Read Roman Urdu Geo istisnā 4 Bible Online

istisnā 4 - Roman Urdu Geo bible

istisnā 4

¹ai isrāīl, ab wuh tamām ahkām dhyān se sun le jo maiṅ tumheṅ sikhātā hūṅ. un par amal karo tāki tum zindā raho aur jā kar us mulk par qabzā karo jo rab tumhāre bāpdādā kā ḳhudā tumheṅ dene wālā hai.

²jo ahkām maiṅ tumheṅ sikhātā hūṅ un meṅ na kisī bāt kā izāfā karo aur na un se koī bāt nikālo. rab apne ḳhudā ke tamām ahkām par amal karo jo maiṅ ne tumheṅ die haiṅ.

³tum ne ḳhud dekhā hai ki rab ne bāl-faġhūr se kyā kuchh kiyā. wahāṅ rab tere ḳhudā ne har ek ko halāk kar ḍālā jis ne faġhūr ke bāl dewatā kī pūjā kī.

⁴lekin tum meṅ se jitne rab apne ḳhudā ke sāth lipṭe rahe wuh sab āj tak zindā haiṅ.

⁵maiṅ ne tumheṅ tamām ahkām yūṅ sikhā die haiṅ jis tarah rab mere ḳhudā ne mujhe batāyā. kyūṅki lāzim hai ki tum us mulk meṅ in ke tābe raho jis par tum qabzā karne wāle ho.

⁶inheṅ māno aur in par amal karo to dūsrī qaumoṅ ko tumhārī dānishmandī aur samajh nazar āegī. phir wuh in tamām ahkām ke bāre meṅ sun kar kaheṅgī, “wāh, yih azīm qaum kaisī dānishmand aur samajhdār hai!”

⁷kaun sī azīm qaum ke mābūd itne qarīb haiṅ jitnā hamārā ḳhudā hamāre qarīb hai? jab bhī ham madad ke lie pukārte haiṅ to rab hamārā ḳhudā maujūd hotā hai.

⁸kaun sī azīm qaum ke pās aise munsifānā ahkām aur hidāyāt haiṅ jaise maiṅ āj tumheṅ pūrī sharīat sunā kar pesh kar rahā hūṅ?

⁹lekin ḳhabardār, ehtiyāt karnā aur wuh tamām bāteṅ na bhūlnā jo terī āṅkhoṅ ne dekhī haiṅ. wuh umr bhar tere dil meṅ se miṭ na jāeṅ balki unheṅ apne bachchoṅ aur pote-potiyoṅ ko bhī batāte rahnā.

¹⁰wuh din yād kar jab tū horib yānī sīnā pahāṛ par rab apne ḳhudā ke sāmne hāzir thā aur us ne mujhe batāyā, “qaum ko yahāṅ mere pās jamā kar tāki maiṅ un se bāt karūṅ aur wuh umr bhar merā ḳhauf māneṅ aur apne bachchoṅ ko merī bāteṅ sikhāte raheṅ.”

¹¹us waqt tum qarīb ā kar pahāṛ ke dāman meṅ khaṛe hue. wuh jal rahā thā, aur us kī āg āsmān tak bhaṛak rahī thī jabki kāle bādaloṅ aur gahre andhere ne use nazaroṅ se chhupā diyā.

¹²phir rab āg meṅ se tum se hamkalām huā. tum ne us kī bāteṅ sunīṅ lekin us kī koī shakl na dekhī. sirf us kī āwāz sunāī dī.

¹³us ne tumhāre lie apne ahd yānī un 10 ahkām kā elān kiyā aur hukm diyā ki in par amal karo. phir us ne unheṅ patthar kī do taḳhtiyoṅ par likh diyā.

¹⁴rab ne mujhe hidāyat kī, “unheṅ wuh tamām ahkām sikhā jin ke mutābiq unheṅ chalnā hogā jab wuh daryā-e-yardan ko pār karke kan'ān par qabzā kareṅge.”

¹⁵jab rab horib yānī sīnā pahāṛ par tum se hamkalām huā to tum ne us kī koī shakl na dekhī. chunāṅche ḳhabardār raho

¹⁶ki tum ġhalat kām karke apne lie kisī bhī shakl kā but na banāo. na mard, aurat,

¹⁷zamīn par chalne wāle jānwar, parinde,

¹⁸reṅgne wāle jānwar yā machhlī kā but banāo.

¹⁹jab tū āsmān kī taraf nazar uṭhā kar āsmān kā pūrā lashkar dekhe to sūraj, chāṅd aur sitāroṅ kī parastish aur ḳhidmat karne kī āzmāish meṅ na paṛnā. rab tere ḳhudā ne in chīzoṅ ko bāqī tamām qaumoṅ ko atā kiyā hai,

²⁰lekin tumheṅ us ne misr ke bhaṛakte bhaṭṭe se nikālā hai tāki tum us kī apnī qaum aur us kī mīrās ban jāo. aur āj aisā hī huā hai.

²¹tumhāre sabab se rab ne mujh se nārāz ho kar qasam khāī ki tū daryā-e-yardan ko pār karke us achchhe mulk meṅ dāḳhil nahīṅ hogā jo rab terā ḳhudā tujhe mīrās meṅ dene wālā hai.

²²maiṅ yihīṅ isī mulk meṅ mar jāūṅgā aur daryā-e-yardan ko pār nahīṅ karūṅga. lekin tum daryā ko pār karke us behtarīn mulk par qabzā karoge.

²³har sūrat meṅ wuh ahd yād rakhnā jo rab tumhāre ḳhudā ne tumhāre sāth bāndhā hai. apne lie kisī bhī chīz kī mūrat na banānā. yih rab kā hukm hai,

²⁴kyūṅki rab terā ḳhudā bhasm kar dene wālī āg hai, wuh ġhayūr ḳhudā hai.

²⁵tum mulk meṅ jā kar wahāṅ rahoge. tumhāre bachche aur pote-nawāse us meṅ paidā ho jāeṅge. jab is tarah bahut waqt guzar jāegā to ḳhatrā hai ki tum ġhalat kām karke kisī chīz kī mūrat banāo. aisā kabhī na karnā. yih rab tumhāre ḳhudā kī nazar meṅ burā hai aur use ġhussā dilāegā.

²⁶āj āsmān aur zamīn mere gawāh haiṅ ki agar tum aisā karo to jaldī se us mulk meṅ se miṭ jāoge jis par tum daryā-e-yardan ko pār karke qabzā karoge. tum der tak wahāṅ jīte nahīṅ rahoge balki pūre taur par halāk ho jāoge.

²⁷rab tumheṅ mulk se nikāl kar muḳhtalif qaumoṅ meṅ muntashir kar degā, aur wahāṅ sirf thoṛe hī afrād bache raheṅge.

²⁸wahāṅ tum insān ke hāthoṅ se bane hue lakaṛī aur patthar ke butoṅ kī ḳhidmat karoge, jo na dekh sakte, na sun sakte, na khā sakte aur na sūṅgh sakte haiṅ.

²⁹wahīṅ tū rab apne ḳhudā ko talāsh karegā, aur agar use pūre dil-o-jān se ḍhūnḍe to wuh tujhe mil bhī jāegā.

³⁰jab tū is taqlīf meṅ mubtalā hogā aur yih sārā kuchh tujh par se guzaregā phir āḳhirkār rab apne ḳhudā kī taraf rujū karke us kī sunegā.

³¹kyūṅki rab terā ḳhudā rahīm ḳhudā hai. wuh tujhe na tark karegā aur na barbād karegā. wuh us ahd ko nahīṅ bhūlegā jo us ne qasam khā kar tere bāpdādā se bāndhā thā.

³²duniyā meṅ insān kī taḳhlīq se le kar āj tak māzī kī taftīsh kar. āsmān ke ek sire se dūsre sire tak khoj lagā. kyā is se pahle kabhī is tarah kā mojizānā kām huā hai? kyā kisī ne is se pahle is qism ke azīm kām kī ḳhabar sunī hai?

³³tū ne āg meṅ se boltī huī allāh kī āwāz sunī to bhī jītā bachā! kyā kisī aur qaum ke sāth aisā huā hai?

³⁴kyā kisī aur mābūd ne kabhī jur'at kī hai ki rab kī tarah pūrī qaum ko ek mulk se nikāl kar apnī milkiyat banāyā ho? us ne aisā hī tumhāre sāth kiyā. us ne tumhāre deḳhte deḳhte misriyoṅ ko āzmāyā, unheṅ baṛe mojize dikhāe, un ke sāth jang kī, apnī baṛī qudrat aur iḳhtiyār kā izhār kiyā aur haulnāk kāmoṅ se un par ġhālib ā gayā.

³⁵tujhe yih sab kuchh dikhāyā gayā tāki tū jān le ki rab ḳhudā hai. us ke siwā koī aur nahīṅ hai.

³⁶us ne tujhe nasīhat dene ke lie āsmān se apnī āwāz sunāī. zamīn par us ne tujhe apnī azīm āg dikhāī jis meṅ se tū ne us kī bāteṅ sunīṅ.

³⁷use tere bāpdādā se pyār thā, aur us ne tujhe jo un kī aulād haiṅ chun liyā. is lie wuh ḳhud hāzir ho kar apnī azīm qudrat se tujhe misr se nikāl lāyā.

³⁸us ne tere āge se tujh se zyādā baṛī aur tāqatwar qaumeṅ nikāl dīṅ tāki tujhe un kā mulk mīrās meṅ mil jāe. āj aisā hī ho rahā hai.

³⁹chunāṅche āj jān le aur zahan meṅ rakh ki rab āsmān aur zamīn kā ḳhudā hai. koī aur mābūd nahīṅ hai.

⁴⁰us ke ahkām par amal kar jo maiṅ tujhe āj sunā rahā hūṅ. phir tū aur terī aulād kāmyāb hoṅge, aur tū der tak us mulk meṅ jītā rahegā jo rab tujhe hameshā ke lie de rahā hai.

⁴¹yih kah kar mūsā ne daryā-e-yardan ke mashriq meṅ panāh ke tīn shahr chun lie.

⁴²un meṅ wuh shaḳhs panāh le saktā thā jis ne dushmanī kī binā par nahīṅ balki ġhairirādī taur par kisī ko jān se mār diyā thā. aise shahr meṅ panāh lene ke sabab se use badle meṅ qatl nahīṅ kiyā jā saktā thā.

⁴³is ke lie rūbin ke qabīle ke lie maidān-e-murtafā kā shahr basar, jad ke qabīle ke lie jiliād kā shahr rāmāt aur manassī ke qabīle ke lie basan kā shahr jaulān chunā gayā.

⁴⁴darj-e-zail wuh sharīat hai jo mūsā ne isrāīliyoṅ ko pesh kī.

⁴⁵mūsā ne yih ahkām aur hidāyāt us waqt pesh kīṅ jab wuh misr se nikal kar

⁴⁶daryā-e-yardan ke mashriqī kināre par the. bait-faġhūr un ke muqābil thā, aur wuh amorī bādshāh sīhon ke mulk meṅ ḳhaimāzan the. sīhon kī rihāish hasbon meṅ thī aur use isrāīliyoṅ se shikast huī thī jab wuh mūsā kī rāhnumāī meṅ misr se nikal āe the.

⁴⁷us ke mulk par qabzā karke unhoṅ ne basan ke mulk par bhī fath pāī thī jis kā bādshāh oj thā. in donoṅ amorī bādshāhoṅ kā yih pūrā ilāqā un ke hāth meṅ ā gayā thā. yih ilāqā daryā-e-yardan ke mashriq meṅ thā.

⁴⁸us kī junūbī sarhad daryā-e-arnon ke kināre par wāqe shahr aroīr thī jabki us kī shimālī sarhad siryūn yānī harmūn pahāṛ thī.

⁴⁹daryā-e-yardan kā pūrā mashriqī kinārā pisgā ke pahāṛī silsile ke dāman meṅ wāqe bahīrā-e-murdār tak us meṅ shāmil thā.