī ho kar unheṅ mujrim qarār degī. kyūṅki wuh dūrdarāz mulk se sulaimān kī hikmat sunane ke lie āī thī jabki yahāṅ wuh hai jo sulaimān se bhī baṛā hai.

³²us din nīnwā ke bāshinde bhī is nasl ke logoṅ ke sāth khaṛe ho kar unheṅ mujrim ṭhahrāeṅge. kyūṅki yūnus ke elān par unhoṅ ne taubā kī thī jabki yahāṅ wuh hai jo yūnus se bhī baṛā hai.

³³jab koī shaḳhs charāġh jalātā hai to na wuh use chhupātā, na bartan ke nīche rakhtā balki use shamādān par rakh detā hai tāki us kī raushnī andar āne wāloṅ ko nazar āe.

³⁴terī āṅkh tere badan kā charāġh hai. agar terī āṅkh ṭhīk ho to terā pūrā jism raushan hogā. lekin agar āṅkh ḳharāb ho to pūrā jism andherā hī andherā hogā.

³⁵ḳhabardār! aisā na ho ki jo raushnī tere andar hai wuh haqīqat meṅ tārīkī ho.

³⁶chunāṅche agar terā pūrā jism raushan ho aur koī bhī hissā tārīk na ho to phir wuh bilkul raushan hogā, aisā jaisā us waqt hotā hai jab charāġh tujhe apne chamakne damakne se raushan kar detā hai.”

³⁷īsā abhī bāt kar rahā thā ki kisī farīsī ne use khāne kī dāwat dī. chunāṅche wuh us ke ghar meṅ jā kar khāne ke lie baiṭh gayā.

³⁸mezbān baṛā hairān huā, kyūṅki us ne dekhā ki īsā hāth dhoe baġhair khāne ke lie baiṭh gayā hai.

³⁹lekin ḳhudāwand ne us se kahā, “dekho, tum farīsī bāhar se har pyāle aur bartan kī safāī karte ho, lekin andar se tum lūṭ-mār aur sharārat se bhare hote ho.

⁴⁰nādāno! allāh ne bāhar wāle hisse ko ḳhalaq kiyā, to kyā us ne andar wāle hisse ko nahīṅ banāyā?

⁴¹chunāṅche jo kuchh bartan ke andar hai use ġharīboṅ ko de do. phir tumhāre lie sab kuchh pāk-sāf hogā.

⁴²farīsiyo, tum par afsos! kyūṅki ek taraf tum paudīnā, sadāb aur bāġh kī har qism kī tarkārī kā daswāṅ hissā allāh ke lie maḳhsūs karte ho, lekin dūsrī taraf tum insāf aur allāh kī muhabbat ko nazarandāz karte ho. lāzim hai ki tum yih kām bhī karo aur pahlā bhī na chhoṛo.

⁴³farīsiyo, tum par afsos! kyūṅki tum ibādatḳhānoṅ kī izzat kī kursiyoṅ par baiṭhne ke lie bechain rahte aur bāzār meṅ logoṅ kā salām sunane ke lie taṛapte ho.

⁴⁴hāṅ, tum par afsos! kyūṅki tum poshīdā qabroṅ kī mānind ho jin par se log nādānistā taur par guzarte haiṅ.”

⁴⁵sharīat ke ek ālim ne etirāz kiyā, “ustād, āp yih kah kar hamārī bhī be'izzatī karte haiṅ.”

⁴⁶īsā ne jawāb diyā, “tum sharīat ke ālimoṅ par bhī afsos! kyūṅki tum logoṅ par bhārī bojh ḍāl dete ho jo mushkil se uṭhāyā jā saktā hai. na sirf yih balki tum ḳhud is bojh ko apnī ek unglī bhī nahīṅ lagāte.

⁴⁷tum par afsos! kyūṅki tum nabiyoṅ ke mazār banā dete ho, un ke jinheṅ tumhāre bāpdādā ne mār ḍālā.

⁴⁸is se tum gawāhī dete ho ki tum wuh kuchh pasand karte ho jo tumhāre bāpdādā ne kiyā. unhoṅ ne nabiyoṅ ko qatl kiyā jabki tum un ke mazār tāmīr karte ho.

⁴⁹is lie allāh kī hikmat ne kahā, ‘maiṅ un meṅ nabī aur rasūl bhej dūṅgī. un meṅ se bāz ko wuh qatl kareṅge aur bāz ko satāeṅge.’

⁵⁰natīje meṅ yih nasl tamām nabiyoṅ ke qatl kī zimmādār ṭhahregī - duniyā kī taḳhlīq se le kar āj tak,

⁵¹yānī hābīl ke qatl se le kar zakariyāh ke qatl tak, jise bait-ul-muqaddas ke sahan meṅ maujūd qurbāngāh aur bait-ul-muqaddas ke darwāze ke darmiyān qatl kiyā gayā. hāṅ, maiṅ tum ko batātā hūṅ ki yih nasl zarūr un kī zimmādār ṭhahregī.

⁵²sharīat ke ālimo, tum par afsos! kyūṅki tum ne ilm kī kunjī ko chhīn liyā hai. na sirf yih ki tum ḳhud dāḳhil nahīṅ hue, balki tum ne dāḳhil hone wāloṅ ko bhī rok liyā.”

⁵³jab īsā wahāṅ se niklā to ālim aur farīsī us ke saḳht muḳhālif ho gae aur baṛe ġhaur se us kī pūchh-gachh karne lage.

⁵⁴wuh is tāk meṅ rahe ki use muṅh se niklī kisī bāt kī wajah se pakaṛeṅ.