Read Roman Urdu Geo lūqā 21 Bible Online

lūqā 21 - Roman Urdu Geo bible

lūqā 21

¹īsā ne nazar uṭhā kar dekhā ki amīr log apne hadie bait-ul-muqaddas ke chande ke baks meṅ ḍāl rahe haiṅ.

²ek ġharīb bewā bhī wahāṅ se guzarī jis ne us meṅ tāṅbe ke do māmūlī se sikke ḍāl die.

³īsā ne kahā, “maiṅ tum ko sach batātā hūṅ ki is ġharīb bewā ne tamām logoṅ kī nisbat zyādā ḍālā hai.

⁴kyūṅki in sab ne to apnī daulat kī kasrat se kuchh ḍālā jabki is ne zarūratmand hone ke bāwujūd bhī apne guzāre ke sāre paise de die haiṅ.”

⁵us waqt kuchh log bait-ul-muqaddas kī tārīf meṅ kahne lage ki wuh kitne ḳhūbsūrat pattharoṅ aur mannat ke tohfoṅ se sajī huī hai. yih sun kar īsā ne kahā,

⁶“jo kuchh tum ko yahāṅ nazar ātā hai us kā patthar par patthar nahīṅ rahegā. āne wāle dinoṅ meṅ sab kuchh ḍhā diyā jāegā.”

⁷unhoṅ ne pūchhā, “ustād, yih kab hogā? kyā kyā nazar āegā jis se mālūm ho ki yih ab hone ko hai?”

⁸īsā ne jawāb diyā, “ḳhabardār raho ki koī tumheṅ gumrāh na kar de. kyūṅki bahut se log merā nām le kar āeṅge aur kaheṅge, ‘maiṅ hī masīh hūṅ’ aur ki ‘waqt qarīb ā chukā hai.’ lekin un ke pīchhe na lagnā.

⁹aur jab jangoṅ aur fitnoṅ kī ḳhabreṅ tum tak pahuṅcheṅgī to mat ghabrānā. kyūṅki lāzim hai ki yih sab kuchh pahle pesh āe. to bhī abhī āḳhirat na hogī.”

¹⁰us ne apnī bāt jārī rakhī, “ek qaum dūsrī ke ḳhilāf uṭh khaṛī hogī, aur ek bādshāhī dūsrī ke ḳhilāf.

¹¹shadīd zalzale āeṅge, jagah jagah kāl paṛeṅge aur wabāī bīmāriyāṅ phail jāeṅgī. haibatnāk wāqiāt aur āsmān par baṛe nishān deḳhne meṅ āeṅge.

¹²lekin in tamām wāqiāt se pahle log tum ko pakaṛ kar satāeṅge. wuh tum ko yahūdī ibādatḳhānoṅ ke hawāle kareṅge, qaidḳhānoṅ meṅ ḍalwāeṅge aur bādshāhoṅ aur hukmrānoṅ ke sāmne pesh kareṅge. aur yih is lie hogā ki tum mere pairokār ho.

¹³natīje meṅ tumheṅ merī gawāhī dene kā mauqā milegā.

¹⁴lekin ṭhān lo ki tum pahle se apnā difā karne kī tayyārī na karo,

¹⁵kyūṅki maiṅ tum ko aise alfāz aur hikmat atā karūṅga ki tumhāre tamām muḳhālif na us kā muqābalā aur na us kī tardīd kar sakeṅge.

¹⁶tumhāre wālidain, bhāī, rishtedār aur dost bhī tum ko dushman ke hawāle kar deṅge, balki tum meṅ se bāz ko qatl kiyā jāegā.

¹⁷sab tum se nafrat kareṅge, is lie ki tum mere pairokār ho.

¹⁸to bhī tumhārā ek bāl bhī bīkā nahīṅ hogā.

¹⁹sābitqadam rahne se hī tum apnī jān bachā loge.

²⁰jab tum yarūshalam ko faujoṅ se ghirā huā dekho to jān lo ki us kī tabāhī qarīb ā chukī hai.

²¹us waqt yahūdiyā ke bāshinde bhāg kar pahāṛī ilāqe meṅ panāh leṅ. shahr ke rahne wāle us se nikal jāeṅ aur dehāt meṅ ābād log shahr meṅ dāḳhil na hoṅ.

²²kyūṅki yih ilāhī ġhazab ke din hoṅge jin meṅ wuh sab kuchh pūrā ho jāegā jo kalām-e-muqaddas meṅ likhā hai.

²³un ḳhawātīn par afsos jo un dinoṅ meṅ hāmilā hoṅ yā apne bachchoṅ ko dūdh pilātī hoṅ, kyūṅki mulk meṅ bahut musībat hogī aur is qaum par allāh kā ġhazab nāzil hogā.

²⁴log unheṅ talwār se qatl kareṅge aur qaid karke tamām ġhairyahūdī mamālik meṅ le jāeṅge. ġhairyahūdī yarūshalam ko pāoṅ tale kuchal ḍāleṅge. yih silsilā us waqt tak jārī rahegā jab tak ġhairyahūdiyoṅ kā daur pūrā na ho jāe.

²⁵sūraj, chāṅd aur sitāroṅ meṅ ajīb-o-ġharīb nishān zāhir hoṅge. qaumeṅ samundar ke shor aur ṭhāṭheṅ mārne se hairān-o-pareshān hoṅgī.

²⁶log is andeshe se ki kyā kyā musībat duniyā par āegī is qadar ḳhauf khāeṅge ki un kī jān meṅ jān na rahegī, kyūṅki āsmān kī quwwateṅ hilāī jāeṅgī.

²⁷aur phir wuh ibn-e-ādam ko baṛī qudrat aur jalāl ke sāth bādal meṅ āte hue dekheṅge.

²⁸chunāṅche jab yih kuchh pesh āne lage to sīdhe khaṛe ho kar apnī nazar uṭhāo, kyūṅki tumhārī najāt nazdīk hogī.”

²⁹is silsile meṅ īsā ne unheṅ ek tamsīl sunāī. “anjīr ke daraḳht aur bāqī daraḳhtoṅ par ġhaur karo.

³⁰jūṅ hī koṅpleṅ nikalne lagtī haiṅ tum jān lete ho ki garmiyoṅ kā mausam nazdīk hai.

³¹isī tarah jab tum yih wāqiāt dekhoge to jān loge ki allāh kī bādshāhī qarīb hī hai.

³²maiṅ tum ko sach batātā hūṅ ki is nasl ke ḳhatm hone se pahle pahle yih sab kuchh wāqe hogā.

³³āsmān-o-zamīn to jāte raheṅge, lekin merī bāteṅ hameshā tak qāim raheṅgī.

³⁴ḳhabardār raho tāki tumhāre dil ayyāshī, nashābāzī aur rozānā kī fikroṅ tale dab na jāeṅ. warnā yih din achānak tum par ān paṛegā,

³⁵aur phande kī tarah tumheṅ jakaṛ legā. kyūṅki wuh duniyā ke tamām bāshindoṅ par āegā.

³⁶har waqt chaukas raho aur duā karte raho ki tum ko āne wālī in sab bātoṅ se bach nikalne kī taufīq mil jāe aur tum ibn-e-ādam ke sāmne khaṛe ho sako.”

³⁷har roz īsā bait-ul-muqaddas meṅ tālīm detā rahā aur har shām wuh nikal kar us pahāṛ par rāt guzārtā thā jis kā nām zaitūn kā pahāṛ hai.

³⁸aur tamām log us kī bāteṅ sunane ke lie subhsawere bait-ul-muqaddas meṅ us ke pās āte the.