Read Roman Urdu Geo istisnā 25 Bible Online

istisnā 25 - Roman Urdu Geo bible

istisnā 25

¹agar log apnā ek dūsre ke sāth jhagaṛā ḳhud nipṭā na sakeṅ to wuh apnā muāmalā adālat meṅ pesh kareṅ. qāzī faislā kare ki kaun bequsūr hai aur kaun mujrim.

²agar mujrim ko koṛe lagāne kī sazā denī hai to use qāzī ke sāmne hī muṅh ke bal zamīn par liṭānā. phir use itne koṛe lagāe jāeṅ jitnoṅ ke wuh lāiq hai.

³lekin us ko zyādā se zyādā 40 koṛe lagāne haiṅ, warnā tere isrāīlī bhāī kī sar-e-ām be'izzatī ho jāegī.

⁴jab tū fasal gāhne ke lie us par bail chalne detā hai to us kā muṅh bāndh kar na rakhnā.

⁵agar koī shādīshudā mard beaulād mar jāe aur us kā sagā bhāī sāth rahe to us kā farz hai ki bewā se shādī kare. bewā shauhar ke ḳhāndān se haṭ kar kisī aur se shādī na kare balki sirf apne dewar se.

⁶pahlā beṭā jo is rishte se paidā hogā pahle shauhar ke beṭe kī haisiyat rakhegā. yūṅ us kā nām qāim rahegā.

⁷lekin agar dewar bhābī se shādī karnā na chāhe to bhābī shahr ke darwāze par jamā hone wāle buzurgoṅ ke pās jāe aur un se kahe, “merā dewar mujh se shādī karne se inkār kartā hai. wuh apnā farz adā karne ko tayyār nahīṅ ki apne bhāī kā nām qāim rakhe.”

⁸phir shahr ke buzurg dewar ko bulā kar use samjhāeṅ. agar wuh is ke bāwujūd bhī us se shādī karne se inkār kare

⁹to us kī bhābī buzurgoṅ kī maujūdagī meṅ us ke pās jā kar us kī ek chappal utār le. phir wuh us ke muṅh par thūk kar kahe, “us ādmī se aisā sulūk kiyā jātā hai jo apne bhāī kī nasl qāim rakhne ko tayyār nahīṅ.”

¹⁰āindā isrāīl meṅ dewar kī nasl “nange pāoṅ wāle kī nasl” kahlāegī.

¹¹agar do ādmī laṛ rahe hoṅ aur ek kī bīwī apne shauhar ko bachāne kī ḳhātir muḳhālif ke azu-e-tanāsul ko pakaṛ le

¹²to lāzim hai ki tū aurat kā hāth kāṭ ḍāle. us par rahm na karnā.

¹³tolte waqt apne thaile meṅ sahīh wazn ke bāṭ rakh, aur dhokā dene ke lie halke bāṭ sāth na rakhnā.

¹⁴isī tarah apne ghar meṅ anāj kī paimāish karne kā sahīh bartan rakh, aur dhokā dene ke lie chhoṭā bartan sāth na rakhnā.

¹⁵sahīh wazn ke bāṭ aur paimāish karne ke sahīh bartan istemāl karnā tāki tū der tak us mulk meṅ jītā rahe jo rab terā ḳhudā tujhe degā.

¹⁶kyūṅki use har dhokebāz se ghin hai.

¹⁷yād rahe ki amālīqiyoṅ ne tujh se kyā kuchh kiyā jab tum misr se nikal kar safar kar rahe the.

¹⁸jab tū thakāhārā thā to wuh tujh par hamlā karke pīchhe pīchhe chalne wāle tamām kamzoroṅ ko jān se mārte rahe. wuh allāh kā ḳhauf nahīṅ mānte the.

¹⁹chunāṅche jab rab terā ḳhudā tujhe irdgird ke tamām dushmanoṅ se sukūn degā aur tū us mulk meṅ ābād hogā jo wuh tujhe mīrās meṅ de rahā hai tāki tū us par qabzā kare to amālīqiyoṅ ko yūṅ halāk kar ki duniyā meṅ un kā nām-o-nishān na rahe. yih bāt mat bhūlnā.