Read Roman Urdu Geo lūqā 23 Bible Online

lūqā 23 - Roman Urdu Geo bible

lūqā 23

¹phir pūrī majlis uṭhī aur use pīlātus ke pās le āī.

²wahāṅ wuh us par ilzām lagā kar kahne lage, “ham ne mālūm kiyā hai ki yih ādmī hamārī qaum ko gumrāh kar rahā hai. yih shahanshāh ko ṭaiks dene se manā kartā aur dāwā kartā hai ki maiṅ masīh aur bādshāh hūṅ.”

³pīlātus ne us se pūchhā, “achchhā, tum yahūdiyoṅ ke bādshāh ho?” īsā ne jawāb diyā, “jī, āp ḳhud kahte haiṅ.”

⁴phir pīlātus ne rāhnumā imāmoṅ aur hujūm se kahā, “mujhe is ādmī par ilzām lagāne kī koī wajah nazar nahīṅ ātī.”

⁵lekin wuh aṛe rahe. unhoṅ ne kahā, “wuh pūre yahūdiyā meṅ tālīm dete hue qaum ko uksātā hai. wuh galīl se shurū karke yahāṅ tak ā pahuṅchā hai.”

⁶yih sun kar pīlātus ne pūchhā, “kyā yih shaḳhs galīl kā hai?”

⁷jab use mālūm huā ki īsā galīl yānī us ilāqe se hai jis par herodes antipās kī hukūmat hai to us ne use herodes ke pās bhej diyā, kyūṅki wuh bhī us waqt yarūshalam meṅ thā.

⁸herodes īsā ko dekh kar bahut ḳhush huā, kyūṅki us ne us ke bāre meṅ bahut kuchh sunā thā aur is lie kāfī der se us se milnā chāhtā thā. ab us kī baṛī ḳhwāhish thī ki īsā ko koī mojizā karte hue dekh sake.

⁹us ne us se bahut sāre sawāl kie, lekin īsā ne ek kā bhī jawāb na diyā.

¹⁰rāhnumā imām aur sharīat ke ulamā sāth khaṛe baṛe josh se us par ilzām lagāte rahe.

¹¹phir herodes aur us ke faujiyoṅ ne us kī tahqīr karte hue us kā mazāq uṛāyā aur use chamakdār libās pahnā kar pīlātus ke pās wāpas bhej diyā.

¹²usī din herodes aur pīlātus dost ban gae. kyūṅki is se pahle un kī dushmanī chal rahī thī.

¹³phir pīlātus ne rāhnumā imāmoṅ, sardāroṅ aur awām ko jamā karke

¹⁴un se kahā, “tum ne is shaḳhs ko mere pās lā kar is par ilzām lagāyā hai ki yih qaum ko uksā rahā hai. maiṅ ne tumhārī maujūdagī meṅ is kā jāizā le kar aisā kuchh nahīṅ pāyā jo tumhāre ilzāmāt kī tasdīq kare.

¹⁵herodes bhī kuchh nahīṅ mālūm kar sakā, is lie us ne ise hamāre pās wāpas bhej diyā hai. is ādmī se koī bhī aisā qusūr nahīṅ huā ki yih sazā-e-maut ke lāiq hai.

¹⁶is lie maiṅ ise koṛoṅ kī sazā de kar rihā kar detā hūṅ.”

¹⁷[asl meṅ yih us kā farz thā ki wuh īd ke mauqe par un kī ḳhātir ek qaidī ko rihā kar de.]

¹⁸lekin sab mil kar shor machā kar kahne lage, “ise le jāeṅ! ise nahīṅ balki bar-abbā ko rihā karke hameṅ deṅ.”

¹⁹(bar-abbā ko is lie jel meṅ ḍālā gayā thā ki wuh qātil thā aur us ne shahr meṅ hukūmat ke ḳhilāf baġhāwat kī thī.)

²⁰pīlātus īsā ko rihā karnā chāhtā thā, is lie wuh dubārā un se muḳhātib huā.

²¹lekin wuh chillāte rahe, “ise maslūb kareṅ, ise maslūb kareṅ.”

²²phir pīlātus ne tīsrī dafā un se kahā, “kyūṅ? us ne kyā jurm kiyā hai? mujhe ise sazā-e-maut dene kī koī wajah nazar nahīṅ ātī. is lie maiṅ ise koṛe lagwā kar rihā kar detā hūṅ.”

²³lekin wuh baṛā shor machā kar use maslūb karne kā taqāzā karte rahe, aur āḳhirkār un kī āwāzeṅ ġhālib ā gaīṅ.

²⁴phir pīlātus ne faislā kiyā ki un kā mutālabā pūrā kiyā jāe.

²⁵us ne us ādmī ko rihā kar diyā jo apnī bāġhiyānā harkatoṅ aur qatl kī wajah se jel meṅ ḍāl diyā gayā thā jabki īsā ko us ne un kī marzī ke mutābiq un ke hawāle kar diyā.

²⁶jab faujī īsā ko le jā rahe the to unhoṅ ne ek ādmī ko pakaṛ liyā jo libiyā ke shahr kuren kā rahne wālā thā. us kā nām shamāūn thā. us waqt wuh dehāt se shahr meṅ dāḳhil ho rahā thā. unhoṅ ne salīb ko us ke kandhoṅ par rakh kar use īsā ke pīchhe chalne kā hukm diyā.

²⁷ek baṛā hujūm us ke pīchhe ho liyā jis meṅ kuchh aisī aurateṅ bhī shāmil thīṅ jo sīnā pīṭ pīṭ kar us kā mātam kar rahī thīṅ.

²⁸īsā ne muṛ kar un se kahā, “yarūshalam kī beṭiyo! mere wāste na ro'o balki apne aur apne bachchoṅ ke wāste ro'o.

²⁹kyūṅki aise din āeṅge jab log kaheṅge, ‘mubārak haiṅ wuh jo bāṅjh haiṅ, jinhoṅ ne na to bachchoṅ ko janm diyā, na dūdh pilāyā.’

³⁰phir log pahāṛoṅ se kahne lageṅge, ‘ham par gir paṛo,’ aur pahāṛiyoṅ se ki ‘hameṅ chhupā lo.’

³¹kyūṅki agar harī lakaṛī se aisā sulūk kiyā jātā hai to phir sūkhī lakaṛī kā kyā banegā?”

³²do aur mardoṅ ko bhī phāṅsī dene ke lie bāhar le jāyā jā rahā thā. donoṅ mujrim the.

³³chalte chalte wuh us jagah pahuṅche jis kā nām khopaṛī thā. wahāṅ unhoṅ ne īsā ko donoṅ mujrimoṅ samet maslūb kiyā. ek mujrim ko us ke dāeṅ hāth aur dūsre ko us ke bāeṅ hāth laṭkā diyā gayā.

³⁴īsā ne kahā, “ai bāp, inheṅ muāf kar, kyūṅki yih jānte nahīṅ ki kyā kar rahe haiṅ.” unhoṅ ne qur'ā ḍāl kar us ke kapṛe āpas meṅ bāṅṭ lie.

³⁵hujūm wahāṅ khaṛā tamāshā deḳhtā rahā jabki qaum ke sardāroṅ ne us kā mazāq bhī uṛāyā. unhoṅ ne kahā, “us ne auroṅ ko bachāyā hai. agar yih allāh kā chunā huā aur masīh hai to apne āp ko bachāe.”

³⁶faujiyoṅ ne bhī use lān-tān kī. us ke pās ā kar unhoṅ ne use mai kā sirkā pesh kiyā

³⁷aur kahā, “agar tū yahūdiyoṅ kā bādshāh hai to apne āp ko bachā le.”

³⁸us ke sar ke ūpar ek taḳhtī lagāī gaī thī jis par likhā thā, “yih yahūdiyoṅ kā bādshāh hai.”

³⁹jo mujrim us ke sāth maslūb hue the un meṅ se ek ne kufr bakte hue kahā, “kyā tū masīh nahīṅ hai? to phir apne āp ko aur hameṅ bhī bachā le.”

⁴⁰lekin dūsre ne yih sun kar use ḍānṭā, “kyā tū allāh se bhī nahīṅ ḍartā? jo sazā use dī gaī hai wuh tujhe bhī milī hai.

⁴¹hamārī sazā to wājibī hai, kyūṅki hameṅ apne kāmoṅ kā badlā mil rahā hai, lekin is ne koī burā kām nahīṅ kiyā.”

⁴²phir us ne īsā se kahā, “jab āp apnī bādshāhī meṅ āeṅ to mujhe yād kareṅ.”

⁴³īsā ne us se kahā, “maiṅ tujhe sach batātā hūṅ ki tū āj hī mere sāth firdaus meṅ hogā.”

⁴⁴bārah baje se dopahar tīn baje tak pūrā mulk andhere meṅ ḍūb gayā.

⁴⁵sūraj tārīk ho gayā aur bait-ul-muqaddas ke muqaddastarīn kamre ke sāmne laṭkā huā pardā do hissoṅ meṅ phaṭ gayā.

⁴⁶īsā ūṅchī āwāz se pukār uṭhā, “ai bāp, maiṅ apnī rūh tere hāthoṅ meṅ sauṅptā hūṅ.” yih kah kar us ne dam chhoṛ diyā.

⁴⁷yih dekh kar wahāṅ khaṛe faujī afsar [4] ne allāh kī tamjīd karke kahā, “yih ādmī wāqaī rāstbāz thā.”

⁴⁸aur hujūm ke tamām log jo yih tamāshā deḳhne ke lie jamā hue the yih sab kuchh dekh kar chhātī pīṭne lage aur shahr meṅ wāpas chale gae.

⁴⁹lekin īsā ke jānane wāle kuchh fāsile par khaṛe deḳhte rahe. un meṅ wuh ḳhawātīn bhī shāmil thīṅ jo galīl meṅ us ke pīchhe chal kar yahāṅ tak us ke sāth āī thīṅ.

⁵⁰wahāṅ ek nek aur rāstbāz ādmī banām yūsuf thā. wuh yahūdī adālat-e-āliyā kā rukn thā

⁵¹lekin dūsroṅ ke faisle aur harkatoṅ par razāmand nahīṅ huā thā. yih ādmī yahūdiyā ke shahr arimatiyāh kā rahne wālā thā aur is intizār meṅ thā ki allāh kī bādshāhī āe.

⁵²ab us ne pīlātus ke pās jā kar us se īsā kī lāsh le jāne kī ijāzat māṅgī.

⁵³phir lāsh ko utār kar us ne use katān ke kafan meṅ lapeṭ kar chaṭān meṅ tarāshī huī ek qabr meṅ rakh diyā jis meṅ ab tak kisī ko dafnāyā nahīṅ gayā thā.

⁵⁴yih tayyārī kā din yānī jum'ā thā, lekin sabat kā din shurū hone ko thā. [5]

⁵⁵jo aurateṅ īsā ke sāth galīl se āī thīṅ wuh yūsuf ke pīchhe ho līṅ. unhoṅ ne qabr ko dekhā aur yih bhī ki īsā kī lāsh kis tarah us meṅ rakhī gaī hai.

⁵⁶phir wuh shahr meṅ wāpas chalī gaīṅ aur us kī lāsh ke lie ḳhushbūdār masāle tayyār karne lagīṅ. lekin bīch meṅ sabat kā din shurū huā, is lie unhoṅ ne sharīat ke mutābiq ārām kiyā.