Read Roman Urdu Geo istisnā 14 Bible Online

istisnā 14 - Roman Urdu Geo bible

istisnā 14

¹tum rab apne ḳhudā ke farzand ho. apne āp ko murdoṅ ke sabab se na zaḳhmī karo, na apne sar ke sāmne wāle bāl munḍwāo.

²kyūṅki tū rab apne ḳhudā ke lie maḳhsūs-o-muqaddas qaum hai. duniyā kī tamām qaumoṅ meṅ se rab ne tujhe hī chun kar apnī milkiyat banā liyā hai.

³koī bhī makrūh chīz na khānā.

⁴tum bail, bheṛ-bakrī,

⁵hiran, ġhazāl, mrig, [1] pahāṛī bakrī, mahāt, [2] ġhazāl-e-afrīqā [3] aur pahāṛī bakrī khā sakte ho.

⁶jin ke khur yā pāoṅ bilkul chire hue haiṅ aur jo jugālī karte haiṅ unheṅ khāne kī ijāzat hai.

⁷ūṅṭ, bijjū yā ḳhargosh khānā manā hai. wuh tumhāre lie nāpāk haiṅ, kyūṅki wuh jugālī to karte haiṅ lekin un ke khur yā pāoṅ chire hue nahīṅ haiṅ.

⁸sūar na khānā. wuh tumhāre lie nāpāk hai, kyūṅki us ke khur to chire hue haiṅ lekin wuh jugālī nahīṅ kartā. na un kā gosht khānā, na un kī lāshoṅ ko chhūnā.

⁹pānī meṅ rahne wāle jānwar khāne ke lie jāiz haiṅ agar un ke par aur chhilke hoṅ.

¹⁰lekin jin ke par yā chhilke nahīṅ haiṅ wuh tumhāre lie nāpāk haiṅ.

¹¹tum har pāk parindā khā sakte ho.

¹²lekin zail ke parinde khānā manā hai: uqāb, daṛhiyal giddh, kālā giddh,

¹³lāl chīl, kālī chīl, har qism kā giddh,

¹⁴har qism kā kawwā,

¹⁵uqābī ullū, chhoṭe kān wālā ullū, baṛe kān wālā ullū, har qism kā bāz,

¹⁶chhoṭā ullū, chinghāṛne wālā ullū, safed ullū,

¹⁷dashtī ullū, misrī giddh, qūq,

¹⁸laqlaq, har qism kā būtīmār, hudhud aur chamgādaṛ. [4]

¹⁹tamām par rakhne wāle kīṛe tumhāre lie nāpāk haiṅ. unheṅ khānā manā hai.

²⁰lekin tum har pāk parindā khā sakte ho.

²¹jo jānwar ḳhud-ba-ḳhud mar jāe use na khānā. tū use apnī ābādī meṅ rahne wāle kisī pardesī ko de yā kisī ajnabī ko bech saktā hai aur wuh use khā saktā hai. lekin tū use mat khānā, kyūṅki tū rab apne ḳhudā ke lie maḳhsūs-o-muqaddas qaum hai. bakrī ke bachche ko us kī māṅ ke dūdh meṅ pakānā manā hai.

²²lāzim hai ki tū har sāl apne khetoṅ kī paidāwār kā daswāṅ hissā rab ke lie alag kare.

²³is ke lie apnā anāj, angūr kā ras, zaitūn kā tel aur maweshī ke pahlauṭhe rab apne ḳhudā ke huzūr le ānā yānī us jagah jo wuh apne nām kī sukūnat ke lie chunegā. wahāṅ yih chīzeṅ qurbān karke khā tāki tū umr bhar rab apne ḳhudā kā ḳhauf mānanā sīkhe.

²⁴lekin ho saktā hai ki jo jagah rab terā ḳhudā apne nām kī sukūnat ke lie chunegā wuh tere ghar se had se zyādā dūr ho aur rab tere ḳhudā kī barkat ke bāis mazkūrā daswāṅ hissā itnā zyādā ho ki tū use maqdis tak nahīṅ pahuṅchā saktā.

²⁵is sūrat meṅ use bech kar us ke paise us jagah le jā jo rab terā ḳhudā apne nām kī sukūnat ke lie chunegā.

²⁶wahāṅ pahuṅch kar un paisoṅ se jo jī chāhe ḳharīdnā, ḳhwāh gāy-bail, bheṛ-bakrī, mai yā mai jaisī koī aur chīz kyūṅ na ho. phir apne gharāne ke sāth mil kar rab apne ḳhudā ke huzūr yih chīzeṅ khānā aur ḳhushī manānā.

²⁷aise mauqoṅ par un lāwiyoṅ kā ḳhayāl rakhnā jo tere qabāilī ilāqe meṅ rahte haiṅ, kyūṅki unheṅ mīrās meṅ zamīn nahīṅ milegī.

²⁸har tīsre sāl apnī paidāwār kā daswāṅ hissā apne shahroṅ meṅ jamā karnā.

²⁹use lāwiyoṅ ko denā jin ke pās maurūsī zamīn nahīṅ hai, nīz apne shahroṅ meṅ ābād pardesiyoṅ, yatīmoṅ aur bewāoṅ ko denā. wuh āeṅ aur khānā khā kar ser ho jāeṅ tāki rab terā ḳhudā tere har kām meṅ barkat de.