Read Roman Urdu Geo lūqā 9 Bible Online

lūqā 9 - Roman Urdu Geo bible

lūqā 9

¹is ke bād īsā ne apne bārah shāgirdoṅ ko ikaṭṭhā karke unheṅ badrūhoṅ ko nikālne aur marīzoṅ ko shifā dene kī quwwat aur iḳhtiyār diyā.

²phir us ne unheṅ allāh kī bādshāhī kī munādī karne aur shifā dene ke lie bhej diyā.

³us ne kahā, “safar par kuchh sāth na lenā. na lāṭhī, na sāmān ke lie baig, na roṭī, na paise aur na ek se zyādā sūṭ.

⁴jis ghar meṅ bhī tum jāte ho us meṅ us maqām se chale jāne tak ṭhahro.

⁵aur agar maqāmī log tum ko qabūl na kareṅ to phir us shahr se nikalte waqt us kī gard apne pāoṅ se jhāṛ do. yūṅ tum un ke ḳhilāf gawāhī doge.”

⁶chunāṅche wuh nikal kar gāoṅ gāoṅ jā kar allāh kī ḳhushḳhabrī sunāne aur marīzoṅ ko shifā dene lage.

⁷jab galīl ke hukmrān herodes antipās ne sab kuchh sunā jo īsā kar rahā thā to wuh uljhan meṅ paṛ gayā. bāz to kah rahe the ki yahyā baptismā dene wālā jī uṭhā hai.

⁸auroṅ kā ḳhayāl thā ki ilyās nabī īsā meṅ zāhir huā hai yā ki qadīm zamāne kā koī aur nabī jī uṭhā hai.

⁹lekin herodes ne kahā, “maiṅ ne ḳhud yahyā kā sar qalam karwāyā thā. to phir yih kaun hai jis ke bāre meṅ maiṅ is qism kī bāteṅ suntā hūṅ?” aur wuh us se milne kī koshish karne lagā.

¹⁰rasūl wāpas āe to unhoṅ ne īsā ko sab kuchh sunāyā jo unhoṅ ne kiyā thā. phir wuh unheṅ alag le jā kar bait-saidā nāmī shahr meṅ āyā.

¹¹lekin jab logoṅ ko patā chalā to wuh un ke pīchhe wahāṅ pahuṅch gae. īsā ne unheṅ āne diyā aur allāh kī bādshāhī ke bāre meṅ tālīm dī. sāth sāth us ne marīzoṅ ko shifā bhī dī.

¹²jab din ḍhalne lagā to bārah shāgirdoṅ ne pās ā kar us se kahā, “logoṅ ko ruḳhsat kar deṅ tāki wuh irdgird ke dehātoṅ aur bastiyoṅ meṅ jā kar rāt ṭhaharne aur khāne kā band-o-bast kar sakeṅ, kyūṅki is wīrān jagah meṅ kuchh nahīṅ milegā.”

¹³lekin īsā ne unheṅ kahā, “tum ḳhud inheṅ kuchh khāne ko do.” unhoṅ ne jawāb diyā, “hamāre pās sirf pāṅch roṭiyāṅ aur do machhliyāṅ haiṅ. yā kyā ham jā kar in tamām logoṅ ke lie khānā ḳharīd lāeṅ?”

¹⁴(wahāṅ taqrīban 5,000 mard the.) īsā ne apne shāgirdoṅ se kahā, “tamām logoṅ ko gurohoṅ meṅ taqsīm karke biṭhā do. har guroh pachās afrād par mushtamil ho.”

¹⁵shāgirdoṅ ne aisā hī kiyā aur sab ko biṭhā diyā.

¹⁶is par īsā ne un pāṅch roṭiyoṅ aur do machhliyoṅ ko le kar āsmān kī taraf nazar uṭhāī aur un ke lie shukrguzārī kī duā kī. phir us ne unheṅ toṛ toṛ kar shāgirdoṅ ko diyā tāki wuh logoṅ meṅ taqsīm kareṅ.

¹⁷aur sab ne jī bhar kar khāyā. is ke bād jab bache hue ṭukṛe jamā kie gae to bārah ṭokre bhar gae.

¹⁸ek din īsā akelā duā kar rahā thā. sirf shāgird us ke sāth the. us ne un se pūchhā, “maiṅ ām logoṅ ke nazdīk kaun hūṅ?”

¹⁹unhoṅ ne jawāb diyā, “kuchh kahte haiṅ yahyā baptismā dene wālā, kuchh yih ki āp ilyās nabī haiṅ. kuchh yih bhī kahte haiṅ ki qadīm zamāne kā koī nabī jī uṭhā hai.”

²⁰us ne pūchhā, “lekin tum kyā kahte ho? tumhāre nazdīk maiṅ kaun hūṅ?” patras ne jawāb diyā, “āp allāh ke masīh haiṅ.”

²¹yih sun kar īsā ne unheṅ yih bāt kisī ko bhī batāne se manā kiyā.

²²us ne kahā, “lāzim hai ki ibn-e-ādam bahut dukh uṭhā kar buzurgoṅ, rāhnumā imāmoṅ aur sharīat ke ulamā se radd kiyā jāe. use qatl bhī kiyā jāegā, lekin tīsre din wuh jī uṭhegā.”

²³phir us ne sab se kahā, “jo mere pīchhe ānā chāhe wuh apne āp kā inkār kare aur har roz apnī salīb uṭhā kar mere pīchhe ho le.

²⁴kyūṅki jo apnī jān ko bachāe rakhnā chāhe wuh use kho degā. lekin jo merī ḳhātir apnī jān kho de wuhī use bachāegā.

²⁵kyā fāidā hai agar kisī ko pūrī duniyā hāsil ho jāe magar wuh apnī jān se mahrūm ho jāe yā use is kā nuqsān uṭhānā paṛe?

²⁶jo bhī mere aur merī bātoṅ ke sabab se sharmāe us se ibn-e-ādam bhī us waqt sharmāegā jab wuh apne aur apne bāp ke aur muqaddas farishtoṅ ke jalāl meṅ āegā.

²⁷maiṅ tum ko sach batātā hūṅ, yahāṅ kuchh aise log khaṛe haiṅ jo marne se pahle hī allāh kī bādshāhī ko dekheṅge.”

²⁸taqrīban āṭh din guzar gae. phir īsā patras, yāqūb aur yūhannā ko sāth le kar duā karne ke lie pahāṛ par chaṛh gayā.

²⁹wahāṅ duā karte karte us ke chehre kī sūrat badal gaī aur us ke kapṛe safed ho kar bijlī kī tarah chamakne lage.

³⁰achānak do mard zāhir ho kar us se muḳhātib hue. ek mūsā aur dūsrā ilyās thā.

³¹un kī shakl-o-sūrat purjalāl thī. wuh īsā se is ke bāre meṅ bāt karne lage ki wuh kis tarah allāh kā maqsad pūrā karke yarūshalam meṅ is duniyā se kūch kar jāegā.

³²patras aur us ke sāthiyoṅ ko gahrī nīnd ā gaī thī, lekin jab wuh jāg uṭhe to īsā kā jalāl dekhā aur yih ki do ādmī us ke sāth khaṛe haiṅ.

³³jab wuh mard īsā ko chhoṛ kar rawānā hone lage to patras ne kahā, “ustād, kitnī achchhī bāt hai ki ham yahāṅ haiṅ. āeṅ, ham tīn jhoṅpṛiyāṅ banāeṅ, ek āp ke lie, ek mūsā ke lie aur ek ilyās ke lie.” lekin wuh nahīṅ jāntā thā ki kyā kah rahā hai.

³⁴yih kahte hī ek bādal ā kar un par chhā gayā. jab wuh us meṅ dāḳhil hue to dahshatzadā ho gae.

³⁵phir bādal se ek āwāz sunāī dī, “yih merā chunā huā farzand hai, is kī suno.”

³⁶āwāz ḳhatm huī to īsā akelā hī thā. aur un dinoṅ meṅ shāgirdoṅ ne kisī ko bhī is wākie ke bāre meṅ na batāyā balki ḳhāmosh rahe.

³⁷agle din wuh pahāṛ se utar āe to ek baṛā hujūm īsā se milne āyā.

³⁸hujūm meṅ se ek ādmī ne ūṅchī āwāz se kahā, “ustād, mehrbānī karke mere beṭe par nazar kareṅ. wuh merā iklautā beṭā hai.

³⁹ek badrūh use bār bār apnī girift meṅ le letī hai. phir wuh achānak chīḳheṅ mārne lagtā hai. badrūh use jhanjhoṛ kar itnā tang kartī hai ki us ke muṅh se jhāg nikalne lagtā hai. wuh use kuchal kuchal kar mushkil se chhoṛtī hai.

⁴⁰maiṅ ne āp ke shāgirdoṅ se darḳhwāst kī thī ki wuh use nikāleṅ, lekin wuh nākām rahe.”

⁴¹īsā ne kahā, “īmān se ḳhālī aur ṭeṛhī nasl! maiṅ kab tak tumhāre pās rahūṅ, kab tak tumheṅ bardāsht karūṅ?” phir us ne ādmī se kahā, “apne beṭe ko le ā.”

⁴²beṭā īsā ke pās ā rahā thā to badrūh use zamīn par paṭaḳh kar jhanjhoṛne lagī. lekin īsā ne nāpāk rūh ko ḍāṅṭ kar bachche ko shifā dī. phir us ne use wāpas bāp ke sapurd kar diyā.

⁴³tamām log allāh kī azīm qudrat ko dekh kar hakkā-bakkā rah gae. abhī sab un tamām kāmoṅ par tājjub kar rahe the jo īsā ne hāl hī meṅ kie the ki us ne apne shāgirdoṅ se kahā,

⁴⁴“merī is bāt par ḳhūb dhyān do, ibn-e-ādam ko ādmiyoṅ ke hawāle kar diyā jāegā.”

⁴⁵lekin shāgird is kā matlab na samjhe. yih bāt un se poshīdā rahī aur wuh ise samajh na sake. nīz, wuh īsā se is ke bāre meṅ pūchhne se ḍarte bhī the.

⁴⁶phir shāgird bahs karne lage ki ham meṅ se kaun sab se baṛā hai.

⁴⁷lekin īsā jāntā thā ki wuh kyā soch rahe haiṅ. us ne ek chhoṭe bachche ko le kar apne pās khaṛā kiyā

⁴⁸aur un se kahā, “jo mere nām meṅ is bachche ko qabūl kartā hai wuh mujhe hī qabūl kartā hai. aur jo mujhe qabūl kartā hai wuh use qabūl kartā hai jis ne mujhe bhejā hai. chunāṅche tum meṅ se jo sab se chhoṭā hai wuhī baṛā hai.”

⁴⁹yūhannā bol uṭhā, “ustād, ham ne kisī ko dekhā jo āp kā nām le kar badrūheṅ nikāl rahā thā. ham ne use manā kiyā, kyūṅki wuh hamāre sāth mil kar āp kī pairawī nahīṅ kartā.”

⁵⁰lekin īsā ne kahā, “use manā na karnā, kyūṅki jo tumhāre ḳhilāf nahīṅ wuh tumhāre haq meṅ hai.”

⁵¹jab wuh waqt qarīb āyā ki īsā ko āsmān par uṭhā liyā jāe to wuh baṛe azm ke sāth yarūshalam kī taraf safar karne lagā.

⁵²is maqsad ke taht us ne apne āge qāsid bhej die. chalte chalte wuh sāmariyoṅ ke ek gāoṅ meṅ pahuṅche jahāṅ wuh us ke lie ṭhaharne kī jagah tayyār karnā chāhte the.

⁵³lekin gāoṅ ke logoṅ ne īsā ko ṭikne na diyā, kyūṅki us kī manzil-e-maqsūd yarūshalam thī.

⁵⁴yih dekh kar us ke shāgird yāqūb aur yūhannā ne kahā, “ḳhudāwand, kyā [ilyās kī tarah] ham kaheṅ ki āsmān par se āg nāzil ho kar in ko bhasm kar de?”

⁵⁵lekin īsā ne muṛ kar unheṅ ḍānṭā [aur kahā, “tum nahīṅ jānte ki tum kis qism kī rūh ke ho. ibn-e-ādam is lie nahīṅ āyā ki logoṅ ko halāk kare balki is lie ki unheṅ bachāe.”]

⁵⁶chunāṅche wuh kisī aur gāoṅ meṅ chale gae.

⁵⁷safar karte karte kisī ne rāste meṅ īsā se kahā, “jahāṅ bhī āp jāeṅ maiṅ āp ke pīchhe chaltā rahūṅgā.”

⁵⁸īsā ne jawāb diyā, “lomṛiyāṅ apne bhaṭoṅ meṅ aur parinde apne ghoṅsloṅ meṅ ārām kar sakte haiṅ, lekin ibn-e-ādam ke pās sar rakh kar ārām karne kī koī jagah nahīṅ.”

⁵⁹kisī aur se us ne kahā, “mere pīchhe ho le.” lekin us ādmī ne kahā, “ḳhudāwand, mujhe pahle jā kar apne bāp ko dafn karne kī ijāzat deṅ.”

⁶⁰lekin īsā ne jawāb diyā, “murdoṅ ko apne murde dafnāne de. tū jā kar allāh kī bādshāhī kī munādī kar.”

⁶¹ek aur ādmī ne yih māzarat chāhī, “ḳhudāwand, maiṅ zarūr āp ke pīchhe ho lūṅgā. lekin pahle mujhe apne ghar wāloṅ ko ḳhairbād kahne deṅ.”

⁶²lekin īsā ne jawāb diyā, “jo bhī hal chalāte hue pīchhe kī taraf dekhe wuh allāh kī bādshāhī ke lāiq nahīṅ hai.”