Read Roman Urdu Geo yūhannā 11 Bible Online

yūhannā 11 - Roman Urdu Geo bible

yūhannā 11

¹un dinoṅ meṅ ek ādmī bīmār paṛ gayā jis kā nām lāzar thā. wuh apnī bahnoṅ mariyam aur marthā ke sāth bait-aniyāh meṅ rahtā thā.

²yih wuhī mariyam thī jis ne bād meṅ ḳhudāwand par ḳhushbū unḍel kar us ke pāoṅ apne bāloṅ se ḳhushk kie the. usī kā bhāī lāzar bīmār thā.

³chunāṅche bahnoṅ ne īsā ko ittilā dī, “ḳhudāwand, jise āp pyār karte haiṅ wuh bīmār hai.”

⁴jab īsā ko yih ḳhabar milī to us ne kahā, “is bīmārī kā anjām maut nahīṅ hai, balki yih allāh ke jalāl ke wāste huā hai, tāki is se allāh ke farzand ko jalāl mile.”

⁵īsā marthā, mariyam aur lāzar se muhabbat rakhtā thā.

⁶to bhī wuh lāzar ke bāre meṅ ittilā milne ke bād do din aur wahīṅ ṭhahrā.

⁷phir us ne apne shāgirdoṅ se bāt kī, “āo, ham dubārā yahūdiyā chale jāeṅ.”

⁸shāgirdoṅ ne etirāz kiyā, “ustād, abhī abhī wahāṅ ke yahūdī āp ko sangsār karne kī koshish kar rahe the, phir bhī āp wāpas jānā chāhte haiṅ?”

⁹īsā ne jawāb diyā, “kyā din meṅ raushnī ke bārah ghanṭe nahīṅ hote? jo shaḳhs din ke waqt chaltā phirtā hai wuh kisī bhī chīz se nahīṅ ṭakrāegā, kyūṅki wuh is duniyā kī raushnī ke zarī'e dekh saktā hai.

¹⁰lekin jo rāt ke waqt chaltā hai wuh chīzoṅ se ṭakrā jātā hai, kyūṅki us ke pās raushnī nahīṅ hai.”

¹¹phir us ne kahā, “hamārā dost lāzar so gayā hai. lekin maiṅ jā kar use jagā dūṅgā.”

¹²shāgirdoṅ ne kahā, “ḳhudāwand, agar wuh so rahā hai to wuh bach jāegā.”

¹³un kā ḳhayāl thā ki īsā lāzar kī fitrī nīnd kā zikr kar rahā hai jabki haqīqat meṅ wuh us kī maut kī taraf ishārā kar rahā thā.

¹⁴is lie us ne unheṅ sāf batā diyā, “lāzar wafāt pā gayā hai.

¹⁵aur tumhārī ḳhātir maiṅ ḳhush hūṅ ki maiṅ us ke marte waqt wahāṅ nahīṅ thā, kyūṅki ab tum īmān lāoge. āo, ham us ke pās jāeṅ.”

¹⁶tomā ne jis kā laqab juṛwāṅ thā apne sāthī shāgirdoṅ se kahā, “chalo, ham bhī wahāṅ jā kar us ke sāth mar jāeṅ.”

¹⁷wahāṅ pahuṅch kar īsā ko mālūm huā ki lāzar ko qabr meṅ rakhe chār din ho gae haiṅ.

¹⁸bait-aniyāh kā yarūshalam se fāsilā tīn kilomīṭar se kam thā,

¹⁹aur bahut se yahūdī marthā aur mariyam ko un ke bhāī ke bāre meṅ tasallī dene ke lie āe hue the.

²⁰yih sun kar ki īsā ā rahā hai marthā use milne gaī. lekin mariyam ghar meṅ baiṭhī rahī.

²¹marthā ne kahā, “ḳhudāwand, agar āp yahāṅ hote to merā bhāī na martā.

²²lekin maiṅ jāntī hūṅ ki ab bhī allāh āp ko jo bhī māṅgeṅge degā.”

²³īsā ne use batāyā, “terā bhāī jī uṭhegā.”

²⁴marthā ne jawāb diyā, “jī, mujhe mālūm hai ki wuh qiyāmat ke din jī uṭhegā, jab sab jī uṭheṅge.”

²⁵īsā ne use batāyā, “qiyāmat aur zindagī to maiṅ hūṅ. jo mujh par īmān rakhe wuh zindā rahegā, chāhe wuh mar bhī jāe.

²⁶aur jo zindā hai aur mujh par īmān rakhtā hai wuh kabhī nahīṅ maregā. marthā, kyā tujhe is bāt kā yaqīn hai?”

²⁷marthā ne jawāb diyā, “jī ḳhudāwand, maiṅ īmān rakhtī hūṅ ki āp ḳhudā ke farzand masīh haiṅ, jise duniyā meṅ ānā thā.”

²⁸yih kah kar marthā wāpas chalī gaī aur chupke se mariyam ko bulāyā, “ustād ā gae haiṅ, wuh tujhe bulā rahe haiṅ.”

²⁹yih sunte hī mariyam uṭh kar īsā ke pās gaī.

³⁰wuh abhī gāoṅ ke bāhar usī jagah ṭhahrā thā jahāṅ us kī mulāqāt marthā se huī thī.

³¹jo yahūdī ghar meṅ mariyam ke sāth baiṭhe use tasallī de rahe the, jab unhoṅ ne dekhā ki wuh jaldī se uṭh kar nikal gaī hai to wuh us ke pīchhe ho lie. kyūṅki wuh samajh rahe the ki wuh mātam karne ke lie apne bhāī kī qabr par jā rahī hai.

³²mariyam īsā ke pās pahuṅch gaī. use deḳhte hī wuh us ke pāoṅ meṅ gir gaī aur kahne lagī, “ḳhudāwand, agar āp yahāṅ hote to merā bhāī na martā.”

³³jab īsā ne mariyam aur us ke sāthiyoṅ ko rote dekhā to use baṛī ranjish huī. muztarib hālat meṅ

³⁴us ne pūchhā, “tum ne use kahāṅ rakhā hai?” unhoṅ ne jawāb diyā, “āeṅ ḳhudāwand, aur dekh leṅ.”

³⁵īsā ro paṛā.

³⁶yahūdiyoṅ ne kahā, “dekho, wuh use kitnā azīz thā.”

³⁷lekin un meṅ se bāz ne kahā, “is ādmī ne andhe ko shifā dī. kyā yih lāzar ko marne se nahīṅ bachā saktā thā?”

³⁸phir īsā dubārā nihāyat ranjīdā ho kar qabr par āyā. qabr ek ġhār thī jis ke muṅh par patthar rakhā gayā thā.

³⁹īsā ne kahā, “patthar ko haṭā do.” lekin marhūm kī bahan marthā ne etirāz kiyā, “ḳhudāwand, badbū āegī, kyūṅki use yahāṅ paṛe chār din ho gae haiṅ.”

⁴⁰īsā ne us se kahā, “kyā maiṅ ne tujhe nahīṅ batāyā ki agar tū īmān rakhe to allāh kā jalāl dekhegī?”

⁴¹chunāṅche unhoṅ ne patthar ko haṭā diyā. phir īsā ne apnī nazar uṭhā kar kahā, “ai bāp, maiṅ terā shukr kartā hūṅ ki tū ne merī sun lī hai.

⁴²maiṅ to jāntā hūṅ ki tū hameshā merī suntā hai. lekin maiṅ ne yih bāt pās khaṛe logoṅ kī ḳhātir kī, tāki wuh īmān lāeṅ ki tū ne mujhe bhejā hai.”

⁴³phir īsā zor se pukār uṭhā, “lāzar, nikal ā!”

⁴⁴aur murdā nikal āyā. abhī tak us ke hāth aur pāoṅ paṭṭiyoṅ se bandhe hue the jabki us kā chehrā kapṛe meṅ lipṭā huā thā. īsā ne un se kahā, “is ke kafan ko khol kar ise jāne do.”

⁴⁵un yahūdiyoṅ meṅ se jo mariyam ke pās āe the bahut se īsā par īmān lāe jab unhoṅ ne wuh dekhā jo us ne kiyā.

⁴⁶lekin bāz farīsiyoṅ ke pās gae aur unheṅ batāyā ki īsā ne kyā kiyā hai.

⁴⁷tab rāhnumā imāmoṅ aur farīsiyoṅ ne yahūdī adālat-e-āliyā kā ijlās mun'aqid kiyā. unhoṅ ne ek dūsre se pūchhā, “ham kyā kar rahe haiṅ? yih ādmī bahut se ilāhī nishān dikhā rahā hai.

⁴⁸agar ham use khulā chhoṛeṅ to āḳhirkār sab us par īmān le āeṅge. phir romī ā kar hamāre bait-ul-muqaddas aur hamāre mulk ko tabāh kar deṅge.”

⁴⁹un meṅ se ek kāifā thā jo us sāl imām-e-āzam thā. us ne kahā, “āp kuchh nahīṅ samajhte

⁵⁰aur is kā ḳhayāl bhī nahīṅ karte ki is se pahle ki pūrī qaum halāk ho jāe behtar yih hai ki ek ādmī ummat ke lie mar jāe.”

⁵¹us ne yih bāt apnī taraf se nahīṅ kī thī. us sāl ke imām-e-āzam kī haisiyat se hī us ne yih peshgoī kī ki īsā yahūdī qaum ke lie maregā.

⁵²aur na sirf is ke lie balki allāh ke bikhre hue farzandoṅ ko jamā karke ek karne ke lie bhī.

⁵³us din se unhoṅ ne īsā ko qatl karne kā irādā kar liyā.

⁵⁴is lie us ne ab se alāniyā yahūdiyoṅ ke darmiyān waqt na guzārā, balki us jagah ko chhoṛ kar registān ke qarīb ek ilāqe meṅ gayā. wahāṅ wuh apne shāgirdoṅ samet ek gāoṅ banām ifrāīm meṅ rahne lagā.

⁵⁵phir yahūdiyoṅ kī īd-e-fasah qarīb ā gaī. dehāt se bahut se log apne āp ko pāk karwāne ke lie īd se pahle pahle yarūshalam pahuṅche.

⁵⁶wahāṅ wuh īsā kā patā karte aur bait-ul-muqaddas meṅ khaṛe āpas meṅ bāt karte rahe, “kyā ḳhayāl hai? kyā wuh tahwār par nahīṅ āegā?”

⁵⁷lekin rāhnumā imāmoṅ aur farīsiyoṅ ne hukm diyā thā, “agar kisī ko mālūm ho jāe ki īsā kahāṅ hai to wuh ittilā de tāki ham use giriftār kar leṅ.”