Read Roman Urdu Geo lūqā 6 Bible Online

lūqā 6 - Roman Urdu Geo bible

lūqā 6

¹ek din īsā anāj ke khetoṅ meṅ se guzar rahā thā. chalte chalte us ke shāgird anāj kī bāleṅ toṛne aur apne hāthoṅ se mal kar khāne lage. sabat kā din thā.

²yih dekh kar kuchh farīsiyoṅ ne kahā, “tum yih kyūṅ kar rahe ho? sabat ke din aisā karnā manā hai.”

³īsā ne jawāb diyā, “kyā tum ne kabhī nahīṅ paṛhā ki dāūd ne kyā kiyā jab use aur us ke sāthiyoṅ ko bhūk lagī thī?

⁴wuh allāh ke ghar meṅ dāḳhil huā aur rab ke lie maḳhsūsshudā roṭiyāṅ le kar khāīṅ, agarche sirf imāmoṅ ko inheṅ khāne kī ijāzat hai. aur us ne apne sāthiyoṅ ko bhī yih roṭiyāṅ khilāīṅ.”

⁵phir īsā ne un se kahā, “ibn-e-ādam sabat kā mālik hai.”

⁶sabat ke ek aur din īsā ibādatḳhāne meṅ jā kar sikhāne lagā. wahāṅ ek ādmī thā jis kā dahnā hāth sūkhā huā thā.

⁷sharīat ke ālim aur farīsī baṛe ġhaur se dekh rahe the ki kyā īsā is ādmī ko āj bhī shifā degā? kyūṅki wuh us par ilzām lagāne kā koī bahānā ḍhūnḍ rahe the.

⁸lekin īsā ne un kī soch ko jān liyā aur us sūkhe hāth wāle ādmī se kahā, “uṭh, darmiyān meṅ khaṛā ho.” chunāṅche wuh ādmī khaṛā huā.

⁹phir īsā ne un se pūchhā, “mujhe batāo, sharīat hameṅ sabat ke din kyā karne kī ijāzat detī hai, nek kām karne kī yā ġhalat kām karne kī, kisī kī jān bachāne kī yā use tabāh karne kī?”

¹⁰wuh ḳhāmosh ho kar apne irdgird ke tamām logoṅ kī taraf deḳhne lagā. phir us ne kahā, “apnā hāth āge baṛhā.” us ne aisā kiyā to us kā hāth bahāl ho gayā.

¹¹lekin wuh āpe meṅ na rahe aur ek dūsre se bāt karne lage ki ham īsā se kis tarah nipaṭ sakte haiṅ?

¹²un hī dinoṅ meṅ īsā nikal kar duā karne ke lie pahāṛ par chaṛh gayā. duā karte karte pūrī rāt guzar gaī.

¹³phir us ne apne shāgirdoṅ ko apne pās bulā kar un meṅ se bārah ko chun liyā, jinheṅ us ne apne rasūl muqarrar kiyā. un ke nām yih haiṅ:

¹⁴shamāūn jis kā laqab us ne patras rakhā, us kā bhāī andriyās, yāqūb, yūhannā, filippus, bartulmāī,

¹⁵mattī, tomā, yāqūb bin halfaī, shamāūn mujāhid,

¹⁶yahūdāh bin yāqūb aur yahūdāh iskariyotī jis ne bād meṅ use dushman ke hawāle kar diyā.

¹⁷phir wuh un ke sāth pahāṛ se utar kar ek khule aur hamwār maidān meṅ khaṛā huā. wahāṅ shāgirdoṅ kī baṛī tādād ne use gher liyā. sāth hī bahut se log yahūdiyā, yarūshalam aur sūr aur saidā ke sāhilī ilāqe se

¹⁸us kī tālīm sunane aur bīmāriyoṅ se shifā pāne ke lie āe the. aur jinheṅ badrūheṅ tang kar rahī thīṅ unheṅ bhī shifā milī.

¹⁹tamām log use chhūne kī koshish kar rahe the, kyūṅki us meṅ se quwwat nikal kar sab ko shifā de rahī thī.

²⁰phir īsā ne apne shāgirdoṅ kī taraf dekh kar kahā, “mubārak ho tum jo zarūratmand ho, kyūṅki allāh kī bādshāhī tum ko hī hāsil hai.

²¹mubārak ho tum jo is waqt bhūke ho, kyūṅki ser ho jāoge. mubārak ho tum jo is waqt rote ho, kyūṅki ḳhushī se haṅsoge.

²²mubārak ho tum jab log is lie tum se nafrat karte aur tumhārā huqqā-pānī band karte haiṅ ki tum ibn-e-ādam ke pairokār ban gae ho. hāṅ, mubārak ho tum jab wuh isī wajah se tumheṅ lān-tān karte aur tumhārī badnāmī karte haiṅ.

²³jab wuh aisā karte haiṅ to shādmān ho kar ḳhushī se nācho, kyūṅki āsmān par tum ko baṛā ajr milegā. un ke bāpdādā ne yihī sulūk nabiyoṅ ke sāth kiyā thā.

²⁴magar tum par afsos jo ab daulatmand ho, kyūṅki tumhārā sukūn yihīṅ ḳhatm ho jāegā.

²⁵tum par afsos jo is waqt ḳhūb ser ho, kyūṅki bād meṅ tum bhūke hoge. tum par afsos jo ab haṅs rahe ho, kyūṅki ek waqt āegā ki ro ro kar mātam karoge.

²⁶tum par afsos jin kī tamām log tārīf karte haiṅ, kyūṅki un ke bāpdādā ne yihī sulūk jhūṭe nabiyoṅ ke sāth kiyā thā.

²⁷lekin tum ko jo sun rahe ho maiṅ yih batātā hūṅ, apne dushmanoṅ se muhabbat rakho, aur un se bhalāī karo jo tum se nafrat karte haiṅ.

²⁸jo tum par lānat karte haiṅ unheṅ barkat do, aur jo tum se burā sulūk karte haiṅ un ke lie duā karo.

²⁹agar koī tumhāre ek gāl par thappaṛ māre to use dūsrā gāl bhī pesh kar do. isī tarah agar koī tumhārī chādar chhīn le to use qamīs lene se bhī na roko.

³⁰jo bhī tum se kuchh māṅgtā hai use do. aur jis ne tum se kuchh liyā hai us se use wāpas dene kā taqāzā na karo.

³¹logoṅ ke sāth waisā sulūk karo jaisā tum chāhte ho ki wuh tumhāre sāth kareṅ.

³²agar tum sirf un hī se muhabbat karo jo tum se karte haiṅ to is meṅ tumhārī kyā ḳhās mehrbānī hogī? gunāhgār bhī aisā hī karte haiṅ.

³³aur agar tum sirf un hī se bhalāī karo jo tum se bhalāī karte haiṅ to is meṅ tumhārī kyā ḳhās mehrbānī hogī? gunāhgār bhī aisā hī karte haiṅ.

³⁴isī tarah agar tum sirf un hī ko udhār do jin ke bāre meṅ tumheṅ andāzā hai ki wuh wāpas kar deṅge to is meṅ tumhārī kyā ḳhās mehrbānī hogī? gunāhgār bhī gunāhgāroṅ ko udhār dete haiṅ jab unheṅ sab kuchh wāpas milne kā yaqīn hotā hai.

³⁵nahīṅ, apne dushmanoṅ se muhabbat karo aur un hī se bhalāī karo. unheṅ udhār do jin ke bāre meṅ tumheṅ wāpas milne kī ummīd nahīṅ hai. phir tum ko baṛā ajr milegā aur tum allāh t'ālā ke farzand sābit hoge, kyūṅki wuh bhī nāshukroṅ aur bure logoṅ par nekī kā izhār kartā hai.

³⁶lāzim hai ki tum rahmdil ho kyūṅki tumhārā bāp bhī rahmdil hai.

³⁷dūsroṅ kī adālat na karnā to tumhārī bhī adālat nahīṅ kī jāegī. dūsroṅ ko mujrim qarār na denā to tum ko bhī mujrim qarār nahīṅ diyā jāegā. muāf karo to tum ko bhī muāf kar diyā jāegā.

³⁸do to tum ko bhī diyā jāegā. hāṅ, jis hisāb se tum ne diyā usī hisāb se tum ko diyā jāegā, balki paimānā dabā dabā aur hilā hilā kar aur labrez karke tumhārī jholī meṅ ḍāl diyā jāegā. kyūṅki jis paimāne se tum nāpte ho usī se tumhāre lie nāpā jāegā.”

³⁹phir īsā ne yih misāl pesh kī. “kyā ek andhā dūsre andhe kī rāhnumāī kar saktā hai? hargiz nahīṅ! agar wuh aisā kare to donoṅ gaṛhe meṅ gir jāeṅge.

⁴⁰shāgird apne ustād se baṛā nahīṅ hotā balki jab use pūrī ṭrening milī ho to wuh apne ustād hī kī mānind hogā.

⁴¹tū kyūṅ ġhaur se apne bhāī kī āṅkh meṅ paṛe tinke par nazar kartā hai jabki tujhe wuh shahtīr nazar nahīṅ ātā jo terī apnī āṅkh meṅ hai?

⁴²tū kyūṅkar apne bhāī se kah saktā hai, ‘bhāī, ṭhahro, mujhe tumhārī āṅkh meṅ paṛā tinkā nikālne do’ jabki tujhe apnī āṅkh kā shahtīr nazar nahīṅ ātā? riyākār! pahle apnī āṅkh ke shahtīr ko nikāl. tab hī tujhe bhāī kā tinkā sāf nazar āegā aur tū use achchhī tarah se dekh kar nikāl sakegā.

⁴³na achchhā daraḳht ḳharāb phal lātā hai, na ḳharāb daraḳht achchhā phal.

⁴⁴har qism kā daraḳht us ke phal se pahchānā jātā hai. ḳhārdār jhāṛiyoṅ se anjīr yā angūr nahīṅ toṛe jāte.

⁴⁵nek shaḳhs kā achchhā phal us ke dil ke achchhe ḳhazāne se nikaltā hai jabki bure shaḳhs kā ḳharāb phal us ke dil kī burāī se nikaltā hai. kyūṅki jis chīz se dil bharā hotā hai wuhī chhalak kar muṅh se nikaltī hai.

⁴⁶tum kyūṅ mujhe ‘ḳhudāwand, ḳhudāwand’ kah kar pukārte ho? merī bāt par to tum amal nahīṅ karte.

⁴⁷lekin maiṅ tum ko batātā hūṅ ki wuh shaḳhs kis kī mānind hai jo mere pās ā kar merī bāt sun letā aur us par amal kartā hai.

⁴⁸wuh us ādmī kī mānind hai jis ne apnā makān banāne ke lie gahrī bunyād kī khudāī karwāī. khod khod kar wuh chaṭān tak pahuṅch gayā. usī par us ne makān kī bunyād rakhī. makān mukammal huā to ek din sailāb āyā. zor se bahtā huā pānī makān se ṭakrāyā, lekin wuh use hilā na sakā kyūṅki wuh mazbūtī se banāyā gayā thā.

⁴⁹lekin jo merī bāt suntā aur us par amal nahīṅ kartā wuh us shaḳhs kī mānind hai jis ne apnā makān bunyād ke baġhair zamīn par hī tāmīr kiyā. jūṅ hī zor se bahtā huā pānī us se ṭakrāyā to wuh gir gayā aur sarāsar tabāh ho gayā.”