Read Roman Urdu Geo istisnā 11 Bible Online

istisnā 11 - Roman Urdu Geo bible

istisnā 11

¹rab apne ḳhudā se pyār kar aur hameshā us ke ahkām ke mutābiq zindagī guzār.

²āj jān lo ki tumhāre bachchoṅ ne nahīṅ balki tum hī ne rab apne ḳhudā se tarbiyat pāī. tum ne us kī azmat, baṛe iḳhtiyār aur qudrat ko dekhā,

³aur tum un mojizoṅ ke gawāh ho jo us ne misr ke bādshāh fir'aun aur us ke pūre mulk ke sāmne kie.

⁴tum ne dekhā ki rab ne kis tarah misrī fauj ko us ke ghoṛoṅ aur rathoṅ samet bahr-e-qulzum meṅ ġharq kar diyā jab wuh tumhārā tāqqub kar rahe the. us ne unheṅ yūṅ tabāh kiyā ki wuh āj tak bahāl nahīṅ hue.

⁵tumhāre bachche nahīṅ balki tum hī gawāh ho ki yahāṅ pahuṅchne se pahle rab ne registān meṅ tumhārī kis tarah dekh-bhāl kī.

⁶tum ne us kā iliyāb ke beṭoṅ dātan aur abīrām ke sāth sulūk dekhā jo rūbin ke qabīle ke the. us din zamīn ne ḳhaimāgāh ke andar muṅh khol kar unheṅ un ke gharānoṅ, ḍeroṅ aur tamām jāndāroṅ samet haṛap kar liyā.

⁷tum ne apnī hī āṅkhoṅ se rab ke yih tamām azīm kām dekhe haiṅ.

⁸chunāṅche un tamām ahkām par amal karte raho jo maiṅ āj tumheṅ de rahā hūṅ tāki tumheṅ wuh tāqat hāsil ho jo darkār hogī jab tum daryā-e-yardan ko pār karke mulk par qabzā karoge.

⁹agar tum farmāṅbardār raho to der tak us mulk meṅ jīte rahoge jis kā wādā rab ne qasam khā kar tumhāre bāpdādā se kiyā thā aur jis meṅ dūdh aur shahd kī kasrat hai.

¹⁰kyūṅki yih mulk misr kī mānind nahīṅ hai jahāṅ se tum nikal āe ho. wahāṅ ke khetoṅ meṅ tujhe bīj bo kar baṛī mehnat se us kī ābpāshī karnī paṛtī thī

¹¹jabki jis mulk par tum qabzā karoge us meṅ pahāṛ aur wādiyāṅ haiṅ jinheṅ sirf bārish kā pānī serāb kartā hai.

¹²rab terā ḳhudā ḳhud us mulk kā ḳhayāl rakhtā hai. rab tere ḳhudā kī āṅkheṅ sāl ke pahle din se le kar āḳhir tak mutawātir us par lagī rahtī haiṅ.

¹³chunāṅche un ahkām ke tābe raho jo maiṅ āj tumheṅ de rahā hūṅ. rab apne ḳhudā se pyār karo aur apne pūre dil-o-jān se us kī ḳhidmat karo.

¹⁴phir wuh ḳharīf aur bahār kī sālānā bārish waqt par bhejegā. anāj, angūr aur zaitūn kī fasleṅ pakeṅgī, aur tū unheṅ jamā kar legā.

¹⁵nīz, allāh terī charāgāhoṅ meṅ tere rewaṛoṅ ke lie ghās muhayyā karegā, aur tū khā kar ser ho jāegā.

¹⁶lekin ḳhabardār, kahīṅ tumheṅ warġhalāyā na jāe. aisā na ho ki tum rab kī rāh se haṭ jāo aur dīgar mābūdoṅ ko sijdā karke un kī ḳhidmat karo.

¹⁷warnā rab kā ġhazab tum par ān paṛegā, aur wuh mulk meṅ bārish hone nahīṅ degā. tumhārī fasleṅ nahīṅ pakeṅgī, aur tumheṅ jald hī us achchhe mulk meṅ se miṭā diyā jāegā jo rab tumheṅ de rahā hai.

¹⁸chunāṅche merī yih bāteṅ apne diloṅ par naqsh kar lo. unheṅ nishān ke taur par aur yāddihānī ke lie apne hāthoṅ aur māthoṅ par lagāo.

¹⁹unheṅ apne bachchoṅ ko sikhāo. har jagah aur hameshā un ke bāre meṅ bāt karo, ḳhwāh tū ghar meṅ baiṭhā yā rāste par chaltā ho, leṭā ho yā khaṛā ho.

²⁰unheṅ apne gharoṅ kī chaukhaṭoṅ aur apne shahroṅ ke darwāzoṅ par likh

²¹tāki jab tak zamīn par āsmān qāim hai tum aur tumhārī aulād us mulk meṅ jīte raheṅ jis kā wādā rab ne qasam khā kar tumhāre bāpdādā se kiyā thā.

²²ehtiyāt se un ahkām kī pairawī karo jo maiṅ tumheṅ de rahā hūṅ. rab apne ḳhudā se pyār karo, us ke tamām ahkām par amal karo aur us ke sāth lipṭe raho.

²³phir wuh tumhāre āge āge yih tamām qaumeṅ nikāl degā aur tum aisī qaumoṅ kī zamīnoṅ par qabzā karoge jo tum se baṛī aur tāqatwar haiṅ.

²⁴tum jahāṅ bhī qadam rakhoge wuh tumhārā hī hogā, junūbī registān se le kar lubnān tak, daryā-e-furāt se bahīrā-e-rūm tak.

²⁵koī bhī tumhārā sāmnā nahīṅ kar sakegā. tum us mulk meṅ jahāṅ bhī jāoge wahāṅ rab tumhārā ḳhudā apne wāde ke mutābiq tumhārī dahshat aur ḳhauf paidā kar degā.

²⁶āj tum ḳhud faislā karo. kyā tum rab kī barkat yā us kī lānat pānā chāhte ho?

²⁷agar tum rab apne ḳhudā ke un ahkām par amal karo jo maiṅ āj tumheṅ de rahā hūṅ to wuh tumheṅ barkat degā.

²⁸lekin agar tum un ke tābe na raho balki merī peshkardā rāh se haṭ kar dīgar mābūdoṅ kī pairawī karo to wuh tum par lānat bhejegā.

²⁹jab rab terā ḳhudā tujhe us mulk meṅ le jāegā jis par tū qabzā karegā to lāzim hai ki garizīm pahāṛ par chaṛh kar barkat kā elān kare aur aibāl pahāṛ par lānat kā.

³⁰yih do pahāṛ daryā-e-yardan ke maġhrib meṅ un kan'āniyoṅ ke ilāqe meṅ wāqe haiṅ jo wādī-e-yardan meṅ ābād haiṅ. wuh maġhrib kī taraf jiljāl shahr ke sāmne morih ke balūt ke daraḳhtoṅ ke nazdīk haiṅ.

³¹ab tum daryā-e-yardan ko pār karke us mulk par qabzā karne wāle ho jo rab tumhārā ḳhudā tumheṅ de rahā hai. jab tum use apnā kar us meṅ ābād ho jāoge

³²to ehtiyāt se un tamām ahkām par amal karte raho jo maiṅ āj tumheṅ de rahā hūṅ.