Read Roman Urdu Geo āmāl 11 Bible Online

āmāl 11 - Roman Urdu Geo bible

āmāl 11

¹yih ḳhabar rasūloṅ aur yahūdiyā ke bāqī bhāiyoṅ tak pahuṅchī ki ġhairyahūdiyoṅ ne bhī allāh kā kalām qabūl kiyā hai.

²chunāṅche jab patras yarūshalam wāpas āyā to yahūdī īmāndār us par etirāz karne lage,

³“āp ġhairyahūdiyoṅ ke ghar meṅ gae aur un ke sāth khānā bhī khāyā.”

⁴phir patras ne un ke sāmne tartīb se sab kuchh bayān kiyā jo huā thā.

⁵“maiṅ yāfā shahr meṅ duā kar rahā thā ki wajd kī hālat meṅ ā kar royā dekhī. āsmān se ek chīz zamīn par utar rahī hai, katān kī baṛī chādar jaisī jo apne chāroṅ konoṅ se utārī jā rahī hai. utartī utartī wuh mujh tak pahuṅch gaī.

⁶jab maiṅ ne ġhaur se dekhā to patā chalā ki us meṅ tamām qism ke jānwar haiṅ: chār pāoṅ wāle, reṅgne wāle aur parinde.

⁷phir ek āwāz mujh se muḳhātib huī, ‘patras, uṭh. kuchh zabah karke khā!’

⁸maiṅ ne etirāz kiyā, ‘hargiz nahīṅ, ḳhudāwand, maiṅ ne kabhī bhī harām yā nāpāk khānā nahīṅ khāyā.’

⁹lekin yih āwāz dubārā mujh se hamkalām huī, ‘jo kuchh allāh ne pāk kar diyā hai use nāpāk qarār na de.’

¹⁰tīn martabā aisā huā, phir chādar ko jānwaroṅ samet wāpas āsmān par uṭhā liyā gayā.

¹¹usī waqt tīn ādmī us ghar ke sāmne ruk gae jahāṅ maiṅ ṭhahrā huā thā. unheṅ qaisariyā se mere pās bhejā gayā thā.

¹²rūh-ul-quds ne mujhe batāyā ki maiṅ baġhair jhijke un ke sāth chalā jāūṅ. yih mere chhih bhāī bhī mere sāth gae. ham rawānā ho kar us ādmī ke ghar meṅ dāḳhil hue jis ne mujhe bulāyā thā.

¹³us ne hameṅ batāyā ki ek farishtā ghar meṅ us par zāhir huā thā jis ne use kahā thā, ‘kisī ko yāfā bhej kar shamāūn ko bulā lo jo patras kahlātā hai.

¹⁴us ke pās wuh paiġhām hai jis ke zarī'e tum apne pūre gharāne samet najāt pāoge.’

¹⁵jab maiṅ wahāṅ bolne lagā to rūh-ul-quds un par nāzil huā, bilkul usī tarah jis tarah wuh shurū meṅ ham par huā thā.

¹⁶phir mujhe wuh bāt yād āī jo ḳhudāwand ne kahī thī, ‘yahyā ne tum ko pānī se baptismā diyā, lekin tumheṅ rūh-ul-quds se baptismā diyā jāegā.’

¹⁷allāh ne unheṅ wuhī nemat dī jo us ne hameṅ bhī dī thī jo ḳhudāwand īsā masīh par īmān lāe the. to phir maiṅ kaun thā ki allāh ko roktā?”

¹⁸patras kī yih bāteṅ sun kar yarūshalam ke īmāndār etirāz karne se bāz āe aur allāh kī tamjīd karne lage. unhoṅ ne kahā, “to is kā matlab hai ki allāh ne ġhairyahūdiyoṅ ko bhī taubā karne aur abadī zindagī pāne kā mauqā diyā hai.”

¹⁹jo īmāndār stifanus kī maut ke bād kī īzārasānī se bikhar gae the wuh fenīke, qubrus aur antākiyā tak pahuṅch gae. jahāṅ bhī wuh jāte wahāṅ allāh kā paiġhām sunāte albattā sirf yahūdiyoṅ ko.

²⁰lekin un meṅ se kuren aur qubrus ke kuchh ādmī antākiyā shahr jā kar yūnāniyoṅ ko bhī ḳhudāwand īsā ke bāre meṅ ḳhushḳhabrī sunāne lage.

²¹ḳhudāwand kī qudrat un ke sāth thī, aur bahut se logoṅ ne īmān lā kar ḳhudāwand kī taraf rujū kiyā.

²²is kī ḳhabar yarūshalam kī jamā'at tak pahuṅch gaī to unhoṅ ne barnabās ko antākiyā bhej diyā.

²³jab wuh wahāṅ pahuṅchā aur dekhā ki allāh ke fazl se kyā kuchh huā hai to wuh ḳhush huā. us ne un sab kī hauslā-afzāī kī ki wuh pūrī lagan se ḳhudāwand ke sāth lipṭe raheṅ.

²⁴barnabās nek ādmī thā jo rūh-ul-quds aur īmān se māmūr thā. chunāṅche us waqt bahut se log ḳhudāwand kī jamā'at meṅ shāmil hue.

²⁵is ke bād wuh sāūl kī talāsh meṅ tarsus chalā gayā.

²⁶jab use milā to wuh use antākiyā le āyā. wahāṅ wuh donoṅ ek pūre sāl tak jamā'at meṅ shāmil hote aur bahut se logoṅ ko sikhāte rahe. antākiyā pahlā maqām thā jahāṅ īmāndār masīhī kahlāne lage.

²⁷un dinoṅ kuchh nabī yarūshalam se ā kar antākiyā pahuṅch gae.

²⁸ek kā nām agabus thā. wuh khaṛā huā aur rūh-ul-quds kī mārifat peshgoī kī ki rom kī pūrī mamlakat meṅ saḳht kāl paṛegā. (yih bāt us waqt pūrī huī jab shahanshāh klaudiyus kī hukūmat thī.)

²⁹agabus kī bāt sun kar antākiyā ke shāgirdoṅ ne faislā kiyā ki ham meṅ se har ek apnī mālī gunjāish ke mutābiq kuchh de tāki use yahūdiyā meṅ rahne wāle bhāiyoṅ kī imdād ke lie bhejā jā sake.

³⁰unhoṅ ne apne is hadie ko barnabās aur sāūl ke sapurd karke wahāṅ ke buzurgoṅ ko bhej diyā.