Read Roman Urdu Geo istisnā 33 Bible Online

istisnā 33 - Roman Urdu Geo bible

istisnā 33

¹marne se peshtar mard-e-ḳhudā mūsā ne isrāīliyoṅ ko barkat de kar

²kahā, “rab sīnā se āyā, saīr [11] se us kā nūr un par tulū huā. wuh koh-e-fārān se raushnī phailā kar ribbot-qādis se āyā, wuh apne junūbī ilāqe se rawānā ho kar un kī ḳhātir pahāṛī ḍhalānoṅ ke pās āyā.

³yaqīnan wuh qaumoṅ se muhabbat kartā hai, tamām muqaddasīn tere hāth meṅ haiṅ. wuh tere pāoṅ ke sāmne jhuk kar tujh se hidāyat pāte haiṅ.

⁴mūsā ne hameṅ sharīat dī yānī wuh chīz jo yāqūb kī jamā'at kī maurūsī milkiyat hai.

⁵isrāīl ke rāhnumā apne qabīloṅ samet jamā hue to rab yasūrūn [12] kā bādshāh ban gayā.

⁶rūbin kī barkat: rūbin mar na jāe balki jītā rahe. wuh tādād meṅ baṛh jāe.

⁷yahūdāh kī barkat: ai rab, yahūdāh kī pukār sun kar use dubārā us kī qaum meṅ shāmil kar. us ke hāth us ke lie laṛeṅ. muḳhālifoṅ kā sāmnā karte waqt us kī madad kar.

⁸lāwī kī barkat: terī marzī mālūm karne ke qur'e banām ūrīm aur tummīm tere wafādār ḳhādim lāwī ke pās hote haiṅ. tū ne use massā meṅ āzmāyā aur marībā meṅ us se laṛā.

⁹us ne terā kalām saṅbhāl kar terā ahd qāim rakhā, yahāṅ tak ki us ne na apne māṅ-bāp kā, na apne sage bhāiyoṅ yā bachchoṅ kā lihāz kiyā.

¹⁰wuh yāqūb ko terī hidāyāt aur isrāīl ko terī sharīat sikhā kar tere sāmne baḳhūr aur terī qurbāngāh par bhasm hone wālī qurbāniyāṅ chaṛhātā hai.

¹¹ai rab, us kī tāqat ko baṛhā kar us ke hāthoṅ kā kām pasand kar. us ke muḳhālifoṅ kī kamr toṛ aur us se nafrat rakhne wāloṅ ko aisā mār ki āindā kabhī na uṭheṅ.

¹²binyamīn kī barkat: binyamīn rab ko pyārā hai. wuh salāmatī se us ke pās rahtā hai, kyūṅki rab din rāt use panāh detā hai. binyamīn us kī pahāṛī ḍhalānoṅ ke darmiyān mahfūz rahtā hai.

¹³yūsuf kī barkat: rab us kī zamīn ko barkat de. āsmān se qīmtī os ṭapke aur zamīn ke nīche se chashme phūṭ nikleṅ.

¹⁴yūsuf ko sūraj kī behtarīn paidāwār aur har mahīne kā lazīztarīn phal hāsil ho.

¹⁵use qadīm pahāṛoṅ aur abadī wādiyoṅ kī behtarīn chīzoṅ se nawāzā jāe.

¹⁶zamīn ke tamām zaḳhīre us ke lie khul jāeṅ. wuh us ko pasand ho jo jaltī huī jhāṛī meṅ sukūnat kartā thā. yih tamām barkateṅ yūsuf ke sar par ṭhahreṅ, us ke sar par jo apne bhāiyoṅ meṅ shahzādā hai.

¹⁷yūsuf sānḍ ke pahlauṭhe jaisā azīm hai, aur us ke sīṅg janglī bail ke sīṅg haiṅ jin se wuh duniyā kī intihā tak sab qaumoṅ ko māregā. ifrāīm ke beshumār afrād aise hī haiṅ, manassī ke hazāroṅ afrād aise hī haiṅ.

¹⁸zabūlūn aur ishkār kī barkat: ai zabūlūn, ghar se nikalte waqt ḳhushī manā. ai ishkār, apne ḳhaimoṅ meṅ rahte hue ḳhush ho.

¹⁹wuh dīgar qaumoṅ ko apne pahāṛ par āne kī dāwat deṅge aur wahāṅ rāstī kī qurbāniyāṅ pesh kareṅge. wuh samundar kī kasrat aur samundar kī ret meṅ chhupe hue ḳhazānoṅ ko jazb kar leṅge.

²⁰jad kī barkat: mubārak hai wuh jo jad kā ilāqā wasī kar de. jad sherbabar kī tarah dabak kar kisī kā bāzū yā sar phāṛ ḍālne ke lie tayyār rahtā hai.

²¹us ne apne lie sab se achchhī zamīn chun lī, rāhnumā kā hissā usī ke lie mahfūz rakhā gayā. jab qaum ke rāhnumā jamā hue to us ne rab kī rāst marzī pūrī kī aur isrāīl ke bāre meṅ us ke faisle amal meṅ lāyā.

²²dān kī barkat: dān sherbabar kā bachchā hai jo basan se nikal kar chhalāṅg lagātā hai.

²³naftālī kī barkat: naftālī rab kī manzūrī se ser hai, use us kī pūrī barkat hāsil hai. wuh galīl kī jhīl aur us ke junūb kā ilāqā mīrās meṅ pāegā.

²⁴āshar kī barkat: āshar beṭoṅ meṅ sab se mubārak hai. wuh apne bhāiyoṅ ko pasand ho. us ke pās zaitūn kā itnā tel ho ki wuh apne pāoṅ us meṅ ḍubo sake.

²⁵tere shahroṅ ke darwāzoṅ ke kunḍe lohe aur pītal ke hoṅ, terī tāqat umr bhar qāim rahe.

²⁶yasūrūn ke ḳhudā kī mānind koī nahīṅ hai, jo āsmān par sawār ho kar, hāṅ apne jalāl meṅ bādaloṅ par baiṭh kar terī madad karne ke lie ātā hai.

²⁷azlī ḳhudā terī panāhgāh hai, wuh apne azlī bāzū tere nīche phailāe rakhtā hai. wuh dushman ko tere sāmne se bhagā kar use halāk karne ko kahtā hai.

²⁸chunāṅche isrāīl salāmatī se zindagī guzāregā, yāqūb kā chashmā alag aur mahfūz rahegā. us kī zamīn anāj aur angūr kī kasrat paidā karegī, aur us ke ūpar āsmān zamīn par os paṛne degā.

²⁹ai isrāīl, tū kitnā mubārak hai. kaun terī mānind hai, jise rab ne bachāyā hai. wuh terī madad kī ḍhāl aur terī shān kī talwār hai. tere dushman shikast khā kar terī ḳhushāmad kareṅge, aur tū un kī kamreṅ pāoṅ tale kuchlegā.”