Read Roman Urdu Geo lūqā 15 Bible Online

lūqā 15 - Roman Urdu Geo bible

lūqā 15

¹ab aisā thā ki tamām ṭaiks lene wāle aur gunāhgār īsā kī bāteṅ sunane ke lie us ke pās āte the.

²yih dekh kar farīsī aur sharīat ke ālim buṛbuṛāne lage, “yih ādmī gunāhgāroṅ ko ḳhushāmdīd kah kar un ke sāth khānā khātā hai.”

³is par īsā ne unheṅ yih tamsīl sunāī,

⁴“farz karo ki tum meṅ se kisī kī sau bheṛeṅ haiṅ. lekin ek gum ho jātī hai. ab mālik kyā karegā? kyā wuh bāqī 99 bheṛeṅ khule maidān meṅ chhoṛ kar gumshudā bheṛ ko ḍhūṅḍne nahīṅ jāegā? zarūr jāegā, balki jab tak use wuh bheṛ mil na jāe wuh us kī talāsh meṅ rahegā.

⁵phir wuh ḳhush ho kar use apne kandhoṅ par uṭhā legā.

⁶yūṅ chalte chalte wuh apne ghar pahuṅch jāegā aur wahāṅ apne dostoṅ aur hamsāyoṅ ko bulā kar un se kahegā, ‘mere sāth ḳhushī manāo! kyūṅki mujhe apnī khoī huī bheṛ mil gaī hai.’

⁷maiṅ tum ko batātā hūṅ ki āsmān par bilkul isī tarah ḳhushī manāī jāegī jab ek hī gunāhgār taubā karegā. aur yih ḳhushī us ḳhushī kī nisbat zyādā hogī jo un 99 afrād ke bāis manāī jāegī jinheṅ taubā karne kī zarūrat hī nahīṅ thī.

⁸yā farz karo ki kisī aurat ke pās das sikke hoṅ lekin ek sikkā gum ho jāe. ab aurat kyā karegī? kyā wuh charāġh jalā kar aur ghar meṅ jhāṛū de de kar baṛī ehtiyāt se sikke ko talāsh nahīṅ karegī? zarūr karegī, balki wuh us waqt tak ḍhūṅḍtī rahegī jab tak use sikkā mil na jāe.

⁹jab use sikkā mil jāegā to wuh apnī saheliyoṅ aur hamsāyoṅ ko bulā kar un se kahegī, ‘mere sāth ḳhushī manāo! kyūṅki mujhe apnā gumshudā sikkā mil gayā hai.’

¹⁰maiṅ tum ko batātā hūṅ ki bilkul isī tarah allāh ke farishtoṅ ke sāmne ḳhushī manāī jātī hai jab ek bhī gunāhgār taubā kartā hai.”

¹¹īsā ne apnī bāt jārī rakhī. “kisī ādmī ke do beṭe the.

¹²in meṅ se chhoṭe ne bāp se kahā, ‘ai bāp, mīrās kā merā hissā de deṅ.’ is par bāp ne donoṅ meṅ apnī milkiyat taqsīm kar dī.

¹³thoṛe dinoṅ ke bād chhoṭā beṭā apnā sārā sāmān sameṭ kar apne sāth kisī dūrdarāz mulk meṅ le gayā. wahāṅ us ne ayyāshī meṅ apnā pūrā māl-o-matā uṛā diyā.

¹⁴sab kuchh zāe ho gayā to us mulk meṅ saḳht kāl paṛā. ab wuh zarūratmand hone lagā.

¹⁵natīje meṅ wuh us mulk ke kisī bāshinde ke hāṅ jā paṛā jis ne use sūaroṅ ko charāne ke lie apne khetoṅ meṅ bhej diyā.

¹⁶wahāṅ wuh apnā peṭ un phaliyoṅ se bharne kī shadīd ḳhwāhish rakhtā thā jo sūar khāte the, lekin use is kī bhī ijāzat na milī.

¹⁷phir wuh hosh meṅ āyā. wuh kahne lagā, mere bāp ke kitne mazdūroṅ ko kasrat se khānā miltā hai jabki maiṅ yahāṅ bhūkā mar rahā hūṅ.

¹⁸maiṅ uṭh kar apne bāp ke pās wāpas chalā jāūṅgā aur us se kahūṅgā, ‘ai bāp, maiṅ ne āsmān kā aur āp kā gunāh kiyā hai.

¹⁹ab maiṅ is lāiq nahīṅ rahā ki āp kā beṭā kahlāūṅ. mehrbānī karke mujhe apne mazdūroṅ meṅ rakh leṅ.’

²⁰phir wuh uṭh kar apne bāp ke pās wāpas chalā gayā. lekin wuh ghar se abhī dūr hī thā ki us ke bāp ne use dekh liyā. use tars āyā aur wuh bhāg kar beṭe ke pās āyā aur gale lagā kar use bosā diyā.

²¹beṭe ne kahā, ‘ai bāp, maiṅ ne āsmān kā aur āp kā gunāh kiyā hai. ab maiṅ is lāiq nahīṅ rahā ki āp kā beṭā kahlāūṅ.’

²²lekin bāp ne apne naukaroṅ ko bulāyā aur kahā, ‘jaldī karo, behtarīn sūṭ lā kar ise pahnāo. is ke hāth meṅ angūṭhī aur pāoṅ meṅ jūte pahnā do.

²³phir moṭā-tāzā bachhṛā lā kar use zabah karo tāki ham khāeṅ aur ḳhushī manāeṅ,

²⁴kyūṅki yih merā beṭā murdā thā ab zindā ho gayā hai, gum ho gayā thā ab mil gayā hai.’ is par wuh ḳhushī manāne lage.

²⁵is daurān bāp kā baṛā beṭā khet meṅ thā. ab wuh ghar lauṭā. jab wuh ghar ke qarīb pahuṅchā to andar se mausīqī aur nāchne kī āwāzeṅ sunāī dīṅ.

²⁶us ne kisī naukar ko bulā kar pūchhā, ‘yih kyā ho rahā hai?’

²⁷naukar ne jawāb diyā, ‘āp kā bhāī ā gayā hai aur āp ke bāp ne moṭā-tāzā bachhṛā zabah karwāyā hai, kyūṅki use apnā beṭā sahīh-salāmat wāpas mil gayā hai.’

²⁸yih sun kar baṛā beṭā ġhusse huā aur andar jāne se inkār kar diyā. phir bāp ghar se nikal kar use samjhāne lagā.

²⁹lekin us ne jawāb meṅ apne bāp se kahā, ‘dekheṅ, maiṅ ne itne sāl āp kī ḳhidmat meṅ saḳht mehnat-mashaqqat kī hai aur ek dafā bhī āp kī marzī kī ḳhilāfwarzī nahīṅ kī. to bhī āp ne mujhe is pūre arse meṅ ek chhoṭā bakrā bhī nahīṅ diyā ki use zabah karke apne dostoṅ ke sāth ziyāfat kartā.

³⁰lekin jūṅ hī āp kā yih beṭā āyā jis ne āp kī daulat kasbiyoṅ meṅ uṛā dī, āp ne us ke lie moṭā-tāzā bachhṛā zabah karwāyā.’

³¹bāp ne jawāb diyā, ‘beṭā, āp to har waqt mere pās rahe haiṅ, aur jo kuchh merā hai wuh āp hī kā hai.

³²lekin ab zarūrī thā ki ham jashn manāeṅ aur ḳhush hoṅ. kyūṅki āp kā yih bhāī jo murdā thā ab zindā ho gayā hai, jo gum ho gayā thā ab mil gayā hai’.”