Read Roman Urdu Geo yūhannā 2 Bible Online

yūhannā 2 - Roman Urdu Geo bible

yūhannā 2

¹tīsre din galīl ke gāoṅ qānā meṅ ek shādī huī. īsā kī māṅ wahāṅ thī

²aur īsā aur us ke shāgirdoṅ ko bhī dāwat dī gaī thī.

³mai ḳhatm ho gaī to īsā kī māṅ ne us se kahā, “un ke pās mai nahīṅ rahī.”

⁴īsā ne jawāb diyā, “ai ḳhātūn, merā āp se kyā wāstā? merā waqt abhī nahīṅ āyā.”

⁵lekin us kī māṅ ne naukaroṅ ko batāyā, “jo kuchh wuh tum ko batāe wuh karo.”

⁶wahāṅ patthar ke chhih maṭke paṛe the jinheṅ yahūdī dīnī ġhusl ke lie istemāl karte the. har ek meṅ taqrīban 100 liṭar kī gunjāish thī.

⁷īsā ne naukaroṅ se kahā, “maṭkoṅ ko pānī se bhar do.” chunāṅche unhoṅ ne unheṅ labālab bhar diyā.

⁸phir us ne kahā, “ab kuchh nikāl kar ziyāfat kā intizām chalāne wāle ke pās le jāo.” unhoṅ ne aisā hī kiyā.

⁹jūṅ hī ziyāfat kā intizām chalāne wāle ne wuh pānī chakhā jo mai meṅ badal gayā thā to us ne dūlhe ko bulāyā. (use mālūm na thā ki yih kahāṅ se āī hai, agarche un naukaroṅ ko patā thā jo use nikāl kar lāe the.)

¹⁰us ne kahā, “har mezbān pahle achchhī qism kī mai pīne ke lie pesh kartā hai. phir jab logoṅ ko nashā chaṛhnī lage to wuh nisbatan ghaṭiyā qism kī mai pilāne lagtā hai. lekin āp ne achchhī mai ab tak rakh chhoṛī hai.”

¹¹yūṅ īsā ne galīl ke qānā meṅ yih pahlā ilāhī nishān dikhā kar apne jalāl kā izhār kiyā. yih dekh kar us ke shāgird us par īmān lāe.

¹²is ke bād wuh apnī māṅ, apne bhāiyoṅ aur apne shāgirdoṅ ke sāth kafarnahūm ko chalā gayā. wahāṅ wuh thoṛe din rahe.

¹³jab yahūdī īd-e-fasah qarīb ā gaī to īsā yarūshalam chalā gayā.

¹⁴bait-ul-muqaddas meṅ jā kar us ne dekhā ki kaī log us meṅ gāy-bail, bheṛeṅ aur kabūtar bech rahe haiṅ. dūsre mez par baiṭhe ġhairmulkī sikke bait-ul-muqaddas ke sikkoṅ meṅ badal rahe haiṅ.

¹⁵phir īsā ne rassiyoṅ kā koṛā banā kar sab ko bait-ul-muqaddas se nikāl diyā. us ne bheṛoṅ aur gāy-bailoṅ ko bāhar hāṅk diyā, paise badalne wāloṅ ke sikke bikher die aur un kī mezeṅ ulaṭ dīṅ.

¹⁶kabūtar bechne wāloṅ ko us ne kahā, “ise le jāo. mere bāp ke ghar ko manḍī meṅ mat badlo.”

¹⁷yih dekh kar īsā ke shāgirdoṅ ko kalām-e-muqaddas kā yih hawālā yād āyā ki “tere ghar kī ġhairat mujhe khā jāegī.”

¹⁸yahūdiyoṅ ne jawāb meṅ pūchhā, “āp hameṅ kyā ilāhī nishān dikhā sakte haiṅ tāki hameṅ yaqīn āe ki āp ko yih karne kā iḳhtiyār hai?”

¹⁹īsā ne jawāb diyā, “is maqdis ko ḍhā do to maiṅ ise tīn din ke andar dubārā tāmīr kar dūṅgā.”

²⁰yahūdiyoṅ ne kahā, “bait-ul-muqaddas ko tāmīr karne meṅ 46 sāl lag gae the aur āp use tīn din meṅ tāmīr karnā chāhte haiṅ?”

²¹lekin jab īsā ne “is maqdis” ke alfāz istemāl kie to is kā matlab us kā apnā badan thā.

²²us ke murdoṅ meṅ se jī uṭhne ke bād us ke shāgirdoṅ ko us kī yih bāt yād āī. phir wuh kalām-e-muqaddas aur un bātoṅ par īmān lāe jo īsā ne kī thīṅ.

²³jab īsā fasah kī īd ke lie yarūshalam meṅ thā to bahut se log us ke peshkardā ilāhī nishānoṅ ko dekh kar us ke nām par īmān lāne lage.

²⁴lekin us ko un par etimād nahīṅ thā, kyūṅki wuh sab ko jāntā thā.

²⁵aur use insān ke bāre meṅ kisī kī gawāhī kī zarūrat nahīṅ thī, kyūṅki wuh jāntā thā ki insān ke andar kyā kuchh hai.