Read Roman Urdu Geo āmāl 2 Bible Online

āmāl 2 - Roman Urdu Geo bible

āmāl 2

¹phir īd-e-pantikust kā din āyā. sab ek jagah jamā the

²ki achānak āsmān se aisī āwāz āī jaise shadīd āṅdhī chal rahī ho. pūrā makān jis meṅ wuh baiṭhe the is āwāz se gūṅj uṭhā.

³aur unheṅ shole kī laueṅ jaisī nazar āīṅ jo alag alag ho kar un meṅ se har ek par utar kar ṭhahar gaīṅ.

⁴sab rūh-ul-quds se bhar gae aur muḳhtalif ġhairmulkī zabānoṅ meṅ bolne lage, har ek us zabān meṅ jo bolne kī rūh-ul-quds ne use taufīq dī.

⁵us waqt yarūshalam meṅ aise ḳhudātars yahūdī ṭhahre hue the jo āsmān tale kī har qaum meṅ se the.

⁶jab yih āwāz sunāī dī to ek baṛā hujūm jamā huā. sab ghabrā gae kyūṅki har ek ne īmāndāroṅ ko apnī mādarī zabān meṅ bolte sunā.

⁷saḳht hairatzadā ho kar wuh kahne lage, “kyā yih sab galīl ke rahne wāle nahīṅ haiṅ?

⁸to phir yih kis tarah ho saktā hai ki ham meṅ se har ek unheṅ apnī mādarī zabān meṅ bāteṅ karte sun rahā hai

⁹jabki hamāre mamālik yih haiṅ: pārthiyā, mādiyā, ailām, masoputāmiyā, yahūdiyā, kappadukiyā, puntus, āsiyā,

¹⁰farūgiyā, pamfīliyā, misr aur libiyā kā wuh ilāqā jo kuren ke irdgird hai. rom se bhī log maujūd haiṅ.

¹¹yahāṅ yahūdī bhī haiṅ aur ġhairyahūdī naumurīd bhī, krete ke log aur arab ke bāshinde bhī. aur ab ham sab ke sab in ko apnī apnī zabān meṅ allāh ke azīm kāmoṅ kā zikr karte sun rahe haiṅ.”

¹²sab dang rah gae. uljhan meṅ paṛ kar wuh ek dūsre se pūchhne lage, “is kā kyā matlab hai?”

¹³lekin kuchh log un kā mazāq uṛā kar kahne lage, “yih bas naī mai pī kar nashe meṅ dhut ho gae haiṅ.”

¹⁴phir patras bāqī gyārah rasūloṅ samet khaṛā ho kar ūṅchī āwāz se un se muḳhātib huā, “suneṅ, yahūdī bhāiyo aur yarūshalam ke tamām rahne wālo! jān leṅ aur ġhaur se merī bāt sun leṅ!

¹⁵āp kā ḳhayāl hai ki yih log nashe meṅ haiṅ. lekin aisā nahīṅ hai. dekheṅ, abhī to subh ke nau baje kā waqt hai.

¹⁶ab wuh kuchh ho rahā hai jis kī peshgoī yoel nabī ne kī thī,

¹⁷‘allāh farmātā hai ki āḳhirī dinoṅ meṅ maiṅ apne rūh ko tamām insānoṅ par unḍel dūṅgā. tumhāre beṭe-beṭiyāṅ nabuwwat kareṅge, tumhāre naujawān royāeṅ aur tumhāre buzurg ḳhwāb dekheṅge.

¹⁸un dinoṅ meṅ maiṅ apne rūh ko apne ḳhādimoṅ aur ḳhādimāoṅ par bhī unḍel dūṅgā, aur wuh nabuwwat kareṅge.

¹⁹maiṅ ūpar āsmān par mojize dikhāūṅgā aur nīche zamīn par ilāhī nishān zāhir karūṅga, ḳhūn, āg aur dhueṅ ke bādal.

²⁰sūraj tārīk ho jāegā, chāṅd kā rang ḳhūn sā ho jāegā, aur phir rab kā azīm aur jalālī din āegā.

²¹us waqt jo bhī rab kā nām legā najāt pāegā.’

²²isrāīl ke mardo, merī bāt suneṅ! allāh ne āp ke sāmne hī īsā nāsarī kī tasdīq kī, kyūṅki us ne us ke wasīle se āp ke darmiyān ajūbe, mojize aur ilāhī nishān dikhāe. āp ḳhud is bāt se wāqif haiṅ.

²³lekin allāh ko pahle hī ilm thā ki kyā honā hai, kyūṅki us ne ḳhud apnī marzī se muqarrar kiyā thā ki īsā ko dushman ke hawāle kar diyā jāe. chunāṅche āp ne bedīn logoṅ ke zarī'e use salīb par chaṛhwā kar qatl kiyā.

²⁴lekin allāh ne use maut kī aziyatnāk girift se āzād karke zindā kar diyā, kyūṅki mumkin hī nahīṅ thā ki maut use apne qabze meṅ rakhe.

²⁵chunāṅche dāūd ne us ke bāre meṅ kahā, ‘rab har waqt merī āṅkhoṅ ke sāmne rahā. wuh mere dahne hāth rahtā hai tāki maiṅ na ḍagmagāūṅ.

²⁶is lie merā dil shādmān hai, aur merī zabān ḳhushī ke nāre lagātī hai. hāṅ, merā badan purummīd zindagī guzāregā.

²⁷kyūṅki tū merī jān ko pātāl meṅ nahīṅ chhoṛegā, aur na apne muqaddas ko galne saṛne kī naubat tak pahuṅchne degā.

²⁸tū ne mujhe zindagī kī rāhoṅ se āgāh kar diyā hai, aur tū apne huzūr mujhe ḳhushī se sarshār karegā.’

²⁹mere bhāiyo, agar ijāzat ho to maiṅ āp ko dilerī se apne buzurg dāūd ke bāre meṅ kuchh batāūṅ. wuh to faut ho kar dafnāyā gayā aur us kī qabr āj tak hamāre darmiyān maujūd hai.

³⁰lekin wuh nabī thā aur jāntā thā ki allāh ne qasam khā kar mujh se wādā kiyā hai ki wuh merī aulād meṅ se ek ko mere taḳht par biṭhāegā.

³¹mazkūrā āyāt meṅ dāūd mustaqbil meṅ dekh kar masīh ke jī uṭhne kā zikr kar rahā hai, yānī ki na use pātāl meṅ chhoṛā gayā, na us kā badan galne saṛne kī naubat tak pahuṅchā.

³²allāh ne isī īsā ko zindā kar diyā hai aur ham sab is ke gawāh haiṅ.

³³ab use sarfarāz karke ḳhudā ke dahne hāth biṭhāyā gayā aur bāp kī taraf se use mau'ūdā rūh-ul-quds mil gayā hai. isī ko us ne ham par unḍel diyā, jis tarah āp dekh aur sun rahe haiṅ.

³⁴dāūd ḳhud to āsmān par nahīṅ chaṛhā, to bhī us ne farmāyā, ‘rab ne mere rab se kahā, mere dahne hāth baiṭh

³⁵jab tak maiṅ tere dushmanoṅ ko tere pāoṅ kī chaukī na banā dūṅ.’

³⁶chunāṅche pūrā isrāīl yaqīn jāne ki jis īsā ko āp ne maslūb kiyā hai use hī allāh ne ḳhudāwand aur masīh banā diyā hai.”

³⁷patras kī yih bāteṅ sun kar logoṅ ke dil chhid gae. unhoṅ ne patras aur bāqī rasūloṅ se pūchhā, “bhāiyo, phir ham kyā kareṅ?”

³⁸patras ne jawāb diyā, “āp meṅ se har ek taubā karke īsā ke nām par baptismā le tāki āp ke gunāh muāf kar die jāeṅ. phir āp ko rūh-ul-quds kī nemat mil jāegī.

³⁹kyūṅki yih dene kā wādā āp se aur āp ke bachchoṅ se kiyā gayā hai, balki un se bhī jo dūr ke haiṅ, un sab se jinheṅ rab hamārā ḳhudā apne pās bulāegā.”

⁴⁰patras ne mazīd bahut sī bātoṅ se unheṅ nasīhat kī aur samjhāyā ki “is ṭeṛhī nasl se nikal kar najāt pāeṅ.”

⁴¹jinhoṅ ne patras kī bāt qabūl kī un kā baptismā huā. yūṅ us din jamā'at meṅ taqrīban 3,000 afrād kā izāfā huā.

⁴²yih īmāndār rasūloṅ se tālīm pāne, rifāqat rakhne aur rifāqatī khānoṅ aur duāoṅ meṅ sharīk hote rahe.

⁴³sab par ḳhauf chhā gayā aur rasūloṅ kī taraf se bahut se mojize aur ilāhī nishān dikhāe gae.

⁴⁴jo bhī īmān lāte the wuh ek jagah jamā hote the. un kī har chīz mushtarakā hotī thī.

⁴⁵apnī milkiyat aur māl faroḳht karke unhoṅ ne har ek ko us kī zarūrat ke mutābiq diyā.

⁴⁶rozānā wuh yakdilī se bait-ul-muqaddas meṅ jamā hote rahe. sāth sāth wuh masīh kī yād meṅ apne gharoṅ meṅ roṭī toṛte, baṛī ḳhushī aur sādagī se rifāqatī khānā khāte

⁴⁷aur allāh kī tamjīd karte rahe. us waqt wuh tamām logoṅ ke manzūr-e-nazar the. aur ḳhudāwand roz-ba-roz jamā'at meṅ najātyāftā logoṅ kā izāfā kartā rahā.