Read Roman Urdu Geo lūqā 7 Bible Online

lūqā 7 - Roman Urdu Geo bible

lūqā 7

¹yih sab kuchh logoṅ ko sunāne ke bād īsā kafarnahūm chalā gayā.

²wahāṅ sau faujiyoṅ par muqarrar ek afsar rahtā thā. un dinoṅ meṅ us kā ek ġhulām jo use bahut azīz thā bīmār paṛ gayā. ab wuh marne ko thā.

³chūṅki afsar ne īsā ke bāre meṅ sunā thā is lie us ne yahūdiyoṅ ke kuchh buzurg yih darḳhwāst karne ke lie us ke pās bhej die ki wuh ā kar ġhulām ko shifā de.

⁴wuh īsā ke pās pahuṅch kar baṛe zor se iltijā karne lage, “yih ādmī is lāiq hai ki āp us kī darḳhwāst pūrī kareṅ,

⁵kyūṅki wuh hamārī qaum se pyār kartā hai, yahāṅ tak ki us ne hamāre lie ibādatḳhānā bhī tāmīr karwāyā hai.”

⁶chunāṅche īsā un ke sāth chal paṛā. lekin jab wuh ghar ke qarīb pahuṅch gayā to afsar ne apne kuchh dost yih kah kar us ke pās bhej die ki “ḳhudāwand, mere ghar meṅ āne kī taqlīf na kareṅ, kyūṅki maiṅ is lāiq nahīṅ hūṅ.

⁷is lie maiṅ ne ḳhud ko āp ke pās āne ke lāiq bhī na samjhā. bas wahīṅ se kah deṅ to merā ġhulām shifā pā jāegā.

⁸kyūṅki mujhe ḳhud ālā afsaroṅ ke hukm par chalnā paṛtā hai aur mere mātaht bhī faujī haiṅ. ek ko kahtā hūṅ, ‘jā!’ to wuh jātā hai aur dūsre ko ‘ā!’ to wuh ātā hai. isī tarah maiṅ apne naukar ko hukm detā hūṅ, ‘yih kar!’ to wuh kartā hai.”

⁹yih sun kar īsā nihāyat hairān huā. us ne muṛ kar apne pīchhe āne wāle hujūm se kahā, “maiṅ tum ko sach batātā hūṅ, maiṅ ne isrāīl meṅ bhī is qism kā īmān nahīṅ pāyā.”

¹⁰jab afsar kā paiġhām pahuṅchāne wāle ghar wāpas āe to unhoṅ ne dekhā ki ġhulām kī sehhat bahāl ho chukī hai.

¹¹kuchh der ke bād īsā apne shāgirdoṅ ke sāth nāin shahr ke lie rawānā huā. ek baṛā hujūm bhī sāth chal rahā thā.

¹²jab wuh shahr ke darwāze ke qarīb pahuṅchā to ek janāzā niklā. jo naujawān faut huā thā us kī māṅ bewā thī aur wuh us kā iklautā beṭā thā. māṅ ke sāth shahr ke bahut se log chal rahe the.

¹³use dekh kar ḳhudāwand ko us par baṛā tars āyā. us ne us se kahā, “mat ro.”

¹⁴phir wuh janāze ke pās gayā aur use chhuā. use uṭhāne wāle ruk gae to īsā ne kahā, “ai naujawān, maiṅ tujhe kahtā hūṅ ki uṭh.”

¹⁵murdā uṭh baiṭhā aur bolne lagā. īsā ne use us kī māṅ ke sapurd kar diyā.

¹⁶yih dekh kar tamām logoṅ par ḳhauf tārī ho gayā aur wuh allāh kī tamjīd karke kahne lage, “hamāre darmiyān ek baṛā nabī barpā huā hai. allāh ne apnī qaum par nazar kī hai.”

¹⁷aur īsā ke bāre meṅ yih ḳhabar pūre yahūdiyā aur irdgird ke ilāqe meṅ phail gaī.

¹⁸yahyā ko bhī apne shāgirdoṅ kī mārifat in tamām wāqiāt ke bāre meṅ patā chalā. is par us ne do shāgirdoṅ ko bulā kar

¹⁹unheṅ yih pūchhne ke lie ḳhudāwand ke pās bhejā, “kyā āp wuhī haiṅ jise ānā hai yā ham kisī aur ke intizār meṅ raheṅ?”

²⁰chunāṅche yih shāgird īsā ke pās pahuṅch kar kahne lage, “yahyā baptismā dene wāle ne hameṅ yih pūchhne ke lie bhejā hai ki kyā āp wuhī haiṅ jise ānā hai yā ham kisī aur kā intizār kareṅ?”

²¹īsā ne usī waqt bahut se logoṅ ko shifā dī thī jo muḳhtalif qism kī bīmāriyoṅ, musībatoṅ aur badrūhoṅ kī girift meṅ the. andhoṅ kī āṅkheṅ bhī bahāl ho gaī thīṅ.

²²is lie us ne jawāb meṅ yahyā ke qāsidoṅ se kahā, “yahyā ke pās wāpas jā kar use sab kuchh batā denā jo tum ne dekhā aur sunā hai. ‘andhe deḳhte, langaṛe chalte phirte haiṅ, koṛhiyoṅ ko pāk-sāf kiyā jātā hai, bahre sunte haiṅ, murdoṅ ko zindā kiyā jātā hai aur ġharīboṅ ko allāh kī ḳhushḳhabrī sunāī jātī hai.’

²³yahyā ko batāo, ‘mubārak hai wuh jo mere sabab se ṭhokar khā kar bargashtā nahīṅ hotā’.”

²⁴yahyā ke yih qāsid chale gae to īsā hujūm se yahyā ke bāre meṅ bāt karne lagā, “tum registān meṅ kyā deḳhne gae the? ek sarkanḍā jo hawā ke har jhoṅke se hiltā hai? beshak nahīṅ.

²⁵yā kyā wahāṅ jā kar aise ādmī kī tawaqqo kar rahe the jo nafīs aur mulāim libās pahne hue hai? nahīṅ, jo shāndār kapṛe pahante aur aish-o-ishrat meṅ zindagī guzārte haiṅ wuh shāhī mahaloṅ meṅ pāe jāte haiṅ.

²⁶to phir tum kyā deḳhne gae the? ek nabī ko? bilkul sahīh, balki maiṅ tum ko batātā hūṅ ki wuh nabī se bhī baṛā hai.

²⁷usī ke bāre meṅ kalām-e-muqaddas meṅ likhā hai, ‘dekh maiṅ apne paiġhambar ko tere āge āge bhej detā hūṅ jo tere sāmne rāstā tayyār karegā.’

²⁸maiṅ tum ko batātā hūṅ ki is duniyā meṅ paidā hone wālā koī bhī shaḳhs yahyā se baṛā nahīṅ hai. to bhī allāh kī bādshāhī meṅ dāḳhil hone wālā sab se chhoṭā shaḳhs us se baṛā hai.”

²⁹bāt yih thī ki tamām qaum bashamūl ṭaiks lene wāloṅ ne yahyā kā paiġhām sun kar allāh kā insāf mān liyā aur yahyā se baptismā liyā thā.

³⁰sirf farīsī aur sharīat ke ulamā ne apne bāre meṅ allāh kī marzī ko radd karke yahyā kā baptismā lene se inkār kiyā thā.

³¹īsā ne bāt jārī rakhī, “chunāṅche maiṅ is nasl ke logoṅ ko kis se tashbīh dūṅ? wuh kis se mutābiqat rakhte haiṅ?

³²wuh un bachchoṅ kī mānind haiṅ jo bāzār meṅ baiṭhe khel rahe haiṅ. un meṅ se kuchh ūṅchī āwāz se dūsre bachchoṅ se shikāyat kar rahe haiṅ, ‘ham ne bāṅsrī bajāī to tum na nāche. phir ham ne nohā ke gīt gāe, lekin tum na roe.’

³³dekho, yahyā baptismā dene wālā āyā aur na roṭī khāī, na mai pī. yih dekh kar tum kahte ho ki us meṅ badrūh hai.

³⁴phir ibn-e-ādam khātā aur pītā huā āyā. ab tum kahte ho, ‘dekho yih kaisā peṭū aur sharābī hai. aur wuh ṭaiks lene wāloṅ aur gunāhgāroṅ kā dost bhī hai.’

³⁵lekin hikmat apne tamām bachchoṅ se hī sahīh sābit huī hai.”

³⁶ek farīsī ne īsā ko khānā khāne kī dāwat dī. īsā us ke ghar jā kar khānā khāne ke lie baiṭh gayā.

³⁷us shahr meṅ ek badchalan aurat rahtī thī. jab use patā chalā ki īsā us farīsī ke ghar meṅ khānā khā rahā hai to wuh itrdān meṅ beshqīmat itr lā kar

³⁸pīchhe se us ke pāoṅ ke pās khaṛī ho gaī. wuh ro paṛī aur us ke āṅsū ṭapak ṭapak kar īsā ke pāoṅ ko tar karne lage. phir us ne us ke pāoṅ ko apne bāloṅ se poṅchh kar unheṅ chūmā aur un par itr ḍālā.

³⁹jab īsā ke farīsī mezbān ne yih dekhā to us ne dil meṅ kahā, “agar yih ādmī nabī hotā to use mālūm hotā ki yih kis qism kī aurat hai jo use chhū rahī hai, ki yih gunāhgār hai.”

⁴⁰īsā ne in ḳhayālāt ke jawāb meṅ us se kahā, “shamāūn, maiṅ tujhe kuchh batānā chāhtā hūṅ.” us ne kahā, “jī ustād, batāeṅ.”

⁴¹īsā ne kahā, “ek sāhūkār ke do qarzdār the. ek ko us ne chāṅdī ke 500 sikke die the aur dūsre ko 50 sikke.

⁴²lekin donoṅ apnā qarz adā na kar sake. yih dekh kar us ne donoṅ kā qarz muāf kar diyā. ab mujhe batā, donoṅ qarzdāroṅ meṅ se kaun use zyādā azīz rakhegā?”

⁴³shamāūn ne jawāb diyā, “mere ḳhayāl meṅ wuh jise zyādā muāf kiyā gayā.” īsā ne kahā, “tū ne ṭhīk andāzā lagāyā hai.”

⁴⁴aur aurat kī taraf muṛ kar us ne shamāūn se bāt jārī rakhī, “kyā tū is aurat ko deḳhtā hai?

⁴⁵jab maiṅ is ghar meṅ āyā to tū ne mujhe pāoṅ dhone ke lie pānī na diyā. lekin is ne mere pāoṅ ko apne āṅsū'oṅ se tar karke apne bāloṅ se poṅchh kar ḳhushk kar diyā hai. tū ne mujhe bosā na diyā, lekin yih mere andar āne se le kar ab tak mere pāoṅ ko chūmne se bāz nahīṅ rahī.

⁴⁶tū ne mere sar par zaitūn kā tel na ḍālā, lekin is ne mere pāoṅ par itr ḍālā.

⁴⁷is lie maiṅ tujhe batātā hūṅ ki is ke gunāhoṅ ko go wuh bahut haiṅ muāf kar diyā gayā hai, kyūṅki is ne bahut muhabbat kā izhār kiyā hai. lekin jise kam muāf kiyā gayā ho wuh kam muhabbat rakhtā hai.”

⁴⁸phir īsā ne aurat se kahā, “tere gunāhoṅ ko muāf kar diyā gayā hai.”

⁴⁹yih sun kar jo sāth baiṭhe the āpas meṅ kahne lage, “yih kis qism kā shaḳhs hai jo gunāhoṅ ko bhī muāf kartā hai?”

⁵⁰lekin īsā ne ḳhātūn se kahā, “tere īmān ne tujhe bachā liyā hai. salāmatī se chalī jā.”