Read Roman Urdu Geo āmāl 10 Bible Online

āmāl 10 - Roman Urdu Geo bible

āmāl 10

¹qaisariyā meṅ ek romī afsar [1] rahtā thā jis kā nām kurneliyus thā. wuh us palṭan ke sau faujiyoṅ par muqarrar thā jo itālwī kahlātī thī.

²kurneliyus apne pūre gharāne samet dīndār aur ḳhudātars thā. wuh fayyāzī se ḳhairāt detā aur mutawātir duā meṅ lagā rahtā thā.

³ek din us ne tīn baje dopahar ke waqt royā dekhī. us meṅ us ne sāf taur par allāh kā ek farishtā dekhā jo us ke pās āyā aur kahā, “kurneliyus!”

⁴wuh ghabrā gayā aur use ġhaur se deḳhte hue kahā, “mere āqā, farmāeṅ.” farishte ne kahā, “tumhārī duāoṅ aur ḳhairāt kī qurbānī allāh ke huzūr pahuṅch gaī hai aur manzūr hai.

⁵ab kuchh ādmī yāfā bhej do. wahāṅ ek ādmī banām shamāūn hai jo patras kahlātā hai. use bulā kar le āo.

⁶patras ek chamṛā rangne wāle kā mehmān hai jis kā nām shamāūn hai. us kā ghar samundar ke qarīb wāqe hai.”

⁷jūṅ hī farishtā chalā gayā kurneliyus ne do naukaroṅ aur apne ḳhidmatgār faujiyoṅ meṅ se ek ḳhudātars ādmī ko bulāyā.

⁸sab kuchh sunā kar us ne unheṅ yāfā bhej diyā.

⁹agle din patras dopahar taqrīban bārah baje duā karne ke lie chhat par chaṛh gayā. us waqt kurneliyus ke bheje hue ādmī yāfā shahr ke qarīb pahuṅch gae the.

¹⁰patras ko bhūk lagī aur wuh kuchh khānā chāhtā thā. jab us ke lie khānā tayyār kiyā jā rahā thā to wuh wajd kī hālat meṅ ā gayā.

¹¹us ne dekhā ki āsmān khul gayā hai aur ek chīz zamīn par utar rahī hai, katān kī baṛī chādar jaisī jo apne chār konoṅ se nīche utārī jā rahī hai.

¹²chādar meṅ tamām qism ke jānwar haiṅ: chār pāoṅ rakhne wāle, reṅgne wāle aur parinde.

¹³phir ek āwāz us se muḳhātib huī, “uṭh, patras. kuchh zabah karke khā!”

¹⁴patras ne etirāz kiyā, “hargiz nahīṅ ḳhudāwand, maiṅ ne kabhī bhī harām yā nāpāk khānā nahīṅ khāyā.”

¹⁵lekin yih āwāz dubārā us se hamkalām huī, “jo kuchh allāh ne pāk kar diyā hai use nāpāk qarār na de.”

¹⁶yihī kuchh tīn martabā huā, phir chādar ko achānak āsmān par wāpas uṭhā liyā gayā.

¹⁷patras baṛī uljhan meṅ paṛ gayā. wuh abhī soch rahā thā ki is royā kā kyā matlab hai to kurneliyus ke bheje hue ādmī shamāūn ke ghar kā patā karke us ke geṭ par pahuṅch gae.

¹⁸āwāz de kar unhoṅ ne pūchhā, “kyā shamāūn jo patras kahlātā hai āp ke mehmān haiṅ?”

¹⁹patras abhī royā par ġhaur kar hī rahā thā ki rūh-ul-quds us se hamkalām huā, “shamāūn, tīn mard terī talāsh meṅ haiṅ.

²⁰uṭh aur chhat se utar kar un ke sāth chalā jā. mat jhijaknā, kyūṅki maiṅ hī ne unheṅ tere pās bhejā hai.”

²¹chunāṅche patras un ādmiyoṅ ke pās gayā aur un se kahā, “maiṅ wuhī hūṅ jise āp ḍhūnḍ rahe haiṅ. āp kyūṅ mere pās āe haiṅ?”

²²unhoṅ ne jawāb diyā, “ham sau faujiyoṅ par muqarrar afsar kurneliyus ke ghar se āe haiṅ. wuh insāfparwar aur ḳhudātars ādmī haiṅ. pūrī yahūdī qaum is kī tasdīq kar saktī hai. ek muqaddas farishte ne unheṅ hidāyat dī ki wuh āp ko apne ghar bulā kar āp kā paiġhām suneṅ.”

²³yih sun kar patras unheṅ andar le gayā aur un kī mehmān-nawāzī kī. agle din wuh uṭh kar un ke sāth rawānā huā. yāfā ke kuchh bhāī bhī sāth gae.

²⁴ek din ke bād wuh qaisariyā pahuṅch gayā. kurneliyus un ke intizār meṅ thā. us ne apne rishtedāroṅ aur qarībī dostoṅ ko bhī apne ghar jamā kar rakhā thā.

²⁵jab patras ghar meṅ dāḳhil huā to kurneliyus ne us ke sāmne gir kar use sijdā kiyā.

²⁶lekin patras ne use uṭhā kar kahā, “uṭheṅ. maiṅ bhī insān hī hūṅ.”

²⁷aur us se bāteṅ karte karte wuh andar gayā aur dekhā ki bahut se log jamā ho gae haiṅ.

²⁸us ne un se kahā, “āp jānte haiṅ ki kisī yahūdī ke lie kisī ġhairyahūdī se rifāqat rakhnā yā us ke ghar meṅ jānā manā hai. lekin allāh ne mujhe dikhāyā hai ki maiṅ kisī ko bhī harām yā nāpāk qarār na dūṅ.

²⁹is wajah se jab mujhe bulāyā gayā to maiṅ etirāz kie baġhair chalā āyā. ab mujhe batā dījie ki āp ne mujhe kyūṅ bulāyā hai?”

³⁰kurneliyus ne jawāb diyā, “chār din kī bāt hai ki maiṅ isī waqt dopahar tīn baje duā kar rahā thā. achānak ek ādmī mere sāmne ā khaṛā huā. us ke kapṛe chamak rahe the.

³¹us ne kahā, ‘kurneliyus, allāh ne tumhārī duā sun lī aur tumhārī ḳhairāt kā ḳhayāl kiyā hai.

³²ab kisī ko yāfā bhej kar shamāūn ko bulā lo jo patras kahlātā hai. wuh chamṛā rangne wāle shamāūn kā mehmān hai. shamāūn kā ghar samundar ke qarīb wāqe hai.’

³³yih sunte hī maiṅ ne apne logoṅ ko āp ko bulāne ke lie bhej diyā. achchhā huā ki āp ā gae haiṅ. ab ham sab allāh ke huzūr hāzir haiṅ tāki wuh kuchh suneṅ jo rab ne āp ko hameṅ batāne ko kahā hai.”

³⁴phir patras bol uṭhā, “ab maiṅ samajh gayā hūṅ ki allāh wāqaī jānibdār nahīṅ,

³⁵balki har kisī ko qabūl kartā hai jo us kā ḳhauf māntā aur rāst kām kartā hai.

³⁶āp allāh kī us ḳhushḳhabrī se wāqif haiṅ jo us ne isrāīliyoṅ ko bhejī, yih ḳhushḳhabrī ki īsā masīh ke wasīle se salāmatī āī hai. īsā masīh sab kā ḳhudāwand hai.

³⁷āp ko wuh kuchh mālūm hai jo galīl se shurū ho kar yahūdiyā ke pūre ilāqe meṅ huā yānī us baptisme ke bād jis kī munādī yahyā ne kī.

³⁸aur āp jānte haiṅ ki allāh ne īsā nāsarī ko rūh-ul-quds aur quwwat se masah kiyā aur ki is par us ne jagah jagah jā kar nek kām kiyā aur iblīs ke dabe hue tamām logoṅ ko shifā dī, kyūṅki allāh us ke sāth thā.

³⁹jo kuchh bhī us ne mulk-e-yahūd aur yarūshalam meṅ kiyā, us ke gawāh ham ḳhud haiṅ. go logoṅ ne use lakaṛī par laṭkā kar qatl kar diyā

⁴⁰lekin allāh ne tīsre din use murdoṅ meṅ se zindā kiyā aur use logoṅ par zāhir kiyā.

⁴¹wuh pūrī qaum par to zāhir nahīṅ huā balki ham par jin ko allāh ne pahle se chun liyā thā tāki ham us ke gawāh hoṅ. ham ne us ke jī uṭhne ke bād us ke sāth khāne-pīne kī rifāqat bhī rakhī.

⁴²us waqt us ne hameṅ hukm diyā ki munādī karke qaum ko gawāhī do ki īsā wuhī hai jise allāh ne zindoṅ aur murdoṅ par munsif muqarrar kiyā hai.

⁴³tamām nabī us kī gawāhī dete haiṅ ki jo bhī us par īmān lāe use us ke nām ke wasīle se gunāhoṅ kī muāfī mil jāegī.”

⁴⁴patras abhī yih bāt kar hī rahā thā ki tamām sunane wāloṅ par rūh-ul-quds nāzil huā.

⁴⁵jo yahūdī īmāndār patras ke sāth āe the wuh hakkā-bakkā rah gae ki rūh-ul-quds kī nemat ġhairyahūdiyoṅ par bhī unḍelī gaī hai,

⁴⁶kyūṅki unhoṅ ne dekhā ki wuh ġhairzabāneṅ bol rahe aur allāh kī tamjīd kar rahe haiṅ. tab patras ne kahā,

⁴⁷“ab kaun in ko baptismā lene se rok saktā hai? inheṅ to hamārī tarah rūh-ul-quds hāsil huā hai.”

⁴⁸aur us ne hukm diyā ki unheṅ īsā masīh ke nām se baptismā diyā jāe. is ke bād unhoṅ ne patras se guzārish kī ki kuchh din hamāre pās ṭhahreṅ.