Read Roman Urdu Geo lūqā 24 Bible Online

lūqā 24 - Roman Urdu Geo bible

lūqā 24

¹itwār ke din yih aurateṅ apne tayyārshudā masāle le kar subhsawere qabr par gaīṅ.

²wahāṅ pahuṅch kar unhoṅ ne dekhā ki qabr par kā patthar ek taraf luṛhkā huā hai.

³lekin jab wuh qabr meṅ gaīṅ to wahāṅ ḳhudāwand īsā kī lāsh na pāī.

⁴wuh abhī uljhan meṅ wahāṅ khaṛī thīṅ ki achānak do mard un ke pās ā khaṛe hue jin ke libās bijlī kī tarah chamak rahe the.

⁵aurateṅ dahshat khā kar muṅh ke bal jhuk gaīṅ, lekin un mardoṅ ne kahā, “tum kyūṅ zindā ko murdoṅ meṅ ḍhūnḍ rahī ho?

⁶wuh yahāṅ nahīṅ hai, wuh to jī uṭhā hai. wuh bāt yād karo jo us ne tum se us waqt kahī jab wuh galīl meṅ thā.

⁷‘lāzim hai ki ibn-e-ādam ko gunāhgāroṅ ke hawāle kar diyā jāe, maslūb kiyā jāe aur ki wuh tīsre din jī uṭhe’.”

⁸phir unheṅ yih bāt yād āī.

⁹aur qabr se wāpas ā kar unhoṅ ne yih sab kuchh gyārah rasūloṅ aur bāqī shāgirdoṅ ko sunā diyā.

¹⁰mariyam magdalīnī, yūannā, yāqūb kī māṅ mariyam aur chand ek aur aurateṅ un meṅ shāmil thīṅ jinhoṅ ne yih bāteṅ rasūloṅ ko batāīṅ.

¹¹lekin un ko yih bāteṅ betukī sī lag rahī thīṅ, is lie unheṅ yaqīn na āyā.

¹²to bhī patras uṭhā aur bhāg kar qabr ke pās āyā. jab pahuṅchā to jhuk kar andar jhāṅkā, lekin sirf kafan [6] hī nazar āyā. yih hālāt dekh kar wuh hairān huā aur chalā gayā.

¹³usī din īsā ke do pairokār ek gāoṅ banām immāus kī taraf chal rahe the. yih gāoṅ yarūshalam se taqrīban das kilomīṭar dūr thā.

¹⁴chalte chalte wuh āpas meṅ un wāqiāt kā zikr kar rahe the jo hue the.

¹⁵aur aisā huā ki jab wuh bāteṅ aur ek dūsre ke sāth bahs-mubāhasā kar rahe the to īsā ḳhud qarīb ā kar un ke sāth chalne lagā.

¹⁶lekin un kī āṅkhoṅ par pardā ḍālā gayā thā, is lie wuh use pahchān na sake.

¹⁷īsā ne kahā, “yih kaisī bāteṅ haiṅ jin ke bāre meṅ tum chalte chalte tabādalā-e-ḳhyāl kar rahe ho?” yih sun kar wuh ġhamgīn se khaṛe ho gae.

¹⁸un meṅ se ek banām kliyupās ne us se pūchhā, “kyā āp yarūshalam meṅ wāhid shaḳhs haiṅ jise mālūm nahīṅ ki in dinoṅ meṅ kyā kuchh huā hai?”

¹⁹us ne kahā, “kyā huā hai?” unhoṅ ne jawāb diyā, “wuh jo īsā nāsarī ke sāth huā hai. wuh nabī thā jise kalām aur kām meṅ allāh aur tamām qaum ke sāmne zabardast quwwat hāsil thī.

²⁰lekin hamāre rāhnumā imāmoṅ aur sardāroṅ ne use hukmrānoṅ ke hawāle kar diyā tāki use sazā-e-maut dī jāe, aur unhoṅ ne use maslūb kiyā.

²¹lekin hameṅ to ummīd thī ki wuhī isrāīl ko najāt degā. in wāqiāt ko tīn din ho gae haiṅ.

²²lekin ham meṅ se kuchh ḳhawātīn ne bhī hameṅ hairān kar diyā hai. wuh āj subhsawere qabr par gaīṅ

²³to dekhā ki lāsh wahāṅ nahīṅ hai. unhoṅ ne lauṭ kar hameṅ batāyā ki ham par farishte zāhir hue jinhoṅ ne kahā ki īsā zindā hai.

²⁴ham meṅ se kuchh qabr par gae aur use waisā hī pāyā jis tarah un auratoṅ ne kahā thā. lekin use ḳhud unhoṅ ne nahīṅ dekhā.”

²⁵phir īsā ne un se kahā, “are nādāno! tum kitne kundzahan ho ki tumheṅ un tamām bātoṅ par yaqīn nahīṅ āyā jo nabiyoṅ ne farmāī haiṅ.

²⁶kyā lāzim nahīṅ thā ki masīh yih sab kuchh jhel kar apne jalāl meṅ dāḳhil ho jāe?”

²⁷phir mūsā aur tamām nabiyoṅ se shurū karke īsā ne kalām-e-muqaddas kī har bāt kī tashrīh kī jahāṅ jahāṅ us kā zikr hai.

²⁸chalte chalte wuh us gāoṅ ke qarīb pahuṅche jahāṅ unheṅ jānā thā. īsā ne aisā kiyā goyā ki wuh āge baṛhnā chāhtā hai,

²⁹lekin unhoṅ ne use majbūr karke kahā, “hamāre pās ṭhahreṅ, kyūṅki shām hone ko hai aur din ḍhal gayā hai.” chunāṅche wuh un ke sāth ṭhaharne ke lie andar gayā.

³⁰aur aisā huā ki jab wuh khāne ke lie baiṭh gae to us ne roṭī le kar us ke lie shukrguzārī kī duā kī. phir us ne use ṭukṛe karke unheṅ diyā.

³¹achānak un kī āṅkheṅ khul gaīṅ aur unhoṅ ne use pahchān liyā. lekin usī lamhe wuh ojhal ho gayā.

³²phir wuh ek dūsre se kahne lage, “kyā hamāre dil josh se na bhar gae the jab wuh rāste meṅ ham se bāteṅ karte karte hameṅ sahīfoṅ kā matlab samjhā rahā thā?”

³³aur wuh usī waqt uṭh kar yarūshalam wāpas chale gae. jab wuh wahāṅ pahuṅche to gyārah rasūl apne sāthiyoṅ samet pahle se jamā the

³⁴aur yih kah rahe the, “ḳhudāwand wāqaī jī uṭhā hai! wuh shamāūn par zāhir huā hai.”

³⁵phir immāus ke do shāgirdoṅ ne unheṅ batāyā ki gāoṅ kī taraf jāte hue kyā huā thā aur ki īsā ke roṭī toṛte waqt unhoṅ ne use kaise pahchānā.

³⁶wuh abhī yih bāteṅ sunā rahe the ki īsā ḳhud un ke darmiyān ā khaṛā huā aur kahā, “tumhārī salāmatī ho.”

³⁷wuh ghabrā kar bahut ḍar gae. kyūṅki un kā ḳhayāl thā ki koī bhūt-pret dekh rahe haiṅ.

³⁸us ne un se kahā, “tum kyūṅ pareshān ho gae ho? kyā wajah hai ki tumhāre diloṅ meṅ shak ubhar āyā hai?

³⁹mere hāthoṅ aur pāoṅ ko dekho ki maiṅ hī hūṅ. mujhe ṭaṭol kar dekho, kyūṅki bhūt ke gosht aur haḍḍiyāṅ nahīṅ hotīṅ jabki tum dekh rahe ho ki merā jism hai.”

⁴⁰yih kah kar us ne unheṅ apne hāth aur pāoṅ dikhāe.

⁴¹jab unheṅ ḳhushī ke māre yaqīn nahīṅ ā rahā thā aur tājjub kar rahe the to īsā ne pūchhā, “kyā yahāṅ tumhāre pās koī khāne kī chīz hai?”

⁴²unhoṅ ne use bhunī huī machhlī kā ek ṭukṛā diyā

⁴³us ne use le kar un ke sāmne hī khā liyā.

⁴⁴phir us ne un se kahā, “yihī hai jo maiṅ ne tum ko us waqt batāyā thā jab tumhāre sāth thā ki jo kuchh bhī mūsā kī sharīat, nabiyoṅ ke sahīfoṅ aur zabūr kī kitāb meṅ mere bāre meṅ likhā hai use pūrā honā hai.”

⁴⁵phir us ne un ke zahan ko khol diyā tāki wuh allāh kā kalām samajh sakeṅ.

⁴⁶us ne un se kahā, “kalām-e-muqaddas meṅ yūṅ likhā hai, masīh dukh uṭhā kar tīsre din murdoṅ meṅ se jī uṭhegā.

⁴⁷phir yarūshalam se shurū karke us ke nām meṅ yih paiġhām tamām qaumoṅ ko sunāyā jāegā ki wuh taubā karke gunāhoṅ kī muāfī pāeṅ.

⁴⁸tum in bātoṅ ke gawāh ho.

⁴⁹aur maiṅ tumhāre pās use bhej dūṅgā jis kā wādā mere bāp ne kiyā hai. phir tum ko āsmān kī quwwat se mulabbas kiyā jāegā. us waqt tak shahr se bāhar na nikalnā.”

⁵⁰phir wuh shahr se nikal kar unheṅ bait-aniyāh tak le gayā. wahāṅ us ne apne hāth uṭhā kar unheṅ barkat dī.

⁵¹aur aisā huā ki barkat dete hue wuh un se judā ho kar āsmān par uṭhā liyā gayā.

⁵²unhoṅ ne use sijdā kiyā aur phir baṛī ḳhushī se yarūshalam wāpas chale gae.

⁵³wahāṅ wuh apnā pūrā waqt bait-ul-muqaddas meṅ guzār kar allāh kī tamjīd karte rahe.