Read Roman Urdu Geo yūhannā 14 Bible Online

yūhannā 14 - Roman Urdu Geo bible

yūhannā 14

¹tumhārā dil na ghabrāe. tum allāh par īmān rakhte ho, mujh par bhī īmān rakho.

²mere bāp ke ghar meṅ beshumār makān haiṅ. agar aisā na hotā to kyā maiṅ tum ko batātā ki maiṅ tumhāre lie jagah tayyār karne ke lie wahāṅ jā rahā hūṅ?

³aur agar maiṅ jā kar tumhāre lie jagah tayyār karūṅ to wāpas ā kar tum ko apne sāth le jāūṅgā tāki jahāṅ maiṅ hūṅ wahāṅ tum bhī ho.

⁴aur jahāṅ maiṅ jā rahā hūṅ us kī rāh tum jānte ho.”

⁵tomā bol uṭhā, “ḳhudāwand, hameṅ mālūm nahīṅ ki āp kahāṅ jā rahe haiṅ. to phir ham us kī rāh kis tarah jāneṅ?”

⁶īsā ne jawāb diyā, “rāh aur haq aur zindagī maiṅ hūṅ. koī mere wasīle ke baġhair bāp ke pās nahīṅ ā saktā.

⁷agar tum ne mujhe jān liyā hai to is kā matlab hai ki tum mere bāp ko bhī jān loge. aur ab se aisā hai bhī. tum use jānte ho aur tum ne us ko dekh liyā hai.”

⁸filippus ne kahā, “ai ḳhudāwand, bāp ko hameṅ dikhāeṅ. bas yihī hamāre lie kāfī hai.”

⁹īsā ne jawāb diyā, “filippus, maiṅ itnī der se tumhāre sāth hūṅ, kyā is ke bāwujūd tū mujhe nahīṅ jāntā? jis ne mujhe dekhā us ne bāp ko dekhā hai. to phir tū kyūṅkar kahtā hai, ‘bāp ko hameṅ dikhāeṅ’?

¹⁰kyā tū īmān nahīṅ rakhtā ki maiṅ bāp meṅ hūṅ aur bāp mujh meṅ hai? jo bāteṅ meṅ tum ko batātā hūṅ wuh merī nahīṅ balki mujh meṅ rahne wāle bāp kī taraf se haiṅ. wuhī apnā kām kar rahā hai.

¹¹merī bāt kā yaqīn karo ki maiṅ bāp meṅ hūṅ aur bāp mujh meṅ hai. yā kam az kam un kāmoṅ kī binā par yaqīn karo jo maiṅ ne kie haiṅ.

¹²maiṅ tum ko sach batātā hūṅ ki jo mujh par īmān rakhe wuh wuhī kuchh karegā jo maiṅ kartā hūṅ. na sirf yih balki wuh in se bhī baṛe kām karegā, kyūṅki maiṅ bāp ke pās jā rahā hūṅ.

¹³aur jo kuchh tum mere nām meṅ māṅgo maiṅ dūṅgā tāki bāp ko farzand meṅ jalāl mil jāe.

¹⁴jo kuchh tum mere nām meṅ mujh se chāho wuh maiṅ karūṅga.

¹⁵agar tum mujhe pyār karte ho to mere ahkām ke mutābiq zindagī guzāroge.

¹⁶aur maiṅ bāp se guzārish karūṅga to wuh tum ko ek aur madadgār degā jo abad tak tumhāre sāth rahegā

¹⁷yānī sachchāī kā rūh, jise duniyā pā nahīṅ saktī, kyūṅki wuh na to use deḳhtī na jāntī hai. lekin tum use jānte ho, kyūṅki wuh tumhāre sāth rahtā hai aur āindā tumhāre andar rahegā.

¹⁸maiṅ tum ko yatīm chhoṛ kar nahīṅ jāūṅgā balki tumhāre pās wāpas āūṅgā.

¹⁹thoṛī der ke bād duniyā mujhe nahīṅ dekhegī, lekin tum mujhe deḳhte rahoge. chūṅki maiṅ zindā hūṅ is lie tum bhī zindā rahoge.

²⁰jab wuh din āegā to tum jān loge ki maiṅ apne bāp meṅ hūṅ, tum mujh meṅ ho aur maiṅ tum meṅ.

²¹jis ke pās mere ahkām haiṅ aur jo un ke mutābiq zindagī guzārtā hai, wuhī mujhe pyār kartā hai. aur jo mujhe pyār kartā hai use merā bāp pyār karegā. maiṅ bhī use pyār karūṅga aur apne āp ko us par zāhir karūṅga.”

²²yahūdāh (yahūdāh iskariyotī nahīṅ) ne pūchhā, “ḳhudāwand, kyā wajah hai ki āp apne āp ko sirf ham par zāhir kareṅge aur duniyā par nahīṅ?”

²³īsā ne jawāb diyā, “agar koī mujhe pyār kare to wuh mere kalām ke mutābiq zindagī guzāregā. merā bāp aise shaḳhs ko pyār karegā aur ham us ke pās ā kar us ke sāth sukūnat kareṅge.

²⁴jo mujh se muhabbat nahīṅ kartā wuh merī bātoṅ ke mutābiq zindagī nahīṅ guzārtā. aur jo kalām tum mujh se sunte ho wuh merā apnā kalām nahīṅ hai balki bāp kā hai jis ne mujhe bhejā hai.

²⁵yih sab kuchh maiṅ ne tumhāre sāth rahte hue tum ko batāyā hai.

²⁶lekin bād meṅ rūh-ul-quds, jise bāp mere nām se bhejegā tum ko sab kuchh sikhāegā. yih madadgār tum ko har bāt kī yād dilāegā jo maiṅ ne tum ko batāī hai.

²⁷maiṅ tumhāre pās salāmatī chhoṛe jātā hūṅ, apnī hī salāmatī tum ko de detā hūṅ. aur maiṅ ise yūṅ nahīṅ detā jis tarah duniyā detī hai. tumhārā dil na ghabrāe aur na ḍare.

²⁸tum ne mujh se sun liyā hai ki ‘maiṅ jā rahā hūṅ aur tumhāre pās wāpas āūṅgā.’ agar tum mujh se muhabbat rakhte to tum is bāt par ḳhush hote ki maiṅ bāp ke pās jā rahā hūṅ, kyūṅki bāp mujh se baṛā hai.

²⁹maiṅ ne tum ko pahle se batā diyā hai, is se peshtar ki yih ho, tāki jab pesh āe to tum īmān lāo.

³⁰ab se maiṅ tum se zyādā bāteṅ nahīṅ karūṅga, kyūṅki is duniyā kā hukmrān ā rahā hai. use mujh par koī qābū nahīṅ hai,

³¹lekin duniyā yih jān le ki maiṅ bāp ko pyār kartā hūṅ aur wuhī kuchh kartā hūṅ jis kā hukm wuh mujhe detā hai. ab uṭho, ham yahāṅ se chaleṅ.