Read Roman Urdu Geo lūqā 20 Bible Online

lūqā 20 - Roman Urdu Geo bible

lūqā 20

¹ek din jab wuh bait-ul-muqaddas meṅ logoṅ ko tālīm de rahā aur allāh kī ḳhushḳhabrī sunā rahā thā to rāhnumā imām, sharīat ke ulamā aur buzurg us ke pās āe.

²unhoṅ ne kahā, “hameṅ batāeṅ, āp yih kis iḳhtiyār se kar rahe haiṅ? kis ne āp ko yih iḳhtiyār diyā hai?”

³īsā ne jawāb diyā, “merā bhī tum se ek sawāl hai. tum mujhe batāo ki

⁴kyā yahyā kā baptismā āsmānī thā yā insānī?”

⁵wuh āpas meṅ bahs karne lage, “agar ham kaheṅ ‘āsmānī’ to wuh pūchhegā, ‘to phir tum us par īmān kyūṅ na lāe?’

⁶lekin agar ham kaheṅ ‘insānī’ to tamām log hameṅ sangsār kareṅge, kyūṅki wuh to yaqīn rakhte haiṅ ki yahyā nabī thā.”

⁷is lie unhoṅ ne jawāb diyā, “ham nahīṅ jānte ki wuh kahāṅ se thā.”

⁸īsā ne kahā, “to phir maiṅ bhī tum ko nahīṅ batātā ki maiṅ yih sab kuchh kis iḳhtiyār se kar rahā hūṅ.”

⁹phir īsā logoṅ ko yih tamsīl sunāne lagā, “kisī ādmī ne angūr kā ek bāġh lagāyā. phir wuh use muzāreoṅ ke sapurd karke bahut der ke lie bairūn-e-mulk chalā gayā.

¹⁰jab angūr pak gae to us ne apne naukar ko un ke pās bhej diyā tāki wuh mālik kā hissā wasūl kare. lekin muzāreoṅ ne us kī piṭāī karke use ḳhālī hāth lauṭā diyā.

¹¹is par mālik ne ek aur naukar ko un ke pās bhejā. lekin muzāreoṅ ne use bhī mār mār kar us kī be'izzatī kī aur ḳhālī hāth nikāl diyā.

¹²phir mālik ne tīsre naukar ko bhej diyā. use bhī unhoṅ ne mār kar zaḳhmī kar diyā aur nikāl diyā.

¹³bāġh ke mālik ne kahā, ‘ab maiṅ kyā karūṅ? maiṅ apne pyāre beṭe ko bhejūṅgā, shāyad wuh us kā lihāz kareṅ.’

¹⁴lekin mālik ke beṭe ko dekh kar muzāre āpas meṅ kahne lage, ‘yih zamīn kā wāris hai. āo, ham ise mār ḍāleṅ. phir is kī mīrās hamārī hī hogī.’

¹⁵unhoṅ ne use bāġh se bāhar phaiṅk kar qatl kiyā.” īsā ne pūchhā, “ab batāo, bāġh kā mālik kyā karegā?

¹⁶wuh wahāṅ jā kar muzāreoṅ ko halāk karegā aur bāġh ko dūsroṅ ke sapurd kar degā.” yih sun kar logoṅ ne kahā, “ḳhudā aisā kabhī na kare.”

¹⁷īsā ne un par nazar ḍāl kar pūchhā, “to phir kalām-e-muqaddas ke is hawāle kā kyā matlab hai ki ‘jis patthar ko makān banāne wāloṅ ne radd kiyā, wuh kone kā bunyādī patthar ban gayā’?

¹⁸jo is patthar par giregā wuh ṭukṛe ṭukṛe ho jāegā, jabki jis par wuh ḳhud giregā use pīs ḍālegā.”

¹⁹sharīat ke ulamā aur rāhnumā imāmoṅ ne usī waqt use pakaṛne kī koshish kī, kyūṅki wuh samajh gae the ki tamsīl meṅ bayānshudā muzāre ham hī haiṅ. lekin wuh awām se ḍarte the.

²⁰chunāṅche wuh use pakaṛne kā mauqā ḍhūṅḍte rahe. is maqsad ke taht unhoṅ ne us ke pās jāsūs bhej die. yih log apne āp ko diyānatdār zāhir karke īsā ke pās āe tāki us kī koī bāt pakaṛ kar use romī gawarnar ke hawāle kar sakeṅ.

²¹in jāsūsoṅ ne us se pūchhā, “ustād, ham jānte haiṅ ki āp wuhī kuchh bayān karte aur sikhāte haiṅ jo sahīh hai. āp jānibdār nahīṅ hote balki diyānatdārī se allāh kī rāh kī tālīm dete haiṅ.

²²ab hameṅ batāeṅ ki kyā romī shahanshāh ko ṭaiks denā jāiz hai yā nājāiz?”

²³lekin īsā ne un kī chālākī bhāṅp lī aur kahā,

²⁴“mujhe chāṅdī kā ek romī sikkā dikhāo. kis kī sūrat aur nām is par kandā hai?” unhoṅ ne jawāb diyā, “shahanshāh kā.”

²⁵us ne kahā, “to jo shahanshāh kā hai shahanshāh ko do aur jo allāh kā hai allāh ko.”

²⁶yūṅ wuh awām ke sāmne us kī koī bāt pakaṛne meṅ nākām rahe. us kā jawāb sun kar wuh hakkā-bakkā rah gae aur mazīd koī bāt na kar sake.

²⁷phir kuchh sadūqī us ke pās āe. sadūqī nahīṅ mānte ki roz-e-qiyāmat murde jī uṭheṅge. unhoṅ ne īsā se ek sawāl kiyā,

²⁸“ustād, mūsā ne hameṅ hukm diyā ki agar koī shādīshudā ādmī beaulād mar jāe aur us kā bhāī ho to bhāī kā farz hai ki wuh bewā se shādī karke apne bhāī ke lie aulād paidā kare.

²⁹ab farz kareṅ ki sāt bhāī the. pahle ne shādī kī, lekin beaulād faut huā.

³⁰is par dūsre ne us se shādī kī, lekin wuh bhī beaulād mar gayā.

³¹phir tīsre ne us se shādī kī. yih silsilā sātweṅ bhāī tak jārī rahā. yake bād dīgare har bhāī bewā se shādī karne ke bād mar gayā.

³²āḳhir meṅ bewā bhī faut ho gaī.

³³ab batāeṅ ki qiyāmat ke din wuh kis kī bīwī hogī? kyūṅki sāt ke sāt bhāiyoṅ ne us se shādī kī thī.”

³⁴īsā ne jawāb diyā, “is zamāne meṅ log byāh-shādī karte aur karāte haiṅ.

³⁵lekin jinheṅ allāh āne wāle zamāne meṅ sharīk hone aur murdoṅ meṅ se jī uṭhne ke lāiq samajhtā hai wuh us waqt shādī nahīṅ kareṅge, na un kī shādī kisī se karāī jāegī.

³⁶wuh mar bhī nahīṅ sakeṅge, kyūṅki wuh farishtoṅ kī mānind hoṅge aur qiyāmat ke farzand hone ke bāis allāh ke farzand hoṅge.

³⁷aur yih bāt ki murde jī uṭheṅge mūsā se bhī zāhir kī gaī hai. kyūṅki jab wuh kāṅṭedār jhāṛī ke pās āyā to us ne rab ko yih nām diyā, ‘ibrāhīm kā ḳhudā, is'hāq kā ḳhudā aur yāqūb kā ḳhudā,’ hālāṅki us waqt tīnoṅ bahut pahle mar chuke the. is kā matlab hai ki yih haqīqat meṅ zindā haiṅ.

³⁸kyūṅki allāh murdoṅ kā nahīṅ balki zindoṅ kā ḳhudā hai. us ke nazdīk yih sab zindā haiṅ.”

³⁹yih sun kar sharīat ke kuchh ulamā ne kahā, “shābāsh ustād, āp ne achchhā kahā hai.”

⁴⁰is ke bād unhoṅ ne us se koī bhī sawāl karne kī jur'at na kī.

⁴¹phir īsā ne un se pūchhā, “masīh ke bāre meṅ kyūṅ kahā jātā hai ki wuh dāūd kā farzand hai?

⁴²kyūṅki dāūd ḳhud zabūr kī kitāb meṅ farmātā hai, ‘rab ne mere rab se kahā, mere dahne hāth baiṭh,

⁴³jab tak maiṅ tere dushmanoṅ ko tere pāoṅ kī chaukī na banā dūṅ.’

⁴⁴dāūd to ḳhud masīh ko rab kahtā hai. to phir wuh kis tarah dāūd kā farzand ho saktā hai?”

⁴⁵jab log sun rahe the to us ne apne shāgirdoṅ se kahā,

⁴⁶“sharīat ke ulamā se ḳhabardār raho! kyūṅki wuh shāndār choġhe pahan kar idhar udhar phirnā pasand karte haiṅ. jab log bāzāroṅ meṅ salām karke un kī izzat karte haiṅ to phir wuh ḳhush ho jāte haiṅ. un kī bas ek hī ḳhwāhish hotī hai ki ibādatḳhānoṅ aur ziyāfatoṅ meṅ izzat kī kursiyoṅ par baiṭh jāeṅ.

⁴⁷yih log bewāoṅ ke ghar haṛap kar jāte aur sāth sāth dikhāwe ke lie lambī lambī duāeṅ māṅgte haiṅ. aise logoṅ ko nihāyat saḳht sazā milegī.”