Read Roman Urdu Geo lūqā 12 Bible Online

lūqā 12 - Roman Urdu Geo bible

lūqā 12

¹itne meṅ kaī hazār log jamā ho gae the. baṛī tādād kī wajah se wuh ek dūsre par gire paṛte the. phir īsā apne shāgirdoṅ se yih bāt karne lagā, “farīsiyoṅ ke ḳhamīr yānī riyākārī se ḳhabardār!

²jo kuchh bhī abhī chhupā huā hai use āḳhir meṅ zāhir kiyā jāegā aur jo kuchh bhī is waqt poshīdā hai us kā rāz āḳhir meṅ khul jāegā.

³is lie jo kuchh tum ne andhere meṅ kahā hai wuh roz-e-raushan meṅ sunāyā jāegā aur jo kuchh tum ne andarūnī kamroṅ kā darwāzā band karke āhistā āhistā kān meṅ bayān kiyā hai us kā chhatoṅ se elān kiyā jāegā.

⁴mere azīzo, un se mat ḍarnā jo sirf jism ko qatl karte haiṅ aur mazīd nuqsān nahīṅ pahuṅchā sakte.

⁵maiṅ tum ko batātā hūṅ ki kis se ḍarnā hai. allāh se ḍaro, jo tumheṅ halāk karne ke bād jahannum meṅ phaiṅkne kā iḳhtiyār bhī rakhtā hai. jī hāṅ, usī se ḳhauf khāo.

⁶kyā pāṅch chiṛiyāṅ do paisoṅ meṅ nahīṅ biktīṅ? to bhī allāh har ek kī fikr karke ek ko bhī nahīṅ bhūltā.

⁷hāṅ, balki tumhāre sar ke sab bāl bhī gine hue haiṅ. lihāzā mat ḍaro. tumhārī qadar-o-qīmat bahut sī chiṛiyoṅ se kahīṅ zyādā hai.

⁸maiṅ tum ko batātā hūṅ, jo bhī logoṅ ke sāmne merā iqrār kare us kā iqrār ibn-e-ādam bhī farishtoṅ ke sāmne karegā.

⁹lekin jo logoṅ ke sāmne merā inkār kare us kā bhī allāh ke farishtoṅ ke sāmne inkār kiyā jāegā.

¹⁰aur jo bhī ibn-e-ādam ke ḳhilāf bāt kare use muāf kiyā jā saktā hai. lekin jo rūh-ul-quds ke ḳhilāf kufr bake use muāf nahīṅ kiyā jāegā.

¹¹jab log tum ko ibādatḳhānoṅ meṅ aur hākimoṅ aur iḳhtiyār wāloṅ ke sāmne ghasīṭ kar le jāeṅge to yih sochte sochte pareshān na ho jānā ki maiṅ kis tarah apnā difā karūṅ yā kyā kahūṅ,

¹²kyūṅki rūh-ul-quds tum ko usī waqt sikhā degā ki tum ko kyā kahnā hai.”

¹³kisī ne bhīṛ meṅ se kahā, “ustād, mere bhāī se kaheṅ ki mīrās kā merā hissā mujhe de.”

¹⁴īsā ne jawāb diyā, “bhaī, kis ne mujhe tum par jaj yā taqsīm karne wālā muqarrar kiyā hai?”

¹⁵phir us ne un se mazīd kahā, “ḳhabardār! har qism ke lālach se bache rahnā, kyūṅki insān kī zindagī us ke māl-o-daulat kī kasrat par munhasir nahīṅ.”

¹⁶us ne unheṅ ek tamsīl sunāī. “kisī amīr ādmī kī zamīn meṅ achchhī fasal paidā huī.

¹⁷chunāṅche wuh sochne lagā, ‘ab maiṅ kyā karūṅ? mere pās to itnī jagah nahīṅ jahāṅ maiṅ sab kuchh jamā karke rakhūṅ.’

¹⁸phir us ne kahā, ‘maiṅ yih karūṅga ki apne godāmoṅ ko ḍhā kar in se baṛe tāmīr karūṅga. un meṅ apnā tamām anāj aur bāqī paidāwār jamā kar lūṅgā.

¹⁹phir maiṅ apne āp se kahūṅgā ki lo, in achchhī chīzoṅ se terī zarūriyāt bahut sāloṅ tak pūrī hotī raheṅgī. ab ārām kar. khā, pī aur ḳhushī manā.’

²⁰lekin allāh ne us se kahā, ‘ahmaq! isī rāt tū mar jāegā. to phir jo chīzeṅ tū ne jamā kī haiṅ wuh kis kī hoṅgī?’

²¹yihī us shaḳhs kā anjām hai jo sirf apne lie chīzeṅ jamā kartā hai jabki wuh allāh ke sāmne ġharīb hai.”

²²phir īsā ne apne shāgirdoṅ se kahā, “is lie apnī zindagī kī zarūriyāt pūrī karne ke lie pareshān na raho ki hāy, maiṅ kyā khāūṅ. aur jism ke lie fikrmand na raho ki hāy, maiṅ kyā pahnūṅ.

²³zindagī to khāne se zyādā aham hai aur jism poshāk se zyādā.

²⁴kawwoṅ par ġhaur karo. na wuh bīj bote, na fasleṅ kāṭte haiṅ. un ke pās na sṭor hotā hai, na godām. to bhī allāh ḳhud unheṅ khānā khilātā hai. aur tumhārī qadar-o-qīmat to parindoṅ se kahīṅ zyādā hai.

²⁵kyā tum meṅ se koī fikr karte karte apnī zindagī meṅ ek lamhe kā bhī izāfā kar saktā hai?

²⁶agar tum fikr karne se itnī chhoṭī sī tabdīlī bhī nahīṅ lā sakte to phir tum bāqī bātoṅ ke bāre meṅ kyūṅ fikrmand ho?

²⁷ġhaur karo ki sosan ke phūl kis tarah ugte haiṅ. na wuh mehnat karte, na kātte haiṅ. lekin maiṅ tumheṅ batātā hūṅ ki sulaimān bādshāh apnī pūrī shān-o-shaukat ke bāwujūd aise shāndār kapṛoṅ se mulabbas nahīṅ thā jaise un meṅ se ek.

²⁸agar allāh us ghās ko jo āj maidān meṅ hai aur kal āg meṅ jhoṅkī jāegī aisā shāndār libās pahnātā hai to ai kam'etiqādo, wuh tum ko pahnāne ke lie kyā kuchh nahīṅ karegā?

²⁹is kī talāsh meṅ na rahnā ki kyā khāoge yā kyā piyoge. aisī bātoṅ kī wajah se bechain na raho.

³⁰kyūṅki duniyā meṅ jo īmān nahīṅ rakhte wuhī in tamām chīzoṅ ke pīchhe bhāgte rahte haiṅ, jabki tumhāre bāp ko pahle se mālūm hai ki tum ko in kī zarūrat hai.

³¹chunāṅche usī kī bādshāhī kī talāsh meṅ raho. phir yih tamām chīzeṅ bhī tum ko mil jāeṅgī.

³²ai chhoṭe galle, mat ḍarnā, kyūṅki tumhāre bāp ne tum ko bādshāhī denā pasand kiyā.

³³apnī milkiyat bech kar ġharīboṅ ko de denā. apne lie aise baṭwe banwāo jo nahīṅ ghiste. apne lie āsmān par aisā ḳhazānā jamā karo jo kabhī ḳhatm nahīṅ hogā aur jahāṅ na koī chor āegā, na koī kīṛā use ḳharāb karegā.

³⁴kyūṅki jahāṅ tumhārā ḳhazānā hai wahīṅ tumhārā dil bhī lagā rahegā.

³⁵ḳhidmat ke lie tayyār khaṛe raho aur is par dhyān do ki tumhāre charāġh jalte raheṅ.

³⁶yānī aise naukaroṅ kī mānind jin kā mālik kisī shādī se wāpas āne wālā hai aur wuh us ke lie tayyār khaṛe haiṅ. jūṅ hī wuh ā kar dastak de wuh darwāze ko khol deṅge.

³⁷wuh naukar mubārak haiṅ jinheṅ mālik ā kar jāgte hue aur chaukas pāegā. maiṅ tum ko sach batātā hūṅ ki yih dekh kar mālik apne kapṛe badal kar unheṅ biṭhāegā aur mez par un kī ḳhidmat karegā.

³⁸ho saktā hai mālik ādhī rāt yā is ke bād āe. agar wuh is sūrat meṅ bhī unheṅ musta'id pāe to wuh mubārak haiṅ.

³⁹yaqīn jāno, agar kisī ghar ke mālik ko patā hotā ki chor kab āegā to wuh zarūr use ghar meṅ naqb lagāne na detā.

⁴⁰tum bhī tayyār raho, kyūṅki ibn-e-ādam aise waqt āegā jab tum is kī tawaqqo nahīṅ karoge.”

⁴¹patras ne pūchhā, “ḳhudāwand, kyā yih tamsīl sirf hamāre lie hai yā sab ke lie?”

⁴²ḳhudāwand ne jawāb diyā, “kaun sā naukar wafādār aur samajhdār hai? farz karo ki ghar ke mālik ne kisī naukar ko bāqī naukaroṅ par muqarrar kiyā ho. us kī ek zimmādārī yih bhī hai ki unheṅ waqt par munāsib khānā khilāe.

⁴³wuh naukar mubārak hogā jo mālik kī wāpasī par yih sab kuchh kar rahā hogā.

⁴⁴maiṅ tum ko sach batātā hūṅ ki yih dekh kar mālik use apnī pūrī jāydād par muqarrar karegā.

⁴⁵lekin farz karo ki naukar apne dil meṅ soche, ‘mālik kī wāpasī meṅ abhī der hai.’ wuh naukaroṅ aur naukarāniyoṅ ko pīṭne lage aur khāte-pīte wuh nashe meṅ rahe.

⁴⁶agar wuh aisā kare to mālik aise din aur waqt āegā jis kī tawaqqo naukar ko nahīṅ hogī. in hālāt ko dekh kar wuh naukar ko ṭukṛe ṭukṛe kar ḍālegā aur use ġhairīmāndāroṅ meṅ shāmil karegā.

⁴⁷jo naukar apne mālik kī marzī ko jāntā hai, lekin us ke lie tayyāriyāṅ nahīṅ kartā, na use pūrī karne kī koshish kartā hai, us kī ḳhūb piṭāī kī jāegī.

⁴⁸is ke muqābale meṅ wuh jo mālik kī marzī ko nahīṅ jāntā aur is binā par koī qābil-e-sazā kām kare us kī kam piṭāī kī jāegī. kyūṅki jise bahut diyā gayā ho us se bahut talab kiyā jāegā. aur jis ke sapurd bahut kuchh kiyā gayā ho us se kahīṅ zyādā māṅgā jāegā.

⁴⁹maiṅ zamīn par āg lagāne āyā hūṅ, aur kāsh wuh pahle hī bhaṛak rahī hotī!

⁵⁰lekin ab tak mere sāmne ek baptismā hai jise lenā zarūrī hai. aur mujh par kitnā dabāo hai jab tak us kī takmīl na ho jāe.

⁵¹kyā tum samajhte ho ki maiṅ duniyā meṅ sulah-salāmatī qāim karne āyā hūṅ? nahīṅ, maiṅ tum ko batātā hūṅ ki is kī bajāe maiṅ iḳhtilāf paidā karūṅga.

⁵²kyūṅki ab se ek gharāne ke pāṅch afrād meṅ iḳhtilāf hogā. tīn do ke ḳhilāf aur do tīn ke ḳhilāf hoṅge.

⁵³bāp beṭe ke ḳhilāf hogā aur beṭā bāp ke ḳhilāf, māṅ beṭī ke ḳhilāf aur beṭī māṅ ke ḳhilāf, sās bahū ke ḳhilāf aur bahū sās ke ḳhilāf.”

⁵⁴īsā ne hujūm se yih bhī kahā, “jūṅ hī koī bādal maġhribī ufaq se chaṛhtā huā nazar āe to tum kahte ho ki bārish hogī. aur aisā hī hotā hai.

⁵⁵aur jab junūbī lū chaltī hai to tum kahte ho ki saḳht garmī hogī. aur aisā hī hotā hai.

⁵⁶ai riyākāro! tum āsmān-o-zamīn ke hālāt par ġhaur karke sahīh natījā nikāl lete ho. to phir tum maujūdā zamāne ke hālāt par ġhaur karke sahīh natījā kyūṅ nahīṅ nikāl sakte?

⁵⁷tum ḳhud sahīh faislā kyūṅ nahīṅ kar sakte?

⁵⁸farz karo ki kisī ne tujh par muqaddamā chalāyā hai. agar aisā ho to pūrī koshish kar ki kachahrī meṅ pahuṅchne se pahle pahle muāmalā hal karke muḳhālif se fāriġh ho jāe. aisā na ho ki wuh tujh ko jaj ke sāmne ghasīṭ kar le jāe, jaj tujhe pulis afsar ke hawāle kare aur pulis afsar tujhe jel meṅ ḍāl de.

⁵⁹maiṅ tujhe batātā hūṅ, wahāṅ se tū us waqt tak nahīṅ nikal pāegā jab tak jurmāne kī pūrī pūrī raqm adā na kar de.”