Read Roman Urdu Geo yūhannā 5 Bible Online

yūhannā 5 - Roman Urdu Geo bible

yūhannā 5

¹kuchh der ke bād īsā kisī yahūdī īd ke mauqe par yarūshalam gayā.

²shahr meṅ ek hauz thā jis kā nām arāmī zabān meṅ bait-hasdā thā. us ke pāṅch baṛe barāmde the aur wuh shahr ke us darwāze ke qarīb thā jis kā nām ‘bheṛoṅ kā darwāzā’ hai.

³in barāmdoṅ meṅ beshumār māzūr log paṛe rahte the. yih andhe, langaṛe aur maflūj pānī ke hilne ke intizār meṅ rahte the.

⁴[kyūṅki gāhe-ba-gāhe rab kā farishtā utar kar pānī ko hilā detā thā. jo bhī us waqt us meṅ pahle dāḳhil ho jātā use shifā mil jātī thī ḳhwāh us kī bīmārī koī bhī kyūṅ na hotī.]

⁵marīzoṅ meṅ se ek ādmī 38 sāl se māzūr thā.

⁶jab īsā ne use wahāṅ paṛā dekhā aur use mālūm huā ki yih itnī der se is hālat meṅ hai to us ne pūchhā, “kyā tū tandurust honā chāhtā hai?”

⁷us ne jawāb diyā, “ḳhudāwand, yih mushkil hai. merā koī sāthī nahīṅ jo mujhe uṭhā kar pānī meṅ jab use hilāyā jātā hai le jāe. is lie mere wahāṅ pahuṅchne meṅ itnī der lag jātī hai ki koī aur mujh se pahle pānī meṅ utar jātā hai.”

⁸īsā ne kahā, “uṭh, apnā bistar uṭhā kar chal phir!”

⁹wuh ādmī fauran bahāl ho gayā. us ne apnā bistar uṭhāyā aur chalne phirne lagā. yih wāqiā sabat ke din huā.

¹⁰is lie yahūdiyoṅ ne shifāyāb ādmī ko batāyā, “āj sabat kā din hai. āj bistar uṭhānā manā hai.”

¹¹lekin us ne jawāb diyā, “jis ādmī ne mujhe shifā dī us ne mujhe batāyā, ‘apnā bistar uṭhā kar chal phir’.”

¹²unhoṅ ne sawāl kiyā, “wuh kaun hai jis ne tujhe yih kuchh batāyā?”

¹³lekin shifāyāb ādmī ko mālūm na thā, kyūṅki īsā hujūm ke sabab se chupke se wahāṅ se chalā gayā thā.

¹⁴bād meṅ īsā use bait-ul-muqaddas meṅ milā. us ne kahā, “ab tū bahāl ho gayā hai. phir gunāh na karnā, aisā na ho ki terā hāl pahle se bhī badtar ho jāe.”

¹⁵us ādmī ne use chhoṛ kar yahūdiyoṅ ko ittilā dī, “īsā ne mujhe shifā dī.”

¹⁶is par yahūdī us ko satāne lage, kyūṅki us ne us ādmī ko sabat ke din bahāl kiyā thā.

¹⁷lekin īsā ne unheṅ jawāb diyā, “merā bāp āj tak kām kartā āyā hai, aur maiṅ bhī aisā kartā hūṅ.”

¹⁸yih sun kar yahūdī use qatl karne kī mazīd koshish karne lage, kyūṅki us ne na sirf sabat ke din ko mansūḳh qarār diyā thā balki allāh ko apnā bāp kah kar apne āp ko allāh ke barābar ṭhahrāyā thā.

¹⁹īsā ne unheṅ jawāb diyā, “maiṅ tum ko sach batātā hūṅ ki farzand apnī marzī se kuchh nahīṅ kar saktā. wuh sirf wuh kuchh kartā hai jo wuh bāp ko karte deḳhtā hai. jo kuchh bāp kartā hai wuhī farzand bhī kartā hai,

²⁰kyūṅki bāp farzand ko pyār kartā aur use sab kuchh dikhātā hai jo wuh ḳhud kartā hai. hāṅ, wuh farzand ko in se bhī azīm kām dikhāegā. phir tum aur bhī zyādā hairatzadā hoge.

²¹kyūṅki jis tarah bāp murdoṅ ko zindā kartā hai usī tarah farzand bhī jinheṅ chāhtā hai zindā kar detā hai.

²²aur bāp kisī kī bhī adālat nahīṅ kartā balki us ne adālat kā pūrā intizām farzand ke sapurd kar diyā hai

²³tāki sab usī tarah farzand kī izzat kareṅ jis tarah wuh bāp kī izzat karte haiṅ. jo farzand kī izzat nahīṅ kartā wuh bāp kī bhī izzat nahīṅ kartā jis ne use bhejā hai.

²⁴maiṅ tum ko sach batātā hūṅ, jo bhī merī bāt sun kar us par īmān lātā hai jis ne mujhe bhejā hai abadī zindagī us kī hai. use mujrim nahīṅ ṭhahrāyā jāegā balki wuh maut kī girift se nikal kar zindagī meṅ dāḳhil ho gayā hai.

²⁵maiṅ tum ko sach batātā hūṅ ki ek waqt āne wālā hai balki ā chukā hai jab murde allāh ke farzand kī āwāz suneṅge. aur jitne suneṅge wuh zindā ho jāeṅge.

²⁶kyūṅki jis tarah bāp zindagī kā mambā hai usī tarah us ne apne farzand ko zindagī kā mambā banā diyā hai.

²⁷sāth sāth us ne use adālat karne kā iḳhtiyār bhī de diyā hai, kyūṅki wuh ibn-e-ādam hai.

²⁸yih sun kar tājjub na karo kyūṅki ek waqt ā rahā hai jab tamām murde us kī āwāz sun kar

²⁹qabroṅ meṅ se nikal āeṅge. jinhoṅ ne nek kām kiyā wuh jī uṭh kar zindagī pāeṅge jabki jinhoṅ ne burā kām kiyā wuh jī to uṭheṅge lekin un kī adālat kī jāegī.

³⁰maiṅ apnī marzī se kuchh nahīṅ kar saktā balki jo kuchh bāp se suntā hūṅ us ke mutābiq adālat kartā hūṅ. aur merī adālat rāst hai kyūṅki maiṅ apnī marzī karne kī koshish nahīṅ kartā balki usī kī jis ne mujhe bhejā hai.

³¹agar maiṅ ḳhud apne bāre meṅ gawāhī detā to merī gawāhī motabar na hotī.

³²lekin ek aur hai jo mere bāre meṅ gawāhī de rahā hai aur maiṅ jāntā hūṅ ki mere bāre meṅ us kī gawāhī sachchī aur motabar hai.

³³tum ne patā karne ke lie apne logoṅ ko yahyā ke pās bhejā hai aur us ne haqīqat kī tasdīq kī hai.

³⁴beshak mujhe kisī insānī gawāh kī zarūrat nahīṅ hai, lekin maiṅ yih is lie batā rahā hūṅ tāki tum ko najāt mil jāe.

³⁵yahyā ek jaltā huā charāġh thā jo raushnī detā thā, aur kuchh der ke lie tum ne us kī raushnī meṅ ḳhushī manānā pasand kiyā.

³⁶lekin mere pās ek aur gawāh hai jo yahyā kī nisbat zyādā aham hai yānī wuh kām jo bāp ne mujhe mukammal karne ke lie de diyā. yihī kām jo maiṅ kar rahā hūṅ mere bāre meṅ gawāhī detā hai ki bāp ne mujhe bhejā hai.

³⁷is ke ilāwā bāp ne ḳhud jis ne mujhe bhejā hai mere bāre meṅ gawāhī dī hai. afsos, tum ne kabhī us kī āwāz nahīṅ sunī, na us kī shakl-o-sūrat dekhī,

³⁸aur us kā kalām tumhāre andar nahīṅ rahtā, kyūṅki tum us par īmān nahīṅ rakhte jise us ne bhejā hai.

³⁹tum apne sahīfoṅ meṅ ḍhūṅḍte rahte ho kyūṅki samajhte ho ki un se tumheṅ abadī zindagī hāsil hai. lekin yihī mere bāre meṅ gawāhī dete haiṅ!

⁴⁰to bhī tum zindagī pāne ke lie mere pās ānā nahīṅ chāhte.

⁴¹maiṅ insānoṅ se izzat nahīṅ chāhtā,

⁴²lekin maiṅ tum ko jāntā hūṅ ki tum meṅ allāh kī muhabbat nahīṅ.

⁴³agarche maiṅ apne bāp ke nām meṅ āyā hūṅ to bhī tum mujhe qabūl nahīṅ karte. is ke muqābale meṅ agar koī apne nām meṅ āegā to tum use qabūl karoge.

⁴⁴koī ajab nahīṅ ki tum īmān nahīṅ lā sakte. kyūṅki tum ek dūsre se izzat chāhte ho jabki tum wuh izzat pāne kī koshish hī nahīṅ karte jo wāhid ḳhudā se miltī hai.

⁴⁵lekin yih na samjho ki maiṅ bāp ke sāmne tum par ilzām lagāūṅgā. ek aur hai jo tum par ilzām lagā rahā hai yānī mūsā, jis se tum ummīd rakhte ho.

⁴⁶agar tum wāqaī mūsā par īmān rakhte to zarūr mujh par bhī īmān rakhte, kyūṅki us ne mere hī bāre meṅ likhā.

⁴⁷lekin chūṅki tum wuh kuchh nahīṅ mānte jo us ne likhā hai to merī bāteṅ kyūṅkar mān sakte ho!”