Read Roman Urdu Geo āmāl 19 Bible Online

āmāl 19 - Roman Urdu Geo bible

āmāl 19

¹jab apullos kurinthus meṅ ṭhahrā huā thā to paulus eshiyā-e-kūchak ke andarūnī ilāqe meṅ se safar karte karte sāhilī shahr ifisus meṅ āyā. wahāṅ use kuchh shāgird mile

²jin se us ne pūchhā, “kyā āp ko īmān lāte waqt rūh-ul-quds milā?” unhoṅ ne jawāb diyā, “nahīṅ, ham ne to rūh-ul-quds kā zikr tak nahīṅ sunā.”

³us ne pūchhā, “to āp ko kaun sā baptismā diyā gayā?” unhoṅ ne jawāb diyā, “yahyā kā.”

⁴paulus ne kahā, “yahyā ne baptismā diyā jab logoṅ ne taubā kī. lekin us ne ḳhud unheṅ batāyā, ‘mere bād āne wāle par īmān lāo, yānī īsā par’.”

⁵yih sun kar unhoṅ ne ḳhudāwand īsā ke nām par baptismā liyā.

⁶aur jab paulus ne apne hāth un par rakhe to un par rūh-ul-quds nāzil huā, aur wuh ġhairzabāneṅ bolne aur nabuwwat karne lage.

⁷in ādmiyoṅ kī kul tādād taqrīban bārah thī.

⁸paulus yahūdī ibādatḳhāne meṅ gayā aur tīn mahīne ke daurān yahūdiyoṅ se dilerī se bāt kartā rahā. un ke sāth bahs karke us ne unheṅ allāh kī bādshāhī ke bāre meṅ qāil karne kī koshish kī.

⁹lekin kuchh aṛ gae. wuh allāh ke tābe na hue balki awām ke sāmne hī allāh kī rāh ko burā-bhalā kahne lage. is par paulus ne unheṅ chhoṛ diyā. shāgirdoṅ ko bhī alag karke wuh un ke sāth turannus ke laikchar hāl meṅ jamā huā kartā thā jahāṅ wuh rozānā unheṅ tālīm detā rahā.

¹⁰yih silsilā do sāl tak jārī rahā. yūṅ sūbā āsiyā ke tamām logoṅ ko ḳhudāwand kā kalām sunane kā mauqā milā, ḳhwāh wuh yahūdī the yā yūnānī.

¹¹allāh ne paulus kī mārifat ġhairmāmūlī mojize kie,

¹²yahāṅ tak ki jab rūmāl yā epran us ke badan se lagāne ke bād marīzoṅ par rakhe jāte to un kī bīmāriyāṅ jātī rahtīṅ aur badrūheṅ nikal jātīṅ.

¹³wahāṅ kuchh aise yahūdī bhī the jo jagah jagah jā kar badrūheṅ nikālte the. ab wuh badrūhoṅ ke bandhan meṅ phaṅse logoṅ par ḳhudāwand īsā kā nām istemāl karne kī koshish karke kahne lage, “maiṅ tujhe us īsā ke nām se nikalne kā hukm detā hūṅ jis kī munādī paulus kartā hai.”

¹⁴ek yahūdī rāhnumā imām banām skiwā ke sāt beṭe aisā karte the.

¹⁵lekin ek dafā jab yihī koshish kar rahe the to badrūh ne jawāb diyā, “īsā ko to maiṅ jāntī hūṅ aur paulus ko bhī, lekin tum kaun ho?”

¹⁶phir wuh ādmī jis meṅ badrūh thī un par jhapaṭ kar sab par ġhālib ā gayā. us kā un par itnā saḳht hamlā huā ki wuh nange aur zaḳhmī hālat meṅ bhāg kar us ghar se nikal gae.

¹⁷is wākie kī ḳhabar ifisus ke tamām rahne wāle yahūdiyoṅ aur yūnāniyoṅ meṅ phail gaī. un par ḳhauf tārī huā aur ḳhudāwand īsā ke nām kī tāzīm huī.

¹⁸jo īmān lāe the un meṅ se bahuteroṅ ne ā kar alāniyā apne gunāhoṅ kā iqrār kiyā.

¹⁹jādūgarī karne wāloṅ kī baṛī tādād ne apnī jādūmantar kī kitābeṅ ikaṭṭhī karke awām ke sāmne jalā dīṅ. pūrī kitāboṅ kā hisāb kiyā gayā to un kī kul raqm chāṅdī ke pachās hazār sikke thī.

²⁰yūṅ ḳhudāwand kā kalām zabardast tarīqe se baṛhtā aur zor pakaṛtā gayā.

²¹in wāqiāt ke bād paulus ne makiduniyā aur aḳhayā meṅ se guzar kar yarūshalam jāne kā faislā kiyā. us ne kahā, “is ke bād lāzim hai ki maiṅ rom bhī jāūṅ.”

²²us ne apne do madadgāroṅ tīmuthiyus aur irāstus ko āge makiduniyā bhej diyā jabki wuh ḳhud mazīd kuchh der ke lie sūbā āsiyā meṅ ṭhahrā rahā.

²³taqrīban us waqt allāh kī rāh ek shadīd hangāme kā bāis ho gaī.

²⁴yih yūṅ huā, ifisus meṅ ek chāṅdī kī ashyā banāne wālā rahtā thā jis kā nām demetriyus thā. wuh chāṅdī se artamis dewī ke mandir banwātā thā, aur us ke kām se dastkāroṅ kā kārobār ḳhūb chaltā thā.

²⁵ab us ne is kām se tālluq rakhne wāle dīgar dastkāroṅ ko jamā karke un se kahā, “hazarāt, āp ko mālūm hai ki hamārī daulat is kārobār par munhasir hai.

²⁶āp ne yih bhī dekh aur sun liyā hai ki is ādmī paulus ne na sirf ifisus balki taqrīban pūre sūbā āsiyā meṅ bahut se logoṅ ko bhaṭkā kar qāil kar liyā hai ki hāthoṅ ke bane dewatā haqīqat meṅ dewatā nahīṅ hote.

²⁷na sirf yih ḳhatrā hai ki hamāre kārobār kī badnāmī ho balki yih bhī ki azīm dewī artamis ke mandir kā asar-o-rasūḳh jātā rahegā, ki artamis ḳhud jis kī pūjā sūbā āsiyā aur pūrī duniyā meṅ kī jātī hai apnī azmat kho baiṭhe.”

²⁸yih sun kar wuh taish meṅ ā kar chīḳhne-chillāne lage, “ifisiyoṅ kī artamis dewī azīm hai!”

²⁹pūre shahr meṅ halchal mach gaī. logoṅ ne paulus ke makidunī hamsafar gayus aur aristarḳhus ko pakaṛ liyā aur mil kar tamāshāgāh meṅ dauṛe āe.

³⁰yih dekh kar paulus bhī awām ke is ijlās meṅ jānā chāhtā thā, lekin shāgirdoṅ ne use rok liyā.

³¹isī tarah us ke kuchh dostoṅ ne bhī jo sūbā āsiyā ke afsar the use ḳhabar bhej kar minnat kī ki wuh na jāe.

³²ijlās meṅ baṛī afrā-tafrī thī. kuchh yih chīḳh rahe the, kuchh wuh. zyādātar log jamā hone kī wajah jānte bhī na the.

³³yahūdiyoṅ ne sikandar ko āge kar diyā. sāth sāth hujūm ke kuchh log use hidāyāt dete rahe. us ne hāth se ḳhāmosh ho jāne kā ishārā kiyā tāki wuh ijlās ke sāmne apnā difā kare.

³⁴lekin jab unhoṅ ne jān liyā ki wuh yahūdī hai to wuh taqrīban do ghanṭoṅ tak chillā kar nārā lagāte rahe, “ifisus kī artamis dewī azīm hai!”

³⁵āḳhirkār baldiyā kā chīf saikraṭarī unheṅ ḳhāmosh karāne meṅ kāmyāb huā. phir us ne kahā, “ifisus ke hazarāt, kis ko mālūm nahīṅ ki ifisus azīm artamis dewī ke mandir kā muhāfiz hai! pūrī duniyā jāntī hai ki ham us ke us mujassame ke nigarān haiṅ jo āsmān se gir kar hamāre pās pahuṅch gayā.

³⁶yih haqīqat to nāqābil-e-inkār hai. chunāṅche lāzim hai ki āp chup-chāp raheṅ aur jaldbāzī na kareṅ.

³⁷āp yih ādmī yahāṅ lāe haiṅ hālāṅki na to wuh mandiroṅ ko lūṭne wāle haiṅ, na unhoṅ ne dewī kī behurmatī kī hai.

³⁸agar demetriyus aur us ke sāth wāle dastkāroṅ kā kisī par ilzām hai to is ke lie kachahriyāṅ aur gawarnar hote haiṅ. wahāṅ jā kar wuh ek dūsre se muqaddamā laṛeṅ.

³⁹agar āp mazīd koī muāmalā pesh karnā chāhte haiṅ to use hal karne ke lie qānūnī majlis hotī hai.

⁴⁰ab ham is ḳhatre meṅ haiṅ ki āj ke wāqiāt ke bāis ham par fasād kā ilzām lagāyā jāegā. kyūṅki jab ham se pūchhā jāegā to ham is qism ke betartīb aur nājāiz ijtimā kā koī jawāz pesh nahīṅ kar sakeṅge.”

⁴¹yih kah kar us ne ijlās ko barḳhāst kar diyā.