Read Roman Urdu Geo istisnā 17 Bible Online

istisnā 17 - Roman Urdu Geo bible

istisnā 17

¹rab apne ḳhudā ko nāqis gāy-bail yā bheṛ-bakrī pesh na karnā, kyūṅki wuh aisī qurbānī se nafrat rakhtā hai.

²jab tū un shahroṅ meṅ ābād ho jāegā jo rab terā ḳhudā tujhe degā to ho saktā hai ki tere darmiyān koī mard yā aurat rab tere ḳhudā kā ahd toṛ kar wuh kuchh kare jo use burā lage.

³masalan wuh dīgar mābūdoṅ ko yā sūraj, chāṅd yā sitāroṅ ke pūre lashkar ko sijdā kare, hālāṅki maiṅ ne yih manā kiyā hai.

⁴jab bhī tujhe is qism kī ḳhabar mile to is kā pūrā khoj lagā. agar bāt durust nikle aur aisī ghinaunī harkat wāqaī isrāīl meṅ kī gaī ho

⁵to qusūrwār ko shahr ke bāhar le jā kar sangsār kar denā.

⁶lekin lāzim hai ki pahle kam az kam do yā tīn log gawāhī deṅ ki us ne aisā hī kiyā hai. use sazā-e-maut dene ke lie ek gawāh kāfī nahīṅ.

⁷pahle gawāh us par patthar phaiṅkeṅ, is ke bād bāqī tamām log use sangsār kareṅ. yūṅ tū apne darmiyān se burāī miṭā degā.

⁸agar tere shahr ke qāziyoṅ ke lie kisī muqaddame kā faislā karnā mushkil ho to us maqdis meṅ ā kar apnā muāmalā pesh kar jo rab terā ḳhudā chunegā, ḳhwāh kisī ko qatl kiyā gayā ho, use zaḳhmī kar diyā gayā ho yā koī aur maslā ho.

⁹lāwī ke qabīle ke imāmoṅ aur maqdis meṅ ḳhidmat karne wāle qāzī ko apnā muqaddamā pesh kar, aur wuh faislā kareṅ.

¹⁰jo faislā wuh us maqdis meṅ kareṅge jo rab chunegā use mānanā paṛegā. jo bhī hidāyat wuh deṅ us par ehtiyāt se amal kar.

¹¹sharīat kī jo bhī bāt wuh tujhe sikhāeṅ aur jo bhī faislā wuh deṅ us par amal kar. jo kuchh bhī wuh tujhe batāeṅ us se na dāīṅ aur na bāīṅ taraf muṛnā.

¹²jo maqdis meṅ rab tere ḳhudā kī ḳhidmat karne wāle qāzī yā imām ko haqīr jān kar un kī nahīṅ suntā use sazā-e-maut dī jāe. yūṅ tū isrāīl se burāī miṭā degā.

¹³phir tamām log yih sun kar ḍar jāeṅge aur āindā aisī gustāḳhī karne kī jur'at nahīṅ kareṅge.

¹⁴tū jald hī us mulk meṅ dāḳhil hogā jo rab terā ḳhudā tujhe dene wālā hai. jab tū us par qabzā karke us meṅ ābād ho jāegā to ho saktā hai ki tū ek din kahe, “āo ham irdgird kī tamām qaumoṅ kī tarah bādshāh muqarrar kareṅ jo ham par hukūmat kare.”

¹⁵agar tū aisā kare to sirf wuh shaḳhs muqarrar kar jise rab terā ḳhudā chunegā. wuh pardesī na ho balki terā apnā isrāīlī bhāī ho.

¹⁶bādshāh bahut zyādā ghoṛe na rakhe, na apne logoṅ ko unheṅ ḳharīdne ke lie misr bheje. kyūṅki rab ne tujh se kahā hai ki kabhī wahāṅ wāpas na jānā.

¹⁷terā bādshāh zyādā bīwiyāṅ bhī na rakhe, warnā us kā dil rab se dūr ho jāegā. aur wuh had se zyādā sonā-chāṅdī jamā na kare.

¹⁸taḳhtnashīn hote waqt wuh lāwī ke qabīle ke imāmoṅ ke pās paṛī is sharīat kī naql likhwāe.

¹⁹yih kitāb us ke pās mahfūz rahe, aur wuh umr bhar rozānā ise paṛhtā rahe tāki rab apne ḳhudā kā ḳhauf mānanā sīkhe. tab wuh sharīat kī tamām bātoṅ kī pairawī karegā,

²⁰apne āp ko apne isrāīlī bhāiyoṅ se zyādā aham nahīṅ samjhegā aur kisī tarah bhī sharīat se haṭ kar kām nahīṅ karegā. natīje meṅ wuh aur us kī aulād bahut arse tak isrāīl par hukūmat kareṅge.