Read Roman Urdu Geo istisnā 31 Bible Online

istisnā 31 - Roman Urdu Geo bible

istisnā 31

¹mūsā ne jā kar tamām isrāīliyoṅ se mazīd kahā,

²“ab maiṅ 120 sāl kā ho chukā hūṅ. merā chalnā phirnā mushkil ho gayā hai. aur waise bhī rab ne mujhe batāyā hai, ‘tū daryā-e-yardan ko pār nahīṅ karegā.’

³rab terā ḳhudā ḳhud tere āge āge jā kar yardan ko pār karegā. wuhī tere āge āge in qaumoṅ ko tabāh karegā tāki tū un ke mulk par qabzā kar sake. daryā ko pār karte waqt yashūa tere āge chalegā jis tarah rab ne farmāyā hai.

⁴rab wahāṅ ke logoṅ ko bilkul usī tarah tabāh karegā jis tarah wuh amoriyoṅ ko un ke bādshāhoṅ sīhon aur oj samet tabāh kar chukā hai.

⁵rab tumheṅ un par ġhālib āne degā. us waqt tumheṅ un ke sāth waisā sulūk karnā hai jaisā maiṅ ne tumheṅ batāyā hai.

⁶mazbūt aur diler ho. un se ḳhauf na khāo, kyūṅki rab terā ḳhudā tere sāth chaltā hai. wuh tujhe kabhī nahīṅ chhoṛegā, tujhe kabhī tark nahīṅ karegā.”

⁷is ke bād mūsā ne tamām isrāīliyoṅ ke sāmne yashūa ko bulāyā aur us se kahā, “mazbūt aur diler ho, kyūṅki tū is qaum ko us mulk meṅ le jāegā jis kā wādā rab ne qasam khā kar un ke bāpdādā se kiyā thā. lāzim hai ki tū hī use taqsīm karke har qabīle ko us kā maurūsī ilāqā de.

⁸rab ḳhud tere āge āge chalte hue tere sāth hogā. wuh tujhe kabhī nahīṅ chhoṛegā, tujhe kabhī nahīṅ tark karegā. ḳhauf na khānā, na ghabrānā.”

⁹mūsā ne yih pūrī sharīat likh kar isrāīl ke tamām buzurgoṅ aur lāwī ke qabīle ke un imāmoṅ ke sapurd kī jo safar karte waqt ahd kā sandūq uṭhā kar le chalte the. us ne un se kahā,

¹⁰“har sāt sāl ke bād is sharīat kī tilāwat karnā, yānī bahālī ke sāl meṅ jab tamām qarz mansūḳh kie jāte haiṅ. tilāwat us waqt karnā hai jab isrāīlī jhoṅpṛiyoṅ kī īd ke lie rab apne ḳhudā ke sāmne us jagah hāzir hoṅge jo wuh maqdis ke lie chunegā.

¹²tamām logoṅ ko mardoṅ, auratoṅ, bachchoṅ aur pardesiyoṅ samet wahāṅ jamā karnā tāki wuh sun kar sīkheṅ, rab tumhāre ḳhudā kā ḳhauf māneṅ aur ehtiyāt se is sharīat kī bātoṅ par amal kareṅ.

¹³lāzim hai ki un kī aulād jo is sharīat se nāwāqif hai ise sune aur sīkhe tāki umr bhar us mulk meṅ rab tumhāre ḳhudā kā ḳhauf māne jis par tum daryā-e-yardan ko pār karke qabzā karoge.”

¹⁴rab ne mūsā se kahā, “ab terī maut qarīb hai. yashūa ko bulā kar us ke sāth mulāqāt ke ḳhaime meṅ hāzir ho jā. wahāṅ maiṅ use us kī zimmādāriyāṅ sauṅpūṅgā.” mūsā aur yashūa ā kar ḳhaime meṅ hāzir hue

¹⁵to rab ḳhaime ke darwāze par bādal ke satūn meṅ zāhir huā.

¹⁶us ne mūsā se kahā, “tū jald hī mar kar apne bāpdādā se jā milegā. lekin yih qaum mulk meṅ dāḳhil hone par zinā karke us ke ajnabī dewatāoṅ kī pairawī karne lag jāegī. wuh mujhe tark karke wuh ahd toṛ degī jo maiṅ ne un ke sāth bāndhā hai.

¹⁷phir merā ġhazab un par bhaṛkegā. maiṅ unheṅ chhoṛ kar apnā chehrā un se chhupā lūṅgā. tab unheṅ kachchā chabā liyā jāegā aur bahut sārī haibatnāk musībateṅ un par āeṅgī. us waqt wuh kaheṅge, ‘kyā yih musībateṅ is wajah se ham par nahīṅ āīṅ ki rab hamāre sāth nahīṅ hai?’

¹⁸aur aisā hī hogā. maiṅ zarūr apnā chehrā un se chhupāe rakhūṅgā, kyūṅki dīgar mābūdoṅ ke pīchhe chalne se unhoṅ ne ek nihāyat sharīr qadam uṭhāyā hogā.

¹⁹ab zail kā gīt likh kar isrāīliyoṅ ko yūṅ sikhāo ki wuh zabānī yād rahe aur mere lie un ke ḳhilāf gawāhī diyā kare.

²⁰kyūṅki maiṅ unheṅ us mulk meṅ le jā rahā hūṅ jis kā wādā maiṅ ne qasam khā kar un ke bāpdādā se kiyā thā, us mulk meṅ jis meṅ dūdh aur shahd kī kasrat hai. wahāṅ itnī ḳhurāk hogī ki un kī bhūk jātī rahegī aur wuh moṭe ho jāeṅge. lekin phir wuh dīgar mābūdoṅ ke pīchhe lag jāeṅge aur un kī ḳhidmat kareṅge. wuh mujhe radd kareṅge aur merā ahd toṛeṅge.

²¹natīje meṅ un par bahut sārī haibatnāk musībateṅ āeṅgī. phir yih gīt jo un kī aulād ko yād rahegā un ke ḳhilāf gawāhī degā. kyūṅki go maiṅ unheṅ us mulk meṅ le jā rahā hūṅ jis kā wādā maiṅ ne qasam khā kar un se kiyā thā to bhī maiṅ jāntā hūṅ ki wuh ab tak kis tarah kī soch rakhte haiṅ.”

²²mūsā ne usī din yih gīt likh kar isrāīliyoṅ ko sikhāyā.

²³phir rab ne yashūa bin nūn se kahā, “mazbūt aur diler ho, kyūṅki tū isrāīliyoṅ ko us mulk meṅ le jāegā jis kā wādā maiṅ ne qasam khā kar un se kiyā thā. maiṅ ḳhud tere sāth hūṅgā.”

²⁴jab mūsā ne pūrī sharīat ko kitāb meṅ likh liyā

²⁵to wuh un lāwiyoṅ se muḳhātib huā jo safar karte waqt ahd kā sandūq uṭhā kar le jāte the.

²⁶“sharīat kī yih kitāb le kar rab apne ḳhudā ke ahd ke sandūq ke pās rakhnā. wahāṅ wuh paṛī rahe aur tere ḳhilāf gawāhī detī rahe.

²⁷kyūṅki maiṅ ḳhūb jāntā hūṅ ki tū kitnā sarkash aur haṭdharm hai. merī maujūdagī meṅ bhī tum ne kitnī dafā rab se sarkashī kī. to phir mere marne ke bād tum kyā kuchh nahīṅ karoge!

²⁸ab mere sāmne apne qabīloṅ ke tamām buzurgoṅ aur nigahbānoṅ ko jamā karo tāki wuh ḳhud merī yih bāteṅ suneṅ aur āsmān aur zamīn un ke ḳhilāf gawāh hoṅ.

²⁹kyūṅki mujhe mālūm hai ki merī maut ke bād tum zarūr bigaṛ jāoge aur us rāste se haṭ jāoge jis par chalne kī maiṅ ne tumheṅ tākīd kī hai. āḳhirkār tum par musībat āegī, kyūṅki tum wuh kuchh karoge jo rab ko burā lagtā hai, tum apne hāthoṅ ke kām se use ġhussā dilāoge.”

³⁰phir mūsā ne isrāīl kī tamām jamā'at ke sāmne yih gīt shurū se le kar āḳhir tak pesh kiyā,