Read Roman Urdu Geo lūqā 19 Bible Online

lūqā 19 - Roman Urdu Geo bible

lūqā 19

¹phir īsā yarīhū meṅ dāḳhil huā aur us meṅ se guzarne lagā.

²us shahr meṅ ek amīr ādmī banām zakkāī rahtā thā jo ṭaiks lene wāloṅ kā afsar thā.

³wuh jānanā chāhtā thā ki yih īsā kaun hai, lekin pūrī koshish karne ke bāwujūd use dekh na sakā, kyūṅki īsā ke irdgird baṛā hujūm thā aur zakkāī kā qad chhoṭā thā.

⁴is lie wuh dauṛ kar āge niklā aur use deḳhne ke lie anjīr-tūt [3] ke daraḳht par chaṛh gayā jo rāste meṅ thā.

⁵jab īsā wahāṅ pahuṅchā to us ne nazar uṭhā kar kahā, “zakkāī, jaldī se utar ā, kyūṅki āj mujhe tere ghar meṅ ṭhaharnā hai.”

⁶zakkāī fauran utar āyā aur ḳhushī se us kī mehmān-nawāzī kī.

⁷yih dekh kar bāqī tamām log buṛbuṛāne lage, “is ke ghar meṅ jā kar wuh ek gunāhgār ke mehmān ban gae haiṅ.”

⁸lekin zakkāī ne ḳhudāwand ke sāmne khaṛe ho kar kahā, “ḳhudāwand, maiṅ apne māl kā ādhā hissā ġharīboṅ ko de detā hūṅ. aur jis se maiṅ ne nājāiz taur se kuchh liyā hai use chār gunā wāpas kartā hūṅ.”

⁹īsā ne us se kahā, “āj is gharāne ko najāt mil gaī hai, is lie ki yih bhī ibrāhīm kā beṭā hai.

¹⁰kyūṅki ibn-e-ādam gumshudā ko ḍhūṅḍne aur najāt dene ke lie āyā hai.”

¹¹ab īsā yarūshalam ke qarīb ā chukā thā, is lie log andāzā lagāne lage ki allāh kī bādshāhī zāhir hone wālī hai. is ke pesh-e-nazar īsā ne apnī yih bāteṅ sunane wāloṅ ko ek tamsīl sunāī.

¹²us ne kahā, “ek nawāb kisī dūrdarāz mulk ko chalā gayā tāki use bādshāh muqarrar kiyā jāe. phir use wāpas ānā thā.

¹³rawānā hone se pahle us ne apne naukaroṅ meṅ se das ko bulā kar unheṅ sone kā ek ek sikkā diyā. sāth sāth us ne kahā, ‘yih paise le kar us waqt tak kārobār meṅ lagāo jab tak maiṅ wāpas na āūṅ.’

¹⁴lekin us kī riāyā us se nafrat rakhtī thī, is lie us ne us ke pīchhe wafd bhej kar ittilā dī, ‘ham nahīṅ chāhte ki yih ādmī hamārā bādshāh bane.’

¹⁵to bhī use bādshāh muqarrar kiyā gayā. is ke bād jab wāpas āyā to us ne un naukaroṅ ko bulāyā jinheṅ us ne paise die the tāki mālūm kare ki unhoṅ ne yih paise kārobār meṅ lagā kar kitnā izāfā kiyā hai.

¹⁶pahlā naukar āyā. us ne kahā, ‘janāb, āp ke ek sikke se das ho gae haiṅ.’

¹⁷mālik ne kahā, ‘shābāsh, achchhe naukar. tū thoṛe meṅ wafādār rahā, is lie ab tujhe das shahroṅ par iḳhtiyār milegā.’

¹⁸phir dūsrā naukar āyā. us ne kahā, ‘janāb, āp ke ek sikke se pāṅch ho gae haiṅ.’

¹⁹mālik ne us se kahā, ‘tujhe pāṅch shahroṅ par iḳhtiyār milegā.’

²⁰phir ek aur naukar ā kar kahne lagā, ‘janāb, yih āp kā sikkā hai. maiṅ ne ise kapṛe meṅ lapeṭ kar mahfūz rakhā,

²¹kyūṅki maiṅ āp se ḍartā thā, is lie ki āp saḳht ādmī haiṅ. jo paise āp ne nahīṅ lagāe unheṅ le lete haiṅ aur jo bīj āp ne nahīṅ boyā us kī fasal kāṭte haiṅ.’

²²mālik ne kahā, ‘sharīr naukar! maiṅ tere apne alfāz ke mutābiq terī adālat karūṅga. jab tū jāntā thā ki maiṅ saḳht ādmī hūṅ, ki wuh paise le letā hūṅ jo ḳhud nahīṅ lagāe aur wuh fasal kāṭtā hūṅ jis kā bīj nahīṅ boyā,

²³to phir tū ne mere paise baink meṅ kyūṅ na jamā karāe? agar tū aisā kartā to wāpasī par mujhe kam az kam wuh paise sūd samet mil jāte.’

²⁴yih kah kar wuh hāzirīn se muḳhātib huā, ‘yih sikkā is se le kar us naukar ko de do jis ke pās das sikke haiṅ.’

²⁵unhoṅ ne etirāz kiyā, ‘janāb, us ke pās to pahle hī das sikke haiṅ.’

²⁶us ne jawāb diyā, ‘maiṅ tumheṅ batātā hūṅ ki har shaḳhs jis ke pās kuchh hai use aur diyā jāegā, lekin jis ke pās kuchh nahīṅ hai us se wuh bhī chhīn liyā jāegā jo us ke pās hai.

²⁷ab un dushmanoṅ ko le āo jo nahīṅ chāhte the ki maiṅ un kā bādshāh banūṅ. unheṅ mere sāmne phāṅsī de do’.”

²⁸in bātoṅ ke bād īsā dūsroṅ ke āge āge yarūshalam kī taraf baṛhne lagā.

²⁹jab wuh bait-fage aur bait-aniyāh ke qarīb pahuṅchā jo zaitūn ke pahāṛ par the to us ne do shāgirdoṅ ko apne āge bhej kar

³⁰kahā, “sāmne wāle gāoṅ meṅ jāo. wahāṅ tum ek jawān gadhā dekhoge. wuh bandhā huā hogā aur ab tak koī bhī us par sawār nahīṅ huā hai. use khol kar le āo.

³¹agar koī pūchhe ki gadhe ko kyūṅ khol rahe ho to use batā denā ki ḳhudāwand ko is kī zarūrat hai.”

³²donoṅ shāgird gae to dekhā ki sab kuchh waisā hī hai jaisā īsā ne unheṅ batāyā thā.

³³jab wuh jawān gadhe ko kholne lage to us ke mālikoṅ ne pūchhā, “tum gadhe ko kyūṅ khol rahe ho?”

³⁴unhoṅ ne jawāb diyā, “ḳhudāwand ko is kī zarūrat hai.”

³⁵wuh use īsā ke pās le āe, aur apne kapṛe gadhe par rakh kar us ko us par sawār kiyā.

³⁶jab wuh chal paṛā to logoṅ ne us ke āge āge rāste meṅ apne kapṛe bichhā die.

³⁷chalte chalte wuh us jagah ke qarīb pahuṅchā jahāṅ rāstā zaitūn ke pahāṛ par se utarne lagtā hai. is par shāgirdoṅ kā pūrā hujūm ḳhushī ke māre ūṅchī āwāz se un mojizoṅ ke lie allāh kī tamjīd karne lagā jo unhoṅ ne dekhe the,

³⁸“mubārak hai wuh bādshāh jo rab ke nām se ātā hai. āsmān par salāmatī ho aur bulandiyoṅ par izzat-o-jalāl.”

³⁹kuchh farīsī bhīṛ meṅ the. unhoṅ ne īsā se kahā, “ustād, apne shāgirdoṅ ko samjhāeṅ.”

⁴⁰us ne jawāb diyā, “maiṅ tumheṅ batātā hūṅ, agar yih chup ho jāeṅ to patthar pukār uṭheṅge.”

⁴¹jab wuh yarūshalam ke qarīb pahuṅchā to shahr ko dekh kar ro paṛā

⁴²aur kahā, “kāsh tū bhī is din jān letī ki terī salāmatī kis meṅ hai. lekin ab yih bāt terī āṅkhoṅ se chhupī huī hai.

⁴³kyūṅki tujh par aisā waqt āegā ki tere dushman tere irdgird band bāndh kar terā muhāsarā kareṅge aur yūṅ tujhe chāroṅ taraf se gher kar tang kareṅge.

⁴⁴wuh tujhe tere bachchoṅ samet zamīn par paṭkeṅge aur tere andar ek bhī patthar dūsre par nahīṅ chhoṛeṅge. aur wajah yihī hogī ki tū ne wuh waqt nahīṅ pahchānā jab allāh ne terī najāt ke lie tujh par nazar kī.”

⁴⁵phir īsā bait-ul-muqaddas meṅ jā kar unheṅ nikālne lagā jo wahāṅ qurbāniyoṅ ke lie darkār chīzeṅ bech rahe the. us ne kahā,

⁴⁶“kalām-e-muqaddas meṅ likhā hai, ‘merā ghar duā kā ghar hogā’ jabki tum ne use ḍākuoṅ ke aḍḍe meṅ badal diyā hai.”

⁴⁷aur wuh rozānā bait-ul-muqaddas meṅ tālīm detā rahā. lekin bait-ul-muqaddas ke rāhnumā imām, sharīat ke ālim aur awāmī rāhnumā use qatl karne ke lie koshāṅ rahe,

⁴⁸albattā unheṅ koī mauqā na milā, kyūṅki tamām log īsā kī har bāt sun sun kar us se lipṭe rahte the.