Read Roman Urdu Geo istisnā 6 Bible Online

istisnā 6 - Roman Urdu Geo bible

istisnā 6

¹yih wuh tamām ahkām haiṅ jo rab tumhāre ḳhudā ne mujhe tumheṅ sikhāne ke lie kahā. us mulk meṅ in par amal karnā jis meṅ tum jāne wāle ho tāki us par qabzā karo.

²umr bhar tū, tere bachche aur pote-nawāse rab apne ḳhudā kā ḳhauf māneṅ aur us ke un tamām ahkām par chaleṅ jo maiṅ tujhe de rahā hūṅ. tab tū der tak jītā rahegā.

³ai isrāīl, yih merī bāteṅ sun aur baṛī ehtiyāt se in par amal kar! phir rab tere ḳhudā kā wādā pūrā ho jāegā ki tū kāmyāb rahegā aur terī tādād us mulk meṅ ḳhūb baṛhtī jāegī jis meṅ dūdh aur shahd kī kasrat hai.

⁴sun ai isrāīl! rab hamārā ḳhudā ek hī rab hai.

⁵rab apne ḳhudā se apne pūre dil, apnī pūrī jān aur apnī pūrī tāqat se pyār karnā.

⁶jo ahkām maiṅ tujhe āj batā rahā hūṅ unheṅ apne dil par naqsh kar.

⁷unheṅ apne bachchoṅ ke zahannashīn karā. yihī bāteṅ har waqt aur har jagah tere laboṅ par hoṅ ḳhwāh tū ghar meṅ baiṭhā yā rāste par chaltā ho, leṭā ho yā khaṛā ho.

⁸unheṅ nishān ke taur par aur yāddihānī ke lie apne bāzū'oṅ aur māthe par lagā.

⁹unheṅ apne gharoṅ kī chaukhaṭoṅ aur apne shahroṅ ke darwāzoṅ par likh.

¹⁰rab tere ḳhudā kā wādā pūrā hogā jo us ne qasam khā kar tere bāpdādā ibrāhīm, is'hāq aur yāqūb ke sāth kiyā ki maiṅ tujhe kan'ān meṅ le jāūṅgā. jo baṛe aur shāndār shahr us meṅ haiṅ wuh tū ne ḳhud nahīṅ banāe.

¹¹jo makān us meṅ haiṅ wuh aisī achchhī chīzoṅ se bhare hue haiṅ jo tū ne un meṅ nahīṅ rakhīṅ. jo kueṅ us meṅ haiṅ un ko tū ne nahīṅ khodā. jo angūr aur zaitūn ke bāġh us meṅ haiṅ unheṅ tū ne nahīṅ lagāyā. yih haqīqat yād rakh. jab tū us mulk meṅ kasrat kā khānā khā kar ser ho jāegā

¹²to ḳhabardār! rab ko na bhūlnā jo tujhe misr kī ġhulāmī se nikāl lāyā.

¹³rab apne ḳhudā kā ḳhauf mānanā. sirf usī kī ibādat karnā aur usī kā nām le kar qasam khānā.

¹⁴dīgar mābūdoṅ kī pairawī na karnā. is meṅ tamām paṛosī aqwām ke dewatā bhī shāmil haiṅ.

¹⁵warnā rab tere ḳhudā kā ġhazab tujh par nāzil ho kar tujhe mulk meṅ se miṭā ḍālegā. kyūṅki wuh ġhayūr ḳhudā hai aur tere darmiyān hī rahtā hai.

¹⁶rab apne ḳhudā ko us tarah na āzmānā jis tarah tum ne massā meṅ kiyā thā.

¹⁷dhyān se rab apne ḳhudā ke ahkām ke mutābiq chalo, un tamām hidāyāt aur qawānīn par jo us ne tujhe die haiṅ.

¹⁸jo kuchh rab kī nazar meṅ durust aur achchhā hai wuh kar. phir tū kāmyāb rahegā, tū jā kar us achchhe mulk par qabzā karegā jis kā wādā rab ne tere bāpdādā se qasam khā kar kiyā thā.

¹⁹tab rab kī bāt pūrī ho jāegī ki tū apne dushmanoṅ ko apne āge āge nikāl degā.

²⁰āne wāle dinoṅ meṅ tere bachche pūchheṅge, “rab hamāre ḳhudā ne āp ko in tamām ahkām par amal karne ko kyūṅ kahā?”

²¹phir unheṅ jawāb denā, “ham misr ke bādshāh fir'aun ke ġhulām the, lekin rab hameṅ baṛī qudrat kā izhār karke misr se nikāl lāyā.

²²hamāre deḳhte deḳhte us ne baṛe baṛe nishān aur mojize kie aur misr, fir'aun aur us ke pūre gharāne par haulnāk musībateṅ bhejīṅ.

²³us waqt wuh hameṅ wahāṅ se nikāl lāyā tāki hameṅ le kar wuh mulk de jis kā wādā us ne qasam khā kar hamāre bāpdādā ke sāth kiyā thā.

²⁴rab hamāre ḳhudā hī ne hameṅ kahā ki in tamām ahkām ke mutābiq chalo aur rab apne ḳhudā kā ḳhauf māno. kyūṅki agar ham aisā kareṅ to phir ham hameshā kāmyāb aur zindā raheṅge. aur āj tak aisā hī rahā hai.

²⁵agar ham rab apne ḳhudā ke huzūr rah kar ehtiyāt se un tamām bātoṅ par amal kareṅge jo us ne hameṅ karne ko kahī haiṅ to wuh hameṅ rāstbāz qarār degā.”