Read Roman Urdu Geo yūhannā 1 Bible Online

yūhannā 1 - Roman Urdu Geo bible

yūhannā 1

¹ibtidā meṅ kalām thā. kalām allāh ke sāth thā aur kalām allāh thā.

²yihī ibtidā meṅ allāh ke sāth thā.

³sab kuchh kalām ke wasīle se paidā huā. maḳhlūqāt kī ek bhī chīz us ke baġhair paidā nahīṅ huī.

⁴us meṅ zindagī thī, aur yih zindagī insānoṅ kā nūr thī.

⁵yih nūr tārīkī meṅ chamaktā hai, aur tārīkī ne us par qābū na pāyā.

⁶ek din allāh ne apnā paiġhambar bhej diyā, ek ādmī jis kā nām yahyā thā.

⁷wuh nūr kī gawāhī dene ke lie āyā. maqsad yih thā ki log us kī gawāhī kī binā par īmān lāeṅ.

⁸wuh ḳhud to nūr na thā balki use sirf nūr kī gawāhī denī thī.

⁹haqīqī nūr jo har shaḳhs ko raushan kartā hai duniyā meṅ āne ko thā.

¹⁰go kalām duniyā meṅ thā aur duniyā us ke wasīle se paidā huī to bhī duniyā ne use na pahchānā.

¹¹wuh us meṅ āyā jo us kā apnā thā, lekin us ke apnoṅ ne use qabūl na kiyā.

¹²to bhī kuchh use qabūl karke us ke nām par īmān lāe. unheṅ us ne allāh ke farzand banane kā haq baḳhsh diyā,

¹³aise farzand jo na fitrī taur par, na kisī insān ke mansūbe ke taht paidā hue balki allāh se.

¹⁴kalām insān ban kar hamāre darmiyān rihāishpazīr huā aur ham ne us ke jalāl kā mushāhadā kiyā. wuh fazl aur sachchāī se māmūr thā aur us kā jalāl bāp ke iklaute farzand kā sā thā.

¹⁵yahyā us ke bāre meṅ gawāhī de kar pukār uṭhā, “yih wuhī hai jis ke bāre meṅ maiṅ ne kahā, ek mere bād āne wālā hai jo mujh se baṛā hai, kyūṅki wuh mujh se pahle thā.”

¹⁶us kī kasrat se ham sab ne fazl par fazl pāyā.

¹⁷kyūṅki sharīat mūsā kī mārifat dī gaī, lekin allāh kā fazl aur sachchāī īsā masīh ke wasīle se qāim huī.

¹⁸kisī ne kabhī bhī allāh ko nahīṅ dekhā. lekin iklautā farzand jo allāh kī god meṅ hai usī ne allāh ko ham par zāhir kiyā hai.

¹⁹yih yahyā kī gawāhī hai jab yarūshalam ke yahūdiyoṅ ne imāmoṅ aur lāwiyoṅ ko us ke pās bhej kar pūchhā, “āp kaun haiṅ?”

²⁰us ne inkār na kiyā balki sāf taslīm kiyā, “maiṅ masīh nahīṅ hūṅ.”

²¹unhoṅ ne pūchhā, “to phir āp kaun haiṅ? kyā āp ilyās haiṅ?” us ne jawāb diyā, “nahīṅ, maiṅ wuh nahīṅ hūṅ.” unhoṅ ne sawāl kiyā, “kyā āp āne wālā nabī haiṅ?” us ne kahā, “nahīṅ.”

²²“to phir hameṅ batāeṅ ki āp kaun haiṅ? jinhoṅ ne hameṅ bhejā hai unheṅ hameṅ koī na koī jawāb denā hai. āp ḳhud apne bāre meṅ kyā kahte haiṅ?”

²³yahyā ne yasāyāh nabī kā hawālā de kar jawāb diyā, “maiṅ registān meṅ wuh āwāz hūṅ jo pukār rahī hai, rab kā rāstā sīdhā banāo.”

²⁴bheje gae log farīsī firqe se tālluq rakhte the.

²⁵unhoṅ ne pūchhā, “agar āp na masīh haiṅ, na ilyās yā āne wālā nabī to phir āp baptismā kyūṅ de rahe haiṅ?”

²⁶yahyā ne jawāb diyā, “maiṅ to pānī se baptismā detā hūṅ, lekin tumhāre darmiyān hī ek khaṛā hai jis ko tum nahīṅ jānte.

²⁷wuhī mere bād āne wālā hai aur maiṅ us ke jūtoṅ ke tasme bhī kholne ke lāiq nahīṅ.”

²⁸yih yardan ke pār bait-aniyāh meṅ huā jahāṅ yahyā baptismā de rahā thā.

²⁹agle din yahyā ne īsā ko apne pās āte dekhā. us ne kahā, “dekho, yih allāh kā lelā hai jo duniyā kā gunāh uṭhā le jātā hai.

³⁰yih wuhī hai jis ke bāre meṅ maiṅ ne kahā, ‘ek mere bād āne wālā hai jo mujh se baṛā hai, kyūṅki wuh mujh se pahle thā.’

³¹maiṅ to use nahīṅ jāntā thā, lekin maiṅ is lie ā kar pānī se baptismā dene lagā tāki wuh isrāīl par zāhir ho jāe.”

³²aur yahyā ne yih gawāhī dī, “maiṅ ne dekhā ki rūh-ul-quds kabūtar kī tarah āsmān par se utar kar us par ṭhahar gayā.

³³maiṅ to use nahīṅ jāntā thā, lekin jab allāh ne mujhe baptismā dene ke lie bhejā to us ne mujhe batāyā, ‘tū dekhegā ki rūh-ul-quds utar kar kisī par ṭhahar jāegā. yih wuhī hogā jo rūh-ul-quds se baptismā degā.’

³⁴ab maiṅ ne dekhā hai aur gawāhī detā hūṅ ki yih allāh kā farzand hai.”

³⁵agle din yahyā dubārā wahīṅ khaṛā thā. us ke do shāgird sāth the.

³⁶us ne īsā ko wahāṅ se guzarte hue dekhā to kahā, “dekho, yih allāh kā lelā hai!”

³⁷us kī yih bāt sun kar us ke do shāgird īsā ke pīchhe ho lie.

³⁸īsā ne muṛ kar dekhā ki yih mere pīchhe chal rahe haiṅ to us ne pūchhā, “tum kyā chāhte ho?” unhoṅ ne kahā, “ustād, āp kahāṅ ṭhahre hue haiṅ?”

³⁹us ne jawāb diyā, “āo, ḳhud dekh lo.” chunāṅche wuh us ke sāth gae. unhoṅ ne wuh jagah dekhī jahāṅ wuh ṭhahrā huā thā aur din ke bāqī waqt us ke pās rahe. shām ke taqrīban chār baj gae the.

⁴⁰shamāūn patras kā bhāī andriyās un do shāgirdoṅ meṅ se ek thā jo yahyā kī bāt sun kar īsā ke pīchhe ho lie the.

⁴¹ab us kī pahlī mulāqāt us ke apne bhāī shamāūn se huī. us ne use batāyā, “hameṅ masīh mil gayā hai.” (masīh kā matlab ‘masah kiyā huā shaḳhs’ hai.)

⁴²phir wuh use īsā ke pās le gayā. use dekh kar īsā ne kahā, “tū yūhannā kā beṭā shamāūn hai. tū kaifā kahlāegā.” (is kā yūnānī tarjumā patras yānī patthar hai.)

⁴³agle din īsā ne galīl jāne kā irādā kiyā. filippus se milā to us se kahā, “mere pīchhe ho le.”

⁴⁴andriyās aur patras kī tarah filippus kā watanī shahr bait-saidā thā.

⁴⁵filippus natanael se milā, aur us ne us se kahā, “hameṅ wuhī shaḳhs mil gayā jis kā zikr mūsā ne tauret aur nabiyoṅ ne apne sahīfoṅ meṅ kiyā hai. us kā nām īsā bin yūsuf hai aur wuh nāsarat kā rahne wālā hai.”

⁴⁶natanael ne kahā, “nāsarat? kyā nāsarat se koī achchhī chīz nikal saktī hai?” filippus ne jawāb diyā, “ā aur ḳhud dekh le.”

⁴⁷jab īsā ne natan-el ko āte dekhā to us ne kahā, “lo, yih sachchā isrāīlī hai jis meṅ makr nahīṅ.”

⁴⁸natan-el ne pūchhā, “āp mujhe kahāṅ se jānte haiṅ?” īsā ne jawāb diyā, “is se pahle ki filippus ne tujhe bulāyā maiṅ ne tujhe dekhā. tū anjīr ke daraḳht ke sāy meṅ thā.”

⁴⁹natan-el ne kahā, “ustād, āp allāh ke farzand haiṅ, āp isrāīl ke bādshāh haiṅ.”

⁵⁰īsā ne us se pūchhā, “achchhā, merī yih bāt sun kar ki maiṅ ne tujhe anjīr ke daraḳht ke sāy meṅ dekhā tū īmān lāyā hai? tū is se kahīṅ baṛī bāteṅ dekhegā.”

⁵¹us ne bāt jārī rakhī, “maiṅ tum ko sach batātā hūṅ ki tum āsmān ko khulā aur allāh ke farishtoṅ ko ūpar chaṛhte aur ibn-e-ādam par utarte dekhoge.”