Read Roman Urdu Geo āmāl 17 Bible Online

āmāl 17 - Roman Urdu Geo bible

āmāl 17

¹amfipulis aur apulloniyā se ho kar paulus aur sīlās thissalunīke shahr pahuṅch gae jahāṅ yahūdī ibādatḳhānā thā.

²apnī ādat ke mutābiq paulus us meṅ gayā aur lagātār tīn sabatoṅ ke daurān kalām-e-muqaddas se dalāil de de kar yahūdiyoṅ ko qāil karne kī koshish kartā rahā.

³us ne kalām-e-muqaddas kī tashrīh karke sābit kiyā ki masīh kā dukh uṭhānā aur murdoṅ meṅ se jī uṭhnā lāzim thā. us ne kahā, “jis īsā kī maiṅ ḳhabar de rahā hūṅ, wuhī masīh hai.”

⁴yahūdiyoṅ meṅ se kuchh qāil ho kar paulus aur sīlās se wābastā ho gae. jin meṅ ḳhudātars yūnāniyoṅ kī baṛī tādād aur bārasūḳh ḳhawātīn bhī sharīk thīṅ.

⁵yih dekh kar bāqī yahūdī hasad karne lage. unhoṅ ne galiyoṅ meṅ āwārā phirne wāle kuchh sharīr ādmī ikaṭṭhe karke julūs nikālā aur shahr meṅ halchal machā dī. phir yāson ke ghar par hamlā karke unhoṅ ne paulus aur sīlās ko ḍhūnḍā tāki unheṅ awāmī ijlās ke sāmne pesh kareṅ.

⁶lekin wuh wahāṅ nahīṅ the, is lie wuh yāson aur chand ek aur īmāndār bhāiyoṅ ko shahr ke majisṭreṭoṅ ke sāmne lāe. unhoṅ ne chīḳh kar kahā, “yih log pūrī duniyā meṅ gaṛbaṛ paidā kar rahe haiṅ aur ab yahāṅ bhī ā gae haiṅ.

⁷yāson ne unheṅ apne ghar meṅ ṭhahrāyā hai. yih sab shahanshāh ke ahkām kī ḳhilāfwarzī kar rahe haiṅ, kyūṅki yih kisī aur ko bādshāh mānte haiṅ jis kā nām īsā hai.”

⁸is tarah kī bātoṅ se unhoṅ ne hujūm aur majisṭreṭoṅ meṅ baṛā hangāmā paidā kiyā.

⁹chunāṅche majisṭreṭoṅ ne yāson aur dūsroṅ se zamānat lī aur phir unheṅ chhoṛ diyā.

¹⁰usī rāt bhāiyoṅ ne paulus aur sīlās ko beriyā bhej diyā. wahāṅ pahuṅch kar wuh yahūdī ibādatḳhāne meṅ gae.

¹¹yih log thissalunīke ke yahūdiyoṅ kī nisbat zyādā khule zahan ke the. yih baṛe shauq se paulus aur sīlās kī bāteṅ sunte aur roz-ba-roz kalām-e-muqaddas kī taftīsh karte rahe ki kyā wāqaī aisā hai jaisā hameṅ batāyā jā rahā hai?

¹²natīje meṅ in meṅ se bahut se yahūdī īmān lāe aur sāth sāth bahut sī bārasūḳh yūnānī ḳhawātīn aur mard bhī.

¹³lekin phir thissalunīke ke yahūdiyoṅ ko yih ḳhabar milī ki paulus beriyā meṅ allāh kā kalām sunā rahā hai. wuh wahāṅ bhī pahuṅche aur logoṅ ko uksā kar halchal machā dī.

¹⁴is par bhāiyoṅ ne paulus ko fauran sāhil par bhej diyā, lekin sīlās aur tīmuthiyus beriyā meṅ pīchhe rah gae.

¹⁵jo ādmī paulus ko sāhil tak pahuṅchāne āe the wuh us ke sāth athene tak gae. wahāṅ wuh use chhoṛ kar wāpas chale gae. un ke hāth paulus ne sīlās aur tīmuthiyus ko ḳhabar bhejī ki jitnī jaldī ho sake beriyā ko chhoṛ kar mere pās ā jāeṅ.

¹⁶athene shahr meṅ sīlās aur tīmuthiyus kā intizār karte karte paulus baṛe josh meṅ ā gayā, kyūṅki us ne dekhā ki pūrā shahr butoṅ se bharā huā hai.

¹⁷wuh yahūdī ibādatḳhāne meṅ jā kar yahūdiyoṅ aur ḳhudātars ġhairyahūdiyoṅ se bahs karne lagā. sāth sāth wuh rozānā chauk meṅ bhī jā kar wahāṅ par maujūd logoṅ se guftgū kartā rahā.

¹⁸ipikūrī aur stoikī falsafī [2] bhī us se bahs karne lage. jab paulus ne unheṅ īsā aur us ke jī uṭhne kī ḳhushḳhabrī sunāī to bāz ne pūchhā, “yih bakwāsī in bātoṅ se kyā kahnā chāhtā hai jo is ne idhar udhar se chun kar joṛ dī haiṅ?” dūsroṅ ne kahā, “lagtā hai ki wuh ajnabī dewatāoṅ kī ḳhabar de rahā hai.”

¹⁹wuh use sāth le kar shahr kī majlis-e-shūrā meṅ gae jo ariyopagus nāmī pahāṛī par mun'aqid hotī thī. unhoṅ ne darḳhwāst kī, “kyā hameṅ mālūm ho saktā hai ki āp kaun sī naī tālīm pesh kar rahe haiṅ?

²⁰āp to hameṅ ajīb-o-ġharīb bāteṅ sunā rahe haiṅ. ab ham un kā sahīh matlab jānanā chāhte haiṅ.”

²¹(bāt yih thī ki athene ke tamām bāshinde shahr meṅ rahne wāle pardesiyoṅ samet apnā pūrā waqt is meṅ sarf karte the ki tāzā tāzā ḳhayālāt suneṅ yā sunāeṅ.)

²²paulus majlis meṅ khaṛā huā aur kahā, “athene ke hazarāt, maiṅ deḳhtā hūṅ ki āp har lihāz se bahut mazhabī log haiṅ.

²³kyūṅki jab maiṅ shahr meṅ se guzar rahā thā to un chīzoṅ par ġhaur kiyā jin kī pūjā āp karte haiṅ. chalte chalte maiṅ ne ek aisī qurbāngāh bhī dekhī jis par likhā thā, ‘nāmālūm ḳhudā kī qurbāngāh.’ ab maiṅ āp ko us ḳhudā kī ḳhabar detā hūṅ jis kī pūjā āp karte to haiṅ magar āp use jānte nahīṅ.

²⁴yih wuh ḳhudā hai jis ne duniyā aur us meṅ maujūd har chīz kī taḳhlīq kī. wuh āsmān-o-zamīn kā mālik hai, is lie wuh insānī hāthoṅ ke banāe hue mandiroṅ meṅ sukūnat nahīṅ kartā.

²⁵aur insānī hāth us kī ḳhidmat nahīṅ kar sakte, kyūṅki use koī bhī chīz darkār nahīṅ hotī. is ke bajāe wuhī sab ko zindagī aur sāṅs muhayyā karke un kī tamām zarūriyāt pūrī kartā hai.

²⁶usī ne ek shaḳhs ko ḳhalaq kiyā tāki duniyā kī tamām qaumeṅ us se nikal kar pūrī duniyā meṅ phail jāeṅ. us ne har qaum ke auqāt aur sarhaddeṅ bhī muqarrar kīṅ.

²⁷maqsad yih thā ki wuh ḳhudā ko talāsh kareṅ. ummīd yih thī ki wuh ṭaṭol ṭaṭol kar use pāeṅ, agarche wuh ham meṅ se kisī se dūr nahīṅ hotā.

²⁸kyūṅki us meṅ ham jīte, harkat karte aur wujūd rakhte haiṅ. āp ke apne kuchh shāiroṅ ne bhī farmāyā hai, ‘ham bhī us ke farzand haiṅ.’

²⁹ab chūṅki ham allāh ke farzand haiṅ is lie hamārā us ke bāre meṅ tasawwur yih nahīṅ honā chāhie ki wuh sone, chāṅdī yā patthar kā koī mujassamā ho jo insān kī mahārat aur ḍizāin se banāyā gayā ho.

³⁰māzī meṅ ḳhudā ne is qism kī jahālat ko nazarandāz kiyā, lekin ab wuh har jagah ke logoṅ ko taubā kā hukm detā hai.

³¹kyūṅki us ne ek din muqarrar kiyā hai jab wuh insāf se duniyā kī adālat karegā. aur wuh yih adālat ek shaḳhs kī mārifat karegā jis ko wuh muta'ayyin kar chukā hai aur jis kī tasdīq us ne is se kī hai ki us ne use murdoṅ meṅ se zindā kar diyā hai.”

³²murdoṅ kī qiyāmat kā zikr sun kar bāz ne paulus kā mazāq uṛāyā. lekin bāz ne kahā, “ham kisī aur waqt is ke bāre meṅ āp se mazīd sunanā chāhte haiṅ.”

³³phir paulus majlis se nikal kar chalā gayā.

³⁴kuchh log us se wābastā ho kar īmān le āe. un meṅ se majlis-e-shūrā kā maimbar diyonīsiyus thā aur ek aurat banām damaris. kuchh aur bhī the.