Read Roman Urdu Geo lūqā 2 Bible Online

lūqā 2 - Roman Urdu Geo bible

lūqā 2

¹un ayyām meṅ rom ke shahanshāh augustus ne farmān jārī kiyā ki pūrī saltanat kī mardumshumārī kī jāe.

²yih pahlī mardumshumārī us waqt huī jab kūriniyus shām kā gawarnar thā.

³har kisī ko apne watanī shahr meṅ jānā paṛā tāki wahāṅ rajisṭar meṅ apnā nām darj karwāe.

⁴chunāṅche yūsuf galīl ke shahr nāsarat se rawānā ho kar yahūdiyā ke shahr bait-laham pahuṅchā. wajah yih thī ki wuh dāūd bādshāh ke gharāne aur nasl se thā, aur bait-laham dāūd kā shahr thā.

⁵chunāṅche wuh apne nām ko rajisṭar meṅ darj karwāne ke lie wahāṅ gayā. us kī mangetar mariyam bhī sāth thī. us waqt wuh ummīd se thī.

⁶jab wuh wahāṅ ṭhahre hue the to bachche ko janm dene kā waqt ā pahuṅchā.

⁷beṭā paidā huā. yih mariyam kā pahlā bachchā thā. us ne use kapṛoṅ [1] meṅ lapeṭ kar ek charnī meṅ liṭā diyā, kyūṅki unheṅ sarāy meṅ rahne kī jagah nahīṅ milī thī.

⁸us rāt kuchh charwāhe qarīb ke khule maidān meṅ apne rewaṛoṅ kī pahrādārī kar rahe the.

⁹achānak rab kā ek farishtā un par zāhir huā, aur un ke irdgird rab kā jalāl chamkā. yih dekh kar wuh saḳht ḍar gae.

¹⁰lekin farishte ne un se kahā, “ḍaro mat! dekho maiṅ tum ko baṛī ḳhushī kī ḳhabar detā hūṅ jo tamām logoṅ ke lie hogī.

¹¹āj hī dāūd ke shahr meṅ tumhāre lie najātdahindā paidā huā hai yānī masīh ḳhudāwand.

¹²aur tum use is nishān se pahchān loge, tum ek shīrḳhwār bachche ko kapṛoṅ meṅ lipṭā huā pāoge. wuh charnī meṅ paṛā huā hogā.”

¹³achānak āsmānī lashkaroṅ ke beshumār farishte us farishte ke sāth zāhir hue jo allāh kī hamd-o-sanā karke kah rahe the,

¹⁴“āsmān kī bulandiyoṅ par allāh kī izzat-o-jalāl, zamīn par un logoṅ kī salāmatī jo use manzūr haiṅ.”

¹⁵farishte unheṅ chhoṛ kar āsmān par wāpas chale gae to charwāhe āpas meṅ kahne lage, “āo, ham bait-laham jā kar yih bāt dekheṅ jo huī hai aur jo rab ne ham par zāhir kī hai.”

¹⁶wuh bhāg kar bait-laham pahuṅche. wahāṅ unheṅ mariyam aur yūsuf mile aur sāth hī chhoṭā bachchā jo charnī meṅ paṛā huā thā.

¹⁷yih dekh kar unhoṅ ne sab kuchh bayān kiyā jo unheṅ is bachche ke bāre meṅ batāyā gayā thā.

¹⁸jis ne bhī un kī bāt sunī wuh hairatzadā huā.

¹⁹lekin mariyam ko yih tamām bāteṅ yād rahīṅ aur wuh apne dil meṅ un par ġhaur kartī rahī.

²⁰phir charwāhe lauṭ gae aur chalte chalte un tamām bātoṅ ke lie allāh kī tāzīm-o-tārīf karte rahe jo unhoṅ ne sunī aur dekhī thīṅ, kyūṅki sab kuchh waisā hī pāyā thā jaisā farishte ne unheṅ batāyā thā.

²¹āṭh din ke bād bachche kā ḳhatnā karwāne kā waqt ā gayā. us kā nām īsā rakhā gayā, yānī wuhī nām jo farishte ne mariyam ko us ke hāmilā hone se pahle batāyā thā.

²²jab mūsā kī sharīat ke mutābiq tahārat ke din pūre hue tab wuh bachche ko yarūshalam le gae tāki use rab ke huzūr pesh kiyā jāe,

²³jaise rab kī sharīat meṅ likhā hai, “har pahlauṭhe ko rab ke lie maḳhsūs-o-muqaddas karnā hai.”

²⁴sāth hī unhoṅ ne mariyam kī tahārat kī rasm ke lie wuh qurbānī pesh kī jo rab kī sharīat bayān kartī hai, yānī “do qumriyāṅ yā do jawān kabūtar.”

²⁵us waqt yarūshalam meṅ ek ādmī banām shamāūn rahtā thā. wuh rāstbāz aur ḳhudātars thā aur is intizār meṅ thā ki masīh ā kar isrāīl ko sukūn baḳhshe. rūh-ul-quds us par thā,

²⁶aur us ne us par yih bāt zāhir kī thī ki wuh jīte jī rab ke masīh ko dekhegā.

²⁷us din rūh-ul-quds ne use tahrīk dī ki wuh bait-ul-muqaddas meṅ jāe. chunāṅche jab mariyam aur yūsuf bachche ko rab kī sharīat ke mutābiq pesh karne ke lie bait-ul-muqaddas meṅ āe

²⁸to shamāūn maujūd thā. us ne bachche ko apne bāzū'oṅ meṅ le kar allāh kī hamd-o-sanā karte hue kahā,

²⁹“ai āqā, ab tū apne bande ko ijāzat detā hai ki wuh salāmatī se rehlat kar jāe, jis tarah tū ne farmāyā hai.

³⁰kyūṅki maiṅ ne apnī āṅkhoṅ se terī us najāt kā mushāhadā kar liyā hai

³¹jo tū ne tamām qaumoṅ kī maujūdagī meṅ tayyār kī hai.

³²yih ek aisī raushnī hai jis se ġhairyahūdiyoṅ kī āṅkheṅ khul jāeṅgī aur terī qaum isrāīl ko jalāl hāsil hogā.”

³³bachche ke māṅ-bāp apne beṭe ke bāre meṅ in alfāz par hairān hue.

³⁴shamāūn ne unheṅ barkat dī aur mariyam se kahā, “yih bachchā muqarrar huā hai ki isrāīl ke bahut se log is se ṭhokar khā kar gir jāeṅ, lekin bahut se is se apne pāoṅ par khaṛe bhī ho jāeṅge. go yih allāh kī taraf se ek ishārā hai to bhī is kī muḳhālafat kī jāegī.

³⁵yūṅ bahutoṅ ke dilī ḳhayālāt zāhir ho jāeṅge. is silsile meṅ talwār terī jān meṅ se bhī guzar jāegī.”

³⁶wahāṅ bait-ul-muqaddas meṅ ek umrrasīdā nabiyā bhī thī jis kā nām hannāh thā. wuh fanūel kī beṭī aur āshar ke qabīle se thī. shādī ke sāt sāl bād us kā shauhar mar gayā thā.

³⁷ab wuh bewā kī haisiyat se 84 sāl kī ho chukī thī. wuh kabhī bait-ul-muqaddas ko nahīṅ chhoṛtī thī, balki din rāt allāh ko sijdā kartī, rozā rakhtī aur duā kartī thī.

³⁸us waqt wuh mariyam aur yūsuf ke pās ā kar allāh kī tamjīd karne lagī. sāth sāth wuh har ek ko jo is intizār meṅ thā ki allāh fidyā de kar yarūshalam ko chhuṛāe, bachche ke bāre meṅ batātī rahī.

³⁹jab īsā ke wālidain ne rab kī sharīat meṅ darj tamām farāiz adā kar lie to wuh galīl meṅ apne shahr nāsarat ko lauṭ gae.

⁴⁰wahāṅ bachchā parwān chaṛhā aur taqwiyat pātā gayā. wuh hikmat-o-dānāī se māmūr thā, aur allāh kā fazl us par thā.

⁴¹īsā ke wālidain har sāl fasah kī īd ke lie yarūshalam jāyā karte the.

⁴²us sāl bhī wuh māmūl ke mutābiq īd ke lie gae jab īsā bārah sāl kā thā.

⁴³īd ke iḳhtitām par wuh nāsarat wāpas jāne lage, lekin īsā yarūshalam meṅ rah gayā. pahle us ke wālidain ko mālūm na thā,

⁴⁴kyūṅki wuh samajhte the ki wuh qāfile meṅ kahīṅ maujūd hai. lekin chalte chalte pahlā din guzar gayā aur wuh ab tak nazar na āyā thā. is par wālidain use apne rishtedāroṅ aur azīzoṅ meṅ ḍhūṅḍne lage.

⁴⁵jab wuh wahāṅ na milā to mariyam aur yūsuf yarūshalam wāpas gae aur wahāṅ ḍhūṅḍne lage.

⁴⁶tīn din ke bād wuh āḳhirkār bait-ul-muqaddas meṅ pahuṅche. wahāṅ īsā dīnī ustādoṅ ke darmiyān baiṭhā un kī bāteṅ sun rahā aur un se sawālāt pūchh rahā thā.

⁴⁷jis ne bhī us kī bāteṅ sunīṅ wuh us kī samajh aur jawāboṅ se dang rah gayā.

⁴⁸use dekh kar us ke wālidain ghabrā gae. us kī māṅ ne kahā, “beṭā, tū ne hamāre sāth yih kyūṅ kiyā? terā bāp aur maiṅ tujhe ḍhūṅḍte ḍhūṅḍte shadīd koft kā shikār hue.”

⁴⁹īsā ne jawāb diyā, “āp ko mujhe talāsh karne kī kyā zarūrat thī? kyā āp ko mālūm na thā ki mujhe apne bāp ke ghar meṅ honā zarūr hai?”

⁵⁰lekin wuh us kī bāt na samjhe.

⁵¹phir wuh un ke sāth rawānā ho kar nāsarat wāpas āyā aur un ke tābe rahā. lekin us kī māṅ ne yih tamām bāteṅ apne dil meṅ mahfūz rakheṅ.

⁵²yūṅ īsā jawān huā. us kī samajh aur hikmat baṛhtī gaī, aur use allāh aur insān kī maqbūliyat hāsil thī.