Read Roman Urdu Geo yūhannā 10 Bible Online

yūhannā 10 - Roman Urdu Geo bible

yūhannā 10

¹maiṅ tum ko sach batātā hūṅ ki jo darwāze se bheṛoṅ ke bāṛe meṅ dāḳhil nahīṅ hotā balki phalāṅg kar andar ghus ātā hai wuh chor aur ḍākū hai.

²lekin jo darwāze se dāḳhil hotā hai wuh bheṛoṅ kā charwāhā hai.

³chaukīdār us ke lie darwāzā khol detā hai aur bheṛeṅ us kī āwāz suntī haiṅ. wuh apnī har ek bheṛ kā nām le kar unheṅ bulātā aur bāhar le jātā hai.

⁴apne pūre galle ko bāhar nikālne ke bād wuh un ke āge āge chalne lagtā hai aur bheṛeṅ us ke pīchhe pīchhe chal paṛtī haiṅ, kyūṅki wuh us kī āwāz pahchāntī haiṅ.

⁵lekin wuh kisī ajnabī ke pīchhe nahīṅ chaleṅgī balki us se bhāg jāeṅgī, kyūṅki wuh us kī āwāz nahīṅ pahchāntīṅ.”

⁶īsā ne unheṅ yih tamsīl pesh kī, lekin wuh na samjhe ki wuh unheṅ kyā batānā chāhtā hai.

⁷is lie īsā dubārā is par bāt karne lagā, “maiṅ tum ko sach batātā hūṅ ki bheṛoṅ ke lie darwāzā maiṅ hūṅ.

⁸jitne bhī mujh se pahle āe wuh chor aur ḍākū haiṅ. lekin bheṛoṅ ne un kī na sunī.

⁹maiṅ hī darwāzā hūṅ. jo bhī mere zarī'e andar āe use najāt milegī. wuh ātā jātā aur harī charāgāheṅ pātā rahegā.

¹⁰chor to sirf chorī karne, zabah karne aur tabāh karne ātā hai. lekin maiṅ is lie āyā hūṅ ki wuh zindagī pāeṅ, balki kasrat kī zindagī pāeṅ.

¹¹achchhā charwāhā maiṅ hūṅ. achchhā charwāhā apnī bheṛoṅ ke lie apnī jān detā hai.

¹²mazdūr charwāhe kā kirdār adā nahīṅ kartā, kyūṅki bheṛeṅ us kī apnī nahīṅ hotīṅ. is lie jūṅ hī koī bheṛiyā ātā hai to mazdūr use deḳhte hī bheṛoṅ ko chhoṛ kar bhāg jātā hai. natīje meṅ bheṛiyā kuchh bheṛeṅ pakaṛ letā aur bāqiyoṅ ko muntashir kar detā hai.

¹³wajah yih hai ki wuh mazdūr hī hai aur bheṛoṅ kī fikr nahīṅ kartā.

¹⁴achchhā charwāhā maiṅ hūṅ. maiṅ apnī bheṛoṅ ko jāntā hūṅ aur wuh mujhe jāntī haiṅ,

¹⁵bilkul usī tarah jis tarah bāp mujhe jāntā hai aur maiṅ bāp ko jāntā hūṅ. aur maiṅ bheṛoṅ ke lie apnī jān detā hūṅ.

¹⁶merī aur bhī bheṛeṅ haiṅ jo is bāṛe meṅ nahīṅ haiṅ. lāzim hai ki unheṅ bhī le āūṅ. wuh bhī merī āwāz suneṅgī. phir ek hī gallā aur ek hī gallābān hogā.

¹⁷merā bāp mujhe is lie pyār kartā hai ki maiṅ apnī jān detā hūṅ tāki use phir le lūṅ.

¹⁸koī merī jān mujh se chhīn nahīṅ saktā balki maiṅ use apnī marzī se de detā hūṅ. mujhe use dene kā iḳhtiyār hai aur use wāpas lene kā bhī. yih hukm mujhe apne bāp kī taraf se milā hai.”

¹⁹in bātoṅ par yahūdiyoṅ meṅ dubārā phūṭ paṛ gaī.

²⁰bahutoṅ ne kahā, “yih badrūh kī girift meṅ hai, yih dīwānā hai. is kī kyūṅ suneṅ!”

²¹lekin auroṅ ne kahā, “yih aisī bāteṅ nahīṅ haiṅ jo badrūh-giriftā shaḳhs kar sake. kyā badrūheṅ andhoṅ kī āṅkheṅ bahāl kar saktī haiṅ?”

²²sardiyoṅ kā mausam thā aur īsā bait-ul-muqaddas kī maḳhsūsiyat kī īd banām hanūkā ke daurān yarūshalam meṅ thā.

²³wuh bait-ul-muqaddas ke us barāmde meṅ phir rahā thā jis kā nām sulaimān kā barāmdā thā.

²⁴yahūdī use gher kar kahne lage, “āp hameṅ kab tak uljhan meṅ rakheṅge? agar āp masīh haiṅ to hameṅ sāf sāf batā deṅ.”

²⁵īsā ne jawāb diyā, “maiṅ tum ko batā chukā hūṅ, lekin tum ko yaqīn nahīṅ āyā. jo kām maiṅ apne bāp ke nām se kartā hūṅ wuh mere gawāh haiṅ.

²⁶lekin tum īmān nahīṅ rakhte kyūṅki tum merī bheṛeṅ nahīṅ ho.

²⁷merī bheṛeṅ merī āwāz suntī haiṅ. maiṅ unheṅ jāntā hūṅ aur wuh mere pīchhe chaltī haiṅ.

²⁸maiṅ unheṅ abadī zindagī detā hūṅ, is lie wuh kabhī halāk nahīṅ hoṅgī. koī unheṅ mere hāth se chhīn na legā,

²⁹kyūṅki mere bāp ne unheṅ mere sapurd kiyā hai aur wuhī sab se baṛā hai. koī unheṅ bāp ke hāth se chhīn nahīṅ saktā.

³⁰maiṅ aur bāp ek haiṅ.”

³¹yih sun kar yahūdī dubārā patthar uṭhāne lage tāki īsā ko sangsār kareṅ.

³²us ne un se kahā, “maiṅ ne tumheṅ bāp kī taraf se kaī ilāhī nishān dikhāe haiṅ. tum mujhe in meṅ se kis nishān kī wajah se sangsār kar rahe ho?”

³³yahūdiyoṅ ne jawāb diyā, “ham tum ko kisī achchhe kām kī wajah se sangsār nahīṅ kar rahe balki kufr bakne kī wajah se. tum jo sirf insān ho allāh hone kā dāwā karte ho.”

³⁴īsā ne kahā, “kyā yih tumhārī sharīat meṅ nahīṅ likhā hai ki allāh ne farmāyā, ‘tum ḳhudā ho’?

³⁵unheṅ ‘ḳhudā’ kahā gayā jin tak allāh kā yih paiġhām pahuṅchāyā gayā. aur ham jānte haiṅ ki kalām-e-muqaddas ko mansūḳh nahīṅ kiyā jā saktā.

³⁶to phir tum kufr bakne kī bāt kyūṅ karte ho jab maiṅ kahtā hūṅ ki maiṅ allāh kā farzand hūṅ? āḳhir bāp ne ḳhud mujhe maḳhsūs karke duniyā meṅ bhejā hai.

³⁷agar maiṅ apne bāp ke kām na karūṅ to merī bāt na māno.

³⁸lekin agar us ke kām karūṅ to beshak merī bāt na māno, lekin kam az kam un kāmoṅ kī gawāhī to māno. phir tum jān loge aur samajh jāoge ki bāp mujh meṅ hai aur maiṅ bāp meṅ hūṅ.”

³⁹ek bār phir unhoṅ ne use giriftār karne kī koshish kī, lekin wuh un ke hāth se nikal gayā.

⁴⁰phir īsā dubārā daryā-e-yardan ke pār us jagah chalā gayā jahāṅ yahyā shurū meṅ baptismā diyā kartā thā. wahāṅ wuh kuchh der ṭhahrā.

⁴¹bahut se log us ke pās āte rahe. unhoṅ ne kahā, “yahyā ne kabhī koī ilāhī nishān na dikhāyā, lekin jo kuchh us ne is ke bāre meṅ bayān kiyā, wuh bilkul sahīh niklā.”

⁴²aur wahāṅ bahut se log īsā par īmān lāe.