Read Roman Urdu Geo lūqā 4 Bible Online

lūqā 4 - Roman Urdu Geo bible

lūqā 4

¹īsā daryā-e-yardan se wāpas āyā. wuh rūh-ul-quds se māmūr thā jis ne use registān meṅ lā kar us kī rāhnumāī kī.

²wahāṅ use chālīs din tak iblīs se āzmāyā gayā. is pūre arse meṅ us ne kuchh na khāyā. āḳhirkār use bhūk lagī.

³phir iblīs ne us se kahā, “agar tū allāh kā farzand hai to is patthar ko hukm de ki roṭī ban jāe.”

⁴lekin īsā ne inkār karke kahā, “hargiz nahīṅ, kyūṅki kalām-e-muqaddas meṅ likhā hai ki insān kī zindagī sirf roṭī par munhasir nahīṅ hotī.”

⁵is par iblīs ne use kisī buland jagah par le jā kar ek lamhe meṅ duniyā ke tamām mamālik dikhāe.

⁶wuh bolā, “maiṅ tujhe in mamālik kī shān-o-shaukat aur in par tamām iḳhtiyār dūṅgā. kyūṅki yih mere sapurd kie gae haiṅ aur jise chāhūṅ de saktā hūṅ.

⁷lihāzā yih sab kuchh terā hī hogā. shart yih hai ki tū mujhe sijdā kare.”

⁸lekin īsā ne jawāb diyā, “hargiz nahīṅ, kyūṅki kalām-e-muqaddas meṅ yūṅ likhā hai, ‘rab apne allāh ko sijdā kar aur sirf usī kī ibādat kar’.”

⁹phir iblīs ne use yarūshalam le jā kar bait-ul-muqaddas kī sab se ūṅchī jagah par khaṛā kiyā aur kahā, “agar tū allāh kā farzand hai to yahāṅ se chhalāṅg lagā de.

¹⁰kyūṅki kalām-e-muqaddas meṅ likhā hai, ‘wuh apne farishtoṅ ko terī hifāzat karne kā hukm degā,

¹¹aur wuh tujhe apne hāthoṅ par uṭhā leṅge tāki tere pāoṅ ko patthar se ṭhes na lage’.”

¹²lekin īsā ne tīsrī bār inkār kiyā aur kahā, “kalām-e-muqaddas yih bhī farmātā hai, ‘rab apne allāh ko na āzmānā’.”

¹³in āzmāishoṅ ke bād iblīs ne īsā ko kuchh der ke lie chhoṛ diyā.

¹⁴phir īsā wāpas galīl meṅ āyā. us meṅ rūh-ul-quds kī quwwat thī, aur us kī shohrat us pūre ilāqe meṅ phail gaī.

¹⁵wahāṅ wuh un ke ibādatḳhānoṅ meṅ tālīm dene lagā, aur sab ne us kī tārīf kī.

¹⁶ek din wuh nāsarat pahuṅchā jahāṅ wuh parwān chaṛhā thā. wahāṅ bhī wuh māmūl ke mutābiq sabat ke din maqāmī ibādatḳhāne meṅ jā kar kalām-e-muqaddas meṅ se paṛhne ke lie khaṛā ho gayā.

¹⁷use yasāyāh nabī kī kitāb dī gaī to us ne tūmār ko khol kar yih hawālā ḍhūnḍ nikālā,

¹⁸“rab kā rūh mujh par hai, kyūṅki us ne mujhe tel se masah karke ġharīboṅ ko ḳhushḳhabrī sunāne kā iḳhtiyār diyā hai. us ne mujhe yih elān karne ke lie bhejā hai ki qaidiyoṅ ko rihāī milegī aur andhe dekheṅge. us ne mujhe bhejā hai ki maiṅ kuchle huoṅ ko āzād karāūṅ

¹⁹aur rab kī taraf se bahālī ke sāl kā elān karūṅ.”

²⁰yih kah kar īsā ne tūmār ko lapeṭ kar ibādatḳhāne ke mulāzim ko wāpas kar diyā aur baiṭh gayā. sārī jamā'at kī āṅkheṅ us par lagī thīṅ.

²¹phir wuh bol uṭhā, “āj allāh kā yih farmān tumhāre sunte hī pūrā ho gayā hai.”

²²sab īsā ke haq meṅ bāteṅ karne lage. wuh un purfazl bātoṅ par hairatzadā the jo us ke muṅh se niklīṅ, aur wuh kahne lage, “kyā yih yūsuf kā beṭā nahīṅ hai?”

²³us ne un se kahā, “beshak tum mujhe yih kahāwat batāoge, ‘ai ḍākṭar, pahle apne āp kā ilāj kar.’ yānī sunane meṅ āyā hai ki āp ne kafarnahūm meṅ mojize kie haiṅ. ab aise mojize yahāṅ apne watanī shahr meṅ bhī dikhāeṅ.

²⁴lekin maiṅ tum ko sach batātā hūṅ ki koī bhī nabī apne watanī shahr meṅ maqbūl nahīṅ hotā.

²⁵yih haqīqat hai ki ilyās nabī ke zamāne meṅ isrāīl meṅ bahut sī zarūratmand bewāeṅ thīṅ, us waqt jab sāṛhe tīn sāl tak bārish na huī aur pūre mulk meṅ saḳht kāl paṛā.

²⁶is ke bāwujūd ilyās ko un meṅ se kisī ke pās nahīṅ bhejā gayā balki ek ġhairyahūdī bewā ke pās jo saidā ke shahr sārpat meṅ rahtī thī.

²⁷isī tarah ilīshā nabī ke zamāne meṅ isrāīl meṅ koṛh ke bahut se marīz the. lekin un meṅ se kisī ko shifā na milī balki sirf nāmān ko jo mulk-e-shām kā shahrī thā.”

²⁸jab ibādatḳhāne meṅ jamā logoṅ ne yih bāteṅ sunīṅ to wuh baṛe taish meṅ ā gae.

²⁹wuh uṭhe aur use shahr se nikāl kar us pahāṛī ke kināre le gae jis par shahr ko tāmīr kiyā gayā thā. wahāṅ se wuh use nīche girānā chāhte the,

³⁰lekin īsā un meṅ se guzar kar wahāṅ se chalā gayā.

³¹is ke bād wuh galīl ke shahr kafarnahūm ko gayā aur sabat ke din ibādatḳhāne meṅ logoṅ ko sikhāne lagā.

³²wuh us kī tālīm sun kar hakkā-bakkā rah gae. kyūṅki wuh iḳhtiyār ke sāth tālīm detā thā.

³³ibādatḳhāne meṅ ek ādmī thā jo kisī nāpāk rūh ke qabze meṅ thā. ab wuh chīḳh chīḳh kar bolne lagā,

³⁴“are nāsarat ke īsā, hamārā āp ke sāth kyā wāstā hai? kyā āp hameṅ halāk karne āe haiṅ? maiṅ to jāntā hūṅ ki āp kaun haiṅ, āp allāh ke quddūs haiṅ.”

³⁵īsā ne use ḍāṅṭ kar kahā, “ḳhāmosh! ādmī meṅ se nikal jā!” is par badrūh ādmī ko jamā'at ke bīch meṅ farsh par paṭak kar us meṅ se nikal gaī. lekin wuh ādmī zaḳhmī na huā.

³⁶tamām log ghabrā gae aur ek dūsre se kahne lage, “us ādmī ke alfāz meṅ kyā iḳhtiyār aur quwwat hai ki badrūheṅ us kā hukm māntī aur us ke kahne par nikal jātī haiṅ?”

³⁷aur īsā ke bāre meṅ charchā us pūre ilāqe meṅ phail gayā.

³⁸phir īsā ibādatḳhāne ko chhoṛ kar shamāūn ke ghar gayā. wahāṅ shamāūn kī sās shadīd buḳhār meṅ mubtalā thī. unhoṅ ne īsā se guzārish kī ki wuh us kī madad kare.

³⁹us ne us ke sirhāne khaṛe ho kar buḳhār ko ḍānṭā to wuh utar gayā aur shamāūn kī sās usī waqt uṭh kar un kī ḳhidmat karne lagī.

⁴⁰jab din ḍhal gayā to sab maqāmī log apne marīzoṅ ko īsā ke pās lāe. ḳhwāh un kī bīmāriyāṅ kuchh bhī kyūṅ na thīṅ, us ne har ek par apne hāth rakh kar use shifā dī.

⁴¹bahutoṅ meṅ badrūheṅ bhī thīṅ jinhoṅ ne nikalte waqt chillā kar kahā, “tū allāh kā farzand hai.” lekin chūṅki wuh jāntī thīṅ ki wuh masīh hai is lie us ne unheṅ ḍāṅṭ kar bolne na diyā.

⁴²jab aglā din chaṛhā to īsā shahr se nikal kar kisī wīrān jagah chalā gayā. lekin hujūm use ḍhūṅḍte ḍhūṅḍte āḳhirkār us ke pās pahuṅchā. log use apne pās se jāne nahīṅ denā chāhte the.

⁴³lekin us ne un se kahā, “lāzim hai ki maiṅ dūsre shahroṅ meṅ bhī jā kar allāh kī bādshāhī kī ḳhushḳhabrī sunāūṅ, kyūṅki mujhe isī maqsad ke lie bhejā gayā hai.”

⁴⁴chunāṅche wuh yahūdiyā ke ibādatḳhānoṅ meṅ munādī kartā rahā.