Read Roman Urdu Geo istisnā 5 Bible Online

istisnā 5 - Roman Urdu Geo bible

istisnā 5

¹mūsā ne tamām isrāīliyoṅ ko jamā karke kahā, e isrāīl, dhyān se wuh hidāyāt aur ahkām sun jo maiṅ tumheṅ āj pesh kar rahā hūṅ. unheṅ sīkho aur baṛī ehtiyāt se un par amal karo.

²rab hamāre ḳhudā ne horib yānī sīnā pahāṛ par hamāre sāth ahd bāndhā.

³us ne yih ahd hamāre bāpdādā ke sāth nahīṅ balki hamāre hī sāth bāndhā hai, jo āj is jagah par zindā haiṅ.

⁴rab pahāṛ par āg meṅ se rū-ba-rū ho kar tum se hamkalām huā.

⁵us waqt maiṅ tumhāre aur rab ke darmiyān khaṛā huā tāki tumheṅ rab kī bāteṅ sunāūṅ. kyūṅki tum āg se ḍarte the aur is lie pahāṛ par na chaṛhe. us waqt rab ne kahā,

⁶“maiṅ rab terā ḳhudā hūṅ jo tujhe mulk-e-misr kī ġhulāmī se nikāl lāyā.

⁷mere siwā kisī aur mābūd kī parastish na karnā.

⁸apne lie but na banānā. kisī bhī chīz kī mūrat na banānā, chāhe wuh āsmān meṅ, zamīn par yā samundar meṅ ho.

⁹na butoṅ kī parastish, na un kī ḳhidmat karnā, kyūṅki maiṅ terā rab ġhayūr ḳhudā hūṅ. jo mujh se nafrat karte haiṅ unheṅ maiṅ tīsrī aur chauthī pusht tak sazā dūṅgā.

¹⁰lekin jo mujh se muhabbat rakhte aur mere ahkām pūre karte haiṅ un par maiṅ hazār pushtoṅ tak mehrbānī karūṅga.

¹¹rab apne ḳhudā kā nām bemaqsad yā ġhalat maqsad ke lie istemāl na karnā. jo bhī aisā kartā hai use rab sazā die baġhair nahīṅ chhoṛegā.

¹²sabat ke din kā ḳhayāl rakhnā. use is tarah manānā ki wuh maḳhsūs-o-muqaddas ho, usī tarah jis tarah rab tere ḳhudā ne tujhe hukm diyā hai.

¹³hafte ke pahle chhih din apnā kām-kāj kar,

¹⁴lekin sātwāṅ din rab tere ḳhudā kā ārām kā din hai. us din kisī tarah kā kām na karnā. na tū, na terā beṭā, na terī beṭī, na terā naukar, na terī naukarānī, na terā bail, na terā gadhā, na terā koī aur maweshī. jo pardesī tere darmiyān rahtā hai wuh bhī kām na kare. tere naukar aur terī naukarānī ko terī tarah ārām kā mauqā milnā hai.

¹⁵yād rakhnā ki tū misr meṅ ġhulām thā aur ki rab terā ḳhudā hī tujhe baṛī qudrat aur iḳhtiyār se wahāṅ se nikāl lāyā. is lie us ne tujhe hukm diyā hai ki sabat kā din manānā.

¹⁶apne bāp aur apnī māṅ kī izzat karnā jis tarah rab tere ḳhudā ne tujhe hukm diyā hai. phir tū us mulk meṅ jo rab terā ḳhudā tujhe dene wālā hai ḳhushhāl hogā aur der tak jītā rahegā.

¹⁷qatl na karnā.

¹⁸zinā na karnā.

¹⁹chorī na karnā.

²⁰apne paṛosī ke bāre meṅ jhūṭī gawāhī na denā.

²¹apne paṛosī kī bīwī kā lālach na karnā. na us ke ghar kā, na us kī zamīn kā, na us ke naukar kā, na us kī naukarānī kā, na us ke bail aur na us ke gadhe kā balki us kī kisī bhī chīz kā lālach na karnā.”

²²rab ne tum sab ko yih ahkām die jab tum sīnā pahāṛ ke dāman meṅ jamā the. wahāṅ tum ne āg, bādal aur gahre andhere meṅ se us kī zordār āwāz sunī. yihī kuchh us ne kahā aur bas. phir us ne unheṅ patthar kī do taḳhtiyoṅ par likh kar mujhe de diyā.

²³jab tum ne tārīkī se yih āwāz sunī aur pahāṛ kī jaltī huī hālat dekhī to tumhāre qabīloṅ ke rāhnumā aur buzurg mere pās āe.

²⁴unhoṅ ne kahā, “rab hamāre ḳhudā ne ham par apnā jalāl aur azmat zāhir kī hai. āj ham ne āg meṅ se us kī āwāz sunī hai. ham ne dekh liyā hai ki jab allāh insān se hamkalām hotā hai to zarūrī nahīṅ ki wuh mar jāe.

²⁵lekin ab ham kyūṅ apnī jān ḳhatre meṅ ḍāleṅ? agar ham mazīd rab apne ḳhudā kī āwāz suneṅ to yih baṛī āg hameṅ bhasm kar degī aur ham apnī jān se hāth dho baiṭheṅge.

²⁶kyūṅki fānī insānoṅ meṅ se kaun hamārī tarah zindā ḳhudā ko āg meṅ se bāteṅ karte hue sun kar zindā rahā hai? koī bhī nahīṅ!

²⁷āp hī qarīb jā kar un tamām bātoṅ ko suneṅ jo rab hamārā ḳhudā hameṅ batānā chāhtā hai. phir lauṭ kar hameṅ wuh bāteṅ sunāeṅ. ham unheṅ suneṅge aur un par amal kareṅge.”

²⁸jab rab ne yih sunā to us ne mujh se kahā, “maiṅ ne in logoṅ kī yih bāteṅ sun lī haiṅ. wuh ṭhīk kahte haiṅ.

²⁹kāsh un kī soch hameshā aisī hī ho! kāsh wuh hameshā isī tarah merā ḳhauf māneṅ aur mere ahkām par amal kareṅ! agar wuh aisā kareṅge to wuh aur un kī aulād hameshā kāmyāb raheṅge.

³⁰jā, unheṅ batā de ki apne ḳhaimoṅ meṅ lauṭ jāo.

³¹lekin tū yahāṅ mere pās rah tāki maiṅ tujhe tamām qawānīn aur ahkām de dūṅ. un ko logoṅ ko sikhānā tāki wuh us mulk meṅ un ke mutābiq chaleṅ jo maiṅ unheṅ dūṅgā.”

³²chunāṅche ehtiyāt se un ahkām par amal karo jo rab tumhāre ḳhudā ne tumheṅ die haiṅ. un se na dāīṅ taraf haṭo na bāīṅ taraf.

³³hameshā us rāh par chalte raho jo rab tumhāre ḳhudā ne tumheṅ batāī hai. phir tum kāmyāb hoge aur us mulk meṅ der tak jīte rahoge jis par tum qabzā karoge.