Read Roman Urdu Geo āmāl 20 Bible Online

āmāl 20 - Roman Urdu Geo bible

āmāl 20

¹jab shahr meṅ afrā-tafrī ḳhatm huī to paulus ne shāgirdoṅ ko bulā kar un kī hauslā-afzāī kī. phir wuh unheṅ ḳhairbād kah kar makiduniyā ke lie rawānā huā.

²wahāṅ pahuṅch kar us ne jagah-ba-jagah jā kar bahut sī bātoṅ se īmāndāroṅ kī hauslā-afzāī kī. yūṅ chalte chalte wuh yūnān pahuṅch gayā

³jahāṅ wuh tīn māh tak ṭhahrā. wuh mulk-e-shām ke lie jahāz par sawār hone wālā thā ki patā chalā ki yahūdiyoṅ ne us ke ḳhilāf sāzish kī hai. is par us ne makiduniyā se ho kar wāpas jāne kā faislā kiyā.

⁴us ke kaī hamsafar the: beriyā se purus kā beṭā sopatrus, thissalunīke se aristarḳhus aur sikundus, dirbe se gayus, tīmuthiyus aur sūbā āsiyā se tuḳhikus aur trufimus.

⁵yih ādmī āge nikal kar troās chale gae jahāṅ unhoṅ ne hamārā intizār kiyā.

⁶beḳhamīrī roṭī kī īd ke bād ham filippī ke qarīb jahāz par sawār hue aur pāṅch din ke bād un ke pās troās pahuṅch gae. wahāṅ ham sāt din rahe.

⁷itwār ko ham ashā-e-rabbānī manāne ke lie jamā hue. paulus logoṅ se bāt karne lagā aur chūṅki wuh agle din rawānā hone wālā thā is lie wuh ādhī rāt tak boltā rahā.

⁸ūpar kī manzil meṅ jis kamre meṅ ham jamā the wahāṅ bahut se charāġh jal rahe the.

⁹ek jawān khiṛkī kī dahlīz par baiṭhā thā. us kā nām yūtiḳhus thā. jūṅ jūṅ paulus kī bāteṅ lambī hotī jā rahī thīṅ us par nīnd ġhālib ātī jā rahī thī. āḳhirkār wuh gahrī nīnd meṅ tīsrī manzil se zamīn par gir gayā. jab logoṅ ne nīche pahuṅch kar use zamīn par se uṭhāyā to wuh jāṅ-ba-haq ho chukā thā.

¹⁰lekin paulus utar kar us par jhuk gayā aur use apne bāzū'oṅ meṅ le liyā. us ne kahā, “mat ghabrāeṅ, wuh zindā hai.”

¹¹phir wuh wāpas ūpar ā gayā, ashā-e-rabbānī manāī aur khānā khāyā. us ne apnī bāteṅ pau phaṭne tak jārī rakhīṅ, phir rawānā huā.

¹²aur unhoṅ ne jawān ko zindā hālat meṅ wahāṅ se le kar bahut tasallī pāī.

¹³ham āge nikal kar assus ke lie jahāz par sawār hue. ḳhud paulus ne intizām karwāyā thā ki wuh paidal jā kar assus meṅ hamāre jahāz par āegā.

¹⁴wahāṅ wuh ham se milā aur ham use jahāz par lā kar matulene pahuṅche.

¹⁵agle din ham ḳhiyus ke jazīre se guzare. us se agle din ham sāmus ke jazīre ke qarīb āe. is ke bād ke din ham mīletus pahuṅch gae.

¹⁶paulus pahle se faislā kar chukā thā ki maiṅ ifisus meṅ nahīṅ ṭhahrūṅga balki āge niklūṅgā, kyūṅki wuh jaldī meṅ thā. wuh jahāṅ tak mumkin thā pantikust kī īd se pahle pahle yarūshalam pahuṅchnā chāhtā thā.

¹⁷mīletus se paulus ne ifisus kī jamā'at ke buzurgoṅ ko bulā liyā.

¹⁸jab wuh pahuṅche to us ne un se kahā, “āp jānte haiṅ ki maiṅ sūbā āsiyā meṅ pahlā qadam uṭhāne se le kar pūrā waqt āp ke sāth kis tarah rahā.

¹⁹maiṅ ne baṛī inkisārī se ḳhudāwand kī ḳhidmat kī hai. mujhe bahut āṅsū bahāne paṛe aur yahūdiyoṅ kī sāzishoṅ se mujh par bahut āzmāisheṅ āīṅ.

²⁰maiṅ ne āp ke fāide kī koī bhī bāt āp se chhupāe na rakhī balki āp ko alāniyā aur ghar ghar jā kar tālīm detā rahā.

²¹maiṅ ne yahūdiyoṅ ko yūnāniyoṅ samet gawāhī dī ki unheṅ taubā karke allāh kī taraf rujū karne aur hamāre ḳhudāwand īsā par īmān lāne kī zarūrat hai.

²²aur ab maiṅ rūh-ul-quds se bandhā huā yarūshalam jā rahā hūṅ. maiṅ nahīṅ jāntā ki mere sāth kyā kuchh hogā,

²³lekin itnā mujhe mālūm hai ki rūh-ul-quds mujhe shahr-ba-shahr is bāt se āgāh kar rahā hai ki mujhe qaid aur musībatoṅ kā sāmnā karnā paṛegā.

²⁴ḳhair, maiṅ apnī zindagī ko kisī tarah bhī aham nahīṅ samajhtā. aham bāt sirf yih hai ki maiṅ apnā wuh mishan aur zimmādārī pūrī karūṅ jo ḳhudāwand īsā ne mere sapurd kī hai. aur wuh zimmādārī yih hai ki maiṅ logoṅ ko gawāhī de kar yih ḳhushḳhabrī sunāūṅ ki allāh ne apne fazl se un ke lie kyā kuchh kiyā hai.

²⁵aur ab maiṅ jāntā hūṅ ki āp sab jinheṅ maiṅ ne allāh kī bādshāhī kā paiġhām sunā diyā hai mujhe is ke bād kabhī nahīṅ dekheṅge.

²⁶is lie maiṅ āj hī āp ko batātā hūṅ ki agar āp meṅ se koī bhī halāk ho jāe to maiṅ bequsūr hūṅ,

²⁷kyūṅki maiṅ āp ko allāh kī pūrī marzī batāne se na jhijkā.

²⁸chunāṅche ḳhabardār rah kar apnā aur us pūre galle kā ḳhayāl rakhnā jis par rūh-ul-quds ne āp ko muqarrar kiyā hai. nigarānoṅ aur charwāhoṅ kī haisiyat se allāh kī jamā'at kī ḳhidmat kareṅ, us jamā'at kī jise us ne apne hī farzand ke ḳhūn se hāsil kiyā hai.

²⁹mujhe mālūm hai ki mere jāne ke bād wahshī bheṛie āp meṅ ghus āeṅge jo galle ko nahīṅ chhoṛeṅge.

³⁰āp ke darmiyān se bhī ādmī uṭh kar sachchāī ko toṛ-maroṛ kar bayān kareṅge tāki shāgirdoṅ ko apne pīchhe lagā leṅ.

³¹is lie jāgte raheṅ! yih bāt zahan meṅ rakheṅ ki maiṅ tīn sāl ke daurān din rāt har ek ko samjhāne se bāz na āyā. mere āṅsū'oṅ ko yād rakheṅ jo maiṅ ne āp ke lie bahāe haiṅ.

³²aur ab maiṅ āp ko allāh aur us ke fazl ke kalām ke sapurd kartā hūṅ. yihī kalām āp kī tāmīr karke āp ko wuh mīrās muhayyā karne ke qābil hai jo allāh tamām muqaddas kie gae logoṅ ko detā hai.

³³maiṅ ne kisī ke bhī sone, chāṅdī yā kapṛoṅ kā lālach na kiyā.

³⁴āp ḳhud jānte haiṅ ki maiṅ ne apne in hāthoṅ se kām karke na sirf apnī balki apne sāthiyoṅ kī zarūriyāt bhī pūrī kīṅ.

³⁵apne har kām meṅ maiṅ āp ko dikhātā rahā ki lāzim hai ki ham is qism kī mehnat karke kamzoroṅ kī madad kareṅ. kyūṅki hamāre sāmne ḳhudāwand īsā ke yih alfāz hone chāhieṅ ki denā lene se mubārak hai.”

³⁶yih sab kuchh kah kar paulus ne ghuṭne ṭek kar un sab ke sāth duā kī.

³⁷sab ḳhūb roe aur us ko gale lagā lagā kar bose die.

³⁸unheṅ ḳhāskar paulus kī is bāt se taqlīf huī ki ‘āp is ke bād mujhe kabhī nahīṅ dekheṅge.’ phir wuh us ke sāth jahāz tak gae.