Read Roman Urdu Geo lūqā 5 Bible Online

lūqā 5 - Roman Urdu Geo bible

lūqā 5

¹ek din īsā galīl kī jhīl gannesarat ke kināre par khaṛā hujūm ko allāh kā kalām sunā rahā thā. log sunte sunte itne qarīb ā gae ki us ke lie jagah kam ho gaī.

²phir use do kashtiyāṅ nazar āīṅ jo jhīl ke kināre lagī thīṅ. machhere un meṅ se utar chuke the aur ab apne jāloṅ ko dho rahe the.

³īsā ek kashtī par sawār huā. us ne kashtī ke mālik shamāūn se darḳhwāst kī ki wuh kashtī ko kināre se thoṛā sā dūr le chale. phir wuh kashtī meṅ baiṭhā aur hujūm ko tālīm dene lagā.

⁴tālīm dene ke iḳhtitām par us ne shamāūn se kahā, “ab kashtī ko wahāṅ le jā jahāṅ pānī gahrā hai aur apne jāloṅ ko machhliyāṅ pakaṛne ke lie ḍāl do.”

⁵lekin shamāūn ne etirāz kiyā, “ustād, ham ne to pūrī rāt baṛī koshish kī, lekin ek bhī na pakaṛī. tāham āp ke kahne par maiṅ jāloṅ ko dubārā ḍālūṅgā.”

⁶yih kah kar unhoṅ ne gahre pānī meṅ jā kar apne jāl ḍāl die. aur wāqaī, machhliyoṅ kā itnā baṛā ġhol jāloṅ meṅ phaṅs gayā ki wuh phaṭne lage.

⁷yih dekh kar unhoṅ ne apne sāthiyoṅ ko ishārā karke bulāyā tāki wuh dūsrī kashtī meṅ ā kar un kī madad kareṅ. wuh āe aur sab ne mil kar donoṅ kashtiyoṅ ko itnī machhliyoṅ se bhar diyā ki āḳhirkār donoṅ ḍūbne ke ḳhatre meṅ thīṅ.

⁸jab shamāūn patras ne yih sab kuchh dekhā to us ne īsā ke sāmne muṅh ke bal gir kar kahā, “ḳhudāwand, mujh se dūr chale jāeṅ. maiṅ to gunāhgār hūṅ.”

⁹kyūṅki wuh aur us ke sāthī itnī machhliyāṅ pakaṛne kī wajah se saḳht hairān the.

¹⁰aur zabdī ke beṭe yāqūb aur yūhannā kī hālat bhī yihī thī jo shamāūn ke sāth mil kar kām karte the. lekin īsā ne shamāūn se kahā, “mat ḍar. ab se tū ādmiyoṅ ko pakaṛā karegā.”

¹¹wuh apnī kashtiyoṅ ko kināre par le āe aur sab kuchh chhoṛ kar īsā ke pīchhe ho lie.

¹²ek din īsā kisī shahr meṅ se guzar rahā thā ki wahāṅ ek marīz milā jis kā pūrā jism koṛh se muta'assir thā. jab us ne īsā ko dekhā to wuh muṅh ke bal gir paṛā aur iltijā kī, “ai ḳhudāwand, agar āp chāheṅ to mujhe pāk-sāf kar sakte haiṅ.”

¹³īsā ne apnā hāth baṛhā kar use chhuā aur kahā, “maiṅ chāhtā hūṅ, pāk-sāf ho jā.” is par bīmārī fauran dūr ho gaī.

¹⁴īsā ne use hidāyat kī ki wuh kisī ko na batāe ki kyā huā hai. us ne kahā, “sīdhā bait-ul-muqaddas meṅ imām ke pās jā tāki wuh terā muāinā kare. apne sāth wuh qurbānī le jā jis kā taqāzā mūsā kī sharīat un se kartī hai jinheṅ koṛh se shifā miltī hai. yūṅ alāniyā tasdīq ho jāegī ki tū wāqaī pāk-sāf ho gayā hai.”

¹⁵tāham īsā ke bāre meṅ ḳhabar aur zyādā tezī se phailtī gaī. logoṅ ke baṛe guroh us ke pās āte rahe tāki us kī bāteṅ suneṅ aur us ke hāth se shifā pāeṅ.

¹⁶phir bhī wuh kaī bār unheṅ chhoṛ kar duā karne ke lie wīrān jaghoṅ par jāyā kartā thā.

¹⁷ek din wuh logoṅ ko tālīm de rahā thā. farīsī aur sharīat ke ālim bhī galīl aur yahūdiyā ke har gāoṅ aur yarūshalam se ā kar us ke pās baiṭhe the. aur rab kī qudrat use shifā dene ke lie tahrīk de rahī thī.

¹⁸itne meṅ kuchh ādmī ek maflūj ko chārpāī par ḍāl kar wahāṅ pahuṅche. unhoṅ ne use ghar ke andar īsā ke sāmne rakhne kī koshish kī,

¹⁹lekin befāidā. ghar meṅ itne log the ki andar jānā nāmumkin thā. is lie wuh āḳhirkār chhat par chaṛh gae aur kuchh ṭāyleṅ udheṛ kar chhat kā ek hissā khol diyā. phir unhoṅ ne chārpāī ko maflūj samet hujūm ke darmiyān īsā ke sāmne utārā.

²⁰jab īsā ne un kā īmān dekhā to us ne maflūj se kahā, “ai ādmī, tere gunāh muāf kar die gae haiṅ.”

²¹yih sun kar sharīat ke ālim aur farīsī soch-bichār meṅ paṛ gae. “yih kis tarah kā bandā hai jo is qism kā kufr baktā hai? sirf allāh hī gunāh muāf kar saktā hai.”

²²lekin īsā ne jān liyā ki yih kyā soch rahe haiṅ, is lie us ne pūchhā, “tum dil meṅ is tarah kī bāteṅ kyūṅ soch rahe ho?

²³kyā maflūj se yih kahnā zyādā āsān hai ki ‘tere gunāh muāf kar die gae haiṅ’ yā yih ki ‘uṭh kar chal phir’?

²⁴lekin maiṅ tum ko dikhātā hūṅ ki ibn-e-ādam ko wāqaī duniyā meṅ gunāh muāf karne kā iḳhtiyār hai.” yih kah kar wuh maflūj se muḳhātib huā, “uṭh, apnī chārpāī uṭhā kar apne ghar chalā jā.”

²⁵logoṅ ke deḳhte deḳhte wuh ādmī khaṛā huā aur apnī chārpāī uṭhā kar allāh kī hamd-o-sanā karte hue apne ghar chalā gayā.

²⁶yih dekh kar sab saḳht hairatzadā hue aur allāh kī tamjīd karne lage. un par ḳhauf chhā gayā aur wuh kah uṭhe, “āj ham ne nāqābil-e-yaqīn bāteṅ dekhī haiṅ.”

²⁷is ke bād īsā nikal kar ek ṭaiks lene wāle ke pās se guzarā jo apnī chaukī par baiṭhā thā. us kā nām lāwī thā. use dekh kar īsā ne kahā, “mere pīchhe ho le.”

²⁸wuh uṭhā aur sab kuchh chhoṛ kar us ke pīchhe ho liyā.

²⁹bād meṅ us ne apne ghar meṅ īsā kī baṛī ziyāfat kī. bahut se ṭaiks lene wāle aur dīgar mehmān is meṅ sharīk hue.

³⁰yih dekh kar kuchh farīsiyoṅ aur un se tālluq rakhne wāle sharīat ke ālimoṅ ne īsā ke shāgirdoṅ se shikāyat kī. unhoṅ ne kahā, “tum ṭaiks lene wāloṅ aur gunāhgāroṅ ke sāth kyūṅ khāte-pīte ho?”

³¹īsā ne jawāb diyā, “sehhatmandoṅ ko ḍākṭar kī zarūrat nahīṅ hotī balki marīzoṅ ko.

³²maiṅ rāstbāzoṅ ko nahīṅ balki gunāhgāroṅ ko bulāne āyā hūṅ tāki wuh taubā kareṅ.”

³³kuchh logoṅ ne īsā se ek aur sawāl pūchhā, “yahyā ke shāgird aksar rozā rakhte haiṅ. aur sāth sāth wuh duā bhī karte rahte haiṅ. farīsiyoṅ ke shāgird bhī isī tarah karte haiṅ. lekin āp ke shāgird khāne-pīne kā silsilā jārī rakhte haiṅ.”

³⁴īsā ne jawāb diyā, “kyā tum shādī ke mehmānoṅ ko rozā rakhne ko kah sakte ho jab dūlhā un ke darmiyān hai? hargiz nahīṅ!

³⁵lekin ek din āegā jab dūlhā un se le liyā jāegā. us waqt wuh zarūr rozā rakheṅge.”

³⁶us ne unheṅ yih misāl bhī dī, “kaun kisī nae libās ko phāṛ kar us kā ek ṭukṛā kisī purāne libās meṅ lagāegā? koī bhī nahīṅ! agar wuh aisā kare to na sirf nayā libās ḳharāb hogā balki us se liyā gayā ṭukṛā purāne libās ko bhī ḳharāb kar degā.

³⁷isī tarah koī bhī angūr kā tāzā ras purānī aur belchak mashkoṅ meṅ nahīṅ ḍālegā. agar wuh aisā kare to purānī mashkeṅ paidā hone wālī gais ke bāis phaṭ jāeṅgī. natīje meṅ mai aur mashkeṅ donoṅ zāe ho jāeṅgī.

³⁸is lie angūr kā tāzā ras naī mashkoṅ meṅ ḍālā jātā hai jo lachakdār hotī haiṅ.

³⁹lekin jo bhī purānī mai pīnā pasand kare wuh angūr kā nayā aur tāzā ras pasand nahīṅ karegā. wuh kahegā ki purānī hī behtar hai.”