Read Roman Urdu Geo istisnā 27 Bible Online

istisnā 27 - Roman Urdu Geo bible

istisnā 27

¹phir mūsā ne buzurgoṅ se mil kar qaum se kahā, “tamām hidāyāt ke tābe raho jo maiṅ tumheṅ āj de rahā hūṅ.

²jab tum daryā-e-yardan ko pār karke us mulk meṅ dāḳhil hoge jo rab terā ḳhudā tujhe de rahā hai to wahāṅ baṛe patthar khaṛe karke un par safedī kar.

³un par lafz-ba-lafz pūrī sharīat likh. daryā ko pār karne ke bād yihī kuchh kar tāki tū us mulk meṅ dāḳhil ho jo rab terā ḳhudā tujhe degā aur jis meṅ dūdh aur shahd kī kasrat hai. kyūṅki rab tere bāpdādā ke ḳhudā ne yih dene kā tujh se wādā kiyā hai.

⁴chunāṅche yardan ko pār karke pattharoṅ ko aibāl pahāṛ par khaṛā karo aur un par safedī kar.

⁵wahāṅ rab apne ḳhudā ke lie qurbāngāh banānā. jo patthar tū us ke lie istemāl kare unheṅ lohe ke kisī auzār se na tarāshnā.

⁶sirf sālim patthar istemāl kar. qurbāngāh par rab apne ḳhudā ko bhasm hone wālī qurbāniyāṅ pesh kar.

⁷salāmatī kī qurbāniyāṅ bhī us par chaṛhā. unheṅ wahāṅ rab apne ḳhudā ke huzūr khā kar ḳhushī manā.

⁸wahāṅ khaṛe kie gae pattharoṅ par sharīat ke tamām alfāz sāf sāf likhe jāeṅ.”

⁹phir mūsā ne lāwī ke qabīle ke imāmoṅ se mil kar tamām isrāīliyoṅ se kahā, “ai isrāīl, ḳhāmoshī se sun. ab tū rab apne ḳhudā kī qaum ban gayā hai,

¹⁰is lie us kā farmāṅbardār rah aur us ke un ahkām par amal kar jo maiṅ tujhe āj de rahā hūṅ.”

¹¹usī din mūsā ne isrāīliyoṅ ko hukm de kar kahā,

¹²“daryā-e-yardan ko pār karne ke bād shamāūn, lāwī, yahūdāh, ishkār, yūsuf aur binyamīn ke qabīle garizīm pahāṛ par khaṛe ho jāeṅ. wahāṅ wuh barkat ke alfāz boleṅ.

¹³bāqī qabīle yānī rūbin, jad, āshar, zabūlūn, dān aur naftālī aibāl pahāṛ par khaṛe ho kar lānat ke alfāz boleṅ.

¹⁴phir lāwī tamām logoṅ se muḳhātib ho kar ūṅchī āwāz se kaheṅ,

¹⁵‘us par lānat jo but tarāsh kar yā ḍhāl kar chupke se khaṛā kare. rab ko kārīgar ke hāthoṅ se banī huī aisī chīz se ghin hai.’ jawāb meṅ sab log kaheṅ, ‘āmīn!’

¹⁶phir lāwī kaheṅ, ‘us par lānat jo apne bāp yā māṅ kī tahqīr kare.’ sab log kaheṅ, ‘āmīn!’

¹⁷‘us par lānat jo apne paṛosī kī zamīn kī hudūd āge pīchhe kare.’ sab log kaheṅ, ‘āmīn!’

¹⁸‘us par lānat jo kisī andhe kī rāhnumāī karke use ġhalat rāste par le jāe.’ sab log kaheṅ, ‘āmīn!’

¹⁹‘us par lānat jo pardesiyoṅ, yatīmoṅ yā bewāoṅ ke huqūq qāim na rakhe.’ sab log kaheṅ, ‘āmīn!’

²⁰‘us par lānat jo apne bāp kī bīwī se hambistar ho jāe, kyūṅki wuh apne bāp kī behurmatī kartā hai.’ sab log kaheṅ, ‘āmīn!’

²¹‘us par lānat jo jānwar se jinsī tālluq rakhe.’ sab log kaheṅ, ‘āmīn!’

²²‘us par lānat jo apnī sagī bahan, apne bāp kī beṭī yā apnī māṅ kī beṭī se hambistar ho jāe.’ sab log kaheṅ, ‘āmīn!’

²³‘us par lānat jo apnī sās se hambistar ho jāe.’ sab log kaheṅ, ‘āmīn!’

²⁴‘us par lānat jo chupke se apne hamwatan ko qatl kar de.’ sab log kaheṅ, ‘āmīn!’

²⁵‘us par lānat jo paise le kar kisī bequsūr shaḳhs ko qatl kare.’ sab log kaheṅ, ‘āmīn!’

²⁶‘us par lānat jo is sharīat kī bāteṅ qāim na rakhe, na in par amal kare.’ sab log kaheṅ, ‘āmīn!’