Read Roman Urdu Geo āmāl 16 Bible Online

āmāl 16 - Roman Urdu Geo bible

āmāl 16

¹chalte chalte wuh dirbe pahuṅchā, phir lustrā. wahāṅ ek shāgird banām tīmuthiyus rahtā thā. us kī yahūdī māṅ īmān lāī thī jabki bāp yūnānī thā.

²lustrā aur ikuniyum ke bhāiyoṅ ne us kī achchhī riporṭ dī,

³is lie paulus use safar par apne sāth le jānā chāhtā thā. us ilāqe ke yahūdiyoṅ kā lihāz karke us ne tīmuthiyus kā ḳhatnā karwāyā, kyūṅki sab log is se wāqif the ki us kā bāp yūnānī hai.

⁴phir shahr-ba-shahr jā kar unhoṅ ne maqāmī jamā'atoṅ ko yarūshalam ke rasūloṅ aur buzurgoṅ ke wuh faisle pahuṅchāe jin ke mutābiq zindagī guzārnī thī.

⁵yūṅ jamā'ateṅ īmān meṅ mazbūt huīṅ aur tādād meṅ roz-ba-roz baṛhtī gaīṅ.

⁶rūh-ul-quds ne unheṅ sūbā āsiyā meṅ kalām-e-muqaddas kī munādī karne se rok liyā, is lie wuh farūgiyā aur galatiyā ke ilāqe meṅ se guzare.

⁷mūsiyā ke qarīb ā kar unhoṅ ne shimāl kī taraf sūbā bithuniyā meṅ dāḳhil hone kī koshish kī. lekin īsā ke rūh ne unheṅ wahāṅ bhī jāne na diyā,

⁸is lie wuh mūsiyā meṅ se guzar kar bandargāh troās pahuṅche.

⁹wahāṅ paulus ne rāt ke waqt royā dekhī jis meṅ shimālī yūnān meṅ wāqe sūbā makiduniyā kā ek ādmī khaṛā us se iltimās kar rahā thā, “samundar ko pār karke makiduniyā āeṅ aur hamārī madad kareṅ!”

¹⁰jūṅ hī us ne yih royā dekhī ham makiduniyā jāne kī tayyāriyāṅ karne lage. kyūṅki ham ne royā se yih natījā nikālā ki allāh ne hameṅ us ilāqe ke logoṅ ko ḳhushḳhabrī sunāne ke lie bulāyā hai.

¹¹ham troās meṅ jahāz par sawār ho kar sīdhe jazīrā-e-samutrāke ke lie rawānā hue. phir agle din āge nikal kar nayāpulis pahuṅche.

¹²wahāṅ jahāz se utar kar ham filippī chale gae. jo sūbā makiduniyā ke us zilā kā sadr shahr thā aur romī nauābādī thā. is shahr meṅ ham kuchh din ṭhahre.

¹³sabat ke din ham shahr se nikal kar daryā ke kināre gae. jahāṅ hamārī tawaqqo thī ki yahūdī duā ke lie jamā hoṅge. wahāṅ ham baiṭh kar kuchh ḳhawātīn se bāt karne lage jo ikaṭṭhī huī thīṅ.

¹⁴un meṅ se thuātīrā shahr kī ek aurat thī jis kā nām ludiyā thā. us kā peshā qīmtī arġhawānī rang ke kapṛe kī tijārat thā aur wuh allāh kī parastish karne wālī ġhairyahūdī thī. ḳhudāwand ne us ke dil ko khol diyā, aur us ne paulus kī bātoṅ par tawajjuh dī.

¹⁵us ke aur us ke ghar wāloṅ ke baptismā lene ke bād us ne hameṅ apne ghar meṅ ṭhaharne kī dāwat dī. us ne kahā, “agar āp samajhte haiṅ ki maiṅ wāqaī ḳhudāwand par īmān lāī hūṅ to mere ghar ā kar ṭhahreṅ.” yūṅ us ne hameṅ majbūr kiyā.

¹⁶ek din ham duā kī jagah kī taraf jā rahe the ki hamārī mulāqāt ek launḍī se huī jo ek badrūh ke zarī'e logoṅ kī qismat kā hāl batātī thī. is se wuh apne mālikoṅ ke lie bahut se paise kamātī thī.

¹⁷wuh paulus aur hamāre pīchhe paṛ kar chīḳh chīḳh kar kahne lagī, “yih ādmī allāh t'ālā ke ḳhādim haiṅ jo āp ko najāt kī rāh batāne āe haiṅ.”

¹⁸yih silsilā roz-ba-roz jārī rahā. āḳhirkār paulus tang ā kar muṛā aur badrūh se kahā, “maiṅ tujhe īsā masīh ke nām se hukm detā hūṅ ki laṛkī meṅ se nikal jā!” usī lamhe wuh nikal gaī.

¹⁹us ke mālikoṅ ko mālūm huā ki paise kamāne kī ummīd jātī rahī to wuh paulus aur sīlās ko pakaṛ kar chauk meṅ baiṭhe iqtidār rakhne wāloṅ ke sāmne ghasīṭ le gae.

²⁰unheṅ majisṭreṭoṅ ke sāmne pesh karke wuh chillāne lage, “yih ādmī hamāre shahr meṅ halchal paidā kar rahe haiṅ. yih yahūdī haiṅ

²¹aur aise rasm-o-riwāj kā parchār kar rahe haiṅ jinheṅ qabūl karnā aur adā karnā ham romiyoṅ ke lie jāiz nahīṅ.”

²²hujūm bhī ā milā aur paulus aur sīlās ke ḳhilāf bāteṅ karne lagā. is par majisṭreṭoṅ ne hukm diyā ki un ke kapṛe utāre aur unheṅ lāṭhī se mārā jāe.

²³unhoṅ ne un kī ḳhūb piṭāī karwā kar unheṅ qaidḳhāne meṅ ḍāl diyā aur dāroġhe se kahā ki ehtiyāt se un kī pahrādārī karo.

²⁴chunāṅche us ne unheṅ jel ke sab se andarūnī hisse meṅ le jā kar un ke pāoṅ kāṭh meṅ ḍāl die.

²⁵ab aisā huā ki paulus aur sīlās ādhī rāt ke qarīb duā kar rahe aur allāh kī tamjīd ke gīt gā rahe the aur bāqī qaidī sun rahe the.

²⁶achānak baṛā zalzalā āyā aur qaidḳhāne kī pūrī imārat bunyādoṅ tak hil gaī. fauran tamām darwāze khul gae aur tamām qaidiyoṅ kī zanjīreṅ khul gaīṅ.

²⁷dāroġhā jāg uṭhā. jab us ne dekhā ki jel ke darwāze khule haiṅ to wuh apnī talwār nikāl kar ḳhudkushī karne lagā, kyūṅki aisā lag rahā thā ki qaidī farār ho gae haiṅ.

²⁸lekin paulus chillā uṭhā, “mat kareṅ! apne āp ko nuqsān na pahuṅchāeṅ. ham sab yihīṅ haiṅ.”

²⁹dāroġhe ne charāġh mangwā liyā aur bhāg kar andar āyā. larazte larazte wuh paulus aur sīlās ke sāmne gir gayā.

³⁰phir unheṅ bāhar le jā kar us ne pūchhā, “sāhibo, mujhe najāt pāne ke lie kyā karnā hai?”

³¹unhoṅ ne jawāb diyā, “ḳhudāwand īsā par īmān lāeṅ to āp aur āp ke gharāne ko najāt milegī.”

³²phir unhoṅ ne use aur us ke tamām ghar wāloṅ ko ḳhudāwand kā kalām sunāyā.

³³aur rāt kī usī ghaṛī dāroġhe ne unheṅ le jā kar un ke zaḳhmoṅ ko dhoyā. is ke bād us kā aur us ke sāre ghar wāloṅ kā baptismā huā.

³⁴phir us ne unheṅ apne ghar meṅ lā kar khānā khilāyā. allāh par īmān lāne ke bāis us ne aur us ke tamām ghar wāloṅ ne baṛī ḳhushī manāī.

³⁵jab din chaṛhā to majisṭreṭoṅ ne apne afsaroṅ ko dāroġhe ke pās bhijwā diyā ki wuh paulus aur sīlās ko rihā kare.

³⁶chunāṅche dāroġhe ne paulus ko un kā paiġhām pahuṅchā diyā, “majisṭreṭoṅ ne hukm diyā hai ki āp aur sīlās ko rihā kar diyā jāe. ab nikal kar salāmatī se chale jāeṅ.”

³⁷lekin paulus ne etirāz kiyā. us ne un se kahā, “unhoṅ ne hameṅ awām ke sāmne hī aur adālat meṅ pesh kie baġhair mār kar jel meṅ ḍāl diyā hai hālāṅki ham romī shahrī haiṅ. aur ab wuh hameṅ chupke se nikālnā chāhte haiṅ? hargiz nahīṅ! ab wuh ḳhud āeṅ aur hameṅ bāhar le jāeṅ.”

³⁸afsaroṅ ne majisṭreṭoṅ ko yih ḳhabar pahuṅchāī. jab unheṅ mālūm huā ki paulus aur sīlās romī shahrī haiṅ to wuh ghabrā gae.

³⁹wuh ḳhud unheṅ samjhāne ke lie āe aur jel se bāhar lā kar guzārish kī ki shahr ko chhoṛ deṅ.

⁴⁰chunāṅche paulus aur sīlās jel se nikal āe. lekin pahle wuh ludiyā ke ghar gae jahāṅ wuh bhāiyoṅ se mile aur un kī hauslā-afzāī kī. phir wuh chale gae.