Read Roman Urdu Geo istisnā 12 Bible Online

istisnā 12 - Roman Urdu Geo bible

istisnā 12

¹zail meṅ wuh ahkām aur qawānīn haiṅ jin par tumheṅ dhyān se amal karnā hogā jab tum us mulk meṅ ābād hoge jo rab tere bāpdādā kā ḳhudā tujhe de rahā hai tāki tū us par qabzā kare. mulk meṅ rahte hue umr bhar un ke tābe raho.

²un tamām jaghoṅ ko barbād karo jahāṅ wuh qaumeṅ jinheṅ tumheṅ nikālnā hai apne dewatāoṅ kī pūjā kartī haiṅ, ḳhwāh wuh ūṅche pahāṛoṅ, pahāṛiyoṅ yā ghane daraḳhtoṅ ke sāy meṅ kyūṅ na hoṅ.

³un kī qurbāngāhoṅ ko ḍhā denā. jin pattharoṅ kī pūjā wuh karte haiṅ unheṅ chaknāchūr kar denā. yasīrat dewī ke khambe jalā denā. un ke dewatāoṅ ke mujassame kāṭ ḍālnā. ġharz in jaghoṅ se un kā nām-o-nishān miṭ jāe.

⁴rab apne ḳhudā kī parastish karne ke lie un ke tarīqe na apnānā.

⁵rab tumhārā ḳhudā qabīloṅ meṅ se apne nām kī sukūnat ke lie ek jagah chun legā. ibādat ke lie wahāṅ jāyā karo,

⁶aur wahāṅ apnī tamām qurbāniyāṅ lā kar pesh karo, ḳhwāh wuh bhasm hone wālī qurbāniyāṅ, zabah kī qurbāniyāṅ, paidāwār kā daswāṅ hissā, uṭhāne wālī qurbāniyāṅ, mannat ke hadie, ḳhushī se pesh kī gaī qurbāniyāṅ yā maweshiyoṅ ke pahlauṭhe kyūṅ na hoṅ.

⁷wahāṅ rab apne ḳhudā ke huzūr apne gharānoṅ samet khānā khā kar un kāmyābiyoṅ kī ḳhushī manāo jo tujhe rab tere ḳhudā kī barkat ke bāis hāsil huī haiṅ.

⁸us waqt tumheṅ wuh nahīṅ karnā jo ham karte āe haiṅ. āj tak har koī apnī marzī ke mutābiq ibādat kartā hai,

⁹kyūṅki ab tak tum ārām kī us jagah nahīṅ pahuṅche jo tujhe rab tere ḳhudā se mīrās meṅ milnī hai.

¹⁰lekin jald hī tum daryā-e-yardan ko pār karke us mulk meṅ ābād ho jāoge jo rab tumhārā ḳhudā tumheṅ mīrās meṅ de rahā hai. us waqt wuh tumheṅ irdgird ke dushmanoṅ se bachāe rakhegā, aur tum ārām aur sukūn se zindagī guzār sakoge.

¹¹tab rab tumhārā ḳhudā apne nām kī sukūnat ke lie ek jagah chun legā, aur tumheṅ sab kuchh jo maiṅ batāūṅgā wahāṅ lā kar pesh karnā hai, ḳhwāh wuh bhasm hone wālī qurbāniyāṅ, zabah kī qurbāniyāṅ, paidāwār kā daswāṅ hissā, uṭhāne wālī qurbāniyāṅ yā mannat ke ḳhās hadie kyūṅ na hoṅ.

¹²wahāṅ rab ke sāmne tum, tumhāre beṭe-beṭiyāṅ, tumhāre ġhulām aur launḍiyāṅ ḳhushī manāeṅ. apne shahroṅ meṅ ābād lāwiyoṅ ko bhī apnī ḳhushī meṅ sharīk karo, kyūṅki un ke pās maurūsī zamīn nahīṅ hogī.

¹³ḳhabardār, apnī bhasm hone wālī qurbāniyāṅ har jagah par pesh na karnā

¹⁴balki sirf us jagah par jo rab qabīloṅ meṅ se chunegā. wahīṅ sab kuchh yūṅ manā jis tarah maiṅ tujhe batātā hūṅ.

¹⁵lekin wuh jānwar is meṅ shāmil nahīṅ haiṅ jo tū qurbānī ke taur par pesh nahīṅ karnā chāhtā balki sirf khānā chāhtā hai. aise jānwar tū āzādī se apne tamām shahroṅ meṅ zabah karke us barkat ke mutābiq khā saktā hai jo rab tere ḳhudā ne tujhe dī hai. aisā gosht hiran aur ġhazāl ke gosht kī mānind hai yānī pāk aur nāpāk donoṅ hī use khā sakte haiṅ.

¹⁶lekin ḳhūn na khānā. use pānī kī tarah zamīn par unḍel kar zāe kar denā.

¹⁷jo bhī chīzeṅ rab ke lie maḳhsūs kī gaī haiṅ unheṅ apne shahroṅ meṅ na khānā masalan anāj, angūr ke ras aur zaitūn ke tel kā daswāṅ hissā, maweshiyoṅ ke pahlauṭhe, mannat ke hadie, ḳhushī se pesh kī gaī qurbāniyāṅ aur uṭhāne wālī qurbāniyāṅ.

¹⁸yih chīzeṅ sirf rab ke huzūr khānā yānī us jagah par jise wuh maqdis ke lie chunegā. wahīṅ tū apne beṭe-beṭiyoṅ, ġhulāmoṅ, launḍiyoṅ aur apne qabāilī ilāqe ke lāwiyoṅ ke sāth jamā ho kar ḳhushī manā ki rab ne hamārī mehnat ko barkat dī hai.

¹⁹apne mulk meṅ lāwiyoṅ kī zarūriyāt umr bhar pūrī karne kī fikr rakh.

²⁰jab rab terā ḳhudā apne wāde ke mutābiq terī sarhaddeṅ baṛhā degā aur tū gosht khāne kī ḳhwāhish rakhegā to jis tarah jī chāhe gosht khā sakegā.

²¹agar terā ghar us maqdis se dūr ho jise rab terā ḳhudā apne nām kī sukūnat ke lie chunegā to tū jis tarah jī chāhe apne shahroṅ meṅ rab se mile hue maweshiyoṅ ko zabah karke khā saktā hai. lekin aisā hī karnā jaisā maiṅ ne hukm diyā hai.

²²aisā gosht hiran aur ġhazāl ke gosht kī mānind hai yānī pāk aur nāpāk donoṅ hī use khā sakte haiṅ.

²³albattā gosht ke sāth ḳhūn na khānā, kyūṅki ḳhūn jāndār kī jān hai. us kī jān gosht ke sāth na khānā.

²⁴ḳhūn na khānā balki use zamīn par unḍel kar zāe kar denā.

²⁵use na khānā tāki tujhe aur terī aulād ko kāmyābī hāsil ho, kyūṅki aisā karne se tū rab kī nazar meṅ sahīh kām karegā.

²⁶lekin jo chīzeṅ rab ke lie maḳhsūs-o-muqaddas haiṅ yā jo tū ne mannat mān kar us ke lie maḳhsūs kī haiṅ lāzim hai ki tū unheṅ us jagah le jāe jise rab maqdis ke lie chunegā.

²⁷wahīṅ, rab apne ḳhudā kī qurbāngāh par apnī bhasm hone wālī qurbāniyāṅ gosht aur ḳhūn samet chaṛhā. zabah kī qurbāniyoṅ kā ḳhūn qurbāngāh par unḍel denā, lekin un kā gosht tū khā saktā hai.

²⁸jo bhī hidāyāt maiṅ tujhe de rahā hūṅ unheṅ ehtiyāt se pūrā kar. phir tū aur terī aulād ḳhushhāl raheṅge, kyūṅki tū wuh kuchh karegā jo rab tere ḳhudā kī nazar meṅ achchhā aur durust hai.

²⁹rab terā ḳhudā un qaumoṅ ko miṭā degā jin kī taraf tū baṛh rahā hai. tū unheṅ un ke mulk se nikāltā jāegā aur ḳhud us meṅ ābād ho jāegā.

³⁰lekin ḳhabardār, un ke ḳhatm hone ke bād bhī un ke dewatāoṅ ke bāre meṅ mālūmāt hāsil na kar, warnā tū phaṅs jāegā. mat kahnā ki yih qaumeṅ kis tarīqe se apne dewatāoṅ kī pūjā kartī haiṅ? ham bhī aisā hī kareṅ.

³¹aisā mat kar! yih qaumeṅ aise ghinaune tarīqe se pūjā kartī haiṅ jin se rab nafrat kartā hai. wuh apne bachchoṅ ko bhī jalā kar apne dewatāoṅ ko pesh karte haiṅ.

³²kalām kī jo bhī bāt maiṅ tumheṅ pesh kartā hūṅ us ke tābe rah kar us par amal karo. na kisī bāt kā izāfā karnā, na koī bāt nikālnā.