Read Roman Urdu Geo lūqā 22 Bible Online

lūqā 22 - Roman Urdu Geo bible

lūqā 22

¹beḳhamīrī roṭī kī īd yānī fasah kī īd qarīb ā gaī thī.

²rāhnumā imām aur sharīat ke ulamā īsā ko qatl karne kā koī mauzūṅ mauqā ḍhūnḍ rahe the, kyūṅki wuh awām ke radd-e-amal se ḍarte the.

³us waqt iblīs yahūdāh iskariyotī meṅ samā gayā jo bārah rasūloṅ meṅ se thā.

⁴ab wuh rāhnumā imāmoṅ aur bait-ul-muqaddas ke pahredāroṅ ke afsaroṅ se milā aur un se bāt karne lagā ki wuh īsā ko kis tarah un ke hawāle kar sakegā.

⁵wuh ḳhush hue aur use paise dene par muttafiq hue.

⁶yahūdāh razāmand huā. ab se wuh is talāsh meṅ rahā ki īsā ko aise mauqe par un ke hawāle kare jab hujūm us ke pās na ho.

⁷beḳhamīrī roṭī kī īd āī jab fasah ke lele ko qurbān karnā thā.

⁸īsā ne patras aur yūhannā ko āge bhej kar hidāyat kī, “jāo, hamāre lie fasah kā khānā tayyār karo tāki ham jā kar use khā sakeṅ.”

⁹unhoṅ ne pūchhā, “ham use kahāṅ tayyār kareṅ?”

¹⁰us ne jawāb diyā, “jab tum shahr meṅ dāḳhil hoge to tumhārī mulāqāt ek ādmī se hogī jo pānī kā ghaṛā uṭhāe chal rahā hogā. us ke pīchhe chal kar us ghar meṅ dāḳhil ho jāo jis meṅ wuh jāegā.

¹¹wahāṅ ke mālik se kahnā, ‘ustād āp se pūchhte haiṅ ki wuh kamrā kahāṅ hai jahāṅ maiṅ apne shāgirdoṅ ke sāth fasah kā khānā khāūṅ?’

¹²wuh tum ko dūsrī manzil par ek baṛā aur sajā huā kamrā dikhāegā. fasah kā khānā wahīṅ tayyār karnā.”

¹³donoṅ chale gae to sab kuchh waisā hī pāyā jaisā īsā ne unheṅ batāyā thā. phir unhoṅ ne fasah kā khānā tayyār kiyā.

¹⁴muqarrarā waqt par īsā apne shāgirdoṅ ke sāth khāne ke lie baiṭh gayā.

¹⁵us ne un se kahā, “merī shadīd ārzū thī ki dukh uṭhāne se pahle tumhāre sāth mil kar fasah kā yih khānā khāūṅ.

¹⁶kyūṅki maiṅ tum ko batātā hūṅ ki us waqt tak is khāne meṅ sharīk nahīṅ hūṅgā jab tak is kā maqsad allāh kī bādshāhī meṅ pūrā na ho gayā ho.”

¹⁷phir us ne mai kā pyālā le kar shukrguzārī kī duā kī aur kahā, “is ko le kar āpas meṅ bāṅṭ lo.

¹⁸maiṅ tum ko batātā hūṅ ki ab se maiṅ angūr kā ras nahīṅ piyūṅgā, kyūṅki aglī dafā ise allāh kī bādshāhī ke āne par piyūṅgā.”

¹⁹phir us ne roṭī le kar shukrguzārī kī duā kī aur use ṭukṛe karke unheṅ de diyā. us ne kahā, “yih merā badan hai, jo tumhāre lie diyā jātā hai. mujhe yād karne ke lie yihī kiyā karo.”

²⁰isī tarah us ne khāne ke bād pyālā le kar kahā, “mai kā yih pyālā wuh nayā ahd hai jo mere ḳhūn ke zarī'e qāim kiyā jātā hai, wuh ḳhūn jo tumhāre lie bahāyā jātā hai.

²¹lekin jis shaḳhs kā hāth mere sāth khānā khāne meṅ sharīk hai wuh mujhe dushman ke hawāle kar degā.

²²ibn-e-ādam to allāh kī marzī ke mutābiq kūch kar jāegā, lekin us shaḳhs par afsos jis ke wasīle se use dushman ke hawāle kar diyā jāegā.”

²³yih sun kar shāgird ek dūsre se bahs karne lage ki ham meṅ se yih kaun ho saktā hai jo is qism kī harkat karegā.

²⁴phir ek aur bāt bhī chhiṛ gaī. wuh ek dūsre se bahs karne lage ki ham meṅ se kaun sab se baṛā samjhā jāe.

²⁵lekin īsā ne un se kahā, “ġhairyahūdī qaumoṅ meṅ bādshāh wuhī haiṅ jo dūsroṅ par hukūmat karte haiṅ, aur iḳhtiyār wāle wuhī haiṅ jinheṅ ‘mohsin’ kā laqab diyā jātā hai.

²⁶lekin tum ko aisā nahīṅ honā chāhie. is ke bajāe jo sab se baṛā hai wuh sab se chhoṭe laṛke kī mānind ho aur jo rāhnumāī kartā hai wuh naukar jaisā ho.

²⁷kyūṅki ām taur par kaun zyādā baṛā hotā hai, wuh jo khāne ke lie baiṭhā hai yā wuh jo logoṅ kī ḳhidmat ke lie hāzir hotā hai? kyā wuh nahīṅ jo khāne ke lie baiṭhā hai? beshak. lekin maiṅ ḳhidmat karne wāle kī haisiyat se hī tumhāre darmiyān hūṅ.

²⁸dekho, tum wuhī ho jo merī tamām āzmāishoṅ ke daurān mere sāth rahe ho.

²⁹chunāṅche meṅ tum ko bādshāhī atā kartā hūṅ jis tarah bāp ne mujhe bhī bādshāhī atā kī hai.

³⁰tum merī bādshāhī meṅ merī mez par baiṭh kar mere sāth khāo aur piyoge, aur taḳhtoṅ par baiṭh kar isrāīl ke bārah qabīloṅ kā insāf karoge.

³¹shamāūn, shamāūn! iblīs ne tum logoṅ ko gandum kī tarah phaṭakne kā mutālabā kiyā hai.

³²lekin maiṅ ne tere lie duā kī hai tāki terā īmān jātā na rahe. aur jab tū muṛ kar wāpas āe to us waqt apne bhāiyoṅ ko mazbūt karnā.”

³³patras ne jawāb diyā, “ḳhudāwand, maiṅ to āp ke sāth jel meṅ bhī jāne balki marne ko tayyār hūṅ.”

³⁴īsā ne kahā, “patras, maiṅ tujhe batātā hūṅ ki kal subh murġh ke bāṅg dene se pahle pahle tū tīn bār mujhe jānane se inkār kar chukā hogā.”

³⁵phir us ne un se pūchhā, “jab maiṅ ne tum ko baṭwe, sāmān ke lie baig aur jūtoṅ ke baġhair bhej diyā to kyā tum kisī bhī chīz se mahrūm rahe?” unhoṅ ne jawāb diyā, “kisī se nahīṅ.”

³⁶us ne kahā, “lekin ab jis ke pās baṭwā yā baig ho wuh use sāth le jāe, balki jis ke pās talwār na ho wuh apnī chādar bech kar talwār ḳharīd le.

³⁷kalām-e-muqaddas meṅ likhā hai, ‘use mujrimoṅ meṅ shumār kiyā gayā’ aur maiṅ tum ko batātā hūṅ, lāzim hai ki yih bāt mujh meṅ pūrī ho jāe. kyūṅki jo kuchh mere bāre meṅ likhā hai use pūrā hī honā hai.”

³⁸unhoṅ ne kahā, “ḳhudāwand, yahāṅ do talwāreṅ haiṅ.” us ne kahā, “bas! kāfī hai!”

³⁹phir wuh shahr se nikal kar māmūl ke mutābiq zaitūn ke pahāṛ kī taraf chal diyā. us ke shāgird us ke pīchhe ho lie.

⁴⁰wahāṅ pahuṅch kar us ne un se kahā, “duā karo tāki āzmāish meṅ na paṛo.”

⁴¹phir wuh unheṅ chhoṛ kar kuchh āge niklā, taqrīban itne fāsile par jitnī dūr tak patthar phaiṅkā jā saktā hai. wahāṅ wuh jhuk kar duā karne lagā,

⁴²“ai bāp, agar tū chāhe to yih pyālā mujh se haṭā le. lekin merī nahīṅ balki terī marzī pūrī ho.”

⁴³us waqt ek farishte ne āsmān par se us par zāhir ho kar us ko taqwiyat dī.

⁴⁴wuh saḳht pareshān ho kar zyādā dilsozī se duā karne lagā. sāth sāth us kā pasīnā ḳhūn kī būṅdoṅ kī tarah zamīn par ṭapakne lagā.

⁴⁵jab wuh duā se fāriġh ho kar khaṛā huā aur shāgirdoṅ ke pās wāpas āyā to dekhā ki wuh ġham ke māre so gae haiṅ.

⁴⁶us ne un se kahā, “tum kyūṅ so rahe ho? uṭh kar duā karte raho tāki āzmāish meṅ na paṛo.”

⁴⁷wuh abhī yih bāt kar hī rahā thā ki ek hujūm ā pahuṅchā jis ke āge āge yahūdāh chal rahā thā. wuh īsā ko bosā dene ke lie us ke pās āyā.

⁴⁸lekin us ne kahā, “yahūdāh, kyā tū ibn-e-ādam ko bosā de kar dushman ke hawāle kar rahā hai?”

⁴⁹jab us ke sāthiyoṅ ne bhāṅp liyā ki ab kyā hone wālā hai to unhoṅ ne kahā, “ḳhudāwand, kyā ham talwār chalāeṅ?”

⁵⁰aur un meṅ se ek ne apnī talwār se imām-e-āzam ke ġhulām kā dahnā kān uṛā diyā.

⁵¹lekin īsā ne kahā, “bas kar!” us ne ġhulām kā kān chhū kar use shifā dī.

⁵²phir wuh un rāhnumā imāmoṅ, bait-ul-muqaddas ke pahredāroṅ ke afsaroṅ aur buzurgoṅ se muḳhātib huā jo us ke pās āe the, “kyā maiṅ ḍākū hūṅ ki tum talwāreṅ aur lāṭhiyāṅ lie mere ḳhilāf nikle ho?

⁵³maiṅ to rozānā bait-ul-muqaddas meṅ tumhāre pās thā, magar tum ne wahāṅ mujhe hāth nahīṅ lagāyā. lekin ab yih tumhārā waqt hai, wuh waqt jab tārīkī hukūmat kartī hai.”

⁵⁴phir wuh use giriftār karke imām-e-āzam ke ghar le gae. patras kuchh fāsile par un ke pīchhe pīchhe wahāṅ pahuṅch gayā.

⁵⁵log sahan meṅ āg jalā kar us ke irdgird baiṭh gae. patras bhī un ke darmiyān baiṭh gayā.

⁵⁶kisī naukarānī ne use wahāṅ āg ke pās baiṭhe hue dekhā. us ne use ghūr kar kahā, “yih bhī us ke sāth thā.”

⁵⁷lekin us ne inkār kiyā, “ḳhātūn, maiṅ use nahīṅ jāntā.”

⁵⁸thoṛī der ke bād kisī ādmī ne use dekhā aur kahā, “tum bhī un meṅ se ho.” lekin patras ne jawāb diyā, “nahīṅ bhaī! maiṅ nahīṅ hūṅ.”

⁵⁹taqrīban ek ghanṭā guzar gayā to kisī aur ne isrār karke kahā, “yih ādmī yaqīnan us ke sāth thā, kyūṅki yih bhī galīl kā rahne wālā hai.”

⁶⁰lekin patras ne jawāb diyā, “yār, maiṅ nahīṅ jāntā ki tum kyā kah rahe ho!” wuh abhī bāt kar hī rahā thā ki achānak murġh kī bāṅg sunāī dī.

⁶¹ḳhudāwand ne muṛ kar patras par nazar ḍālī. phir patras ko ḳhudāwand kī wuh bāt yād āī jo us ne us se kahī thī ki “kal subh murġh ke bāṅg dene se pahle pahle tū tīn bār mujhe jānane se inkār kar chukā hogā.”

⁶²patras wahāṅ se nikal kar ṭūṭe dil se ḳhūb royā.

⁶³pahredār īsā kā mazāq uṛāne aur us kī piṭāī karne lage.

⁶⁴unhoṅ ne us kī āṅkhoṅ par paṭṭī bāndh kar pūchhā, “nabuwwat kar ki kis ne tujhe mārā?”

⁶⁵is tarah kī aur bahut sī bātoṅ se wuh us kī be'izzatī karte rahe.

⁶⁶jab din chaṛhā to rāhnumā imāmoṅ aur sharīat ke ulamā par mushtamil qaum kī majlis ne jamā ho kar use yahūdī adālat-e-āliyā meṅ pesh kiyā.

⁶⁷unhoṅ ne kahā, “agar tū masīh hai to hameṅ batā!” īsā ne jawāb diyā, “agar maiṅ tum ko batāūṅ to tum merī bāt nahīṅ mānoge,

⁶⁸aur agar tum se pūchhūṅ to tum jawāb nahīṅ doge.

⁶⁹lekin ab se ibn-e-ādam allāh t'ālā ke dahne hāth baiṭhā hogā.”

⁷⁰sab ne pūchhā, “to phir kyā tū allāh kā farzand hai?” us ne jawāb diyā, “jī, tum ḳhud kahte ho.”

⁷¹is par unhoṅ ne kahā, “ab hameṅ kisī aur gawāhī kī kyā zarūrat rahī? kyūṅki ham ne yih bāt us ke apne muṅh se sun lī hai.”