Read Roman Urdu Geo yūhannā 12 Bible Online

yūhannā 12 - Roman Urdu Geo bible

yūhannā 12

¹fasah kī īd meṅ abhī chhih din bāqī the ki īsā bait-aniyāh pahuṅchā. yih wuh jagah thī jahāṅ us lāzar kā ghar thā jise īsā ne murdoṅ meṅ se zindā kiyā thā.

²wahāṅ us ke lie ek ḳhās khānā banāyā gayā. marthā khāne wāloṅ kī ḳhidmat kar rahī thī jabki lāzar īsā aur bāqī mehmānoṅ ke sāth khāne meṅ sharīk thā.

³phir mariyam ne ādhā liṭar ḳhālis jaṭāmāsī kā nihāyat qīmtī itr le kar īsā ke pāoṅ par unḍel diyā aur unheṅ apne bāloṅ se poṅchh kar ḳhushk kiyā. ḳhushbū pūre ghar meṅ phail gaī.

⁴lekin īsā ke shāgird yahūdāh iskariyotī ne etirāz kiyā (bād meṅ usī ne īsā ko dushman ke hawāle kar diyā). us ne kahā,

⁵“is itr kī qīmat chāṅdī ke 300 sikke thī. ise kyūṅ nahīṅ bechā gayā tāki is ke paise ġharīboṅ ko die jāte?”

⁶us ne yih bāt is lie nahīṅ kī ki use ġharīboṅ kī fikr thī. asal meṅ wuh chor thā. wuh shāgirdoṅ kā ḳhazāṅchī thā aur jamāshudā paisoṅ meṅ se baddiyānatī kartā rahtā thā.

⁷lekin īsā ne kahā, “use chhoṛ de! us ne merī tadfīn kī tayyārī ke lie yih kiyā hai.

⁸ġharīb to hameshā tumhāre pās raheṅge, lekin maiṅ hameshā tumhāre pās nahīṅ rahūṅgā.”

⁹itne meṅ yahūdiyoṅ kī baṛī tādād ko mālūm huā ki īsā wahāṅ hai. wuh na sirf īsā se milne ke lie āe balki lāzar se bhī jise us ne murdoṅ meṅ se zindā kiyā thā.

¹⁰is lie rāhnumā imāmoṅ ne lāzar ko bhī qatl karne kā mansūbā banāyā.

¹¹kyūṅki us kī wajah se bahut se yahūdī un meṅ se chale gae aur īsā par īmān le āe the.

¹²agle din īd ke lie āe hue logoṅ ko patā chalā ki īsā yarūshalam ā rahā hai. ek baṛā hujūm

¹³khajūr kī ḍāliyāṅ pakaṛe shahr se nikal kar us se milne āyā. chalte chalte wuh chillā kar nāre lagā rahe the, “hoshānā! [1] mubārak hai wuh jo rab ke nām se ātā hai! isrāīl kā bādshāh mubārak hai!”

¹⁴īsā ko kahīṅ se ek jawān gadhā mil gayā aur wuh us par baiṭh gayā, jis tarah kalām-e-muqaddas meṅ likhā hai,

¹⁵“ai siyyūn beṭī, mat ḍar! dekh, terā bādshāh gadhe ke bachche par sawār ā rahā hai.”

¹⁶us waqt us ke shāgirdoṅ ko is bāt kī samajh na āī. lekin bād meṅ jab īsā apne jalāl ko pahuṅchā to unheṅ yād āyā ki logoṅ ne us ke sāth yih kuchh kiyā thā aur wuh samajh gae ki kalām-e-muqaddas meṅ is kā zikr bhī hai.

¹⁷jo hujūm us waqt īsā ke sāth thā jab us ne lāzar ko murdoṅ meṅ se zindā kiyā thā, wuh dūsroṅ ko is ke bāre meṅ batātā rahā thā.

¹⁸isī wajah se itne log īsā se milne ke lie āe the, unhoṅ ne us ke is ilāhī nishān ke bāre meṅ sunā thā.

¹⁹yih dekh kar farīsī āpas meṅ kahne lage, “āp dekh rahe haiṅ ki bāt nahīṅ ban rahī. dekho, tamām duniyā us ke pīchhe ho lī hai.”

²⁰kuchh yūnānī bhī un meṅ the jo fasah kī īd ke mauqe par parastish karne ke lie āe hue the.

²¹ab wuh filippus se milne āe jo galīl ke bait-saidā se thā. unhoṅ ne kahā, “janāb, ham īsā se milnā chāhte haiṅ.”

²²filippus ne andriyās ko yih bāt batāī aur phir wuh mil kar īsā ke pās gae aur use yih ḳhabar pahuṅchāī.

²³lekin īsā ne jawāb diyā, “ab waqt ā gayā hai ki ibn-e-ādam ko jalāl mile.

²⁴maiṅ tum ko sach batātā hūṅ ki jab tak gandum kā dānā zamīn meṅ gir kar mar na jāe wuh akelā hī rahtā hai. lekin jab wuh mar jātā hai to bahut sā phal lātā hai.

²⁵jo apnī jān ko pyār kartā hai wuh use kho degā, aur jo is duniyā meṅ apnī jān se dushmanī rakhtā hai wuh use abad tak mahfūz rakhegā.

²⁶agar koī merī ḳhidmat karnā chāhe to wuh mere pīchhe ho le, kyūṅki jahāṅ maiṅ hūṅ wahāṅ merā ḳhādim bhī hogā. aur jo merī ḳhidmat kare merā bāp us kī izzat karegā.

²⁷ab merā dil muztarib hai. maiṅ kyā kahūṅ? kyā maiṅ kahūṅ, ‘ai bāp, mujhe is waqt se bachāe raḳh’? nahīṅ, maiṅ to isī lie āyā hūṅ.

²⁸ai bāp, apne nām ko jalāl de.” tab āsmān se ek āwāz sunāī dī, “maiṅ use jalāl de chukā hūṅ aur dubārā bhī jalāl dūṅgā.”

²⁹hujūm ke jo log wahāṅ khaṛe the unhoṅ ne yih sun kar kahā, “bādal garaj rahe haiṅ.” auroṅ ne ḳhayāl pesh kiyā, “koī farishtā us se hamkalām huā hai.”

³⁰īsā ne unheṅ batāyā, “yih āwāz mere wāste nahīṅ balki tumhāre wāste thī.

³¹ab duniyā kī adālat karne kā waqt ā gayā hai, ab duniyā ke hukmrān ko nikāl diyā jāegā.

³²aur maiṅ ḳhud zamīn se ūṅche par chaṛhāe jāne ke bād sab ko apne pās khaiṅch lūṅgā.”

³³in alfāz se us ne is taraf ishārā kiyā ki wuh kis tarah kī maut maregā.

³⁴hujūm bol uṭhā, “kalām-e-muqaddas se ham ne sunā hai ki masīh abad tak qāim rahegā. to phir āp kī yih kaisī bāt hai ki ibn-e-ādam ko ūṅche par chaṛhāyā jānā hai? āḳhir ibn-e-ādam hai kaun?”

³⁵īsā ne jawāb diyā, “nūr thoṛī der aur tumhāre pās rahegā. jitnī der wuh maujūd hai is nūr meṅ chalte raho tāki tārīkī tum par chhā na jāe. jo andhere meṅ chaltā hai use nahīṅ mālūm ki wuh kahāṅ jā rahā hai.

³⁶nūr ke tumhāre pās se chale jāne se pahle pahle us par īmān lāo tāki tum nūr ke farzand ban jāo.” yih kahne ke bād īsā chalā gayā aur ġhāib ho gayā.

³⁷agarche īsā ne yih tamām ilāhī nishān un ke sāmne hī dikhāe to bhī wuh us par īmān na lāe.

³⁸yūṅ yasāyāh nabī kī peshgoī pūrī huī, “ai rab, kaun hamāre paiġhām par īmān lāyā? aur rab kī qudrat kis par zāhir huī?”

³⁹chunāṅche wuh īmān na lā sake, jis tarah yasāyāh nabī ne kahīṅ aur farmāyā hai,

⁴⁰“allāh ne un kī āṅkhoṅ ko andhā aur un ke dil ko behiss kar diyā hai, aisā na ho ki wuh apnī āṅkhoṅ se dekheṅ, apne dil se samjheṅ, merī taraf rujū kareṅ aur maiṅ unheṅ shifā dūṅ.”

⁴¹yasāyāh ne yih is lie farmāyā kyūṅki us ne īsā kā jalāl dekh kar us ke bāre meṅ bāt kī.

⁴²to bhī bahut se log īsā par īmān rakhte the. un meṅ kuchh rāhnumā bhī shāmil the. lekin wuh is kā alāniyā iqrār nahīṅ karte the, kyūṅki wuh ḍarte the ki farīsī hameṅ yahūdī jamā'at se ḳhārij kar deṅge.

⁴³asal meṅ wuh allāh kī izzat kī nisbat insān kī izzat ko zyādā azīz rakhte the.

⁴⁴phir īsā pukār uṭhā, “jo mujh par īmān rakhtā hai wuh na sirf mujh par balki us par īmān rakhtā hai jis ne mujhe bhejā hai.

⁴⁵aur jo mujhe deḳhtā hai wuh use deḳhtā hai jis ne mujhe bhejā hai.

⁴⁶maiṅ nūr kī haisiyat se is duniyā meṅ āyā hūṅ tāki jo bhī mujh par īmān lāe wuh tārīkī meṅ na rahe.

⁴⁷jo merī bāteṅ sun kar un par amal nahīṅ kartā maiṅ us kī adālat nahīṅ karūṅga, kyūṅki maiṅ duniyā kī adālat karne ke lie nahīṅ āyā balki use najāt dene ke lie.

⁴⁸to bhī ek hai jo us kī adālat kartā hai. jo mujhe radd karke merī bāteṅ qabūl nahīṅ kartā merā pesh kiyā gayā kalām hī qiyāmat ke din us kī adālat karegā.

⁴⁹kyūṅki jo kuchh maiṅ ne bayān kiyā hai wuh merī taraf se nahīṅ hai. mere bhejne wāle bāp hī ne mujhe hukm diyā ki kyā kahnā aur kyā sunānā hai.

⁵⁰aur maiṅ jāntā hūṅ ki us kā hukm abadī zindagī tak pahuṅchātā hai. chunāṅche jo kuchh maiṅ sunātā hūṅ wuhī kuchh hai jo bāp ne mujhe batāyā hai.”