Read Roman Urdu Geo yūhannā 18 Bible Online

yūhannā 18 - Roman Urdu Geo bible

yūhannā 18

¹yih kah kar īsā apne shāgirdoṅ ke sāth niklā aur wādī-e-qidron ko pār karke ek bāġh meṅ dāḳhil huā.

²yahūdāh jo use dushman ke hawāle karne wālā thā wuh bhī is jagah se wāqif thā, kyūṅki īsā wahāṅ apne shāgirdoṅ ke sāth jāyā kartā thā.

³rāhnumā imāmoṅ aur farīsiyoṅ ne yahūdāh ko romī faujiyoṅ kā dastā aur bait-ul-muqaddas ke kuchh pahredār die the. ab yih mash'aleṅ, lālṭain aur hathiyār lie bāġh meṅ pahuṅche.

⁴īsā ko mālūm thā ki use kyā pesh āegā. chunāṅche us ne nikal kar un se pūchhā, “tum kis ko ḍhūnḍ rahe ho?”

⁵unhoṅ ne jawāb diyā, “īsā nāsarī ko.” īsā ne unheṅ batāyā, “maiṅ hī hūṅ.” yahūdāh jo use dushman ke hawāle karnā chāhtā thā, wuh bhī un ke sāth khaṛā thā.

⁶jab īsā ne elān kiyā, “maiṅ hī hūṅ,” to sab pīchhe haṭ kar zamīn par gir paṛe.

⁷ek aur bār īsā ne un se sawāl kiyā, “tum kis ko ḍhūnḍ rahe ho?” unhoṅ ne jawāb diyā, “īsā nāsarī ko.”

⁸us ne kahā, “maiṅ tum ko batā chukā hūṅ ki maiṅ hī hūṅ. agar tum mujhe ḍhūnḍ rahe ho to in ko jāne do.”

⁹yūṅ us kī yih bāt pūrī huī, “maiṅ ne un meṅ se jo tū ne mujhe die haiṅ ek ko bhī nahīṅ khoyā.”

¹⁰shamāūn patras ke pās talwār thī. ab us ne use miyān se nikāl kar imām-e-āzam ke ġhulām kā dahnā kān uṛā diyā (ġhulām kā nām malḳhus thā).

¹¹lekin īsā ne patras se kahā, “talwār ko miyān meṅ rakh. kyā maiṅ wuh pyālā na piyūṅ jo bāp ne mujhe diyā hai?”

¹²phir faujī daste, un ke afsar aur bait-ul-muqaddas ke yahūdī pahredāroṅ ne īsā ko giriftār karke bāndh liyā.

¹³pahle wuh use hannā ke pās le gae. hannā us sāl ke imām-e-āzam kāifā kā susar thā.

¹⁴kāifā hī ne yahūdiyoṅ ko yih mashwarā diyā thā ki behtar yih hai ki ek hī ādmī ummat ke lie mar jāe.

¹⁵shamāūn patras kisī aur shāgird ke sāth īsā ke pīchhe ho liyā thā. yih dūsrā shāgird imām-e-āzam kā jānane wālā thā, is lie wuh īsā ke sāth imām-e-āzam ke sahan meṅ dāḳhil huā.

¹⁶patras bāhar darwāze par khaṛā rahā. phir imām-e-āzam kā jānane wālā shāgird dubārā nikal āyā. us ne geṭ kī nigarānī karne wālī aurat se bāt kī to use patras ko apne sāth andar le jāne kī ijāzat milī.

¹⁷us aurat ne patras se pūchhā, “tum bhī is ādmī ke shāgird ho ki nahīṅ?” us ne jawāb diyā, “nahīṅ, maiṅ nahīṅ hūṅ.”

¹⁸ṭhanḍ thī, is lie ġhulāmoṅ aur pahredāroṅ ne lakaṛī ke koeloṅ se āg jalāī. ab wuh us ke pās khaṛe tāp rahe the. patras bhī un ke sāth khaṛā tāp rahā thā.

¹⁹itne meṅ imām-e-āzam īsā kī pūchh-gachh karke us ke shāgirdoṅ aur tālīm ke bāre meṅ taftīsh karne lagā.

²⁰īsā ne jawāb meṅ kahā, “maiṅ ne duniyā meṅ khul kar bāt kī hai. maiṅ hameshā yahūdī ibādatḳhānoṅ aur bait-ul-muqaddas meṅ tālīm detā rahā, wahāṅ jahāṅ tamām yahūdī jamā huā karte haiṅ. poshīdagī meṅ to maiṅ ne kuchh nahīṅ kahā.

²¹āp mujh se kyūṅ pūchh rahe haiṅ? un se daryāft kareṅ jinhoṅ ne merī bāteṅ sunī haiṅ. un ko mālūm hai ki maiṅ ne kyā kuchh kahā hai.”

²²is par sāth khaṛe bait-ul-muqaddas ke pahredāroṅ meṅ se ek ne īsā ke muṅh par thappaṛ mār kar kahā, “kyā yih imām-e-āzam se bāt karne kā tarīqā hai jab wuh tum se kuchh pūchhe?”

²³īsā ne jawāb diyā, “agar maiṅ ne burī bāt kī hai to sābit kar. lekin agar sach kahā, to tū ne mujhe kyūṅ mārā?”

²⁴phir hannā ne īsā ko bandhī huī hālat meṅ imām-e-āzam kāifā ke pās bhej diyā.

²⁵shamāūn patras ab tak āg ke pās khaṛā tāp rahā thā. itne meṅ dūsre us se pūchhne lage, “tum bhī us ke shāgird ho ki nahīṅ?” lekin patras ne inkār kiyā, “nahīṅ, maiṅ nahīṅ hūṅ.”

²⁶phir imām-e-āzam kā ek ġhulām bol uṭhā jo us ādmī kā rishtedār thā jis kā kān patras ne uṛā diyā thā, “kyā maiṅ ne tum ko bāġh meṅ us ke sāth nahīṅ dekhā thā?”

²⁷patras ne ek bār phir inkār kiyā, aur inkār karte hī murġh kī bāṅg sunāī dī.

²⁸phir yahūdī īsā ko kāifā se le kar romī gawarnar ke mahal banām praiṭoriyum ke pās pahuṅch gae. ab subh ho chukī thī aur chūṅki yahūdī fasah kī īd ke khāne meṅ sharīk honā chāhte the, is lie wuh mahal meṅ dāḳhil na hue, warnā wuh nāpāk ho jāte.

²⁹chunāṅche pīlātus nikal kar un ke pās āyā aur pūchhā, “tum is ādmī par kyā ilzām lagā rahe ho?”

³⁰unhoṅ ne jawāb diyā, “agar yih mujrim na hotā to ham ise āp ke hawāle na karte.”

³¹pīlātus ne kahā, “phir ise le jāo aur apnī sharaī adālatoṅ meṅ pesh karo.” lekin yahūdiyoṅ ne etirāz kiyā, “hameṅ kisī ko sazā-e-maut dene kī ijāzat nahīṅ.”

³²īsā ne is taraf ishārā kiyā thā ki wuh kis tarah maregā aur ab us kī yih bāt pūrī huī.

³³tab pīlātus phir apne mahal meṅ gayā. wahāṅ se us ne īsā ko bulāyā aur us se pūchhā, “kyā tum yahūdiyoṅ ke bādshāh ho?”

³⁴īsā ne pūchhā, “kyā āp apnī taraf se yih sawāl kar rahe haiṅ, yā auroṅ ne āp ko mere bāre meṅ batāyā hai?”

³⁵pīlātus ne jawāb diyā, “kyā maiṅ yahūdī hūṅ? tumhārī apnī qaum aur rāhnumā imāmoṅ hī ne tumheṅ mere hawāle kiyā hai. tum se kyā kuchh sarzad huā hai?”

³⁶īsā ne kahā, “merī bādshāhī is duniyā kī nahīṅ hai. agar wuh is duniyā kī hotī to mere ḳhādim saḳht jidd-o-jahd karte tāki mujhe yahūdiyoṅ ke hawāle na kiyā jātā. lekin aisā nahīṅ hai. ab merī bādshāhī yahāṅ kī nahīṅ hai.”

³⁷pīlātus ne kahā, “to phir tum wāqaī bādshāh ho?” īsā ne jawāb diyā, “āp sahīh kahte haiṅ, maiṅ bādshāh hūṅ. maiṅ isī maqsad ke lie paidā ho kar duniyā meṅ āyā ki sachchāī kī gawāhī dūṅ. jo bhī sachchāī kī taraf se hai wuh merī suntā hai.”

³⁸pīlātus ne pūchhā, “sachchāī kyā hai?” phir wuh dubārā nikal kar yahūdiyoṅ ke pās gayā. us ne elān kiyā, “mujhe use mujrim ṭhahrāne kī koī wajah nahīṅ milī.

³⁹lekin tumhārī ek rasm hai jis ke mutābiq mujhe īd-e-fasah ke mauqe par tumhāre lie ek qaidī ko rihā karnā hai. kyā tum chāhte ho ki maiṅ ‘yahūdiyoṅ ke bādshāh’ ko rihā kar dūṅ?”

⁴⁰lekin jawāb meṅ log chillāne lage, “nahīṅ, is ko nahīṅ balki bar-abbā ko.” (bar-abbā ḍākū thā.)