Read Roman Urdu Geo istisnā 20 Bible Online

istisnā 20 - Roman Urdu Geo bible

istisnā 20

¹jab tū jang ke lie nikal kar deḳhtā hai ki dushman tādād meṅ zyādā haiṅ aur un ke pās ghoṛe aur rath bhī haiṅ to mat ḍarnā. rab terā ḳhudā jo tujhe misr se nikāl lāyā ab bhī tere sāth hai.

²jang ke lie nikalne se pahle imām sāmne āe aur fauj se muḳhātib ho kar

³kahe, “sun ai isrāīl! āj tum apne dushman se laṛne jā rahe ho. un ke sabab se pareshān na ho. un se na ḳhauf khāo, na ghabrāo,

⁴kyūṅki rab tumhārā ḳhudā ḳhud tumhāre sāth jā kar dushman se laṛegā. wuhī tumheṅ fath baḳhshegā.”

⁵phir nigahbān fauj se muḳhātib hoṅ, “kyā yahāṅ koī hai jis ne hāl meṅ apnā nayā ghar mukammal kiyā lekin use maḳhsūs karne kā mauqā na milā? wuh apne ghar wāpas chalā jāe. aisā na ho ki wuh jang ke daurān mārā jāe aur koī aur ghar ko maḳhsūs karke us meṅ basne lage.

⁶kyā koī hai jis ne angūr kā bāġh lagā kar is waqt us kī pahlī fasal ke intizār meṅ hai? wuh apne ghar wāpas chalā jāe. aisā na ho ki wuh jang meṅ mārā jāe aur koī aur bāġh kā fāidā uṭhāe.

⁷kyā koī hai jis kī mangnī huī hai aur jo is waqt shādī ke intizār meṅ hai? wuh apne ghar wāpas chalā jāe. aisā na ho ki wuh jang meṅ mārā jāe aur koī aur us kī mangetar se shādī kare.”

⁸nigahbān kaheṅ, “kyā koī ḳhaufzadā yā pareshān hai? wuh apne ghar wāpas chalā jāe tāki apne sāthiyoṅ ko pareshān na kare.”

⁹is ke bād faujiyoṅ par afsar muqarrar kie jāeṅ.

¹⁰kisī shahr par hamlā karne se pahle us ke bāshindoṅ ko hathiyār ḍāl dene kā mauqā denā.

¹¹agar wuh mān jāeṅ aur apne darwāze khol deṅ to wuh tere lie begār meṅ kām karke terī ḳhidmat kareṅ.

¹²lekin agar wuh hathiyār ḍālne se inkār kareṅ aur jang chhiṛ jāe to shahr kā muhāsarā kar.

¹³jab rab terā ḳhudā tujhe shahr par fath degā to us ke tamām mardoṅ ko halāk kar denā.

¹⁴tū tamām māl-e-ġhanīmat auratoṅ, bachchoṅ aur maweshiyoṅ samet rakh saktā hai. dushman kī jo chīzeṅ rab ne tere hawāle kar dī haiṅ un sab ko tū istemāl kar saktā hai.

¹⁵yūṅ un shahroṅ se nipaṭnā jo tere apne mulk se bāhar haiṅ.

¹⁶lekin jo shahr us mulk meṅ wāqe haiṅ jo rab terā ḳhudā tujhe mīrās meṅ de rahā hai, un ke tamām jāndāroṅ ko halāk kar denā.

¹⁷unheṅ rab ke sapurd karke mukammal taur par halāk karnā, jis tarah rab tere ḳhudā ne tujhe hukm diyā hai. is meṅ hittī, amorī, kan'ānī, farizzī, hiwwī aur yabūsī shāmil haiṅ.

¹⁸agar tū aisā na kare to wuh tumheṅ rab tumhāre ḳhudā kā gunāh karne par uksāeṅge. jo ghinaunī harkateṅ wuh apne dewatāoṅ kī pūjā karte waqt karte haiṅ unheṅ wuh tumheṅ bhī sikhāeṅge.

¹⁹shahr kā muhāsarā karte waqt irdgird ke phaldār daraḳhtoṅ ko kāṭ kar tabāh na kar denā ḳhwāh baṛī der bhī ho jāe, warnā tū un kā phal nahīṅ khā sakegā. unheṅ na kāṭnā. kyā daraḳht tere dushman haiṅ jin kā muhāsarā karnā hai? hargiz nahīṅ!

²⁰un daraḳhtoṅ kī aur bāt hai jo phal nahīṅ lāte. unheṅ tū kāṭ kar muhāsare ke lie istemāl kar saktā hai jab tak shahr shikast na khāe.