Read Roman Urdu Geo lūqā 3 Bible Online

lūqā 3 - Roman Urdu Geo bible

lūqā 3

¹phir rom ke shahanshāh tibariyus kī hukūmat kā pandrahwāṅ sāl ā gayā. us waqt puntiyus pīlātus sūbā yahūdiyā kā gawarnar thā, herodes antipās galīl kā hākim thā, us kā bhāī filippus itūriyā aur traḳhonītis ke ilāqe kā, jabki lisāniyās abilene kā.

²hannā aur kāifā donoṅ imām-e-āzam the. un dinoṅ meṅ allāh yahyā bin zakariyāh se hamkalām huā jab wuh registān meṅ thā.

³phir wuh daryā-e-yardan ke pūre ilāqe meṅ se guzarā. har jagah us ne elān kiyā ki taubā karke baptismā lo tāki tumheṅ apne gunāhoṅ kī muāfī mil jāe.

⁴yūṅ yasāyāh nabī ke alfāz pūre hue jo us kī kitāb meṅ darj haiṅ: ‘registān meṅ ek āwāz pukār rahī hai, rab kī rāh tayyār karo! us ke rāste sīdhe banāo.

⁵lāzim hai ki har wādī bhar dī jāe, zarūrī hai ki har pahāṛ aur buland jagah maidān ban jāe. jo ṭeṛhā hai use sīdhā kiyā jāe, jo nāhamwār hai use hamwār kiyā jāe.

⁶aur tamām insān allāh kī najāt dekheṅge.’

⁷jab bahut se log yahyā ke pās āe tāki us se baptismā leṅ to us ne un se kahā, “ai zahrīle sāṅp ke bachcho! kis ne tum ko āne wāle ġhazab se bachne kī hidāyat kī?

⁸apnī zindagī se zāhir karo ki tum ne wāqaī taubā kī hai. yih ḳhayāl mat karo ki ham to bach jāeṅge kyūṅki ibrāhīm hamārā bāp hai. maiṅ tum ko batātā hūṅ ki allāh in pattharoṅ se bhī ibrāhīm ke lie aulād paidā kar saktā hai.

⁹ab to adālat kī kulhāṛī daraḳhtoṅ kī jaṛoṅ par rakhī huī hai. har daraḳht jo achchhā phal na lāe kāṭā aur āg meṅ jhoṅkā jāegā.”

¹⁰logoṅ ne us se pūchhā, “phir ham kyā kareṅ?”

¹¹us ne jawāb diyā, “jis ke pās do kurte haiṅ wuh ek us ko de de jis ke pās kuchh na ho. aur jis ke pās khānā hai wuh use khilā de jis ke pās kuchh na ho.”

¹²ṭaiks lene wāle bhī baptismā lene ke lie āe to unhoṅ ne pūchhā, “ustād, ham kyā kareṅ?”

¹³us ne jawāb diyā, “sirf utne ṭaiks lenā jitne hukūmat ne muqarrar kie haiṅ.”

¹⁴kuchh faujiyoṅ ne pūchhā, “hameṅ kyā karnā chāhie?” us ne jawāb diyā, “kisī se jabran yā ġhalat ilzām lagā kar paise na lenā balki apnī jāiz āmdanī par iktifā karnā.”

¹⁵logoṅ kī tawaqqoāt bahut baṛh gaīṅ. wuh apne diloṅ meṅ sochne lage ki kyā yih masīh to nahīṅ hai?

¹⁶is par yahyā un sab se muḳhātib ho kar kahne lagā, “maiṅ to tumheṅ pānī se baptismā detā hūṅ, lekin ek āne wālā hai jo mujh se baṛā hai. maiṅ us ke jūtoṅ ke tasme kholne ke bhī lāiq nahīṅ. wuh tumheṅ rūh-ul-quds aur āg se baptismā degā.

¹⁷wuh hāth meṅ chhāj pakaṛe hue anāj ko bhūse se alag karne ke lie tayyār khaṛā hai. wuh gāhne kī jagah ko bilkul sāf karke anāj ko apne godām meṅ jamā karegā. lekin bhūse ko wuh aisī āg meṅ jhoṅkegā jo bujhne kī nahīṅ.”

¹⁸is qism kī bahut sī aur bātoṅ se us ne qaum ko nasīhat kī aur use allāh kī ḳhushḳhabrī sunāī.

¹⁹lekin ek din yūṅ huā ki yahyā ne galīl ke hākim herodes antipās ko ḍānṭā. wajah yih thī ki herodes ne apne bhāī kī bīwī herodiyās se shādī kar lī thī aur is ke ilāwā aur bahut se ġhalat kām kie the.

²⁰yih malāmat sun kar herodes ne apne ġhalat kāmoṅ meṅ aur izāfā yih kiyā ki yahyā ko jel meṅ ḍāl diyā.

²¹ek din jab bahut se logoṅ ko baptismā diyā jā rahā thā to īsā ne bhī baptismā liyā. jab wuh duā kar rahā thā to āsmān khul gayā

²²aur rūh-ul-quds jismānī sūrat meṅ kabūtar kī tarah us par utar āyā. sāth sāth āsmān se ek āwāz sunāī dī, “tū merā pyārā farzand hai, tujh se maiṅ ḳhush hūṅ.”

²³īsā taqrīban tīs sāl kā thā jab us ne ḳhidmat shurū kī. use yūsuf kā beṭā samjhā jātā thā. us kā nasabnāmā yih hai: yūsuf bin elī

²⁴bin mattāt bin lāwī bin malkī bin yannā bin yūsuf

²⁵bin mattitiyāh bin āmūs bin nāhūm bin asaliyāh bin nogā

²⁶bin mā'at bin mattitiyāh bin shamaī bin yoseḳh bin yūdāh

²⁷bin yūhannāh bin resā bin zarubbābal bin siyāltī'el bin nerī

²⁸bin malikī bin addī bin qosām bin ilmodām bin er

²⁹bin yashūa bin ilīazar bin yorīm bin mattāt bin lāwī

³⁰bin shamāūn bin yahūdāh bin yūsuf bin yonām bin iliyāqīm

³¹bin maleāh bin minnāh bin mattitiyāh bin nātan bin dāūd

³²bin yassī bin obed bin boaz bin salmon bin nahson

³³bin ammīnadāb bin admīn bin arnī bin hasron bin fāras bin yahūdāh

³⁴bin yāqūb bin is'hāq bin ibrāhīm bin tārah bin nahūr

³⁵bin sarūj bin raū bin falaj bin ibar bin silah

³⁶bin qīnān bin arfaksad bin sim bin nūh bin lamak

³⁷bin matūsilah bin hanūk bin yārid bin mahalal-el bin qīnān

³⁸bin anūs bin set bin ādam. ādam ko allāh ne paidā kiyā thā.