Read Roman Urdu Geo yūhannā 13 Bible Online

yūhannā 13 - Roman Urdu Geo bible

yūhannā 13

¹fasah kī īd ab shurū hone wālī thī. īsā jāntā thā ki wuh waqt ā gayā hai ki mujhe is duniyā ko chhoṛ kar bāp ke pās jānā hai. go us ne hameshā duniyā meṅ apne logoṅ se muhabbat rakhī thī, lekin ab us ne āḳhirī had tak un par apnī muhabbat kā izhār kiyā.

²phir shām kā khānā tayyār huā. us waqt iblīs shamāūn iskariyotī ke beṭe yahūdāh ke dil meṅ īsā ko dushman ke hawāle karne kā irādā ḍāl chukā thā.

³īsā jāntā thā ki bāp ne sab kuchh mere sapurd kar diyā hai aur ki maiṅ allāh meṅ se nikal āyā aur ab us ke pās wāpas jā rahā hūṅ.

⁴chunāṅche us ne dastarḳhwān se uṭh kar apnā libās utār diyā aur kamr par tauliyā bāndh liyā.

⁵phir wuh bāsan meṅ pānī ḍāl kar shāgirdoṅ ke pāoṅ dhone aur bandhe hue tauliyā se poṅchh kar ḳhushk karne lagā.

⁶jab patras kī bārī āī to us ne kahā, “ḳhudāwand, āp mere pāoṅ dhonā chāhte haiṅ?”

⁷īsā ne jawāb diyā, “is waqt tū nahīṅ samajhtā ki maiṅ kyā kar rahā hūṅ, lekin bād meṅ yih terī samajh meṅ ā jāegā.”

⁸patras ne etirāz kiyā, “maiṅ kabhī bhī āp ko mere pāoṅ dhone nahīṅ dūṅgā!” īsā ne jawāb diyā, “agar maiṅ tujhe na dho'ūṅ to mere sāth terā koī hissā nahīṅ hogā.”

⁹yih sun kar patras ne kahā, “to phir ḳhudāwand, na sirf mere pāoṅ balki mere hāthoṅ aur sar ko bhī dhoeṅ!”

¹⁰īsā ne jawāb diyā, “jis shaḳhs ne nahā liyā hai use sirf apne pāoṅ ko dhone kī zarūrat hotī hai, kyūṅki wuh pūre taur par pāk-sāf hai. tum pāk-sāf ho, lekin sab ke sab nahīṅ.”

¹¹(īsā ko mālūm thā ki kaun use dushman ke hawāle karegā. is lie us ne kahā ki sab ke sab pāk-sāf nahīṅ haiṅ.)

¹²un sab ke pāoṅ dhone ke bād īsā dubārā apnā libās pahan kar baiṭh gayā. us ne sawāl kiyā, “kyā tum samajhte ho ki maiṅ ne tumhāre lie kyā kiyā hai?

¹³tum mujhe ‘ustād’ aur ‘ḳhudāwand’ kah kar muḳhātib karte ho aur yih sahīh hai, kyūṅki maiṅ yihī kuchh hūṅ.

¹⁴maiṅ, tumhāre ḳhudāwand aur ustād ne tumhāre pāoṅ dhoe. is lie ab tumhārā farz bhī hai ki ek dūsre ke pāoṅ dhoyā karo.

¹⁵maiṅ ne tum ko ek namūnā diyā hai tāki tum bhī wuhī karo jo maiṅ ne tumhāre sāth kiyā hai.

¹⁶maiṅ tum ko sach batātā hūṅ ki ġhulām apne mālik se baṛā nahīṅ hotā, na paiġhambar apne bhejne wāle se.

¹⁷agar tum yih jānte ho to is par amal bhī karo, phir hī tum mubārak hoge.

¹⁸maiṅ tum sab kī bāt nahīṅ kar rahā. jinheṅ maiṅ ne chun liyā hai unheṅ maiṅ jāntā hūṅ. lekin kalām-e-muqaddas kī us bāt kā pūrā honā zarūr hai, ‘jo merī roṭī khātā hai us ne mujh par lāt uṭhāī hai.’

¹⁹maiṅ tum ko is se pahle ki wuh pesh āe yih abhī batā rahā hūṅ, tāki jab wuh pesh āe to tum īmān lāo ki maiṅ wuhī hūṅ.

²⁰maiṅ tum ko sach batātā hūṅ ki jo shaḳhs use qabūl kartā hai jise maiṅ ne bhejā hai wuh mujhe qabūl kartā hai. aur jo mujhe qabūl kartā hai wuh use qabūl kartā hai jis ne mujhe bhejā hai.”

²¹in alfāz ke bād īsā nihāyat muztarib huā aur kahā, “maiṅ tum ko sach batātā hūṅ ki tum meṅ se ek mujhe dushman ke hawāle kar degā.”

²²shāgird uljhan meṅ ek dūsre ko dekh kar sochne lage ki īsā kis kī bāt kar rahā hai.

²³ek shāgird jise īsā pyār kartā thā us ke qarībtarīn baiṭhā thā.

²⁴patras ne use ishārā kiyā ki wuh us se daryāft kare ki wuh kis kī bāt kar rahā hai.

²⁵us shāgird ne īsā kī taraf sar jhukā kar pūchhā, “ḳhudāwand, yih kaun hai?”

²⁶īsā ne jawāb diyā, “jise maiṅ roṭī kā luqmā shorb meṅ ḍubo kar dūṅ, wuhī hai.” phir luqme ko ḍubo kar us ne shamāūn iskariyotī ke beṭe yahūdāh ko de diyā.

²⁷jūṅ hī yahūdāh ne yih luqmā le liyā iblīs us meṅ samā gayā. īsā ne use batāyā, “jo kuchh karnā hai wuh jaldī se kar le.”

²⁸lekin mez par baiṭhe logoṅ meṅ se kisī ko mālūm na huā ki īsā ne yih kyūṅ kahā.

²⁹bāz kā ḳhayāl thā ki chūṅki yahūdāh ḳhazāṅchī thā is lie wuh use batā rahā hai ki īd ke lie darkār chīzeṅ ḳharīd le yā ġharīboṅ meṅ kuchh taqsīm kar de.

³⁰chunāṅche īsā se yih luqmā lete hī yahūdāh bāhar nikal gayā. rāt kā waqt thā.

³¹yahūdāh ke chale jāne ke bād īsā ne kahā, “ab ibn-e-ādam ne jalāl pāyā aur allāh ne us meṅ jalāl pāyā hai.

³²hāṅ, chūṅki allāh ko us meṅ jalāl mil gayā hai is lie allāh apne meṅ farzand ko jalāl degā. aur wuh yih jalāl fauran degā.

³³mere bachcho, maiṅ thoṛī der aur tumhāre pās ṭhahrūṅga. tum mujhe talāsh karoge, aur jo kuchh maiṅ yahūdiyoṅ ko batā chukā hūṅ wuh ab tum ko bhī batātā hūṅ, jahāṅ maiṅ jā rahā hūṅ wahāṅ tum nahīṅ ā sakte.

³⁴maiṅ tum ko ek nayā hukm detā hūṅ, yih ki ek dūsre se muhabbat rakho. jis tarah maiṅ ne tum se muhabbat rakhī usī tarah tum bhī ek dūsre se muhabbat karo.

³⁵agar tum ek dūsre se muhabbat rakhoge to sab jān leṅge ki tum mere shāgird ho.”

³⁶patras ne pūchhā, “ḳhudāwand, āp kahāṅ jā rahe haiṅ?” īsā ne jawāb diyā, “jahāṅ maiṅ jā rahā hūṅ wahāṅ tū mere pīchhe nahīṅ ā saktā. lekin bād meṅ tū mere pīchhe ā jāegā.”

³⁷patras ne sawāl kiyā, “ḳhudāwand, maiṅ āp ke pīchhe abhī kyūṅ nahīṅ jā saktā? maiṅ āp ke lie apnī jān tak dene ko tayyār hūṅ.”

³⁸lekin īsā ne jawāb diyā, “tū mere lie apnī jān denā chāhtā hai? maiṅ tujhe sach batātā hūṅ ki murġh ke bāṅg dene se pahle pahle tū tīn martabā mujhe jānane se inkār kar chukā hogā.