Read Roman Urdu Geo lūqā 17 Bible Online

lūqā 17 - Roman Urdu Geo bible

lūqā 17

¹īsā ne apne shāgirdoṅ se kahā, “āzmāishoṅ ko to ānā hī ānā hai, lekin us par afsos jis kī mārifat wuh āeṅ.

²agar wuh in chhoṭoṅ meṅ se kisī ko gunāh karne par uksāe to us ke lie behtar hai ki us ke gale meṅ baṛī chakkī kā pāṭ bāndhā jāe aur use samundar meṅ phaiṅk diyā jāe.

³ḳhabardār raho! agar tumhārā bhāī gunāh kare to use samjhāo. agar wuh is par taubā kare to use muāf kar do.

⁴ab farz karo ki wuh ek din ke andar sāt bār tumhārā gunāh kare, lekin har dafā wāpas ā kar taubā kā izhār kare, to bhī use har dafā muāf kar do.”

⁵rasūloṅ ne ḳhudāwand se kahā, “hamāre īmān ko baṛhā deṅ.”

⁶ḳhudāwand ne jawāb diyā, “agar tumhārā īmān rāī ke dāne jaisā chhoṭā bhī ho to tum shahtūt ke is daraḳht ko kah sakte ho, ‘ukhaṛ kar samundar meṅ jā lag’ to wuh tumhārī bāt par amal karegā.

⁷farz karo ki tum meṅ se kisī ne hal chalāne yā jānwar charāne ke lie ek ġhulām rakhā hai. jab yih ġhulām khet se ghar āegā to kyā us kā mālik kahegā, ‘idhar āo, khāne ke lie baiṭh jāo?’

⁸hargiz nahīṅ, balki wuh yih kahegā, ‘merā khānā tayyār karo, ḍyūṭī ke kapṛe pahan kar merī ḳhidmat karo jab tak maiṅ khā pī na lūṅ. is ke bād tum bhī khā aur pī sakoge.’

⁹aur kyā wuh apne ġhulām kī us ḳhidmat kā shukriyā adā karegā jo us ne use karne ko kahā thā? hargiz nahīṅ!

¹⁰isī tarah jab tum sab kuchh jo tumheṅ karne ko kahā gayā hai kar chuko tab tum ko yih kahnā chāhie, ‘ham nālāiq naukar haiṅ. ham ne sirf apnā farz adā kiyā hai’.”

¹¹aisā huā ki yarūshalam kī taraf safar karte karte īsā sāmariyya aur galīl meṅ se guzarā.

¹²ek din wuh kisī gāoṅ meṅ dāḳhil ho rahā thā ki koṛh ke das marīz us ko milne āe. wuh kuchh fāsile par khaṛe ho kar

¹³ūṅchī āwāz se kahne lage, “ai īsā, ustād, ham par rahm kareṅ.”

¹⁴us ne unheṅ dekhā to kahā, “jāo, apne āp ko imāmoṅ ko dikhāo tāki wuh tumhārā muāinā kareṅ.” aur aisā huā ki wuh chalte chalte apnī bīmārī se pāk-sāf ho gae.

¹⁵un meṅ se ek ne jab dekhā ki shifā mil gaī hai to wuh muṛ kar ūṅchī āwāz se allāh kī tamjīd karne lagā,

¹⁶aur īsā ke sāmne muṅh ke bal gir kar shukriyā adā kiyā. yih ādmī sāmariyya kā bāshindā thā.

¹⁷īsā ne pūchhā, “kyā das ke das ādmī apnī bīmārī se pāk-sāf nahīṅ hue? bāqī nau kahāṅ haiṅ?

¹⁸kyā is ġhairmulkī ke ilāwā koī aur wāpas ā kar allāh kī tamjīd karne ke lie tayyār nahīṅ thā?”

¹⁹phir us ne us se kahā, “uṭh kar chalā jā. tere īmān ne tujhe bachā liyā hai.”

²⁰kuchh farīsiyoṅ ne īsā se pūchhā, “allāh kī bādshāhī kab āegī?” us ne jawāb diyā, “allāh kī bādshāhī yūṅ nahīṅ ā rahī ki use zāhirī nishānoṅ se pahchānā jāe.

²¹log yih bhī nahīṅ kah sakeṅge, ‘wuh yahāṅ hai’ yā ‘wuh wahāṅ hai’ kyūṅki allāh kī bādshāhī tumhāre darmiyān hai.”

²²phir us ne apne shāgirdoṅ se kahā, “aise din āeṅge ki tum ibn-e-ādam kā kam az kam ek din deḳhne kī tamannā karoge, lekin nahīṅ dekhoge.

²³log tum ko batāeṅge, ‘wuh wahāṅ hai’ yā ‘wuh yahāṅ hai.’ lekin mat jānā aur un ke pīchhe na lagnā.

²⁴kyūṅki jab ibn-e-ādam kā din āegā to wuh bijlī kī mānind hogā jis kī chamak āsmān ko ek sire se le kar dūsre sire tak raushan kar detī hai.

²⁵lekin pahle lāzim hai ki wuh bahut dukh uṭhāe aur is nasl ke hāthoṅ radd kiyā jāe.

²⁶jab ibn-e-ādam kā waqt āegā to hālāt nūh ke dinoṅ jaise hoṅge.

²⁷log us din tak khāne-pīne aur shādī karne karwāne meṅ lage rahe jab tak nūh kashtī meṅ dāḳhil na ho gayā. phir sailāb ne ā kar un sab ko tabāh kar diyā.

²⁸bilkul yihī kuchh lūt ke ayyām meṅ huā. log khāne-pīne, ḳharīd-o-faroḳht, kāshtkārī aur tāmīr ke kām meṅ lage rahe.

²⁹lekin jab lūt sadūm ko chhoṛ kar niklā to āg aur gandhak ne āsmān se baras kar un sab ko tabāh kar diyā.

³⁰ibn-e-ādam ke zuhūr ke waqt aise hī hālāt hoṅge.

³¹jo shaḳhs us din chhat par ho wuh ghar kā sāmān sāth le jāne ke lie nīche na utre. isī tarah jo khet meṅ ho wuh apne pīchhe paṛī chīzoṅ ko sāth le jāne ke lie ghar na lauṭe.

³²lūt kī bīwī ko yād rakho.

³³jo apnī jān bachāne kī koshish karegā wuh use kho degā, aur jo apnī jān kho degā wuhī use bachāe rakhegā.

³⁴maiṅ tum ko batātā hūṅ ki us rāt do afrād ek bistar meṅ soe hoṅge, ek ko sāth le liyā jāegā jabki dūsre ko pīchhe chhoṛ diyā jāegā.

³⁵do ḳhawātīn chakkī par gandum pīs rahī hoṅgī, ek ko sāth le liyā jāegā jabki dūsrī ko pīchhe chhoṛ diyā jāegā.

³⁶[do afrād khet meṅ hoṅge, ek ko sāth le liyā jāegā jabki dūsre ko pīchhe chhoṛ diyā jāegā.]”

³⁷unhoṅ ne pūchhā, “ḳhudāwand, yih kahāṅ hogā?” us ne jawāb diyā, “jahāṅ lāsh paṛī ho wahāṅ giddh jamā ho jāeṅge.”