Read Roman Urdu Geo istisnā 24 Bible Online

istisnā 24 - Roman Urdu Geo bible

istisnā 24

¹ho saktā hai koī ādmī kisī aurat se shādī kare lekin bād meṅ use pasand na kare, kyūṅki use bīwī ke bāre meṅ kisī sharmnāk bāt kā patā chal gayā hai. wuh talāqnāmā likh kar use aurat ko detā aur phir use ghar se wāpas bhej detā hai.

²is ke bād us aurat kī shādī kisī aur mard se ho jātī hai,

³aur wuh bhī bād meṅ use pasand nahīṅ kartā. wuh bhī talāqnāmā likh kar use aurat ko detā aur phir use ghar se wāpas bhej detā hai. ḳhwāh dūsrā shauhar use wāpas bhej de yā shauhar mar jāe,

⁴aurat ke pahle shauhar ko us se dubārā shādī karne kī ijāzat nahīṅ hai, kyūṅki wuh aurat us ke lie nāpāk hai. aisī harkat rab kī nazar meṅ qābil-e-ghin hai. us mulk ko yūṅ gunāhālūdā na karnā jo rab terā ḳhudā tujhe mīrās meṅ de rahā hai.

⁵agar kisī ādmī ne abhī abhī shādī kī ho to tū use bhartī karke jang karne ke lie nahīṅ bhej saktā. tū use koī bhī aisī zimmādārī nahīṅ de saktā, jis se wuh ghar se dūr rahne par majbūr ho jāe. ek sāl tak wuh aisī zimmādāriyoṅ se barī rahe tāki ghar meṅ rah kar apnī bīwī ko ḳhush kar sake.

⁶agar koī tujh se udhār le to zamānat ke taur par us se na us kī chhoṭī chakkī, na us kī baṛī chakkī kā pāṭ lenā, kyūṅki aisā karne se tū us kī jān legā yānī tū wuh chīz legā jis se us kā guzārā hotā hai.

⁷agar kisī ādmī ko pakaṛā jāe jis ne apne hamwatan ko aġhwā karke ġhulām banā liyā yā bech diyā hai to use sazā-e-maut denā hai. yūṅ tū apne darmiyān se burāī miṭā degā.

⁸agar koī wabāī jildī bīmārī tujhe lag jāe to baṛī ehtiyāt se lāwī ke qabīle ke imāmoṅ kī tamām hidāyāt par amal karnā. jo bhī hukm maiṅ ne unheṅ diyā use pūrā karnā.

⁹yād kar ki rab tere ḳhudā ne mariyam ke sāth kyā kiyā jab tum misr se nikal kar safar kar rahe the.

¹⁰apne hamwatan ko udhār dete waqt us ke ghar meṅ na jānā tāki zamānat kī koī chīz mile

¹¹balki bāhar ṭhahar kar intizār kar ki wuh ḳhud ghar se zamānat kī chīz nikāl kar tujhe de.

¹²agar wuh itnā zarūratmand ho ki sirf apnī chādar de sake to rāt ke waqt zamānat tere pās na rahe.

¹³use sūraj ḍūbne tak wāpas karnā tāki qarzdār us meṅ lipaṭ kar so sake. phir wuh tujhe barkat degā aur rab terā ḳhudā terā yih qadam rāst qarār degā.

¹⁴zarūratmand mazdūr se ġhalat fāidā na uṭhānā, chāhe wuh isrāīlī ho yā pardesī.

¹⁵use rozānā sūraj ḍūbne se pahle pahle us kī mazdūrī de denā, kyūṅki is se us kā guzārā hotā hai. kahīṅ wuh rab ke huzūr terī shikāyat na kare aur tū qusūrwār ṭhahre.

¹⁶wālidain ko un ke bachchoṅ ke jarāim ke sabab se sazā-e-maut na dī jāe, na bachchoṅ ko un ke wālidain ke jarāim ke sabab se. agar kisī ko sazā-e-maut denī ho to us gunāh ke sabab se jo us ne ḳhud kiyā hai.

¹⁷pardesiyoṅ aur yatīmoṅ ke huqūq qāim rakhnā. udhār dete waqt zamānat ke taur par bewā kī chādar na lenā.

¹⁸yād rakh ki tū bhī misr meṅ ġhulām thā aur ki rab tere ḳhudā ne fidyā de kar tujhe wahāṅ se chhuṛāyā. isī wajah se maiṅ tujhe yih hukm detā hūṅ.

¹⁹agar tū fasal kī kaṭāī ke waqt ek pūlā bhūl kar khet meṅ chhoṛ āe to use lāne ke lie wāpas na jānā. use pardesiyoṅ, yatīmoṅ aur bewāoṅ ke lie wahīṅ chhoṛ denā tāki rab terā ḳhudā tere har kām meṅ barkat de.

²⁰jab zaitūn kī fasal pak gaī ho to daraḳhtoṅ ko mār mār kar ek hī bār un meṅ se phal utār. is ke bād unheṅ na chheṛnā. bachā huā phal pardesiyoṅ, yatīmoṅ aur bewāoṅ ke lie chhoṛ denā.

²¹isī tarah apne angūr toṛne ke lie ek hī bār bāġh meṅ se guzarnā. is ke bād use na chheṛnā. bachā huā phal pardesiyoṅ, yatīmoṅ aur bewāoṅ ke lie chhoṛ denā.

²²yād rakh ki tū ḳhud misr meṅ ġhulām thā. isī wajah se maiṅ tujhe yih hukm detā hūṅ.