Read Roman Urdu Geo lūqā 16 Bible Online

lūqā 16 - Roman Urdu Geo bible

lūqā 16

¹īsā ne shāgirdoṅ se kahā, “kisī amīr ādmī ne ek mulāzim rakhā thā jo us kī jāydād kī dekh-bhāl kartā thā. aisā huā ki ek din us par ilzām lagāyā gayā ki wuh apne mālik kī daulat zāe kar rahā hai.

²mālik ne use bulā kar kahā, ‘yih kyā hai jo maiṅ tere bāre meṅ suntā hūṅ? apnī tamām zimmādāriyoṅ kā hisāb de, kyūṅki maiṅ tujhe barḳhāst kar dūṅgā.’

³mulāzim ne dil meṅ kahā, ‘ab maiṅ kyā karūṅ jabki merā mālik yih zimmādārī mujh se chhīn legā? khudāī jaisā saḳht kām mujh se nahīṅ hotā aur bhīk māṅgne se sharm ātī hai.

⁴hāṅ, maiṅ jāntā hūṅ ki kyā karūṅ tāki log mujhe barḳhāst kie jāne ke bād apne gharoṅ meṅ ḳhushāmdīd kaheṅ.’

⁵yih kah kar us ne apne mālik ke tamām qarzdāroṅ ko bulāyā. pahle se us ne pūchhā, ‘tumhārā qarzā kitnā hai?’

⁶us ne jawāb diyā, ‘mujhe mālik ko zaitūn ke tel ke sau kanastar wāpas karne haiṅ.’ mulāzim ne kahā, ‘apnā bil le lo aur baiṭh kar jaldī se sau kanastar pachās meṅ badal lo.’

⁷dūsre se us ne pūchhā, ‘tumhārā kitnā qarzā hai?’ us ne jawāb diyā, ‘mujhe gandum kī hazār boriyāṅ wāpas karnī haiṅ.’ mulāzim ne kahā, ‘apnā bil le lo aur hazār ke badle āṭh sau likh lo.’

⁸yih dekh kar mālik ne be'īmān mulāzim kī tārīf kī ki us ne aql se kām liyā hai. kyūṅki is duniyā ke farzand apnī nasl ke logoṅ se nipaṭne meṅ nūr ke farzandoṅ se zyādā hoshyār hote haiṅ.

⁹maiṅ tum ko batātā hūṅ ki duniyā kī nārāst daulat se apne lie dost banā lo tāki jab yih ḳhatm ho jāe to log tum ko abadī rihāishgāhoṅ meṅ ḳhushāmdīd kaheṅ.

¹⁰jo thoṛe meṅ wafādār hai wuh zyādā meṅ bhī wafādār hogā. aur jo thoṛe meṅ be'īmān hai wuh zyādā meṅ bhī be'īmānī karegā.

¹¹agar tum duniyā kī nārāst daulat ko saṅbhālne meṅ wafādār na rahe to phir kaun haqīqī daulat tumhāre sapurd karegā?

¹²aur agar tum ne dūsroṅ kī daulat saṅbhālne meṅ be'īmānī dikhāī hai to phir kaun tum ko tumhāre zātī istemāl ke lie kuchh degā?

¹³koī bhī ġhulām do mālikoṅ kī ḳhidmat nahīṅ kar saktā. yā to wuh ek se nafrat karke dūsre se muhabbat rakhegā, yā ek se lipaṭ kar dūsre ko haqīr jānegā. tum ek hī waqt meṅ allāh aur daulat kī ḳhidmat nahīṅ kar sakte.”

¹⁴farīsiyoṅ ne yih sab kuchh sunā to wuh us kā mazāq uṛāne lage, kyūṅki wuh lālchī the.

¹⁵us ne un se kahā, “tum hī wuh ho jo apne āp ko logoṅ ke sāmne rāstbāz qarār dete ho, lekin allāh tumhāre diloṅ se wāqif hai. kyūṅki log jis chīz kī bahut qadar karte haiṅ wuh allāh ke nazdīk makrūh hai.

¹⁶yahyā ke āne tak tumhāre rāhnumā mūsā kī sharīat aur nabiyoṅ ke paiġhāmāt the. lekin ab allāh kī bādshāhī kī ḳhushḳhabrī kā elān kiyā jā rahā hai aur tamām log zabardastī is meṅ dāḳhil ho rahe haiṅ.

¹⁷lekin is kā yih matlab nahīṅ ki sharīat mansūḳh ho gaī hai balki āsmān-o-zamīn jāte raheṅge, lekin sharīat kī zer zabar tak koī bhī bāt nahīṅ badlegī.

¹⁸chunāṅche jo ādmī apnī bīwī ko talāq de kar kisī aur se shādī kare wuh zinā kartā hai. isī tarah jo kisī talāqshudā aurat se shādī kare wuh bhī zinā kartā hai.

¹⁹ek amīr ādmī kā zikr hai jo arġhawānī rang ke kapṛe aur nafīs katān pahantā aur har roz aish-o-ishrat meṅ guzārtā thā.

²⁰amīr ke geṭ par ek ġharīb ādmī paṛā thā jis ke pūre jism par nāsūr the. us kā nām lāzar thā

²¹aur us kī bas ek hī ḳhwāhish thī ki wuh amīr kī mez se gire hue ṭukṛe khā kar ser ho jāe. kutte us ke pās ā kar us ke nāsūr chāṭte the.

²²phir aisā huā ki ġharīb ādmī mar gayā. farishtoṅ ne use uṭhā kar ibrāhīm kī god meṅ biṭhā diyā. amīr ādmī bhī faut huā aur dafnāyā gayā.

²³wuh jahannum meṅ pahuṅchā. azāb kī hālat meṅ us ne apnī nazar uṭhāī to dūr se ibrāhīm aur us kī god meṅ lāzar ko dekhā.

²⁴wuh pukār uṭhā, ‘ai mere bāp ibrāhīm, mujh par rahm kareṅ. mehrbānī karke lāzar ko mere pās bhej deṅ tāki wuh apnī unglī ko pānī meṅ ḍubo kar merī zabān ko ṭhanḍā kare, kyūṅki maiṅ is āg meṅ taṛaptā hūṅ.’

²⁵lekin ibrāhīm ne jawāb diyā, ‘beṭā, yād rakh ki tujhe apnī zindagī meṅ behtarīn chīzeṅ mil chukī haiṅ jabki lāzar ko badtarīn chīzeṅ. lekin ab use ārām aur tasallī mil gaī hai jabki tujhe aziyat.

²⁶nīz, hamāre aur tumhāre darmiyān ek wasī ḳhalīj qāim hai. agar koī chāhe bhī to use pār karke yahāṅ se tumhāre pās nahīṅ jā saktā, na wahāṅ se koī yahāṅ ā saktā hai.’

²⁷amīr ādmī ne kahā, ‘mere bāp, phir merī ek aur guzārish hai, mehrbānī karke lāzar ko mere wālid ke ghar bhej deṅ.

²⁸mere pāṅch bhāī haiṅ. wuh wahāṅ jā kar unheṅ āgāh kare, aisā na ho ki un kā anjām bhī yih aziyatnāk maqām ho.’

²⁹lekin ibrāhīm ne jawāb diyā, ‘un ke pās mūsā kī tauret aur nabiyoṅ ke sahīfe to haiṅ. wuh un kī suneṅ.’

³⁰amīr ne arz kī, ‘nahīṅ, mere bāp ibrāhīm, agar koī murdoṅ meṅ se un ke pās jāe to phir wuh zarūr taubā kareṅge.’

³¹ibrāhīm ne kahā, ‘agar wuh mūsā aur nabiyoṅ kī nahīṅ sunte to wuh us waqt bhī qāil nahīṅ hoṅge jab koī murdoṅ meṅ se jī uṭh kar un ke pās jāegā’.”